Ŋúnuyɔ 38
38
Mi 'mi kapiʔile juu gèle níɛ náari bè puʔɔ
1 Dawuda ŋúnudanʔa gī gàa pe ŋú nɛ́ yakpuɔnrɔ ní dè. Bè sɔ̀ngi daa.
2 Yewe yo, fǎga puɔ muɔ funyɛrigɛ nɛ̄ gè bèri mi wuʔɔʔ !
Fǎga ní puɔ muɔ fundanʔanigɛ nɛ̄ gè bè mi kpúɔnʔ !
3Nɛ́ ki cɛ́n muɔ ŋaaya yi pɛ́nì jíin mi nī,
a muɔ kɔli ki 'mi seri nɛ̀ tárigɛ.
4Muɔ funbiɛnrɛ tire kɛnmɛ nɛ̄, mi céri ti mìɛni nɛ yáa.
Mi cériwiimɛ pi mìɛni 'cúʔɔ mi kapiʔile keli kɛnmɛ nɛ̄ bè.
5Mi kolimɔ pi 'gbuʔulo nɛ̀ kpàʔala nɛ̀ mi nyùgo fɛ́nigɛ gè,
majo tugoro dī dàa ti 'lúbugo mi nɛ̄ dè.
6Mi nɔmirɔ ti 'fúnʔɔ a ti nùgo ki 'pii;
mi kàala ke tɔ̀ni wire wī.
7Mi nyɛ́nì nyùgo cùungu gè fúɔ nɛ̀ pɛ́nì tóri,
níɛ tári nɛ mári funbiɛnrɛ nī dè cɛnguɔmɔ.
8Mi 'ki nyaa kàsun yē mi sɛ̀nnɛ nī gèle,
a mi cériwiimɛ pi mìɛni 'cúʔɔ.
9Mi 'nìɛ nyaa ŋɔri fùn á mi céri ti mìɛni ní ŋúʔɔridɔ;
mi nɛ cíɛn mi fungo nī gè fùrɔgɔ kire kɛnmɛ nɛ̄.
10Mi Kàfɔli yo, gàa mi nɛ caa gè, ki mìɛni yē muɔ yiʔɛ mɛ́.
Mi cíɛnmɛ piì làri muɔ nɛ̄ʔ.
11Mi nàzɔn wiī nɛ wáari kpuʔɔ mi nī,
a mi ŋɔri 'ti yiri mi nī, mi nyapigele kpìɛnmɛ pi 'kúɔ.
12Mi yaama pire kɛnmɛ nɛ̄ bè, a mi siɛndɛninɛ nɛ́ mi nàgorilo pe 'fɛ̀ mi nɛ̄;
bàli pe 'kpɔni mi nɛ̄ bèle, a pe 'yéri liilige.
13Bàli piyē nɛ caa bè mi sìi kúɔ wè, pe 'gáriyɛ pari mi yiʔɛ mɛ́ gè.
Bàli piyē nɛ mi wuʔɔgɔ caa gè, piyē nɛ nyu mi cúʔɔmɔ nɛ̄ bè,
piyē nɛ káfinɛrɛ nyu cɛngɛ ó cɛngɛ.
14Nɛ̀ ki yaʔa mi wè, mi yē bɛ̀ dùnɔ tíɛlɛ, mi wè nɛ lúruʔ,
mi yē bɛ̀ bobogo tíɛlɛ, mi wè nɛ mi nyuɔ múgulo gèʔ.
15ʔaan, mi yē bɛ̀ siɛn tíɛlɛ ŋàa wi wè nɛ lúru wèʔ,
kire nɛ̄ mi nyuɔ kiǐ gbɛ̀ yakaa juuʔ.
16Nɛ̀ ki yaʔa muɔ sí mi nɛ siri, Yewe,
muɔ tíimɛ muɔ bé kàa juu mi mɛ́, mi Kàfɔli, mi Kulocɛliɛ.
17Mi nyɛ́nì náari: «Fǎga ki yaʔa pe‑ fundaanra kpíʔile mi kɛnmɛ nɛ̄ bèʔ;
peri pìye nyíɛnɛ mi nɛ̄ a mi tɔligɔ ki 'pɔ̀li gèʔ.»
18Mi n'ŋɛ, ki 'kò cɛ̀ri dí mi tuu,
mi fungo kayaʔa kiī mi nī súuri.
19Nɛ́ ki cɛ́n mi 'yéri mi kolimɔ nɛ̄ bè;
funwuɔrɔ yē mi nī mi kapiile lire kɛnmɛ nɛ̄.
20Nɛ̀ ki yaʔa mi leguulo peli yē sìi nɛ̄, nɛ́ ŋɔri ní;
piyē nìʔɛnɛ bàli mi 'biɛn bèle nyùgofun wè.
21Bàli pe 'kapiʔi líi nɛ kacɛ̀ngɛ fuʔɔ tɔ́ngi gè,
piyē nɛ tíri mi nɛ̄ bɛ̀ mi nɛ tári kacɛ̀ngɛ kúrugu gè.
22Yewe yo, fǎga mi wáa díɛʔ !
Mi Kulocɛliɛ, fǎga kò liilige mi nɛ̄ʔ !
23Te báan fáari ma pa mi sáʔa, mi Kàfɔli, mi Suɔfɔli !
Currently Selected:
Ŋúnuyɔ 38: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
