Leviiyé 27
27
Fànʔa kajuʔulo gálì ke nyu nyakungɛngɛ wori nɛ̄ dè
1A Yewe 'ki juu Misa mɛ́ nɛ́ jo:
2«Ma ki juu Isirayɛli siɛnnɛ mɛ́ bèle ma kele gálì tìɛ gèle pe nɛ̄:
«A siɛn wáà 'ki nyíɛnɛ nɛ̀ kɔ̀n bè nyakungɛngɛ kpíʔile Yewe mɛ́ wè, bè wìi kɛn kire ga laa bè wi saʔa wuu wáà kɛn Yewe mɛ́ wè#27.2 bè wìi kɛn kire ga laa bè wi saʔa wuu wáà kɛn Yewe mɛ́ wè: Weli 'tiʔɛ gáà siɛnrɛ taʔa dè baa wī bè ti lúʔugɛnnɛ cìile lè. Kire siɛn wi cî wìi kɛn kire ga laa wi saʔa wuu wáà kɛn Yewe mɛ́, wi bé baara saawalidɛngɛgɛ nī gè. Kiì nyaa majo wi cé wi céri kɛn dè kakuɔrɔ yakɔnrɔ wīʔ. Siɛn ó siɛn lɔri ti 'tìɛ nɛ̀ yɛli nɛ́ baara dáà ní wi ŋɔri ti bé jáa bè kúɔ dè, a ki yē nàguɔ wī yo, cɛliwɛ wī yo, nɛ̀ yɛli nɛ́ pe yiʔɛlɛ kɛnmɛ ní bè. Bɛ̀ ki 'puu dí wali níɛ jiin saawalidɛngɛgɛ nī gè bèri ki yɛrɛ gbòborí dè de kpínʔini., wi bé nyakungɛngɛ fori gè bè wali kɛn siɛn sìndiʔɛ nī gè bè tánʔa bè yɛli nɛ́ wali nyuɔ ní gè gàa 'ki tìɛ gè. 3A siɛn wiī yiʔɛlɛ togo nɛ́ yiʔɛlɛ togotaanri sunʔɔmɔ nī bè, a ki yē nàguɔ wī wè, wi lɔri ti bé nyaa walifiiwe walikpegele togosiin nɛ́ kpɔrigɔ, nɛ̀ yɛli nɛ́ saawalidɛngɛgɛ ki wali tɔ́rigɛnmɛ ní bè#27.3 Wali nyuɔ gáà ki yé buu yiʔɛlɛ sicɛri baakuɔwɔ sàri. Kire 'ki tìɛ nyakungɛngɛ gáà ki 'puu yakpuʔɔ.. 4A ki sí nyaa cɛliwɛ wī wè, wi lɔri ti bé nyaa walifiiwe walikpegele togo nɛ́ kpɔrigɔ. 5A siɛn wiī yiʔɛlɛ kogunɔ nɛ́ yiʔɛlɛ togo sunʔɔmɔ nī bè, a ki yē nàgabile nī lè, ni lɔri ti bé nyaa walifiiwe walikpegele togo; a ki sí nyaa pìcapile nī lè, ni lɔri ti bé nyaa walifiiwe walikpegele kiɛ. 6A pùɔ wiī yege nigbe nɛ́ yiʔɛlɛ kogunɔ sunʔɔmɔ nī bè, a ki yē nàgabile nī lè, ni lɔri ti bé nyaa walifiiwe walikpegele kogunɔ; a ki sí nyaa pìcapile nī lè, ni lɔri ti bé nyaa walifiiwe walikpegele taanri. 7A siɛn wi 'tóri yiʔɛlɛ togotaanri nɛ̄ wè, a ki yē nàguɔ wī wè, wi lɔri ti bé nyaa walifiiwe walikpegele kiɛ nɛ́ kogunɔ; a ki sí nyaa cɛliwɛ wī wè, wi lɔri ti bé nyaa walifiiwe walikpegele kiɛ.
8«Ŋàa wi 'ki nyíɛnɛ nɛ̀ kɔ̀n bè nyakungɛngɛ kpíʔile Yewe mɛ́ wè, bè wìi kɛn kire ga laa wi saʔa wuu wáà kɛn Yewe mɛ́ wè, a ki 'nyaa wiǐ gbɛ̀ jáaʔ bè ki sàri nyuɔ gáà 'ki tìɛ gèʔ, wi bé pɛn nɛ́ kire siɛn ní wè bè pa wi yérige kacuɔnriwɔ yiʔɛ mɛ́ gè. Kacuɔnriwɔ wi bé ki tìɛ nyuɔ gáà wi 'yɛli bè sàri gè, nɛ̀ yɛli nɛ́ siɛn wi taagɛnmɛ ní bè.
