CACAH JIWA 1
1
Cacah jiwa sane pangawit ring Israel
1Ring tanggal apisan sasih sane kaping kalih ring taun sane kaping kalih, sasampun bangsa Israel makaon saking panegara Mesir, Ida Sang Hyang Widi Wasa raris masabda ring Dane Musa, ring Kemah Linggih Ida Sang Hyang Widi Wasa, ring tegal melakang Sinaine, sapuniki: 2“Kita muah I Harun patut nyacah jiwan bangsa Israele, manut palingsehan muah kulawargannyane suang-suang. Daptarangja sakancan anake muani-muani, 3ane matuuh duang dasa taun wiadin kelihan teken ento, ane pantes dadi prajurit. 4Uli sabilang suku kita patut ngalih pamimpin aukud buat nulungin kita.” 5-16Kenginan, puniki anak lanang-lanang sane dados pamimpin ring pantaran suku-sukunnyane, sane kapilih saking pantaran bangsane punika, buat ngamargiang pakaryane punika.
| SUKU | PAMIMPIN |
|---|---|
| Ruben | Elisur okan Dane Sedeur |
| Simeon | Selumiel okan Dane Surisadai |
| Yehuda | Nahason okan Dane Aminadab |
| Isakar | Netaneel okan Dane Suar |
| Sebulon | Eliab okan Dane Helon |
| Epraim | Elisama okan Dane Amihud |
| Manase | Gamaliel okan Dane Pedasur |
| Benyamin | Abidan okan Dane Gideoni |
| Dan | Ahieser okan Dane Amisadai |
| Aser | Pagiel okan Dane Okran |
| Gad | Eliasap okan Dane Rehuel |
| Naptali | Ahira okan Dane Enan |
17-19Dane Musa miwah Dane Harun kasarengin anake sareng roras punika maumang pasamuane ring tanggal apisan, sasih sane kaping kalih, tumuli naptarang rakyate makasami manut palingsehan miwah kulawargannyane suang-suang. Pesengan sakancan anake lanang sane mayusa kalih dasa taun wiadin langkungan, makasami kacatet miwah ketang, satinut ring pituduh Ida Sang Hyang Widi Wasa. Dane Musa naptarang rakyate punika ring tegal melakang Sinaine. 20-46Anake lanang-lanang sane mayusa kalih dasa taun, wiadin sane langkungan, sane dados prajurit, kadaptarang wastannyane manut palingsehan miwah kulawargannyane, ngawit saking suku Ruben, okan Dane Yakub sane pinih duur. Gebogannyane sakadi sinurat ring sor puniki:
| Suku Ruben | 46.500 |
| Suku Simeon | 59.300 |
| Suku Gad | 45.650 |
| Suku Yehuda | 74.600 |
| Suku Isakar | 54.400 |
| Suku Sebulon | 57.400 |
| Suku Epraim | 40.500 |
| Suku Manase | 32.200 |
| Suku Benyamin | 35.400 |
| Suku Dan | 62.700 |
| Suku Aser | 41.500 |
| Suku Naptali | 53.400 |
| Gebogannyane makasami wenten | 603.550 |
47Wong Lewine nenten kadaptarang sareng-sareng ring suku-suku sane lianan, 48santukan Ida Sang Hyang Widi Wasa sampun masabda ring Dane Musa, asapuniki: 49“Yening kita nyacah jiwan anake ane pantes dadi prajurit, suku Lewine eda milu peteka. 50Nanging, tundenja suku Lewine ento ngenterang Kemah Linggih Ulune muah sakancan prabotnyane. Ia patut negen Kemahe muah prabotne ento, tur ngancangin di tengah Kemahe muah ngwangun kemahnyane di ilehan Kemah Linggih Ulune ento. 51Yening kita makisid, suku Lewine ento ane patut ngembus Kemah Sucine, tur nyujukang buin di tongos makemahe ane anyar. Sajabaning wong Lewi, nyenja ane bani maekin Kemah Sucine ento patut kamatiang. 52Wong Israele ane lenan, patut nyujukang kemahnyane manut klompoknyane suang-suang. Makejang pada nongos sig klompoknyane, disor panji-panjinnyane suang-suang. 53Nanging suku Lewine patut nyujukang kemahnyane ngilehin Kemah Sucine ento, buat nyaga Kemahe ento, apang tusing ada anak ane maekin Kemah Sucine, ane ngranayang Ulun duka, tur ngukum pasamuan Israele.” 54Kadi asapunika bangsa Israele nglaksanayang sapatitah Ida Sang Hyang Widi Wasa, sane sampun sabdayang Ida ring Dane Musa.
Currently Selected:
CACAH JIWA 1: BAN
Highlight
Share
Copy
Want to have your highlights saved across all your devices? Sign up or sign in
Today's Bali Bible “Cakepan Suci” © Indonesian Bible Society, 1990.