1 aKorinto 14
14
Sa othalihera otthuna wa Muluku ni muulumo
1Mutthareke osivela ni mwaasaase ni nthiti samahala sa Munepa, vancipalexa yamahala ya othalihera otthuna wa Muluku, 2niwoko yoowo onuuluma nuulumo nikina, khanuuluma ni atthu, mene ni Muluku. Wa yeeyo, khaawo oniiwexexa; owo onuuluma matikhinelo mmunepani. 3Vaheera owo onthalihera otthuna wa Muluku onuuluma ni atthu weera aapuhihe, alipihere mirimasaya ni aapepese. 4Yoowo onuuluma ni nuulumo nikina, oniipuhiha muneenaawe paahi, mene yoowo onthalihera otthuna wa Muluku, ompuhiha ekerexa. 5Kaatthuna weera ootheene nyuwo muulume muulumo makina, mene kintthunaxa weera nyuwo muthalihere otthuna wa Muluku. Yoowo onthalihera otthuna wa Muluku ti oompwahaxa yoowo onuuluma ni muulumo makina, ohikhanle weera mukina onootaphulela muulumo awo weera epuhihiwe ekerexa. 6Vano axunnaka, miyo kawa wooxekurani ni kuulumawo ni muulumo makina, eheeni kineeraaka koovareleni? Fataari weera miyo kooleeleni yoothupulula emoha, hoye hoye yoosuwela emoha, naari yoothalihera otthuna wa Muluku emoha, naari nihusiho nimoha. 7Moota hiiho, wa itthu siniipiwa sinruma seiyo sihikhanle ni okumi, hata akhalaka mpetta, hoye hoye makita, saahivirikana orumawaya, eniisuwanyeye hai eniipiwa ni mpetta, hoye hoye ni makita? 8Ohiya toko yeeyo, nipalapatta naahiruma nnenesene, taani aneera iireherere weera arowe okhottoni? 9Hiihotho ni nyuwo. Mwaahuuluma masu oowiiwanyeya ni nlumi, anaasuwele hai mukina etthu onleeliwaawe? Nyuwo mmuulume vasiiyoniwene paahi. 10Woohihovela, mweelaponi aakhala muulumo oohiyanahiyana, wa soothesene ootheene aakhalano etaphulelowaaya. 11Tivawo, miyo kaahiiwexexa etaphulelo ya yeeyo mukina onuulumaawe, miyo nkikhale namarwaawe yoowo onuuluma, ni owo namarwaaka. 12Hiihotho eneereiya wa nyuwo. Mweenre nyuwo mutthunaxaka okhalano samahala sa Munepa, mwaasaase wiikhaliha mmahalani seiyo simpuhiha ekerexa. 13Tivawo, yoowo onuuluma ni nuulumo nikina, avekele weera awere otaphulela nuulumo nno. 14Miyo kavekela ni nuulumo nikina, munepaaka onoovekela, mene soosuwelasaka sinimweemela. 15Vano, nkeereke hai? Nkivekele ni munepa, mene nkivekeletho ni soosuwela; nkiipe ni munepa, mene nkiipetho ni soosuwela. 16Nyuwo mwaamuttottopelaka Muluku mmunepani, ongwereya hai yoole ori a yaale ahiniiwexexa weera “Ame*” wa otthapelawanyu, woonaka weera owo khasuwenle yeeyo nyuwo munghimaanyu? 17Vekhaikhai nyuwo munttottopelaka nnenesene, mene mukina khampuhihiwa. 18Miyo kinnamutthapela Muluku niwoko kinuuluma mmuulumoni woopwahani nyuwo ootheene. 19Wa soothesene, mukerexani kintthunaxa wuuluma masu mathanu oowiiwanyeya weera kaahusihe akina, ohiya wuuluma masu mancipale mmuulumoni. 20Axunnaka, muhuupuwele ntoko anamwane. Mukhale anamwane mwa soonanara, mene oowunnuwa mwa wuupuwelawanyu. 21Vano, yoolempwa munlamuloni: “Nkuulume ni muloko wa atthu ola ni atthu a muulumo makina ni mwa iyano sa anamarwa, mene orookhalaru hiiho, awo kheerwa ekiiwa, aneera Apwiya.” 22Tivawo, muulumo ari eneneero, kheehiyono wa yaawo anroromela, mene wa ahinroromela. Wa soothesene, othaliha otthuna wa Muluku ti wa yaawo anroromela, khoohiyono wa ahinroromela. 23Hiiho, ekerexa yootheene yathukumana ni ootheene yuuluma ni muulumo makina, enavolowa akina oohisuwela, naari oohiroromela, awo kheerwa yeera weera muri ni anepa? 24Avolowatho oohiroromela, naari oohisuwela ootheene yeeraka othaliha otthuna wa Muluku, owo anaaviriyeliwe ni masu a ootheene, ni anaathorihiwe ni masu a ootheene, 25nitho ixiiri sa murimaawe nsikhale soowooneya. Hiiho owo anaamorele vathi ni anaamulape Muluku, akhuwelaka: “Vekhaikhai, Muluku ori variyariwanyu!”