9«A ki sí nyaa yajuʔu gī gè, gàa nyuɔ siɛn wi 'kún nɛ̀ kɛn gè Yewe mɛ́ wè, yajuʔu gáà nɛ̄ Yewe 'fɔ̀li gè pe- ki kɛn kpuʔɔrɔ wire mɛ́ gè, kire yajuʔu ki bé kò wàlidɛngɛgɛ Yewe mɛ́#27.9 Wéli baa 1.2.. 10Kiì yɛli wi- kire yajuʔu fɛ̀ni gè kàa kiiyɛ nɛ̄ʔ, nɛ́ míɛni kàa nɛ̄ gàa ki 'nyuɔ gèʔ, nɛ́ gàa ki wè cɛ̀ngɛ gèʔ. Kire nɛ́ ki mìɛni a siɛn wi 'ki kpíʔile gè nɛ́ yajuʔu fɛ̀ni gè, yajuʔu gáà wi 'fɛ̀ni nɛ́ pélige ní gè, yi mìɛni siin bè kò wàlidɛngɛyɛ Yewe mɛ́.
11«Yajuʔu gáà nyuɔ siɛn wi 'kún nɛ̀ kɛn wè, a kire yajuʔu ki 'núʔɔ Yewe yiʔɛ mɛ́ gè, a siɛn sǐ gbɛ̀ pɛn nɛ́ ki ní bè ki kɛn kpuʔɔrɔ Yewe mɛ́ wèʔ, wi 'yɛli bè ki yajuʔu yérige gè kacuɔnriwɔ wi yiʔɛ mɛ́ gè#27.11 Wéli baa 11.2-8. Dùʔɔ ki bé gbɛ̀ nyaa yajuʔu ki bé puu sèfɛnnɛ, kire ga laa sunʔɔ, kire ga laa nyuʔɔmɔ. Siɛn wi sí de caa bè wi lɔri táà nyɔ́gɔ saawalidɛngɛgɛ baara nī dè. Kacuɔnriwɔ wi bé gbɛ̀ yajuʔu pári gè bè wali taa bè nyɔ́gɔ saawalidɛngɛgɛ baara nī dè.. 12Bà kacuɔnriwɔ wi bé ki lɔri tìɛ dè bè yɛli nɛ́ ki kɛnmɛ ní bè, a ki yē cɛ̀ngɛ, á kire bɛ̀ʔ sìpiʔi gè. Lɔri dáà wi bé tìɛ dè, tire ti bé sàri. 13Ŋàa wi 'yajuʔu nyuɔ 'kún gè nɛ̀ kɛn wè, a wi ń'nɛ̀ jo wi bé ki fùgu bè suɔ gè, wi 'yɛli bè ki lɔri ti tílaya tiɛyɛ kogunɔwuʔu láʔa gè bè ní fàri yajuʔu ki lɔri nɛ̄ dè, bè kɛn kacuɔnriwɔ mɛ́ wè.
14«A ki 'nyaa siɛn 'wi saʔa wàli nɛ̀ tɛ́ngɛ Yewe mɛ́ wè, kpuʔɔrɔ dè, kacuɔnriwɔ wi bé ki lɔri tìɛ dè bè yɛli nɛ́ ki kɛnmɛ ní bè, a ki yē cɛ̀ngɛ, á kire bɛ̀ʔ sìpiʔi gè. Lɔri dáà wi bé tìɛ dè, tire ti bé sàri. 15Ŋàa wi 'ki saʔa wàli gè nɛ̀ tɛ́ngɛ Yewe mɛ́ wè, a wi ń'nɛ̀ jo wi bé ki fùgu bè suɔ gè, wi 'yɛli bè ki lɔri ti tílaya tiɛyɛ kogunɔwuʔu láʔa gè bè ní fàri saʔa ki lɔri nɛ̄ dè, bè kɛn kacuɔnriwɔ mɛ́ wè. Saʔa ki bé ní koli kò wi wuʔu.
