Tobit 1
1
Iñusaj k'iñ Tobit
1Jk'aba' jiñäch Tobit, iyalobil Tobiel, wäle mik kaj tsiktesañ kñusak'iñ. Jiñi kmajchilob lok'emo'bä ti' ip'olbal Neftalí. Iliyob jiño'bäch kñojte'elob: Jahseel yik'ot Ragüel, Rafael, Gabael, Aduel, Ananiel yik'ot Tobiel.
2Joñoñ lok'emoñ ti jump'ejl tejklum ik'aba' Tisbé, ya' ti chañ-elal Galilea. Ti' ichañ-elal ili tejklum ya'añ Quedes icha'añ Neftalí; Sefat añ ti' iyiñtälel, yik'ot ti' it'ejl iyiñtälel, ya'añ Jasor. Ixku che' ti k'iñ che' woli ti yumäñtel jiñi yumäl Salmanasar ya' ti Asiria, tsa' chujkiyoñ majlel ti kächol yik'ot tsa' ipäyäyoñob majlel k'älä Nínive.
3Joñoñ tsa' kcha'le xämbal ti' bijlel isujmlel yik'ot ti' tojel k'äläl che' bakibä k'iñ aloboñto. Ti' pejtelel k'iñ mij koltañ jiñi kpi'älob, yik'ot tsa' kolta ti ka'bäl wiñikob ya' ti ktejklum che' tsa' käjchiyoñ lojoñ majlel k'älä Nínive, iyumäñtel Asiria.
4Che' ch'itoñoñto che' ya' to añoñ ti' Israel ya' ti klumal, pejtelel jiñi kpi'älob lok'eñbä ti' p'olbal Neftalí tsi' täts'äyob lok'el ibä ti' tojlel ipi'älob jiñi David yik'ot tsa' ikäyäyob majlel ya' ti Jerusalén. Jiñi Lak Ch'ujutat tsi' iyajka ili tejklum ti' tojlel pejtelel yañtakbä tejklumtak ya' ti Israel cha'añ ya'i mi' pulob jiñi majtañäl. Jiñ cha'añ, ya' ti Jerusalén tsa' wachokoñti jiñi Ch'ujulbä ajñibäl, jiñi tsa' ochi ti' tojlel Lak Yum cha'añ ya' mi ichumtäl ti' pejtelel k'iñ.
5Che' jiñi, pejtelel jiñi kpi'älob temel yik'ot kmajchilob, mach ya'ix mi' majlelob ti Jerusalén, woliyobix imajlelob ti tejklum Dan, ya' ti t'ejltak joktäl icha'añ Galilea, cha'añ mi' ipulbeñob imajtañäl jiñi yejtal wakax tsa'bä imele jiñi Jeroboam, yumälbä ti Israel, tsa'bä iyäk'ä ti melol ya'i.
6Che'äch bajche' mi' iyäl xik'ojel, pejtelel israelitabä mejl ti majlel k'älä Jerusalén yik'ot mi icha'leñ k'iñijel albilbä icha'añ Lak Yum, ixku che' jiñitakbä k'iñ, joñoñ jach tsa' kmele che' bajche' jiñi. Mik ch'äm majlel ñaxañtakbä iwut kpäk'äb, jiñi kojaxtobä iyaltak kälak' yik'ot ja'el tsa' majli käk' jiñi tsutseltak ktäñäme' kojaxtobä tsa'bä ktsepbe. 7Ti' pejtelel ili kchu'bä añ woli käk'beñob jiñi motomajob. Che' jiñi tsa' käk'eyob ti' tojlel jiñi motomajob iyalobilo'bä Aarón ya' ti' puläñtib majtañäl. Che' ja'el tsa' käk'eyob ti' tojlel jiñi levitajob wolibä imelob iye'tel ya' ti Jerusalén, yik'ot lujump'ejl ijol kwakax, yik'ot trigo, yik'ot iya'lel ts'usub yik'ot jiñi olivo lew. Jiñi iwuttak kpäk'äbäl che' mik kpuk bajche' ili: Juñt'ox mij käk'eñob jiñi iyaj e'telob icha'añ motomajob woliyo'bä ti e'tel ti' tojlel Lak Yum ya' ti Ch'ujulbä iyajñib ti Jerusalén; junt'ox, jiñi mu'bä ktempañ ti wäkp'ej ja'b, mi jelk'extañ ti tak'iñ, jiñäch mu'bä jk'äñ cha'añ mik kch'ujutesañ Lak Yum ya' ti Jerusalén. 8Ti uxp'ejl ja'b mik kpuk jiñi ojlil ti' tojlel jiñi me'ba' alälob, me'ba' x-ixikob yik'ot jiñi ñajtbä tilemob tsa'bä ich'ujbiyob lak kñopbal yik'ot woliyo'bä ti chumtäl ila ti lak yumäñtel. Ili ikolobal mik temel k'ux lojoñ, che'äch bajche' mi' iyäl ixik'ojel Moisés. Che'äch tsa' ikäñtesayoñ jiñi Débora, jiñi chuchub iña' jiñi ktat. Ti jiñbä k'iñ chämeñix jiñi ktat Ananiel che' jiñi tsa' ikäyäyoñ ti me'ba'.