Mweettelo wa mmuthukumanoni
26Tivawo, axunnaka, nnihime eheeni? Mwaathukumanaka, khula mutthu a nyuwo onkhalano ecipo, hoye hoye masu a nihusiho, yoothupulula emoha, masu mmuulumoni, hoye hoye yootaphulela emoha. Mupakeke soothesene weera mpuhihe ekerexa. 27Wa soothesene, yakhala akina anuuluma ni muulumo makina, yuulumeke meeli woohipwaha mararu, mutthu ti mutthu emaaraawe, ni ontthuneya weera mukina ataphuleleke. 28Aahikhala mutthu ootaphulela, amaaleke mukerexani, uulumaka mwaneenaawe, ni ni Muluku. 29Mwaha wa maprofeeti – eeli, hoye hoye araru ethalihereke, ni akina ephimeke nnenesene yeeyo aleelingwaaya. 30Wakhala weera mukina okilaathiye ohooniheriwa etthu, oopacera amaaleke. 31Vano, ootheene nyuwo ngwereke othaliha otthuna wa Muluku, mutthu ti mutthu emaaraawe, weera ootheene ehusihiwe ni elipiheriwe. 32Yaawo anthaliha otthuna wa Muluku anoowera olamula minepasaya. 33Muluku khahiyono Muluku a ohiiwanana, mene a murettele. Ntoko mukerexani sikina sootheene sa ootteela, 34asithiyana ontthuneya weera ekhaleke oomaala mukerexani, niwoko khaatthuniheriwe wuuluma, mene yiiweleleke ntoko nlamulo nihimalaaya. 35Yatthuna ohusihiwa etthu, yaakoheke asiiyaya owaani, niwoko ti yoowuuliha muru wa muthiyana wuuluma mukerexani. 36Weeraka masu a Muluku akhumelenle eriyaraanyu? Hoye hoye awo awiiye wa nyuwo paahi? 37Akhala mukina onuupuwela weera ori mprofeeti, hoye hoye orino samahala sa Munepa, asuweleke weera yeeyo kinlepaaka ti nlamulo na Apwiya. 38Aahisuwela yeeyo, owotho kharwa asuweliwa. 39Tivawo axunnaka, mwaasaase ni nthiti othaliha otthuna wa Muluku, ni muhimukhoottihe yoowo wuuluma ni muulumo. 40Sootheenetho iyo sintthuneya sipakiweke ni ophwanelawaya ni wiiwananawaya.
Currently Selected:
1 aKorinto 14: VMK2021
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.
1 aKorinto 14
14
Sa othalihera otthuna wa Muluku ni muulumo
1Mutthareke osivela ni mwaasaase ni nthiti samahala sa Munepa, vancipalexa yamahala ya othalihera otthuna wa Muluku, 2niwoko yoowo onuuluma nuulumo nikina, khanuuluma ni atthu, mene ni Muluku. Wa yeeyo, khaawo oniiwexexa; owo onuuluma matikhinelo mmunepani. 3Vaheera owo onthalihera otthuna wa Muluku onuuluma ni atthu weera aapuhihe, alipihere mirimasaya ni aapepese. 4Yoowo onuuluma ni nuulumo nikina, oniipuhiha muneenaawe paahi, mene yoowo onthalihera otthuna wa Muluku, ompuhiha ekerexa. 5Kaatthuna weera ootheene nyuwo muulume muulumo makina, mene kintthunaxa weera nyuwo muthalihere otthuna wa Muluku. Yoowo onthalihera otthuna wa Muluku ti oompwahaxa yoowo onuuluma ni muulumo makina, ohikhanle weera mukina onootaphulela muulumo awo weera epuhihiwe ekerexa. 6Vano axunnaka, miyo kawa wooxekurani ni kuulumawo ni muulumo makina, eheeni kineeraaka koovareleni? Fataari weera miyo kooleeleni yoothupulula emoha, hoye hoye yoosuwela emoha, naari yoothalihera otthuna wa Muluku emoha, naari nihusiho nimoha. 7Moota hiiho, wa itthu siniipiwa sinruma seiyo sihikhanle ni okumi, hata akhalaka mpetta, hoye hoye makita, saahivirikana orumawaya, eniisuwanyeye hai eniipiwa ni mpetta, hoye hoye ni makita? 8Ohiya toko yeeyo, nipalapatta naahiruma nnenesene, taani aneera iireherere weera arowe okhottoni? 9Hiihotho ni nyuwo. Mwaahuuluma masu oowiiwanyeya ni nlumi, anaasuwele hai mukina etthu onleeliwaawe? Nyuwo mmuulume vasiiyoniwene paahi. 10Woohihovela, mweelaponi aakhala muulumo oohiyanahiyana, wa soothesene ootheene aakhalano etaphulelowaaya. 11Tivawo, miyo kaahiiwexexa etaphulelo ya yeeyo mukina onuulumaawe, miyo nkikhale namarwaawe yoowo onuuluma, ni owo namarwaaka. 