3 Yoana 1
1
Nkirorokino
1 #
Asat 19:29; Rrom 16:23; 1Lkor 1:14 Kore ana palai naa lochi payian arrarri eing'uaa. Kaairoroki iyie Gayo, sotua lai lacham te ndedei.
2Sotua lai lacham, kaomon payie eitibirari ntoki pooki te iyie niaku bioto te sesen, ana payie kira ltau supat. 3Naa kating'ide oleng payie eyau lkulie alachera lkilikuai ejo ira ltung'ani oning ndedei o ninkunari taatua ndedei. 4Meatae ng'ida nalang ana ta nanu tananing ajo kepuoito nkera ainien taatua ndedei.
Eterrepaki Gayo tankaraki natereto laisiaayiak le Nkai
5Sotua lai lacham, ira loisiligai te inia nintaasita lalachera, abaki era ninche lomon leiching'a. 6Keitabakita ꞉ninche nkanisa nchaman ino. Ntaasa ninche supati intanap aicho ntoki pooki nayieu to nkoitiei epuoito. Kore inia naa keichiaakino teneasi ta Nkai. 7Amu kore lolo alachera, naa kechomo ninche tankaraki nkarna e Laitoriani meng'amaa ntoki taatua lolo leimeiruk inia arna. 8Naaku keichiaakino payie kiretore ltung'ana laijo kulo, payie kias siaai tenebo taatua ndedei.
Larikoni torno
9Kaigeroka sii nkanisa mbae, kake kore Dioterepes oacham ailiepie koon teinie, naa meng'amaa iyioo. 10Naaku kore tanalotu, naitaparru nenia naasita, ewuon airo mbaa torrok naarie iyioo. Tapala duo inia, meng'amaa lalachera, neibooyo sii lolo ooyieu neitoomon ninche. Nemiraa ninche taatua nkanisa.
11Lacham lai, miduaaya ntokitin torrok kake toduai supati. Kore ilo oas supati naa le Nkai naa kore ilo oas ntorrok naa eitu eyielou ꞉ninye Nkai.
Limunoto supat naipirita Demeterio o nkirorokino e siedi
12Kerrepita ltung'ana pooki Demeterio, nerrepita abaki ꞉Ndedei koon. Kore abaki iyioo naa ikintaita limunot enyena supati, niyielo sii iyie ajo kore limunoto ang naa kesipa.
13Kore abaki duo aata mbaa kumo naaigeroki, kake mayieu naaigeroki ta nkalamu o mpalai. 14Kaisilig ajo ikiduaa kuna naataana nikiro king'ura nkomomi. 15Metaa seriani tenebo o iyie. Ikiroroki iyie ꞉sotuatin lang otii ene. Roroki sotuatin lang pooki le inie, intabaki pooki ng'ae nkirorokino.
Currently Selected:
3 Yoana 1: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy