Aisaia 13
13
Aisaia, Godɨn akamɨn, gun kantrin mabav gei
(Sapta 13--23)
God kantri Babilon gasɨghasigham
1 #
Aisaia 47:1-15; Jeremaia 50:1--51:64 God kantri Babilon gasɨghasɨghasa, kamaghɨn, a irebamɨn mɨn garir bizimɨn aven, akam isa Emosɨn otarim, Aisaia ganɨngi. 2A kamaghɨn mɨgei:
“Nɨ nan nir avɨzir pɨn itim isɨ ababanimɨn mɨn temeba puvatɨzir mɨghsɨar mamɨn a kuasagh,
eghtɨ mɨdorozir gumaziba an ganigh izɨ uari akuvagh ikiam.
Nɨ pamtemɨn men dɨmtɨ, me zuamɨra izɨ.
Eghtɨ nɨ uan dafarim ghufegh, Babilonɨn itir gumazir aruar uan ziaba feba, tiar akar ekiabar amadaghan men akagh,
egh me amadaghtɨ, me mangɨ me ko mɨsogh.
3Kɨ Babilon bagha nan navim bar nan ikufi,
egha kɨ uabɨ uan mɨdorozir gumazir aghuir bar gavgaviba amɨsevegha, men diazɨ, me ize.
Egha kɨ Akar Gavgavim me mɨkeme, eghtɨ me mangɨ Babilonia ivezir kuram me danɨngam.
Mɨdorozir gumazir kaba, ziar ekiaba iti,
egha Babilon mɨsoghasa bar akonge.”
4Ia mɨghsɨabagh isɨn nɨgɨnir dafar kam baragh,
kar gumazir bar avɨribar nɨgɨnim.
Kantrin avɨribar mɨdorozir gumaziba iza uari akufa.
Ikiavɨra Itir Godɨn Gavgaviba Bar Itim,
mɨsoghasa uan mɨdorozir gumaziba akufa.
5Me kantrin bar saghon itimɨn ikegha ize,
egha me mati Ikiavɨra Itir Godɨn piba ko bariba.
A bar anɨngaghegha, me akuvagh me damutɨ,
me nguazir kamɨn itir kantribagh asɨghasɨgh, bar me agɨvagham.#13:5 Gumazir maba kamagh nɨghnɨsi, Hibrun akam, a “Nguazir kamɨn itir kantriba bar,” a dav geir puvatɨ. Me ghaze, Hibrun akam kamaghɨn mɨgei, “Kantrin kamra nguibaba bar an iti.”
6 #
Joel 1:15
Ikiavɨra Itir God Izamin Dughiar Ekiam, a roghɨra izegha gɨfa.
Kamaghɨn amizɨ, ia bar puvɨram aziva arang.
Dughiar kamɨn, Godɨn Gavgavim Bar Itim,
dughiar bar kuram amadaghtɨ a izam.
7Bizir kam bangɨn, gumazamizibar aghariba bar men amɨraghtɨ,
men gavgaviba bar gɨvaghtɨ, me uan navibar aven bar atiatingam.
8 #
Onger Akaba 48:6; Aisaia 21:3 Me nɨgh bar atiatighɨva, mɨzazir bar ekiaba baragham,
mati amizim borim batasa mɨzazim isi moghɨn, me mɨzazim iniam.
Me dɨgavir kuram damutɨ, men guabara uarir akakagh suam,
me mɨzazir bar ekiam isi.
Egh me uarira uan guabar ganamin dughiamɨn,
me bar atiatigham.
9Bar guizbangɨra, Ikiavɨra Itir God Izamin Dughiar Ekiam, a izi,
kar Ikiavɨra Itir God uan anɨngagharir ekiam sara izasa mɨsevezir dughiam,
egh nguazir kamɨn itir ruaghateviba bar dagh asɨghasɨghɨva,
gumazamizir arazir kurabagh amiba me bar me agɨvagham.
10 #
Esekiel 32:7; Matyu 24:29; Mak 13:24-25; Luk 21:25; Akar Mogomem 6:12-13; 8:12 Dughiar kamɨn, mɨkoveziba bar dar angazangarim mungegham.
Egh aruem otoghtɨ, an angazangarim mɨtarmegham,
eghtɨ iakɨnimɨn angazangarim puvatɨgham.
11Ikiavɨra Itir God kamaghɨn mɨgei,
“Gumazamizibar arazir kuraba nguazir kam gizɨfa,
kamaghɨn amizɨ, kɨ men arazir kuraba ikarvagh, puv me damigham.