16«A ki sí nyaa siɛn wáà 'wi siʔi wàli nɛ̀ tɛ́ngɛ Yewe mɛ́ wè, gàa gī narigɛ wuʔu gè, ki lɔri ti bé tìɛ bè yɛli nɛ́ yaliire kɛnmɛ ní bè dàa ti bé gbɛ̀ tánʔa siʔi nī gè, bè yɛli nɛ́ ɔrizi gbɔngbonyiɛyɛ kiɛ lɔri kɛnmɛ ní bè; kire nɛ̂ nyaa walifiiwe walikpegele togosiin nɛ́ kpɔrigɔ. 17A ki 'nyaa siʔi ki 'wàli nɛ̀ tɛ́ngɛ Yewe mɛ́ wè Kàkpaanya Wíi yiɛlɛ nī lè#27.17 Wéli baa 25.8-22., lɔri dáà kacuɔnriwɔ wi bé tìɛ dè, tire ti bé sàri. 18Nɛ̀ ki yaʔa a ki 'nyaa Kàkpaanya Wíi yiɛlɛ ni 'tóri nɛ̀ kúɔ lè, a wi nɛ́ péli nɛ̀ ki wàli nɛ̀ tɛ́ngɛ gè Yewe mɛ́ wè, kacuɔnriwɔ wi bé yiʔɛlɛ tɔ́ri gèle, gàli ke 'kúɔ gèle sɛ́ni Kàkpaanya Wíi yiɛlɛ láà 'nɔ̀ lè, bà wi bé kàa yige ki lɔri nī dè bè yɛli nɛ́ yiʔɛlɛ nyuɔ gálì ní ki bága kúɔ gèle.
19«Ŋàa wi sí siʔi wàli gè nɛ̀ tɛ́ngɛ gè Yewe mɛ́ wè, a wi ń'nɛ̀ jo wi bé ki fùgu bè suɔ gè, wi 'yɛli bè ki lɔri ti tílaya tiɛyɛ kogunɔwuʔu láʔa gè bè fàri siʔi ki lɔri nɛ̄ dè, bè kɛn kacuɔnriwɔ mɛ́ wè. Siʔi ki bé ní koli kò wi wuʔu. 20A wiì sí siʔi fùgu gè nɛ̀ suɔ gèʔ, a wi 'ki pári nɛ̀ kúɔ siɛn wáà wiiyɛ mɛ́ wè, wiǐ ní gbɛ̀ jáaʔ bè ki fùgu bè suɔ púloʔ. 21A Kàkpaanya Wíi yiɛlɛ ni pɛ́nì nɔ̀ lè, siʔi ki bé kò wàlidɛngɛgɛ Yewe mɛ́, majo siʔi gáà pe 'láʔa nɛ̀ kɛn Yewe mɛ́ súuri gè. Ki bé kò kacuɔnrilɔ wuʔu súuri.
22«A siɛn wáà 'siʔi wàli nɛ̀ tɛ́ngɛ Yewe mɛ́ wè, gàa wire tíimɛ 'suɔ gè, gàa ki wè wi narigɛ wuʔu gèʔ, 23kacuɔnriwɔ wi bé siʔi ki lɔri tìɛ dè bè yɛli nɛ́ yiʔɛlɛ nyuɔ ní gèle gàli ke 'kò gèle, sɛ́ni Kàkpaanya Wíi yiɛlɛ láà 'nɔ̀ lè. Siɛn wi 'yɛli bè ki lɔri sàri dè kire cɛnnugo gè, nɛ́ ki cɛ́n siʔi kiī wàlidɛngɛgɛ Yewe mɛ́. 24A Kàkpaanya Wíi yiɛlɛ ni pɛ́nì nɔ̀ lè, siʔi ki bé ní koli bè kò ki kàfɔli wi wuʔu, ŋàa mɛ́ wi yé ki suɔ gè, pe narigɛ nī gè.
25«Lɔri ó lɔri kacuɔnriwɔ wi bé tìɛ dè, ti bé juu bè yɛli nɛ́ saawalidɛngɛgɛ ki wali tɔ́rigɛnmɛ ní bè, ŋàa wi yē gera#27.25 Gera wori dáà ti 'juu náʔa gè, kire yé puu nɛ wali wi lúbugɛnnɛ tìí. Walifiiwe walipile tílaga wori dìi pe 'juu náʔa gè, wi lúbugɛnnɛ ni bé gbɛ̀ nyaa giraminɛ kɔlini. Wéli baa Tɔ́nminɔgɛnnɛ Tìɛdiʔɛ nī gè. kpègele togo gèle, gàli ke bé nyaa walifiiwe walipile nigbe lè#27.25 Wéli baa Yir 30.13 nɛ́ kaliwɛgɛ ki táanmɛ gè..
