Eclesiástico 17
17
Lak Yum tsi' mele wiñik
1Lak Ch'ujutat tsi' imele jiñi wiñik ti lum,
jiñ cha'añ yä'äch ti lum mi' cha' iyäk' sujtel.
2Tsikbiljach jayp'ejl k'iñ mi iyajñel ti pañämil,
yik'ot tsi' iyäk'e ip'ätälel cha'añ mi' imel iyumäñtel
ti itojlel pejtelel chukitak añ.
3Lajal tsi' mele che' bajche' iyejtal,
yik'ot tsi' iyäk'e ip'ätälel lajalbä che' bajche' icha'añ.
4Che'äch tsa' imele ja'el cha'añ mi' bäk'ñäñtel
ti' pejtelel yañtakbä kuxultakbä,
yik'ot tsi' iyäk'e ip'ätälel cha'añ mi' imel iyumäñtel
ti' itojlel bälte'el yik'ot muttak.
5-6Lak Ch'ujutat tsi' iyäk'e jiñi wiñik x-ixik
iwut cha'añ mi' k'el, ichikiñ cha'añ mi' iyu'biñ.
yik'ot iña'täbal cha'añ mi' ch'ämbeñob isujm.
7Tsi' iyäk'e jiñi wiñik x-ixik ich'ejlel iña'täbal
cha'añ mi' mejlel iyajkañob
chuki uts'at yik'ot chuki joñtol.
8Tsi' ijambeyob ipusik'al cha'añ mi' ich'ujutesañob Lak Yum,
yik'ot tsi' ipäsbeyob iñuklel iye'tel imelbal,
9cha'añ che' ti wi'il mi' itsiktesabeñob jiñi yaño'bä,
10yik'ot mi' ich'ujutesäbeñob jiñi ch'ujulbä ik'aba'.
Xuk'ulbä it'añ Lak Yum yik'ot tejklum Israel
11Lak Yum tsi' iyäk'eyob lak ñojte'elob iña'täbal,
yik'ot tsi' ikäybeyob jump'ejl xik'ojel mu'bä iyäk' kuxtälel.
12Tsi' xuk'choko it'añ machbä añik ijilibal yik'otob,
yik'ot tsi' ipäsbeyob itoj-esayatak.
13Jiñob tsi' ik'eleyob ti iwut ip'ätälel Lak Yum,
yik'ot tsi' iyu'bibeyob k'ambä it'añ.
14Lak Yum tsi' isu'beyob cha'añ ma'añik mi' cha'leñob chuki joñtol,
yik'ot cha'añ mi' chäñ melob chuki uts'at ti' itojlel ipi'älob.
Tojäch jiñi Lak Yum yik'ot ñuk ip'uñtaya
15Lak Yum mi ik'el pejtelel chuki mi' imel wiñikob x-ixikob,
ma'añik chuki mukbilbä ti iwut.
[16K'äläl che' ch'itoñto joñtoljax imelbal jiñi wiñik.
Mach mejlik itoj-esañ joñtolbä ipusik'al.]
17Che'bä jiñi Lak Yum tsi' puku yumäñteltak ti pañämil,
ti' jujump'ejl tejklum tsi' wa'choko juñtikil yumäl;
ixku jiñi itejklum Israel icha'añäch Lak Yum.
[18Lak Yum tsi' iweñ käñtesa jiñi Israel,
che' bajche' jiñi ñaxañbä iyalobil,
mi iyäk'eñ ik'äk'al ik'uxbiya
yik'ot ma'añik mi' ikäy ti bajñelil.]
19Pejtelel imelbaltak jiñi wiñikob
laj tsikiläch bajche' k'iñ ti' itojlel Lak Yum.
Chäñ ña'täbilix icha'añ chuki mi' imelob wiñikob x-ixikob.
20Mach mejl ti mujkel ti' itojlel joñtolbä imelbalob,
yik'ot mi' ichäñ ña'tañ jiñi imulob mu'bä iyotsañob.
[21Jiñi Lak Ch'ujutat tsa'bä imeleyoñla,
utsäch ipusik'al yik'ot ikäñäyoñla,
jiñ cha'añ mi' ñusañ lak mul
yik'ot ma'añik mi' ibajñel käyoñla.]
22Ñuk ik'äjñibal mi' ik'el Lak Yum
jiñi majtañäl mu'bä iyäk' jiñi wiñik,
yik'ot mi' käñtañ che' bajche' isäklel ik'äk'al iwut jiñi tojbä imelbal.
[Lak Yum mi' yäk'eñ iña'tañ ik'extañ ipusik'al iyalobilob.]
23Ti' wi'il mi' kaj iyäk'eñob ichobejtäbal,
che'äch bajche' ts'äkäl mi' tojtälob ti jujuñtikil.
24Jiñi mu'bä iña'tañob imul
mi' icha' yotsäñtelob ti' itojlel,
yik'ot mi' itijikñesañob ipusik'al tsa'ixbä isätäyob ipijtaya.
Päjyel ajñel ti Lak Ch'ujutat
25Ajñeñix ti' itojlel Lak Yum yik'ot käyäx jiñi mulil;
cha'leñ pejkaya ti' itojlel yik'ot ju'sañ awuwult'añ.
26Yom acha' sujtel ti' itojlel Lak Yum yik'ot käyäx jiñi joñtolil,
kome jiñi mi' yäk' ti tojmulil jiñi xjoñtolob.
27Ya' ti' yumäñtel cha'añ chämel
ma'añik majch mejl ich'ujutesañ jiñi K'ax Ñukbä;
kojach jiñi kuxulo'bä mejl iyäk'eñob wokolix iyälä.
28Jiñi chämeñixbä,
che' bajche' machbä tsikilix,
mach mejl ich'ujutesañ;
jiñi kuxulbä yik'ot k'ok'bä
jiñäch mu'bä imejlel ich'ujutesañ Lak Yum.
29¡K'ax ñukäch iyutsel ipusik'al Lak Yum,
yik'ot ñumeñ ñuk ip'uñtaya ti' itojlel mu'bä icha' sujtelob yik'ot!
30Mach laj mejl imelob jiñi wiñikob;
mi añik juñtikil wiñik machbä mejl ti chämel.
31Che'äch bajche' jiñi tokal mi' imos isäklel k'äk'al k'iñ,
che'äch ja'el jiñi joñtolbä iña'täbal
mi' isojk iña'täbaläl wiñik x-ixik.
32Jiñi Lak Yum muk'ix ilaj k'el pejtelel ek'tak ambä ti panchañ,
¡Ixku jiñi wiñik che'jach bajche' ts'u'bejñ yik'ot täñäl k'ajk!
Currently Selected:
Eclesiástico 17: CholDc
Highlight
Share
Copy
Want to have your highlights saved across all your devices? Sign up or sign in
© Biblia Chol de estudio con DC- Derechos reservados por SBM