Solomon 6
6
Amizibar onger akam
1O nɨ amizir dirim, nɨ bar amizir igharazibagh afira.
Nɨn roroar gumazir nɨ bar ifongezim managh ghu?
Nɨ e mɨkemeghtɨ, e nɨn akuragh a buriam.
A tuavir manamɨn ghu?
Amizir igiamɨn onger akam
2Nan roroar gumazir kɨ bar ifongezim,
uan azenim giraghu.
Azenir kam, bizir mughuriar aghuiba itiba, a gizɨfa.
An memen okoruam azenimɨn graziba api,
ezɨ an akɨmarir aghuiba akumakua da arɨsi.
3Nan roroar gumazir kɨ bar ifongezim, kɨ an amuim,
ezɨ a nan pam,
mati a uan memeba inigha
akɨmarir aghuibar tongɨn ghuzɨ,
da graziba api.
Onger akar namba 5
Gumazir igiamɨn onger akam
4O kɨ ifongezir amizim, nɨn ganganim bar dera,
mati Tirsan nguibar ekiam,
ko Jerusalemɨn nguibar ekiam.
Nɨn ganganim nan damazimɨn, nɨ amizir bar dirim,
mati gumazir mam gari, mɨdorozir gumaziba uan ababanir inir avɨzibar suigha izi,
ezɨ kɨ dɨgavir kuram gamigha mɨkɨman asa.
5Nɨ nan ganan kɨ aghua.
Nɨ nan gara nan muriam aghorima, kɨ okam nɨghnɨsi.
Nɨn dapanarɨzir gɨrakɨrangɨn guraghav itim, pigha ruaragha bar dera,
mati memen pɨzir okoruam bar akuegha, uari fa kura Gileatɨn Mɨghsɨamɨn ghuaghiri.
6Nɨn atariba bar ghurghuri,
mati sipsipɨn ghurghurimɨn arɨziba
me datɨrɨghɨra da rue.
Nɨn ataritam asiaghirɨzir pu.
Puvatɨ. Da bar deraghavɨra iti.
7Inim nɨn guam avara,
ezɨ kɨ nɨn koviamningɨn gari, aning dafogha,
mati pomigranetɨn ovɨzir aghevir akuam.
8Atrivim amuir avɨriba iti.
60plan kwinba, ko 80plan amuir doziba.
Egha amizir igiar avɨrir maba uaghan iti,
ezɨ gumazitam men dɨbobonim gɨfozir puvatɨ.
9Ezɨ ko, kɨ amizir ifongezir vamɨra iti.
A bar amizibagh afira,
ezɨ kɨ bar a gifonge.
An amebam, uan guivibar tongɨn, bar a gifuegha,
a bagha bar akonge.
Amizir igiaba bar an garava,
an ziam fe.
Atrivimɨn amuir ekiaba ko, amuir doziba,
a bagha bar akuegha ighiabagh ami.
10Muna tinara nan gari?
An guam mati amɨnim tirazɨ,
aruer ekiam isiragha dafo.
An guam bar angarigha, mati iakɨnir aruem isira.
An ganganim nan damazimɨn bar amizir dirim,
mati gumazir mam garima, mɨdorozir gumaziba uan ababanir inir avɨzibar suigha izi,
ezɨ kɨ dɨgavir kuram gamigha mɨkɨman asa.
11Kɨ izaghirɨgha gɨvagha azenimɨn aven itir temer aghuir ovɨziba itibar tongɨn iti.
Kɨ temeba ko dar akɨmarir otivibar ganasa danganir zarimɨn ize.
Kɨ wainɨn ikarɨzir mumuriba, ko temer dagher aghuiba itibar akɨmaribar ganasa ize.
12O nan amizim, kɨ nɨn gara,
egha agorogem na mɨsosi.
Kɨ kamaghɨn nɨghnɨsi,
kɨ mati gumazir aruar mamɨn karisɨn aven iti.#6:12 Hibrun akam vezɨn kam deragha a mɨgeir puvatɨ.
Amizibar onger akam
13aO Sulamɨn ikɨzimɨn amizim,
nɨ uamatengegh,
nɨ uamatengegh.
Nɨ uamategh izɨtɨ, e nɨn ganika!
Amizir igiamɨn onger akam
13bKɨ Sulamɨn ikɨzimɨn amizim,
ia tizim bagh nan gantɨ,
kɨ mɨdorozir gumazir okoruar pumuningɨn tongɨn igham gighiam?
Currently Selected:
Solomon 6: AruBib20
Highlight
Copy
Compare
Share
Want to have your highlights saved across all your devices? Sign up or sign in
The Bible in Aruamu: Old Testament and New Testament: © 2020 Pioneer Bible Translators
This work is licensed under the Creative Commons Attribution Share-alike 4.0 license. http://creativecommons.org/licenses/by-sa/4.0/
New Testament is a revision of: The New Testament in Aruamu: © 2004 Bible Society of Papua New Guinea and Pioneer Bible Translators
