Lubaakico N̰amaakeetee Iisa Masi 21

Pol torgowwa geegar ka Zerizalem

1Maa ni pirgiyɗe ma ajaawaŋgeeco giimi ma temekka saananti Iisa Masi koo ku Epez, nii deeɗe kalpa markaba ni kaatiɗe saa cur kiɗa ta Kos ma kadirenta ma ammi. Gaa ma ta sokkonta ni ƴiiliɗe kiɗa ta Rood ma kadirenta kulla ma ammi. Gaa min iŋaa, ni sarɗe geegar ka Patara. 2Iŋaa pa, ni gasse payya markaba kaƴi ma kataa ta kiɗa ta Pinisi, nii deeɗe kalpa ni kaatiɗe. 3Gaa maa ni gaɗaɗɗo ma markaba, ni elliɗe kiɗa ta Sipire ma kadirenta ma ammi ma ta n̰ugila, nii ƴiiliɗe kiɗa ta Sirii. Nii sarɗe geegar ka Tir. Nii deeɗe berra iŋaa asan gu giimi deeɗiy berra lawti markabati. 4Iŋaa pa, ni gasse giimi ma jobokkaa ka Iisa Masi, nii nuntiɗe ma guta meeni paysara. Guta pa ma gudirane ta Ruuhanti Mellayi beneyyiyee oko Pol, goo ga addo kaata ɗa Zerizalem. 5Gaa maa gu meeni ku paysara gaamiɗe, nii kaatiɗe. Guu seneeta ku Tir ma daacco o ronco izinni namma ya biiti geegarri. Gaa were kaaka, biití baharre ta yaata, ni darsiɗe ni enewɗiya Mella. 6Gaa maa ni leeɗe paaɗe maraw aattini, nii kalpiɗe markaba, seneeta pa yooke paaɗe gerraco.

7Nii gaamiyya turguwtini ma markaba oko kaatitini min oko geegar ka Tir namma ya geegar ka Potelmayis. Iŋaa pa ni salammiy seneeta, nii nuntiɗe ma guta meene kaƴi. 8Gaa ma ta sokkonta kaƴi pa ni ƴiiliɗe, nii sarɗe geegar ka Sezaree. Iŋaa pa ni dee suuba girti Pilip. Gata kaaka pa, ay tasaawa ka kabarre ta daana o ga ay kaƴi min oko miɗi ku paysara maa gu apire Zerizalem gaayico n̰amaakeetee Iisa. 9Pilip kaaka pa lekka miici pooɗi gomossi ma sokokke ɗa missa miɗi, ma tasaa beneyyiŋgee ma asaa min Mellayi. 10Maa ni lekkiɗo paaɗe meeni maani pa iŋaa, gaa nabiinice kaƴi maa gu semeetee goo Agabus asiɗe min kiɗa ta Yudee. 11Maa ga asinnii gassa, gaa icciyya sippu maa ga Pol onoɗɗica abuuti, gaa onniɗiy pittee o asintee, gaa Agabus beneyyiɗe gaa: «Ruuhanti Mellayi gee: Milti sippu keeke, gu Yawudigee deeɗiya onna pe aleŋ teete aɗe gonek Zerizalem. Guu biriyyooga oko giimi ma ay Yawudigee ɗa.»

12Maa ni giyyiyya beneyti kaaka ma seneeta ku Sezaree, nii malmiliyya Pol ni ga addo kaata ɗa Zerizalem. 13Gaa gata pa tiilinni gaa: «Ayme ku erecɗinaw ku aŋkiɗo ga ziitu kollinno? Naata pa oyee ɗa ma onno ka, na oyee muutu kulla Zerizalem saananti Miltine kee Iisa.» 14Mileŋ ga poociya beneytini pa, ga nii kulla duwiyee ga kaatiɗe. Nii beneyyiɗe nii: «Ga ka Mellayi maa ga aŋka dee!»

