Asat 15

Nkiguana nataasaki te Yerusalem

1 # Lal 12:3 Nedou lkulie tung'ana te Yudea aapuonu Antiok, aaiteng'en looiteng'eni ejo, <<Kore tanaa mimuratata pooki ana nejo lkerreti le Musa, naa meitejeuni ntae.>> 2Neichankarrare ꞉Paulo o Barnabas lolo tung'ana oleng. Negeluni Paulo o Barnabas tenebo o lkulie alachera meiliepa aapuo Yerusalem aayaki lkipaareta o lpayiani le nkanisa ana bae. 3Neitanap ninche ꞉nkanisa mechomo, kore eimaa nkop e Penisia o ne Samaria, nenyaki looiteng'eni otii inie neikuna lkulie oreren payie eibelekenya aairukurukore Yeso. Neng'ida lalachera pooki oleng tana. 4Kore payie epuonu Paulo o Barnabas Yerusalem, neng'amaa ꞉nkanisa o Lkipaareta o lpayiani ninche. Neliki mbaa pooki naataasie Nkai ninche.

5Kake kore apa ꞉lkulie Parisayo ooiruko Yeso neitachoo aajo, <<Meata ajo memurati lewa pooki loo lkulie oreren metaa loo ltung'ana le Nkai, neitokini aaitanap meibung'a nkitanapat e Musa.>>

6Netumo lkipaareta o lolo arikok le nkanisa aadol naas tana bae. 7#Asat 10:1–43Kore payie eichankarra ninche tana bae nkata naado, neinyuototo Petero aiguan ninche nejoki, <<Lalachera lainien, kaategelua apa Nkai taatua ntae payie ening loreren Lomon Supati to nkutuk ai neiruk. 8#Asat 10:44, 2:4Naa kore Nkai nayielo ltauja loo ltung'ana, neitodolua ajo ketang'amaitie loreren nkichooroto e Ltau Sinyati ooichoo ninche ana sii payie eichoo iyioo. 9Naa kore tekue Nkai, meatae ntoki nagel iyioo o ninche amu keitisinya ltauja lenche to nkurukoto. 10Naaku naa aanyo payie igilunorere Nkai aayeniki nkirochi murto ee looiteng'eni, nemeidim lmakui lang tana iyioo aatanap? 11Mara nejia! Ikiruk iyioo aajo kore munyani e Laitoriani Yeso, naa ninye eitejeunyieki iyioo, naa ninye sii eitejeunyieki ninche.>>

12Kore inia kiguana pooki negira ajo tau aainining Barnabas o Paulo enyau mbaa pooki naataasa Nkai taatua loreren, aasichere ninche metaasa asat naaitodolu nkitoo enye o mbaa e nking'asia. 13Kore payie eidip ninche aairoro, neinyuototo Yakobo nejo, <<Lalachera lainien entining'oki! 14Ketilika iyioo Petero#15:14 Kore Petero naa kejo Luka Simon. neikuna ꞉Nkai payie egelu taatua loreren, lorere lenye. 15Naa kore lomon ootejo Petero naa nabo o inia natejo loibonok le Nkai too Lkigerot Sinyat nchere,

16 # Amos 9:11,12 <Kore tesiedi ana kachukunyie,

nachet nkang e Daudi naterriee.

Kachet pooki toki enye naidaayie,

naitoki aitacheyie inia,

17payie eing'oru ꞉lkulie ltung'ana pooki Laitoriani,

lolo oreren pooki ooipotoki ta nkarna ai.

