Ŋúnuyɔ 96
96
Duniya wi mìɛni 'yɛli wi de ŋú Yewe mɛ́
(Kaj1 16.23-33)
1Yeri ŋúnuvɔngɔ ŋú Yewe mɛ́ wè#96.1 Koliyo 1-13 tiʔɛ nī gè, wéli baa Kaj1 16.23-33. !
Duniya wi mìɛni wè, yeri ŋú Yewe mɛ́ wè !
2Yeri ŋú Yewe mɛ́ wè, yeri kpuʔɔrɔ tari wi míʔɛ nɛ̄ gè !
Yeri ki jáari cɛngɛ ó cɛngɛ kɛnmɛ bíì nɛ̄ wiī nɛ siɛn suu wè !
3Ye‑ wi kpuɔmɔ wuʔu juu gè kùlogolo mɛ́ gèle,
yeri wi kakpoliyo nyu yè siɛnfeliye yi mìɛni mɛ́ yè.
4Nɛ́ ki cɛ́n Yewe wi 'kpúʔɔ, wi 'yɛli nɛ́ kpuʔɔrɔ ní,
weli 'yɛli bèri fìʔɛ́ wi nɛ̄ bè tóri kulocɛlɛlɛ pe mìɛni nɛ̄#96.4 Wéli baa 89.7; 95.3..
5Nɛ́ ki cɛ́n kùlogolo kálì siɛnnɛ pe kulocɛlɛlɛ pe mìɛni, pe wè yafiɛnʔ,
nɛ̀ ki yaʔa Yewe wi 'nyìʔɛnɛ faan lè#96.5 Wéli baa 115.3-7; Sél 1.1..
6Nyíʔɛnimɛ nɛ́ kpuɔmɔ pi 'wi màʔa nɛ̀ suʔu,
ŋɔri nɛ́ cɛ̀nmɛ pi 'wi saawalidɛngɛgɛ nyì gè.
7Yeli bálì bīɛlɛ kùlogolo nariyɛ yè,
ye‑ Yewe kpuɔmɔ cɛ́n bè nɛ́ wi ŋɔri ní dè !
8Ye‑ kpuʔɔrɔ taʔa Yewe nɛ̄ wè
nɛ̀ yɛli nɛ́ wi míʔɛ ki kpúʔɔgɛnmɛ ní bè !
Yeri jiin wi Gbùʔɔrɔsaʔa dàliyɛ nī yè nɛ́ yeli yakɔnrɔ ní dè.
9Ye‑ tuu ye cúbulo ye Yewe gbùʔɔrɔ wè,
wire ŋáà wī Tiɛlɛfun Kulocɛliɛ níɛ nyíʔɛnɛ wè#96.9 wire ŋáà wī Tiɛlɛfun Kulocɛliɛ níɛ nyíʔɛnɛ wè: Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: nɛ́ cìilimɛ fɛ̀ninɛ ní. Wéli baa 29.2..
Dàala siɛnnɛ pe mìɛni peri fún de yàʔará wi yiʔɛ mɛ́ gè !
10Yeri ki nyu siɛnfeliye mɛ́ yè, ye jo:
«Yewe wiī Kùlofɔli !
Duniya wi 'fèriye kɛn yè, wi wè nɛ cúunguʔ.
Yewe wiī nɛ kàyuʔu nyu siɛnfeliye nɛ̄ yè nɛ́ sínmɛ ní.»
11Ki 'yɛli nyìʔɛnɛ ni de fundaanra kpínʔini dí dàala ni de muguri !
Kuʔɔjii lakuruyo yi de tùngú nɛ́ ki laamɛ yɛrɛ ti mìɛni ní dè !
12Ki 'yɛli siiye yi‑ puu fundaanra nɛ̄ nɛ́ yɛrɛ dáà ti mìɛni dī yi nī yè,
dí kákpuɔ tiire ti mìɛni de fundaanra yékpuʔulo wáari
13Yewe yiʔɛ mɛ́ gè, nɛ́ ki cɛ́n wiī nɛ báan !
Wiī nɛ báan bè pa kàyuʔu juu dàala siɛnnɛ nɛ̄ bèle !
Wi bé kàyuʔu juu dàala siɛnnɛ nɛ̄ bèle nɛ́ sínmɛ ní,
wi bé kàyuʔu juu gè siɛnfeliye nɛ̄ yè nɛ́ kányiʔɛ ní.
Currently Selected:
Ŋúnuyɔ 96: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