26«Nɛ̀ ki yaʔa siɛn wáà fáala sǐ gbɛ̀ jáa bè yajuuro pìpelile wàli bèle bè tɛ́ngɛ Yewe mɛ́ʔ, nɛ́ ki cɛ́n tire pìpelile piyē Yewe wuulo nɛ̀ kúɔ#27.26 Wéli baa Yir 13.2.. A ki yē nɛ̀naʔa gè, kire ga laa sìnbapile lè, kire ga laa síkapile lè, tire yē Yewe mɛ́. 27A ki sí nyaa yajuʔu káà gī gáà ki 'núʔɔ Yewe yiʔɛ mɛ́ gè, ki kàfɔli wi bé gbɛ̀ jáa bè ki fùgu bè suɔ. Wi bé ki lɔri ti tílaya tiɛyɛ kogunɔwuʔu láʔa gè bè ní fàri yajuʔu ki lɔri nɛ̄ dè dàa kacuɔnriwɔ wi yé tìɛ dè, bè kɛn kacuɔnriwɔ mɛ́ wè. A ki sí nyaa yajuʔu kiì fùgu nɛ̀ suɔ gèʔ, kacuɔnriwɔ wi bé ki pári bè yɛli nɛ́ lɔri dáà ní wi tìɛ dè.
28«Nɛ̀ ki yaʔa, yɛrɛ dáà ti mìɛni siɛn 'láʔa nɛ̀ kɛn Yewe mɛ́ wè, ki kàa fáala sǐ gbɛ̀ páriʔ, ki kàa fáala míɛni sǐ gbɛ̀ fùgu bè suɔʔ, a ki yē siɛn yo, á kire bɛ̀ʔ yajuʔu yo, á kire bɛ̀ʔ wi siʔi gáà ki yē narigɛ wuʔu gèʔ. Yɛrɛ dáà ti mìɛni ti 'láʔa nɛ̀ kɛn Yewe mɛ́ wè, tire bé kò yakaa gàa gī cɛ̀njɛngɛ wàlidɛngɛgɛ Yewe mɛ́. 29A ki 'nyaa pe 'siɛn wáà cúʔɔ nɛ̀ yige baa péwu nɛ̀ yɛli nɛ́ Yewe kàyuʔujuuro ní dè, wire sǐ ní gbɛ̀ jáa bè fùgu bè suɔʔ; pe 'yɛli pe- wi kpúu wī#27.29 Náʔa gè kiī nɛ nyu siɛn wáà wuʔu nɛ̄ ŋàa kàyuʔu pe 'juu nɛ̀ ceri gè, nɛ́ jo wi 'yɛli nɛ́ kùu ní wī. Wéli baa Yir 22.17-19; Tɔ́r 35.31-34; Fàn 13.13-19; Yes 7.13-15..
30«Kiɛkiɛwuʔulo gálì ke mìɛni ke 'láʔala yaliire nɛ̄ dè, kire ga laa tiire yasɛnrɛ nɛ̄ dè, tire yē Yewe wori, yɛrɛ táà dī dàa ti yē wàlidɛngɛrɛ wi mɛ́#27.30 Koliyo 30-33 tiʔɛ nɛ̄ gè, wéli baa Tɔ́r 18.21; Fàn 14.22-23.. 31A ki 'nyaa siɛn wáà wi je wi yaliire kiɛkiɛwuʔulo kálì fùgu bè suɔ wè, kire ga laa wi tiire yasɛnrɛ wuʔulo gèle, wi 'yɛli bè ki lɔri ti tílaya tiɛyɛ kogunɔwuʔu láʔa gè bè ní fàri ti lɔri nɛ̄ dè, bè kɛn kacuɔnriwɔ mɛ́ wè.
32«Kiɛkiɛwuʔulo gálì ke mìɛni pe 'láʔala yajuuro nɛ̄ dè, lɛ̀lɛ líì nī yajuunaʔawa wi 'kàgbiile tíʔɛ lè nɛ̀ ti tɔ́ri dè, kire 'jo nìɛyɛ yè, nɛ́ sìnbaala bèle, nɛ́ síkaala bèle, kire kiɛkiɛwuʔulo ke bé puu wàlidɛngɛlɛ Yewe mɛ́. 33Ki kàfɔli wiǐ gbɛ̀ ki nyíɛnɛ bè kɔ̀n bè ti fɛ̀ni tìi nɛ̄ʔ, dàa dī cɛ̀nrɛ dè nɛ́ dàa dī sìpiire dèʔ. A wi sí ti fɛ̀ni dè, ki yajuuyo siin yè, gàa wi 'kɛn gìi sìndiʔɛ nī gè nɛ́ gàa ní wi 'pɛn gè, yi mìɛni siin bé kò wàlidɛngɛyɛ Yewe mɛ́. Yiǐ ní gbɛ̀ jáa bè fùgu bè suɔʔ.»
Siɛnrɛ ti kúɔdiʔɛ gè
34Kele gálì keli yē tunduro dáà Yewe 'juu nɛ̀ gbɛ̀ngɛ Misa mɛ́ wè, Sinayii nyagurugo nɛ̄ gè, wi- ti juu Isirayɛli siɛnnɛ mɛ́ bèle.
Currently Selected:
Leviiyé 27: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