15Maa ni leeɗe meeni paalta Sezaree, nii yayyimɗe ma ka turguwwi. Nii kaatiɗe geegar ka Zerizalem. 16Guu giimi daare ma jobokkaa ka Iisa Masi ku Sezaree izinni gu kaatikkikini girti gimu kaƴi aɗe maa gu semeetee goo Menason, nii deeɗe suuba. Gata pa ay ka kiɗa ta Sipire, o ga ay gimu ma jobokkaa ka Iisa Masi min tippa.

Pol kataa girti Zak

17Maa ni asiɗe iŋaa Zerizalem, guu seneeta deeɗinii jooba ma daana. 18Gaa ma ta sokkonta kaƴi, ni kaatiɗe ma giitini Pol girti Zak ni deeɗiya ella. Gaa iŋaa ni deeɗiy gassa kulla ajaawaŋgeeco giimi ma temekka saananti Iisa Masi guu temekke. 19Maa ga Pol salammiɗiy, gaa jeppiyyoogu gaari paracco kaƴi kaƴi maa ga Mella leyyee oko lubbiti aacco giimi ma ay Yawudigee ɗa. 20Maa gu giyyiyya beneyti kaaka, guu logokkiya paracco Mella, guu beneyyiyyee oko Pol goo: «Ellu ƴa sintini, giimi alpaŋgee min Yawudigee ma dowwiy galbigeeco oko Iisa o paracco gu sokokkiy zeneeco ku maa gu joboɗɗiy hukumnigeetee Muusa. 21Guu giyyiɗe kadar ki beneyyayo oko Yawudigee ma nowotte aacco oko giimi ma ay Yawudigee ɗa kii gu poociy hukumnigeetee Muusa o kii gu aɗaayo taharra ɗa oko ronco ku miɗitta, o kii gu addo jobokka ɗa aadaŋgeeco Yawudigeyyo. 22Ni lee pe nii me? Asan gu leewa ma seene kabarre kadar ki ase. 23Kii pa leyya latta maa ni beneyyam. Ni lekka iŋee miɗi pooɗi ma halpayye unti Mellayi. 24Aɗiko ma kii ku deeɗo apila ku deeɗo samaane unti Mellayi, o ki pilkayo gurus ka saɗikanco ku maa gu surɗiɗiy kayyeeco maa gu gaariɗo kadar gu gaamiya lubbico maa gu halpayiki unti Mellayi. Goŋŋa gu giimi paracco leewa kabarre kadar gi gooco giimo maa gu beneyya ma gaarcam ay seene ɗa o gu leewa kabarre kadar ga kii jobokkay hukumnigeetee Muusa. 25A giimi ma ay Yawudigee ɗa pa, guu dowɗiy galbigeeco oko Iisa, ni icce niyyane, nii kitipiyiyyo maktup nii gu addo ayamma ɗa suuɗu ka saɗikiyenta oko zorro o gu addo teewa ɗa baara o gu addo ayamma ma ay ka daɓisiyenta ɗa o nii gu addo diyya ɗa daati e baŋ pa miɗi bala paate.»

26Gaa Pol kaatikkiko miɗi ku pooɗi guta. Gaa ma ta sokkonta, ga diiliɗe ma guta apilo gita tee maa gu deeɗo samaane unti Mellayi. Gaa un̰n̰iɗe dooranti girti Mellayi ku maa ga deeɗiyo beneyya oko soƴoowee ku saɗikaŋgeyyo baŋ gu meeni ku apilti gakamma minke ku maa gu sooƴiyyee saɗikane oko kulla kaƴi aɗe min oko giimi ku pooɗi kotti.

