Ŋúnuyɔ 28
28
Yewe nyɛ́nì lúʔu m'mɛ́ !
1 Dawuda wuʔu gī.
Muɔ wī, Yewe, ŋàa mi nɛ yeri wè.
Muɔ ŋáà wī mi kàdɛnigbaala lè,
muɔ fǎga puu dùnɔ mi náarigɛ mɛ́ gèʔ.
A muɔ 'kò bobogo gè, muɔ sì lúʔu m'mɛ́ wèʔ,
m'bé puu bɛ̀ bàli tíɛlɛ pe jíin kusiʔi nī gè.
2‑Mi yékpoli lúʔu lè bà mi nɛ muɔ fiɛn wè;
‑nyinimɛ taa mi nɛ̄ bà mi nɛ muɔ yeri ma mi sáʔa wè,
bà mi 'mi kiyɛ yɛ̀gɛ yè bè muɔ náari wè#28.2 Bè kiyɛ yɛ̀gɛ yè naamɛ gè bè náari wè, ki yé puu kaliɛlɛ Isirayɛliyé mɛ́ bèle (wéli baa 63.5; 134.2; 141.2; Kùlo1 8.22; Ɛsid 9.5; Nɛy 8.6; Eza 1.15; Tim1 2.8).,
baa muɔ tiɛcɛ̀njɛngɛ wàlidɛngɛgɛ kɔli mɛ́ gè.
3Fǎga mi pínɛ bè cíi nɛ́ siɛnpiile ní bèleʔ,
bàli bīɛlɛ kapiigbiʔilile bèle;
piyē nɛ yanyige siɛnrɛ nyu dè pe siɛnnyɛninɛ mɛ́ bèle
nɛ̀ sí ki yaʔa pe funyɔ yiī nyìyɛ sɔ̀ngibiire nɛ̄ dè.
4‑Pe sàri kɛn wè pe mɛ́ ma yɛli nɛ́ gàa ní pe 'kpíʔile gè,
nɛ̀ yɛli nɛ́ pe kacuʔɔrɔ ní dè dàa pe kpínʔini dè !
‑Pe sàri ma yɛli nɛ́ pe kiyɛ baara ní dè, ‑pe tɔ̀ni kɛn wè pe mɛ́ !
5Bɛ̀ pe wè nɛ tɔ́ri nɛ́ Yewe kakpiʔiligele ní gèleʔ,
nɛ́ wi kiyɛ baara ní dè,
Yewe bé pe cáan dàala nɛ̄ lè, wiǐ ní pe yérigeʔ.
6Kpuʔɔrɔ 'yɛli de tari Yewe nɛ̄ wè,
nɛ́ ki cɛ́n wi nyɛ́nì mi yékpoli lúʔu lè bà mi nɛ wi fiɛn wè.
7Yewe yē mi ŋɔri taadiʔɛ nɛ́ ní mi timɔzigege gè.
Wire mɛ́ mi nìɛ yaʔa nɛ́ mi fungo ki mìɛni ní.
Wi nɛ̂ mi sáʔa; mi fungo ki nɛ̂ puu fundaanra nɛ̄.
M'béri wi gbùʔɔrɔ́ nɛ́ mi ŋúnugo ní gè.
8Yewe yē wi wuulo pe ŋɔri taadiʔɛ.
Wire wī wi siɛnnyiɛnɛgɔnwɔ wi làridiʔɛ bɛ̀ gunliriye tíɛlɛ;
kire tiʔɛ nī wi nɛ̂ suɔlɔ taa lè.
9Yewe yo, ‑muɔ siɛnnɛ suɔ bèle, ma diba taʔa wè muɔ kɔrigɔ nɛ̄ gè !
Ma puu pe sìnbanaʔawa, ma pe gbó súuri !
Currently Selected:
Ŋúnuyɔ 28: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