Nejia ejo Laitoriani,

18/oibalunyie kuna pooki ta ng'asunoto.>

19<<Naa kore nduata ai naa payie mikintanyamal lolo tung'ana loo lkulie oreren ooibelekenyete aairukurukore Nkai, 20#Nai 34:15–17, Lal 18:6–23, Lal 17:10–16kake payie kingeroki ninche metung'ai mbaa torrok ee nkaitok e sapare, nemeboitare likae tung'ani te sesen mara ake ntomononi enye anaa lpayian lenye, nemenya nkiri ee suom o ng'uesi naatogoroki, nememat lodo. 21Amu kelikoritae nkitanapat e Musa ta ng'asunoto taatua lkerenketi pooki, neisomi te Sinagogini chiaake mparri e Sabato.>>

Mpalai naigerokaki nkanisa e Antiok

22Kore lolo kipaareta o larikok, neng'amaa tenebo o nkanisa pooki payie eirruaaya lkulie lewa lenche Antiok tenebo o Paulo o Barnabas. Naa kore lolo lewa ootegeluaki naa Yudas ooitokini aajo Barsabas o Silas oaara larikok taatua lolo ooiruko Kristo. 23Neitanap ana palai najo,

Kore ana palai naa keing'uaa lkipaareta o larikok linchi taatua lolo ooiruko Kristo. Naa keigerokaki ltung'ana lamara loo Lyiaudi ooiruko Kristo ootii Antiok o Siria o Kilikia.

Ikiroroki ntae.

24Ikitining'o aajo keotuo lkulikae tung'ana ooing'uaa atua iyioo aapuonu aaitanyamal ntae tee rerei oopik ltauja linchi nkirochi, namara iyioo ooitanapa ninche metaasa inia nataasa. 25Naaku ikitachamaitie iyioo tanaboicho aagelu Yuda o Silas nikireuu meotu nitii tenebo o lolo alachera lang likicham, aa Barnabas o Paulo, 26ootipika ate nkue e larrabal tankaraki nkarna e Laitoriani lang Yeso Kristo. 27Naaku naa ikirruaki ntae Yudas o Silas meotu alimu sipata too nkutukie enche ee kulo omon likingero. 28Kore inia nikitachamaitie iyioo nechamaa sii Ltau Sinyati nchere, mikintoki aiteleki ntae ai kirochi kitok. Kuna ake naachiaakino: 29eminya ndaa naitakaki nkaitok e sapare, nimimatmat lodo, niminyanya nkiri ee suom o nee ng'uesi naatogoroki, nimiboitarere likae tung'ani te sesen mara ake ntomononi ino anaa lpayian lino. Tinintapaacherere ate kuna baa naa iasitata nairirikino.

Lesere naa.

30Nepalaa lolo tung'ana, neinyuototo aadoyio aapuo Antiok. Kore payie ebaki inie, neipotu ltung'ana pooki le nkanisa meotu tenebo neicho inia palai. 31Kore payie eisom inia palai, neng'ida oleng tankaraki naterretena lolo omon. 32Kore Yudas o Silas oaara loibonok le Nkai, neirorie lolo ooiruko Kristo aaitogol oleng. 33Kore payie ebik ninche te inie nkuti perot, nereu ninche mechomo aachukokino te seriani lolo apa ootereutua ninche. 35Kake kore Paulo o Barnabas newueni ta Antiok eiteng'enicho nelikoo rerei la Laitoriani tenebo o lkulie tung'ana kumo.

Etoorete Paulo o Barnabas

36Kore etibiko ninche nkuti perot, nejoki ꞉Paulo Barnabas, <<Matirrinyoto aisabaki lalachera lang too lkerenketi pooki likitilikorie rerei la Laitoriani, nikidol netiu.>> 37Naa keyieu apa Barnabas neya Yoana oitokini ajo Marko tenebo o ninche, 38#Asat 13:13kake kore apa Paulo naa ketudong'o ajo meichiaakino payie eirukurukore ꞉Yoana ninche amu ketung'ayie apa ta Pampilia, neitu elo aas siaai o ninche. 39Nejing'u Paulo o Barnabas nchankar nairewua, neroyie aaoro. Nerik ꞉Barnabas Marko nepuo lkuran oji Saipiras te meli, 40negelu ꞉Paulo Silas. Kore payie epik ꞉lalachera o nkanachera ninye nkaina e Laitoriani meing'ura te munyani enye, nelo aaing'uaa inie. 41Nekirraa nkop e Siria o ne Kilikia, eitogolito nkanisani e inie.

Currently Selected:

Asat 15: saq

Highlight

Copy