Pol gu bakamma girti Mellayi

27Meeni ku paysara kotti pa, gi apilco Pol ma gittee miɗi ku pooɗi koo gakamme ɗa missa, guu Yawudigee ku kiɗa ta Aazi ma asee elliyya Pol girti Mellayi. Ay ɗakko appe gu issiyyooca oko giimi paracco ma aaye girti Mellayi, guu toogiyya. 28Guu cayyikiɗe ma raɗɗa goo: «Giimi ku Isirayel, moogoŋ! Ay gata appe keeke ga gimu ma beneyyayo miɗɗa oko giimi ku wereeriyee paracco ma gaarco giimi ku Isirayel o ma gaari ku hukumnigeetee Muusa o ma gaari ku girti Mellayi keeke, o ga isse saa kulla haŋka giimi ma ay Yawudigee ɗa aatti girti Mellayi. Ma keeke pa, ga niŋgiya girti Mellayi keeke ma duwenta oko gata ka.» 29Guta pa beneyyiya keeke asan ga meenta gu elliyya Toropim ma ay Yawudince ɗa ma asaa min geegar ka Epez, gaa tan̰aa ma giiti Pol aatti Zerizalem. Gaa oko kanco ka, gu lewɗe goo walaŋ ga issiya ɗakko girti Mellayi.

30Guu giimi ku geegarri waciɗe hawwanti. Gaa min wereeriyee paracco gu joloyloyɗo gu asawɗo, guu asiyya baama Pol gu cimmiya renta min girti Mellayi, guu agisiɗiy beneeco burgaggo. 31Guu aŋkiɗo diyawti Pol. Maa ga beneyyi kaaka sariyyee oko tattuwe ka tatta ka asaakargeyyo kadar gu giimi paracco ku Zerizalem yagee, 32gaa koɗok ga tattuwe ka tatta pa kolliɗe taattuweeco asaakargeyyo o asaakargee, guu gaɗɗiɗe oko were ka giimi ku maani kotti. Maa gu giimi ku maani kotti elliyya tattuwe ka tatta ma asaakargeetee, guu duwɗe tammiti Pol. 33Maa ga tattuwe ka tatta ka asaakargeyyo asiɗe unti Pol, gaa leeɗiyoo oko asaakargeetee gaa: «Onnoŋga gimu keeke ma janaazargee seera.» Gaa inniɗiy giimi kotti gaa: «Gata gimu keeke soo ay we, o ga leelo me?» 34Gaa min aacco giimi kotti gu daare ƴa cayyakɗo cayyiko kaƴi o daare kulla cayyakka cayyiko kaƴi. Gaa ma hawwanco o amsico taata, ga tattuwe ka tatta gata alɗica gassa ɗa payya seenico gaari kotti. Gaa leeɗiyoo gaa gu aɗiki ger ka tatta ka asaakargeyyo. 35Gaa maa ga Pol warriɗe were ka doppoŋgee ku kalpiti girco asaakargeyyo, guu asaakargee icciyya gu poŋŋikki asan gu giimi aŋakkiyee pile miɗɗa, 36o gu giimi jobokkaa Pol ma cayyiko goo: «Deyyoŋga!»

Pol beneyya unco seneetee ku Yawudigeeta

37Gaa maa gu eseɗɗiya paaɗe ger ka tatta ka asaakargeyyo, ga Pol inniyya tattuwe ka tatta ka asaakargeyyo ma beneyco Gireknigeyyo gaa: «Ban̰n̰u ɗe ki oyyiyaw na beneyyiyam.» Gaa gata pa tiiliyyee gaa: «Kii ibinya beneyco Gireknigeyyo e? 38Kii ay gimu ka Masir kee ɗa ka ɗeɗe ma oome katta kee ka sawriyyiti goosigeyyo ma alpaŋgee pooɗi miɗi?» 39Gaa Pol tiiliyyee gaa: «Naa ay Yawudince ka geegar ka Tarse ma aaye kiɗa ta Silisi. Na ay gimu ka geegar ka tatta. Ban̰n̰u oyyaw ɗe na beneyyiyyoo oko giimo.»

40Gaa tattuwe ka tatta ka asaakargeyyo oyyiyyee. Gaa Pol waciɗe ga warriɗe were ka doppoŋgee ku kalpiti uwwa, gaa tooriyyooga pitti oko giimo. Maa gu ƴaapiɗe, gaa beneyyiyyoo ma beneyco Ebireenigeyyo gaa:

Currently Selected:

Lubaakico N̰amaakeetee Iisa Masi 21: mmy

Highlight

Copy