1 Timoti Mbaa naaituruku
Mbaa naaituruku
Kore to mbuku ee Asat ee Lkipaareta 27:1—28:15, naa ikisom neikunaki apa payie eyae Paulo lkerenket oji Rroma, nepiki jila. Kore payie ebaki meli Rroma, neichori Paulo nkaji namany tenebo o sikarii oyiere nerrip ninye. Kore payie elakuni Paulo, neng'asu ninye lototo enye e ong'uan elikoo Lomon Supati tenebo o lkulie tung'ana. Kore etii inia lototo enche, neing'uaa ninye Tito to lkuran oji Kirete, meeitacheki nkanisa natii inie, neing'uaa aitoki Timoti meeitacheki nkanisa natii lkerenket le Epeso. Kore apa Timoti naa ltung'ani lelerie oiruko Yeso, nera apa papa lenye loo Lyiaudi nera ng'otonye noo Lgirriki. Kera apa ninye laretoni le Paulo te siaai le Nkai.
Nelo Paulo kue ana metabaki lkerenket le Pilipi otii nkop e Makedonia. Kore etii ninye inie, neiger ana palai enye ekue aigeroka Timoti o mpalai naigeroka Tito. Kejo ltung'ana keigeroki apa ana palai ta lari loo ntomoni ile o ile eidipaki aatiuu Laitoriani Yeso.
Kore nyamalitin naatii apa nkanisa e Epeso, naa mpukunot naapaapaacha e nkiteng'ena naaing'uaa ltung'ana loo Lyiaudi ooibung aaitirrichaki nkitanapat e Nkai, neyaka inia ninche metaa kegol payie eor inia nayieuni payie eas ltung'ani o nemeyieuni. Kore nkae nyamali, naa ltung'ana leitu apa etum yielounoto nadede naipirita mbae natejo Yeso nchere keichiaakino paa kore ltung'ani oiruko ninye, nenap lmusalaba lenye nemiki koon. Keatae aitoki apa Lgirriki oojo kore nkop, naa keitorno eji nemeatae ltung'ani oachamaa ꞉Nkai mara keata ake nkuto ng'eno naisudoro naipirita Nkai. Neitoki sii aajo mechamaa tenemietopong koon ntokitin naang'idakino sesen, atuwuana taa nyata ee ndaki o naichi e lmusabibu o mboita e sesen e lpayian o ntomononi enye. Kore tana palai, ketama Paulo larrabal oleng tankaraki ena kiteng'enare e sapare, neitogol ilo sotua lenye lelerie oji Timoti, metaa laisiaayiani oisiligai le Yeso Kristo, neicho nkitaarriyiana e rikore e nkanisa.
Kore ana palai keiteng'en iyioo nchere, kore nkiteng'ena e sapare naa keitarruoo lwuenet lang. Keyiere nikiyielou ndedei payie kitum aatirrip meitarruoo ꞉nkiteng'ena e sapare, nikimbooyo Chitani payie metum mpaach taatua ltung'ana le Nkai, neitarruo nkichoni enche.
Currently Selected:
1 Timoti Mbaa naaituruku: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy