Isaya 2
2
Mulamu we cibitilila
(Mik 4:1-3)
1Azi zo nghani zono Mulungu yamulonjela Isaya u mwana wa Amozi, za kuli Yuda na Yelusalemi.
2Mu vilo vyono vikuza litunda lyono lizenjigwe
Nyumba yo Mulungu,
lyolosikamya mucanyha ye matunda
lyolokwinulwa kuciza vigongo vyose,
ne makungugo gose golokuza kuli lyene,
3nawo wanhu wolowa kutya,
“Alenyi cibite kwi'tunda ku Nyumba yo Mulungu,
ku Nyumba yo Mulungu we Waisilayeli.
Mwene nayo kocijiza zono yakuhila ase cizitume.
Nase cojendela mu zinzila zakwe zono kohagula mwene.
Hambi wulajilize wo Muwaha Mulungu,
nha wulawaga ku Yelusalemi
kalongaga ne wanhu wakwe ku wulawa ku Sayuni.”
4Kololamula zo wiwanganile we makungugo mawaha.
Nawo wolotyana mimaje yawo yiwe masili,
ne migoha yawo yiwe mimaje yo kududulila.
Ne makungugo hamba si golokwihoma yaye,
hamba kwiwikaniza so wihomi kanyhi.
5Holeka anye nyo wana wa Yakobo,
kenhenyi cijendele mu wuzelu wono Muwaha Mulungu yakucipela.
Widunhumuzi wose wolokogomezwa
6Gwe go Mulungu, hongo wakondya kuwaleka wanhu wako du,
i wana wana Yakobo!
Vyono yisi yawo luno,
yakondya kumema myoto yono yilawile kucilima,
hamonga no wutowa visangu nhe Wafilisiti.
Wanhu wako watyatya myoto ye cijenzi.
7Ne yisi yawo kumbe ho yimemile fweza na zahabu,
ne viwutwa vyawo si vimalikaga yaye.
Ne yisi yawo yimemile fwalasi,
ne matuka gawo go wulugu menji muno hamba si gakuwala yaye.
8Ninga kanyhi yisi yawo yimemile vihwani vye milungu,
nawo wakuvihemba vinhu vyono wenozeza weneco kwe miwoko yawo.
9Ninga 'gwe walekaje!
Hambi wose nha wolonyetwa, no kukozwa cevu.
Holeka go Muwaha Mulungu, wulece kuwanenela!
10Ninga lizuwa lyolokuza,
lono wolowa kwinjila mu mapango,
na mu mapalika ge mabwe mawaha ga mu matunda,
wanji wolowa kuhimba mina wenjile,
ho weponye ne likuwo lyo Muwaha Mulungu,
wakujela kwihundika ha vilungo vyakwe no lukumyo lwakwe!
11Kanyhi lizuwa likuza,
lono wiwoni wo munhu wolomalika,
no widunhumuzi wo munhu wolokongomezwa.
No Muwaha Mulungu du, yo kolopegwa lukumyo yali wene.
12Na mwizuwa lilyo Muwaha Mulungu u Mudaha vyose,
u Mulngu we Mihanga,
kolowanyetya wose we vilungo,
na wose i wewoni, hamonga ne wevuni wose.
13Koloyibenanjiza ne mibici yose mitali ye mihagata yono yili ku Lebanoni,
sunga ne mibici yose ye minghola, yono yili mu yisi ya Bashani.
14Ne matunda gose matali, ne vigongo vyose,
mwene kolo gakumulanga hawe wuhihi,
15hamonga ne minala yose mitali ne magomawakali gayo.
16Kolozidodomeza mu malenga zingalawa zimbaha kanyhi swanu.
17No wiwoni wo munhu,
baho langa ho wulamalicila,
no widunhumuzi nawo,
baho ho wolokogomezezwa lukulu.
18Avi navyo i vihwani, nhondo ho vyolokwajililila lukulu.
No Muwaha Mulungu du, u Mudaha vyose,
yo kolopegwa lukumyo yali wene.
19Wanhu wolotiza,
wawe kwinjila mu mapango na mu mabwe mawaha ga mu matunda,
na wanji wolohimba mina hasi,
wenjile ho weponye ne likuwo lyo Muwaha Mulungu,
wakujela kwihundika ha vilungo vyakwe no lukumyo lwakwe,
lono mwene yeza kuza kuyisinjisa yinze.
20Ne lizuwa lilyo lilawa kuza,
i wanhu wologagumilila mafuto ne mabudibudi,
vihwani vyawo vye zahabu na vye zifweza,
vyono wali wenozeze, ho wavihembe.
21No Muwaha Mulungu kolo yakuza,
kuloyicicimya yinze, i wanhu wolotiza,
wawe kwinjila mu mapango na mu mapalika ge mabwe mawaha ga mu matunda,
na wanji wolowa kuhimba mina hasi wenjile,
ho weponye ne likuwo lyo Muwaha Mulungu,
wakujela kwihundika ha vilungo vyakwe,
no lukumyo lwakwe.
22Mulecele lukulu kumwitumbila munhu mono wumi wakwe wudumaga nha wehele.
Hambi nha si yakwiliye cinji?
Currently Selected:
Isaya 2: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.