12Hiihotho eneereiya wa nyuwo. Mweenre nyuwo mutthunaxaka okhalano samahala sa Munepa, mwaasaase wiikhaliha mmahalani seiyo simpuhiha ekerexa. 13Tivawo, yoowo onuuluma ni nuulumo nikina, avekele weera awere otaphulela nuulumo nno. 14Miyo kavekela ni nuulumo nikina, munepaaka onoovekela, mene soosuwelasaka sinimweemela. 15Vano, nkeereke hai? Nkivekele ni munepa, mene nkivekeletho ni soosuwela; nkiipe ni munepa, mene nkiipetho ni soosuwela. 16Nyuwo mwaamuttottopelaka Muluku mmunepani, ongwereya hai yoole ori a yaale ahiniiwexexa weera “Ame*” wa otthapelawanyu, woonaka weera owo khasuwenle yeeyo nyuwo munghimaanyu? 17Vekhaikhai nyuwo munttottopelaka nnenesene, mene mukina khampuhihiwa. 18Miyo kinnamutthapela Muluku niwoko kinuuluma mmuulumoni woopwahani nyuwo ootheene. 19Wa soothesene, mukerexani kintthunaxa wuuluma masu mathanu oowiiwanyeya weera kaahusihe akina, ohiya wuuluma masu mancipale mmuulumoni. 20Axunnaka, muhuupuwele ntoko anamwane. Mukhale anamwane mwa soonanara, mene oowunnuwa mwa wuupuwelawanyu. 21Vano, yoolempwa munlamuloni: “Nkuulume ni muloko wa atthu ola ni atthu a muulumo makina ni mwa iyano sa anamarwa, mene orookhalaru hiiho, awo kheerwa ekiiwa, aneera Apwiya.” 22Tivawo, muulumo ari eneneero, kheehiyono wa yaawo anroromela, mene wa ahinroromela. Wa soothesene, othaliha otthuna wa Muluku ti wa yaawo anroromela, khoohiyono wa ahinroromela. 23Hiiho, ekerexa yootheene yathukumana ni ootheene yuuluma ni muulumo makina, enavolowa akina oohisuwela, naari oohiroromela, awo kheerwa yeera weera muri ni anepa? 24Avolowatho oohiroromela, naari oohisuwela ootheene yeeraka othaliha otthuna wa Muluku, owo anaaviriyeliwe ni masu a ootheene, ni anaathorihiwe ni masu a ootheene, 25nitho ixiiri sa murimaawe nsikhale soowooneya. Hiiho owo anaamorele vathi ni anaamulape Muluku, akhuwelaka: “Vekhaikhai, Muluku ori variyariwanyu!”
Mweettelo wa mmuthukumanoni
26Tivawo, axunnaka, nnihime eheeni? Mwaathukumanaka, khula mutthu a nyuwo onkhalano ecipo, hoye hoye masu a nihusiho, yoothupulula emoha, masu mmuulumoni, hoye hoye yootaphulela emoha. Mupakeke soothesene weera mpuhihe ekerexa. 27Wa soothesene, yakhala akina anuuluma ni muulumo makina, yuulumeke meeli woohipwaha mararu, mutthu ti mutthu emaaraawe, ni ontthuneya weera mukina ataphuleleke. 28Aahikhala mutthu ootaphulela, amaaleke mukerexani, uulumaka mwaneenaawe, ni ni Muluku. 29Mwaha wa maprofeeti – eeli, hoye hoye araru ethalihereke, ni akina ephimeke nnenesene yeeyo aleelingwaaya. 30Wakhala weera mukina okilaathiye ohooniheriwa etthu, oopacera amaaleke. 31Vano, ootheene nyuwo ngwereke othaliha otthuna wa Muluku, mutthu ti mutthu emaaraawe, weera ootheene ehusihiwe ni elipiheriwe. 32Yaawo anthaliha otthuna wa Muluku anoowera olamula minepasaya. 33Muluku khahiyono Muluku a ohiiwanana, mene a murettele. Ntoko mukerexani sikina sootheene sa ootteela, 34asithiyana ontthuneya weera ekhaleke oomaala mukerexani, niwoko khaatthuniheriwe wuuluma, mene yiiweleleke ntoko nlamulo nihimalaaya. 35Yatthuna ohusihiwa etthu, yaakoheke asiiyaya owaani, niwoko ti yoowuuliha muru wa muthiyana wuuluma mukerexani. 36Weeraka masu a Muluku akhumelenle eriyaraanyu? Hoye hoye awo awiiye wa nyuwo paahi? 37Akhala mukina onuupuwela weera ori mprofeeti, hoye hoye orino samahala sa Munepa, asuweleke weera yeeyo kinlepaaka ti nlamulo na Apwiya. 38Aahisuwela yeeyo, owotho kharwa asuweliwa. 39Tivawo axunnaka, mwaasaase ni nthiti othaliha otthuna wa Muluku, ni muhimukhoottihe yoowo wuuluma ni muulumo. 40Sootheenetho iyo sintthuneya sipakiweke ni ophwanelawaya ni wiiwananawaya.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Makhua Shirima Bible © Christelike Lektuurmaatskappy NPC, 2021.