Rroman 9
9
Eisinanie Paulo tankaraki nemeiruk ꞉Lyiaudi Nkai
1Kairorita mbaa naadede amu kara le Kristo namajoito sapare amu katumuse naiteyielo sii Ltau Sinyati. 2Kaisinanio oleng naata mion nemeyagari taatua ltau lai. 3Oi siake duo aa nanu edeki naaitaini taatua Kristo, matanang'a lalachera o nkanachera e lorere lai, 4#Nai 4:22ltung'ana loo Isirael. Kore apa ninche naa ketegelua ꞉Nkai metaa ltung'ana lenyena. Neichoo metoduaa nkitoo enye, neitai lning'o o ninche, neicho sii ninche nkitanapat enyena. Neibalakinyie neikoni tenesaii, neitoki aicho lekutukie lenyena. 5Neing'uaa sii ninche ꞉lmakui lang Abraam o Isaka o Isirael, lolo ooing'uaa abaki ꞉Kristo ta ntalipa, ilo oara Nkai naaisul pooki, meterrepi ntarasi! Aamin.
Keng'amari mayian tineiruki lekutukie le Nkai
6Kake mara eji ketaa eitu ebaya rerei le Nkai, amu mara lolo pooki oaara le ichoi e Isirael oaara ltung'ana le Isirael oodede. 7#Ng'as 21:12Namara ichoi pooki e Abraam natum inia natejo Nkai keichoru te lekutuk lenye, kake kejo lkigerot Sinyat, <<Ichoi e Isaka eipoti aajo ne ntalipa ino>> 8Keitodolu ana ajo, mara nkera naatiutua ltung'ana naara nkera e Nkai, kake lolo ake ooitaaki nkera te lekutuk eipoti aajo ichoi e Abraam. 9#Ng'as 18:10Kore lekutuk oitayia Nkai naa ele, <<Kore aitoki tana ng'amata te elde ari, naa karrinyunyie eata Sara layieni.>>
Kera Nkai loosipat
10Kake mara abaki inia, kore layiok oare le Rebeka naa la lpayian obo oji Isaka laa ninye akuyia lang, neata ana mbae nautu. 11-12#Ng'as 25:23Nejoki ꞉Nkai Rebeka ewuon eitu eini nkera enyena o ewuon sii eitu eas ninche supati tanaa ntorrok nchere, <<Keisiaai ꞉ilo ayieni botor lkini.>> Paa kore inia gelunoto e Nkai naaku mara inia nataasa nenia kera eirichakino kake nayieu ninye. 13#Mal 1:2,3Ana naigero ajo, <<Atachamayie Yakobo, alang Esao.>> 14Ikijuaa naa taata, keas Nkai nemeichiaakino? Naikaiting'o! Meas! 15#Nai 33:19Amu ketiaka Musa, <<Kaing'urrie ilo laing'urrie, naing'er ilo laing'er.>> 16Tankaraki inia, paa mara yieuna tanaa nyuata e ltung'ani eirichakino kake tankaraki naata ꞉Nkai lng'ur. 17#Nai 9:16Amu keichoo Nkai Musa lkilikuai le Parao lkinkii le Misiri ejoki, <<Kaailiepunyie iyie aata ana kipidata nchere, payie aaitodolu ngolon ai taatua iyie, neitokini aalikoo nkarna ai to nkop nalulung'a.>> 18Naaku naa, keing'urrie ilo oyieu ꞉ninye neing'urrie, neitogol nkue e ilo oyieu neitogol.
19Naaku indim naa nijo, <<Aanyo naa payie ewuon ekusakan ninye ꞉ltung'ana? Ng'ae sa oidim aibooi ntagule e Nkai?>> 20#Isa 29:16, 45:9Kake ng'ae ira iyie ltung'ani payie intooliki Nkai? Keidim sa ntoki naitibiruaki atiaaki loitibirua, <<Aanyo payie kintibirua aiko inji?>> 21Oo sa laitibirani loo ntokitin e mparpar, meata nkitoria naitibirunyie ntoki e tipat ta mparpar, neitoki ake aitibirunyie inia parpar nkae toki nemeata tipat? 22Kore abaki eyieu apa Nkai neitodol ltung'ana ngoro enye neiteyielo sii ngolon enye, nepal lolo mang'ati lenyena ooitaanyutae mutai, tankaraki ng'iriata enye kitok. 23Ketaasa sii inia payie eitodolu nowua nkitoo enye too lolo ooing'urrieki, lolo ooitibira apake payie etum ꞉ninche inia kitoo.
Ltung'ana ng'ejuko le Nkai
24Keipoto sii iyioo Nkai, namara ake iyioo oaara loo Lyiaudi aapeny eipoto, kake abaki lolo oaara loo lkulie oreren. 25#Osea 2:23Ana najoito ꞉Nkai to mbuku e loiboni lenye Osea,
<<Kore apa lolo lamara ltung'ana lainien, naa kaipot ajo ltung'ana lainien
naa kore inia apa nemechami naipot ajo <Nachami.>
26 #
Osea 1:10
Naa kore te inie ng'oji apake netiaakinyieki,
<Mirara ltung'ana lainien,>
neipoti ninche te inie ng'oji aajo <Nkera e ꞉Nkai naichu.> >>
27 #
Isa 10:22,23 Nebuak loiboni le Nkai Isaya tankaraki Isirael ejo, <<Kore abaki ewuana ltung'ana le Isirael ana sunyai le mpaso, muro ake eitejeuni. 28Amu kesioki Nkai aitai rerei odung'ie nkiguana to nkop.>> 29#Isa 1:9Neitoki Isaya aibonu ajo, <<Teneitu apa eing'uaki iyioo Laitoriani loo njorin ichoi, anata apa eidakieki iyioo ana lkerenket le Sodom, nikituwuanai ana lkerenket le Gomora.>>
Etanya ꞉Lyiaudi Laitejeunoni
30Ikijuaa naa taata iyioo? Kore nikijo, naa nchere kore apa lkulie oreren leitu eyiaya neiko tenetum sipata natumie sotua oipida o Nkai, naa ketumo inia sipata. Naa kore inia sipata, naa nkurukoto eirichakino. 31Kake kore enyok Isirael aajo embung'a nkitanapat payie eaku ltung'ana loosipat, neitu eitabaya ꞉ninche nenia kitanapat. 32Aanyo? Tankaraki neitu eyiaya sipata eirichakino nkurukoto, kake nejo apa ninche eji ketumi taa asat. Nerror ate te ilo soit orrorricho. 33#Isa 28:16Ana naigero ajo,
<<Ng'ura, kapik atua Sion soit orrorricho
o ndadapoi narrekicho,
naa kore pooki ng'ae oiruk ninye naa menya anyit.>>
Currently Selected:
Rroman 9: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy
