Ŋúnuyɔ 7
7
Yewe yo, -tànʔa kɛn m'mɛ́ !
1 Dawuda funbiɛnrɛ ŋúnugo#7.1 Kiì fílige nɛ̀ cɛ́nʔ. A we 'ŋúnugo siɛnrɛ ti mìɛni cò dè eburu siɛnrɛ nī dè, ki kɔri wi bé gbɛ̀ jo: «funbiɛnrɛ ŋúnugo.» gī, gàa wi 'ŋú Yewe mɛ́ Kusi#7.1 Kusi wi bé gbɛ̀ puu siɛn wáà wiyè cɛ́n wèʔ, wi yé puu baa kùlofɔli Sawuli wi kpáa nī gè, baakuɔlɔ nī bèle. Pàli nɛ ki sɔ̀ngí nɛ̀ jo dùʔɔ wi 'kɔ́n Sudan kùlo mɛ́ wī; eburu siɛnrɛ nī dè, Sudan kùlo lè, pe 'puu nɛ ni ye «Kusi» (wéli baa Sam2 18.21-23). wuʔu nɛ̄ gè, ŋàa wi 'kɔ́n Bɛnzamɛ saʔa tùlugo nī gè.
2ʔé Yewe mi Kulocɛliɛ, muɔ láara mi 'fɛ̀ nɛ̀ làri.
‑Mi suɔ pe kɔli nī, bàli pe mìɛni pe mi cìrá bèle, ‑mi suɔ pe mɛ́ !
3Á kire bɛ̀ʔ gè, pe bé mi cɛnminɛ
majo bɛ̀ jàri wí cî yajuʔu cɛnminɛ gè,
m'bé kò kaanyigele; siɛn sǐ taa bè mi cò bè mi suɔ pe mɛ́ʔ.
4Yewe mi Kulocɛliɛ, a ki 'nyaa mi nyɛ́nì ki kpíʔile gàa pe nyu gè,
a mi kiyɛ yi 'kapiʔi kpíʔile gè,
5a ki 'nyaa mi 'koli mi kàdɔnwɔ wáà mɛ́,
á mi 'ki yaʔa a mi piɛn wi 'fɛ̀ nɛ̀ suɔ tànʔa fùn wè#7.5 Siɛnnɛ pálì nɛ̂ tiʔɛ gáà siɛnrɛ yiʔɛ dè nɛ̀ jo: A mi 'mi leguu yɛrɛ cáan nɛ̀ suɔ fànʔa nɛ̄, tànʔa fùn gè.,
6‑ki kpíʔile mi leguulo pe‑ mi cìra jò,
bè mi tánʔana tárigɛ nī gè bè mi fulolo wiiwe,
bé mi míʔɛ cúʔɔ gè bè màʔa. Ye‑ ŋɔ́ cɛ̀.
7ʔé Yewe, yɛ̀ nɛ́ muɔ funyɛrigɛ ní gè !
Yɛ̀ ma yéri mi piɛnnɛ pe fundanʔanigɛ kúrugu gè !
Yɛ̀, Yewe mi Kulocɛliɛ, mi kɛnmɛ nɛ̄; ma mi sáʔa,
muɔ ŋáà ma 'kàyuʔujuuro sɔ́migɔ dè nɛ̀ tɛ́ngɛ dè.
8Ki 'yɛli kùlogolo gboli ni‑ muɔ màʔa bè suʔu;
muɔ wè, dí muɔ sí tɛ́ni pe naamɛ gè.
9Yewe yo, muɔ wī kùlogolo ke 'kàyuʔujuuwo wè.
‑Tànʔa kɛn m'mɛ́ mi sínmɛ pire kɛnmɛ nɛ̄,
bɛ̀ mi yē kolimɔ fùn muɔ yiʔɛ mɛ́ gè !
10Ma siɛnpiiwe wi kakpiʔiligele yérige gèle,
má lìrimɛ le siɛnsinwɛ nī wè, muɔ ŋáà wī Kulocɛliɛ sínwɛ wè,
muɔ ŋáà ma funyɔ nɛ́ sɔ̀ngirɔ siʔɛ dè nɛ wéli dè#7.10 Wéli baa Tìɛ 2.23..
11Kulocɛliɛ wiī mi timɔzigege,
wire wiī nɛ siɛnsinminɛ suu bèle.
12Kulocɛliɛ yē kàyuʔujuuwo ŋáà wi síngi wè.
Kulocɛliɛ fungo kiī nɛ tanʔana cɛngɛ ó cɛngɛ siɛnpiile kúrugu bèle.
13A siɛn ŋíì 'cíi nɛ́ jo wiǐ láʔa wi kapiʔile nɛ̄ gèleʔ,
Kulocɛliɛ nɛ̂ wi kapiɛngbuɔn ŋɔsii juɔ wè#7.13 Eburu siɛnrɛ nī dè, ki 'jo: wi nɛ̂ wi kapiɛngbuɔn ŋɔsii juɔ wè. Wiyè ki cɛ́n ŋàa wuʔu ki 'juu náʔa gèʔ, Kulocɛliɛ wire wī yo, leguuwo wī yo, kiì cɛ́nʔ. Ki bé ní gbɛ̀ yiʔɛ bè juu bé jo: Leguu wi nɛ̂ wi kapiɛngbuɔn ŋɔsii juɔ wè.
níɛ̀ wi sandali gbòbori gè nɛ̀ yaʔa.
14Wiī nɛ yakpuɔnrɔ gbòborí nɛ yɛri dàa ti yɛrɛ kpúu dè,
nɛ́ kàsun ŋaaya#7.14 Pe 'puu nɛ ŋaaya kpínʔini yè níɛ̀ kàsun tùɔndiɛyɛ kpíʔile yi nɛ̄, bèri leguulo pe kàaya sórigi yè. ní yè.
15Ye‑ ki wéli: ŋàa wi sɔ̀ngibiire sɔ̀ngí dè,
wi 'kolimɔ laala taa lè nɛ̀ káfinɛrɛ sii dè.
16Wiī nɛ kàwiʔi túru gè nɛ ki cùugí,
wire tíimɛ nɛ̂ koli nɛ̀ tuu ki kàwiʔi nī gè.
17Kolimɔ kaala náà wi gbòborí lè, ni nɛ̂ koli nɛ̀ tuu wi nyùgo nī gè.
Fungbɛngɛ kele gálì wi kpínʔini gèle,
ke nɛ̂ koli nɛ̀ tuu wi kànyaa nɛ̄ gè.
18M'béri Yewe síɛri wè wi sínmɛ pire kɛnmɛ nɛ̄,
m'béri wi míʔɛ ŋú gè: Yewe wè,
wire ŋáà wī Duniya wi Mìɛni Nyùgo nɛ̄ gè.
Currently Selected:
Ŋúnuyɔ 7: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
