2 Abhatësarönikë 1
1
Amakëërërryö
1Ritashandighi reno nö-öni Pauro ndyandëkirë toona Siriwano#1:1 Siriwano. Mo-maandeko aghandë arabherekerwa igha Siira. hamwë na Timoteo. Ekanisa iya umughi ghono ghokobherekerwa igha Tësarönikë, m-bëënyu tukwandekera, abhantö bhano mukukumya Taata uwëëtö Waryobha na Omonene uwëëtö Yëësu Kiristo.
2Taata uwëëtö Waryobha na Omonene uwëëtö Yëësu Kiristo, bhabhahaane örööbhö na omorembe.
Okobhotora ikiina ukwa Waryobha hano Yëësu arikyora
3Abhakumya bharikyëtö, ni-igha tukumi Waryobha senkaagha syonswe igho, ko okoghera iya bhëënyu, ko bhoora umukumo ughwënyu nkoneneha ghörë bhököngʼu, ghwiki okohanshana ukwënyu, nköghëndërrya körë okoneneha. 4Ku bhuyö nkwikumya törë mo-makanisa agha Waryobha, ko okoghera iya ököghömërrya ukwënyu, na umukumo ghono moonagho ku-nyanko yonswe igho, na inyaanyi eno mukunyoora.
5Ghayö ghonswe igho nkwörökya gharë igha, okobhotora ibhiina ukwa Waryobha, n-kwa heene. Okobhotora ibhiina kuyö nkoraaghere bhëënyu mongʼaarre okosoha mo-Bhokama ubhwaye, bhono mukunyankera. 6Ku bhuyö Waryobha m-bwa heene arekora, ku ukunyankya bhano bhakobhanyankya. 7Bhëënyu bhano mukunyankibhwa, murimuunya inyanko iyëënyu hamwë na bhëëtö. Ni-igho Waryobha arekora, enkaagha eno Omonene Yëësu aremaahekana ararwa mu-ryobha. Nariisha na ëbhëmörë ibhya omorro hamwë na abhamaraika abhaaye abha obhotoro. 8Hayö ho arehaka ikisiiyomba ko bhano bhakwanga Waryobha na bhano bhatakosooka Amangʼana Amaiya agha Omonene uwëëtö Yëësu. 9Ubhushibhu bhuyö, mbörëghëndërrya okobhasikya amakora ghonswe igho, kora mbarebha hare na Omonene Yëësu, na ubhuhika ubhwaye obhonene. 10Urusikö roora Omonene Yëësu arikyora, narëtöönibhwa na abhantö abhaaye, kora naresookwa na abhantö bhonswe igho bhano bhakumukumya. Na bhëënyu bhonswe moreebha-mo, ko bhoora mwikërëëyi engʼana eera twaabhatëëbhëri.
11Ku bhuyö nkobhasabhera törë sinsikö syonswe igho igha, Waryobha uwëëtö abhakore morengʼaane na keno yaabhabhërëkërra. Ghwiki nkobhasabhera törë igha, ko obhotoro ubhwaye, ahekerani amangʼana amaiya ghano mukutuna okokora, na okohekerania emeremo ighyënyu ghyonswe igho ighya umukumo. 12Ni-igho tokosabha, okore iriina irya Omonene uwëëtö Yëësu, rëtöönibhwinga okohetera kö-bhëënyu. Kora bhëënyu mötöönibhwinga ko okoghera iya Yëësu. Ghayö ngarebha ko okoghera iya örööbhö urwa Waryobha uwëëtö, na urwa Omonene Yëësu Kiristo.
Currently Selected:
2 Abhatësarönikë 1: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.