Lubaakico N̰amaakeetee Iisa Masi 11

Piyer unco giimi ku Zerizalem ma temekka saananti Iisa

1Guu n̰amaakeetee Iisa o seneeta daare ma dowwiy galbigeeco oko Iisa Masi ma aaye kiɗa ta Yudee giyyiɗe kadar gu giimi ma ay Yawudigee ɗa oyyiya kulla beneyti Mellayi. 2Maa ga Piyer yookiɗe Zerizalem, guu Yawudigee ma dowwiy galbigeeco oko Iisa Masi makkiyyee goo: 3«Ayme ki un̰n̰iɗe girco giimi ma ay Yawudigee ɗa, kii teeɗe ma guta?»

4Gaa Piyer gemmiyyoogu kaƴi kaƴi gaari paracco ma deero gaa: 5«Maa na alɗo geegar ka Jappa na enewɗo Mella, ga Mella beneyyiyaw aleŋ ma waano. Naa elliɗe latta kaƴi aɗe ma ay aleŋ targane yaata pirriyenta o gi baamenta min beneeti poɗɗacco, gii berewɗo min samaani gi asiyyaw katta. 6Naa elelɗiy samaane lawwi ma aaye aattí. Naa elliɗiy gaaruwi maa gu asinco pooɗi, o gaaruwi ku kayni, o daare ma dapaa o ma soysoyya o ɗiiɗi. 7Naa giyyiɗe ur̰e ma beneyyiyaw gee: “Piyer! Wacu ki daɓisiyɗo, kii aymiɗo!” 8Naa tiiliɗe naa: “Kaw, Miltu! Na ayme ɗa kaytiŋ gaaraw maa gu hukumnigee ku Kitamniti Muusa toɗokke aymiti e baŋ ga ma negekkano unti Mellayi.” 9Naa giyyiɗe payya oko ma daa ta seertiŋ ur̰e ma beneyyiyaw min samaani gee: “Maa ga Mella gaa gu samaane aymiti, ga kii pa aɗiko lee ɗa kii gu negekkatoŋ unti.” 10Beneyyi keeke pa ɗilliyaw subbatiŋ, gii targane taata ma lawti yookiɗe samaani.

11«Gaa oko wikinne kaaka saa gu miɗi subba asiɗe ger maa ni alɗo. Miɗi kotti pa gu n̰akammawgu min geegar ka Sezaree. 12Gii Ruuhanti Mellayi beneyyiyaw gee na addo ma guta bala bammiti seera seera. Guu seneeta ku bizgiƴi koo maa na askikoo iŋee untoŋ, ezeɗɗinoo Sezaree, nii un̰n̰iɗe parattini girti Korney. 13Gaa Korney gata kaaka gemminni baŋ ga malaykat asiyee gaa me girti ga asiyyee beneyya gaa: “Korney, n̰aamu giimi geegar ka Jappa gu deeɗiya kolla Simo maa gu kolaa kulla goo Piyer ga asiɗo. 14Gaa asiyyamga gaara beneyyi ma najjayyam, kii o gimcam paracco ku giiri.” 15Gaa maa na diiliɗe na beneyɗiyo, gii Ruuhanti Mellayi beeriyyo aleŋ maa gi beerinne oko kee diiliti. 16Naa mooyiyya beneyti Miltine maa ga beneyye kee gaa: Yaaya batisiyiy giimi ma ammi, kuŋ soopa akka dee batisiyenta ma Ruuhanti Mellayi. 17Mella pa biryooca Ruuhanti oko giimi ma ay Yawudigee ɗa aleŋ maa ga birinneeca oko kee maa ke duwɗiy galbigeetine oko Miltine kee Iisa Masi. A naa pa, ay we pe soo maa na gederriɗo na toɗɗiyee oko Mellayi?»

18Maa gu giimi kotti giyyiya beneyti kaaka, guu galbigeeco asiyyoo, o gu logiya Mella goo: «Ay ma seene pe ga Mella biryoo kulla oko giimi ma ay Yawudigee ɗa gudirane ta meelo ta gaarco ku miɗɗa, guu gassiɗo hayaatane ma gakamma ɗa ta kaw.»

