1 Ltesalonike Mbaa naaituruku
Mbaa naaituruku
Kore ana palai, naa keigero Lkipaaret Paulo ebikito te lkerenket le Korinto, ta lari le onom o obo, eidipaki aatiiu Laitoriani, naa mpalai ana e are naigero Paulo te lning'o ng'ejuk aijipunyie mpalai naigeroka Lgalatia. Kore to lototo enye e likoroto e are, neng'asu Paulo nkanisa te Tesalonike, lkerenket kitok le Makedonia. Kore apa Makedonia, naa mbata nabo ee nkopi naitore Rroman. Kake nesioki ninye aing'uaa ilo kerenket tankaraki ng'olng'ol natii apa inie nayeutua Lyiaudi. Kore kuna baa naa keigero to mbuku ee Asat ee Lkipaareta motua e tomon o sapa, lkereri le imiet metabaki le tomon. Kore payie einyuototo te Tesalonike, nelo lkerenket le Berea, neitoki alo lkerenket le Aten. Kore etii Aten, neipaaya lboitiei lenye Timoti mechomo Tesalonike payie eitogol nkanisa, neitoki alo kue eiteng'en ninche. Kore inia kata naa keloito Paulo koon Korinto. Indim atisipu ana bae to motua e uni, lkereri lekue metabaki le okuni. Nelotu Timoti tesiedi lkerenket le Korinto, nelimu lomon le Tesalonike o neikuna nkanisa payie eitache to nkurukoto meata lng'ach abaki eritae, neibooritae. Kore etii Paulo Korinto neigeroki inia anisa payie eitogol, neitoki sii awoliki ninche nkuti baa naaiparaki, aa oleng mbaa naaipirita nchukunoto e Yeso.
Keyieu apa Paulo neitogol nkurukoto ee ltung'ana le Tesalonike te nkiteng'ena e Kristo, metaa kewueni to nkoitiei naaichiaakino. Nelikoo koon ana nkitanyanyukoto supat naaidim ninche aatoduai. Neitoki awoliki ninche nkipara naiparutua. Kebaki naa ketii apa ltung'ana le nkanisa ootuata ng'amata naitamaki nkanisa sina. Kore lolo ootung'ayieki, naaku meyielo ninche aajo kore kenya inia parri nalotu Kristo aya nkanisa enye, naa nyo naasai too lolo ootuata apa. Neliki ninche ꞉Paulo areki nchere, kore lolo pooki ootuata eiruko Yeso naa keti ninche siana, naa ninche oojing tekue atua nkichon nemeiting. Indim atisipu ana taatua motua e ong'uan, lkereri le tomon o ile.
Keigero ꞉Paulo ana palai payie elej, neitogol lolo le Kristo ooitamitae sina, ajo keti Nkai tenebo o ninche, naa keisul ꞉ninche ta nkata e nkiting'oto, tenerrunyunyie kenya Kristo aya lolo oaara lenyena. Tankaraki inia, keichiaakino neng'iri ninche tee nyamalitin, newueni to nkoitiei nayanyit Kristo, te ng'ida o mpijan.
Currently Selected:
1 Ltesalonike Mbaa naaituruku: saq
Highlight
Copy
Compare
Share
Want to have your highlights saved across all your devices? Sign up or sign in
© 2021, Bible Translation and Literacy