Gumazamizir uarira uan ziaba feba, kɨ me dɨkabɨragham.
Gumazamizir igharaz darazi paza me gamua uari feba,
kɨ pazɨ me damigh men ifaghatir arazim agɨvagham.
12Gumazamizir bar avɨrim arɨghiregham, eghtɨ kɨ vaghvaziba ateghtɨ, me ikiam.
Egh nɨ kantri Ofirɨn golɨn bar aghuim burian asaghasaghizɨ moghɨn,
nɨ me burian asaghasegham.
13 #
Hagai 2:6
Dughiar kamɨn, kɨ Ikiavɨra Itir Godɨn Gavgaviba Bar Itim,
uan anɨngagharir bar dafam sara izam.
Egh kɨ overiam ko nguazim damightɨ, aning nɨgham,
eghtɨ nguazim isɨvagh uan danganim ategham.”
14Dughiar kamɨn, gumazamiziba bar puvɨram atiatingɨva aregham,
mati asɨzir atiam, gumazim ruarimɨn ghua a gasasava amima,
an arav ghuzɨ moghɨn, me arɨmangegham.
Egh mati sipsipbar garir gumaziba puvatɨzɨ, me onganigh pura tintinibar zui moghɨn,
me tintinibar arɨ uamategh pura uan nguibabar mangam.
15Eghtɨ gumazir manam, apaniba an suira,
me uan mɨdorozir sababar a bɨraghtɨ, an aremegham.
16Eghtɨ apaniba, borir iririviba, men amebabar aghariba da me amɨkɨva,
eghtɨ amebaba ko afeziaba ganvɨra ikɨtɨ,
me boriba isɨ dagɨaba itir nguazim gapɨztɨ, me arɨmɨghiram.
Eghtɨ apaniba men dɨpenibagh asɨghasɨgh, men biziba okɨmɨva,
men amuibar suigh, me abɨn arazir kurabar me damuam.
17Ikiavɨra Itir God ua ghaze,
“Kɨ, Midbar navibagh inivima, me Babilonia mɨsoghasa izi.
Me Babilonian silva ko gol bagha nɨghnɨgha mɨsoghasa izir puvatɨ.
18Me bar Babilonia agɨvasa nɨghnɨzim bar gavgafi.
Me gumazir igiaba uan pibar me gasɨtɨ, me arɨghiregham.
Eghtɨ borir ekiaba ko muziariba, me men apangkuvighan kogham.”
19 #
Jenesis 19:24
E fo, Babilonɨn nguibar ekiam, a bar deragha nguibar ekiar mabagh afira.
Babilonian gumazamiziba, me uan nguibar ekiamɨn ziar aghuim bagha bar akonge.
Eghtɨ God Sodom ko Gomora gasɨghasɨghizɨ moghɨn,
a Babilon gasɨghasɨgham.
20 #
Jeremaia 50:3; 50:39; 51:29; 51:62 Gumazitam ua nguibar kamɨn ikian kogham.
Eghtɨ uaghan Arebian gumaziba izɨ uan averpenitam danganir kamɨn anesaraghan kogham.
Eghtɨ sipsipbar garir gumaziba uan sipsipba inigh izɨtɨ,
da danganir kamɨn irɨv ikɨ avughsan kogham.
21 #
Aisaia 34:14; Sefanaia 2:14; Akar Mogomem 18:2 Nguibar kam pura danganir kɨnim gavaghtɨ, asɨzir atiaba izɨva an ikiam.
Eghtɨ dɨmagarimɨn, kuaraziba dɨpenibar ikiam.
Eghtɨ poneba uaghan ikɨtɨ,
memen atiaba uari akun nguibar ekiamɨn mangɨ izegh damuam.
22Eghtɨ, atrivibar dɨpeniba ko gumazir ekiabar dɨpeniba,
afiar atiaba izɨ dar ikɨ, pura dapur ikiam.
Bar guizbangɨra, Babilon ikuvighamin dughiam,
a roghɨra izegha gɨfa.
Currently Selected:
Aisaia 13: AruBib20
Highlight
Copy
Compare
Share
Want to have your highlights saved across all your devices? Sign up or sign in
The Bible in Aruamu: Old Testament and New Testament: © 2020 Pioneer Bible Translators
This work is licensed under the Creative Commons Attribution Share-alike 4.0 license. http://creativecommons.org/licenses/by-sa/4.0/
New Testament is a revision of: The New Testament in Aruamu: © 2004 Bible Society of Papua New Guinea and Pioneer Bible Translators