Giimi ma temekka saananti Iisa geegar ka Antiyos

19Oko diigane ma deero namma gu deeɗiya Etiyen, gu giimi ma dowwiy galbigeeco oko Iisa Masi tacile min Zerizalem, guu kaatiɗe kiɗaayee daare. Daare ɗe kaate kiɗa ta Pinisi o daare pa kaate kiɗa ma kadirenta ma ammi ma goo Sipire o daare pa Antiyos ma aaye geegar ka kiɗa ta Sirii. Oko wereeriyeeco maa gu kaatiɗe kotti, gu taasica kabarre ta daana ta Iisa oko Yawudigeyyo ka. 20Innasoopa gu giimi daare ma dowwiy galbigeeco oko Iisa Masi ma ay ku Sipire o ku Siren, guta kotti pa kaate Antiyos, gu deeɗica taasa kulla kabarre ta daana ta Miltine kee Iisa oko giimi ma ay Yawudigee ɗa. 21Gaa Mella gaayiɗiy ma gudiranti, ay ɗakko appe gu giimi maani ma ay Yawudigee ɗa amanniɗe oko beneyco kaaka, guu jobbiyya ka Miltine kee Iisa.

22Maa gu giimi ma temekke saananti Iisa Masi ku geegar ka Zerizalem giyyicca kabarre taata, guu n̰aamiyya Barnabas Antiyos. 23-24Barnabas pa, ay gimu daŋgam, o ga dowwica ta tirta teete galbanti oko Iisa, o gi galbanti unenta ma Ruuhanti Mellayi. Gaa maa ga sarɗe Antiyos, gaa elliyya gidaanuwti Mellayi maa ga gaariyoo oko giimi ma dowwiy galbigeeco oko Iisa. Gii deeɗiyee daanee, o ga beneyyiyoo beneyyi maa gu baamicca talta amannico oko Miltine. Guu giimi maani payya duwɗiy galbigeeco oko Miltine kee Iisa.

25Maa gu gaari kooko ƴiiliɗe, gaa Barnabas kaatiɗe ga deeɗiya diyya Sol geegar ka Tarse. 26Maa ga deeɗiya gassa, gaa deeɗiki asa Antiyos. Guu nuntiɗe sawa ƴila parattí ma giimi ma temekke saananti Iisa Masi geegar ka Antiyos, o gu gaariyoo beneyti Mellayi ma gaartee Iisa oko giimi maani. Ay iŋaa pe Antiyos maa gu giimi diiliɗe gu oyyiyo seme oko giimi ma jobokkaa ka Iisa Masi goo Kerettiyennigee#11.26 Seme ku Kerettiyen kooko pa, gi balco okomma min oko semeetee Iisa Masi maa gu kolowɗiya ma beneyyi ka Gireknigeyyo goo Yeesu Kiriis. Masi pa, okomma min beneyyi ka Ebireenigeyyo, o Kiriis, okomma min beneyyi ka Gireknigeyyo, seme ku seera kooko goo ‘gimu maa ga Mella aparre’. Ma kaaka pa, gu Kerettiyennigee kooko ay giimi ma jobokkaa kanti Yeesu Kiriis..

27Oko wikinne kaaka pa, gu nabiinigee ma dowwiy galbigeeco oko Iisa wace min Zerizalem gu kaatiɗe Antiyos. 28Gaa min aacco oko nabiinigee kotti, ga lekkiɗo kaƴi maa gu semeetee goo Agabus. Gata pa gi Ruuhanti Mellayi gaayiya, gaa waciɗe ga taasiyyoo oko giimo gaa: «Katta gi maya yaata akka gala oko dunuune parattí.» Maya taata pa, maa ga beneyya aseero wikinne maa ga Kilod alɗo tattuwe ka tatta ka Rooma. 29Gaa maa gu giimi ma jobokkaa ka Iisa giyyiyya beneyti kaaka, guu boodiɗe goo gu cepekka maatiki kulla gimu aɗe beraa maa ga lekka ka. Guu tappiɗiy lawco kotti maa gu cepekke gu biriyyoogu oko seneeta ma dowwiy galbigeeco oko Iisa ma aaye kiɗa ta Yudee. 30Ay keeke appe maa gu leelo. Guu biriyyoogu lawwi kotti maa gu cepekke oko Barnabas ma giiti Sol gu itiriyyoogu oko ajaawaŋgeeco giimi ma temekka saananti Iisa Masi ku kiɗa ta Yudee.

Currently Selected:

Lubaakico N̰amaakeetee Iisa Masi 11: mmy

Highlight

Copy