9Che' añix ka'bilel tsa' ñujpuñiyoñ kik'ot xch'ok ik'aba' Ana, juñtikil x-ixik lok'eñbä ti' p'olbal kñojte'elob. Ti' tojlel tsa' yila pañämil kalobil, tsa' kotsäbe ik'aba' Tobías.
10Che' ñumeñix ka'bäl k'iñ, jiñi asiriojob tsa' ichokoyoñob lok'el ya' tik ktejklum yik'ot tsi' ikächäyoñob majlel k'älä Nínive, ti Asiria. Che' tsa' k'otiyoñ tsa' kilayob cha'añ pejtelel jiñi israelitajob, temel yik'ot jiñi kerañob, woli ik'uxob jiñi we'el tik'bilbä icha'añ xik'ojel. 11Ixku joñoñ tsa' kchäñ käñta kbä cha'añ ma'añik mik k'ux, ya'i ma'añik tsa' ktsäkle wolibä imelob.
12-14Kome joñoñ tsa' kchäñ xuk'chokoñ kpusik'al ti' itojlel Lak Yum, jiñi tsi' ik'exta ipusik'al jiñi yumäl Salmanasar cha'añ mi' k'eloñ ti uts'at. Che' jiñi, jiñi yumäl tsa' iwa'chokoyoñ ti' x-e'tel cha'añ mi' k'el pejtelel chuki mi' imäñ. Jiñ cha'añ tsa' kchäñ majliyoñ ya' ti kolem tejklum ik'aba' Media. Tsa' kcha'le e'tel bajche' ili jiñto tsa' chämi jiñi yumäl. Ti jiñtakbä kxämbal tsa' kloto kälel ya' ti' iyotot Gabael lujump'ejl iwuklujunk'al (330) iyalel jiñi säklemañbä tak'iñ. Jiñi Gabael jiñäch iyerañ jiñi Gabrí, ya' woli ti chumtäl ti jump'ejl tejklum ya' ti Media ik'aba' Ragües.
15-17Che' wolito ti yumäñtel jiñi Salmanasar ka'bäl tsa' käk'eyob imajtañ ti' tojlelob jiñi israelitajob: Tsa' käk'eyob waj jiñi año'bä iwi'ñal, yik'ot ipislel jiñi pits'ilo'bä, yik'ot tsa' kch'ujña mukuyob jiñi woliyo'bä ti tsänsäñtel yik'ot woliyo'bä ti chojkel lok'el bajche' itsukulel pañämil ya' ti ipat its'ajkil Nínive.
Che' tsa' chämi jiñi Salmanasar jiñi iyalobil ik'aba' Senaquerib tsa' ochi ti yumäl. Che' jiñi, tsa' ñujp'itak pejtelel bijtak, ya'i ma'añik tsa' chäñ mejliyoñ ti majlel ya' ti Media.
18Che'bä jiñi yumäl Senaquerib tsa' k'oti ya' ti Judea, tsa' ip'aja jiñi Lak Yum. Jiñ cha'añ Lak Yum tsi iyäk'ä itoj imul, che' jiñi; jiñi yumäl tsa' puts'i lok'el majlel ya' ti Judea. Che' tsa' k'oti ya' ti Nínive, kome weñ mich' ipusik'al tsa' kaji imel ijoñtolil yik'ot tsi' itsäñsa ka'bäl israelitajob. Awilañ, joñoñ ma'añik tsa' kmulañ k'el bajche' jiñi sajtemo'bixbä ya' chokbil mi' ikälelob, tsa' muku majliyoñ yik'ot tsa' klotoyob cha'añ mik ch'ujul mukob. Che'bä jiñi yumäl mi' imajlel isajkañob, ma'añix chuki mi' itaj. 19Che' jiñi juñtikil ch'oyolbä ti Nínive tsa' majli ijop'e' kmul cha'añ joñoñ tsa' kmukuyob jiñi xchämelob. Jiñ cha'añ tsa' kaji kmujkuñ kbä, yik'ot che' tsa' ku'bi che' woli isajkañoñob cha'añ yom itsäñsañoñob, tsa' kajiyoñ ti bäk'eñ ya'i tsa' puts'iyoñ. 20Ti' pejtelel kchu'bä añ kcha'añ tsa' laj chilbeñtiyoñ, yik'ot cha'añ mi' iyäk'eñob ti tojlel jiñi yumäl. Kojach machbä añik tsa' ichilbeyoñob jiñäch kijñam Ana yik'ot kalobil Tobías.
21-22Ti wi'il che' ñumeñix cha'k'al k'iñ, jiñi Senaquerib tsa' tsänsäñti ti' itojlel cha'tikilbä iyalobilob, jiñob tsa' puts'iyob majlel ya' ti witstak ti Ararat. Jiñi iyalobil ik'aba' Esarhadón tsi' ich'ämbe iye'tel ti yumäñtel, ya'i tsa' iwa'choko jiñi kichak' Ajicar iyalobil jkerañ Anael, cha'añ mi ichäñ mel iye'tel ya' ti yumäñtel bajche' xkäñta tak'iñ. Jiñi Ajicar tsi' ipejka jiñi yumäl Esarhadón cha'añ mi' icha' yäk'oñ ochel ya' ti Nínive, ya'i jiñi yumäl tsa'äch ich'ujbi.
Currently Selected:
Tobit 1: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM