Leviiyé 23
23
Fànʔa kajuʔulo gálì ke nyu Yewe kpàli lɛ̀gɛlɛ wori nɛ̄ dè
1A Yewe 'ki juu Misa mɛ́ nɛ́ jo: 2«-Ki juu Isirayɛliyé mɛ́ bèle ma kele gálì tìɛ gèle pe nɛ̄.
«Yewe kpàli lɛ̀gɛlɛ ke n'gɛlɛ gàli yeli 'yɛli bè jáari kire ga buu yeli- yìye pínɛ bè Yewe gbùʔɔrɔ wè. Ke n'gɛlɛ lɛ̀gɛlɛ gálì mi 'tìɛ gèle.»
Cɛndɛnigɛ wori dè
3«Cɛnyɛ kɔlini sunʔɔmɔ nī bè, yeli bé yeli baara kúɔ dè. Kɔlisiinwuʔu nɛ̄ gè, kire yē cɛndɛnigɛ nɛ́ ní cɛnŋɔdaʔa; yeli sǐ baara yafiɛn kúɔʔ. Yeli bé yìye pínɛ bè Yewe gbùʔɔrɔ wè. Ye fǎga baapile nigbe kúɔ kire cɛngɛ nī gèʔ. Yeli 'yɛli bè Yewe cɛndɛnigɛ kpúʔɔ gè yeli tɛ́nidiɛyɛ yi mìɛni nī yè#23.3 Wéli baa Sél 2.1-3; Yir 16.23-30; 20.8-11; 23.12; 31.12-17; 34.21; 35.2; Fàn 5.12-14..
4«Ke n'gɛlɛ Yewe kpàli lɛ̀gɛlɛ gèle, fundaanra cɛnyɛ nyáà yi 'wàli nɛ̀ tɛ́ngɛ Yewe mɛ́ wè, gàli yeli 'yɛli bè jáari bè ki tìɛ lɛ̀lɛ líì nī yeli bé yìye pínɛ bè Yewe gbùʔɔrɔ wè.»
Torimakiyaʔa Fundaanra nɛ́ Sìnvarifun Búru Fundaanra wori dè
5«Yebelige#23.5 Pe yebelige ki 'puu Takariyege kire ga laa Wariyogo lɛ̀lɛ nī. ki cɛnyɛ kiɛ nɛ́ sicɛriwuʔu nɛ̄ gè, cɛnguɔwuɔmɔ lɛ̀lɛ nī lè, ye Yewe Torimakiyaʔa Fundaanra séli dè#23.5 Wéli baa Yir 12.1-14; Tɔ́r 28.16; Fàn 16.1-2.. 6Kire yege ki cɛnyɛ kiɛ nɛ́ kogunɔwuʔu nɛ̄ gè, tánʔagbuɔlɔ kàduʔumɛ gè, yeli bé Sìnvarifun Búru Fundaanra#23.6 Wéli baa Yir 12.15-20; 23.15; 34.18; Tɔ́r 28.17-25; Fàn 16.3-8. séli dè bè Yewe gbùʔɔrɔ wè. Cɛnyɛ kɔlisiin sunʔɔmɔ nī bè, yeli béri sìnvarifun búru káa wè. 7Cɛnbelige nɛ̄ gè, yeli bé yìye pínɛ bè Yewe gbùʔɔrɔ wè; yeli sǐ ga tíi yeli kele kúɔ gèleʔ. 8Cɛnyɛ kɔlisiin sunʔɔmɔ nī bè, yeli bé pɛn nɛ́ yakɔnrɔ ní dàa kàsun ki sórigi dè Yewe mɛ́ wè. Cɛnyɛ kɔlisiinwuʔu nɛ̄ gè, yeli bé yìye pínɛ bè Yewe gbùʔɔrɔ wè. Kire cɛngɛ míɛni gè, yeli sǐ ga tíi yeli kele kúɔ gèleʔ.»
Yaliipelide Líɛ Lɛ̀lɛ Fundaanra wori dè
9A Yewe 'ki juu Misa mɛ́ nɛ́ jo: 10«-Ki juu Isirayɛliyé mɛ́ bèle ma kele gálì tìɛ gèle pe nɛ̄.
«A yeli kɛ́nì jíin kùlo nī lè nàa mi bé kɛn yeli mɛ́ lè, a muɔ kɛ́ni muɔ siʔi yaliire nyɔ́gi dè, yeli bé pɛn nɛ́ yaliipelide puɔlɔ ní#23.10 Wéli baa Yir 23.19; 34.26., bè ni kɛn kacuɔnriwɔ mɛ́ wè. 11Cɛndɛnigɛ ki kpìɛnduu gè, kacuɔnriwɔ wi bé ni yɛ̀gɛ naamɛ mi Yewe yiʔɛ mɛ́ gè, kire ga buu mi- fɔ̀li yeli nɛ̄.
12«Cɛngɛ gíì nɛ̄ yeli 'yaliipuɔlɔ yɛ̀gɛ lè naamɛ gè, yeli 'yɛli bè pɛn nɛ́ kakuɔrɔ kaasuʔuro sìnbapɛnnɛ ní Yewe mɛ́ wè, yiɛlɛ nigbe woli, kpɔlidiɛlɛ fùn. 13Yeli bé yaliire yakɛnrɛ fàri dè ti nɛ̄; ti bé puu juubaanyɛni nigbe míifuɔnibɔ báà pe 'nyaʔami nɛ́ sùnmɔ ní bè, yakɔnrɔ dáà kàsun ki sórigi dè, dàa nùdaanna ni mi Yewe fungo nyígi gè. Yeli bé ní kakuɔrɔ diviɛn kíri wè, yakuunyɛni nigbe nī lè, bè fàri ti nɛ̄. 14Yeli fǎga búru káa wèʔ, nɛ́ míɛni yaliikalidɛ ní dèʔ, nɛ́ míɛni yaliifɔnrɔ ní dèʔ, fúɔ bè ba nɔ̀ cɛngɛ gíì yeli bé pɛn nɛ́ yeli kpuʔɔrɔ ní dè, yeli Kulocɛliɛ mɛ́ wè.
«Tire yē fànʔa kaala yeli mɛ́ lɛ̀lɛ ó lɛ̀lɛ nī, kɛ̀ngɛlɛ ke mìɛni nī, nɛ́ yeli tɛ́nidiɛyɛ yi mìɛni nī, Yaliipelide Líɛ Lɛ̀lɛ Fundaanra wori dè.»
Cégbuʔulo Fundaanra#23.14 Pe 'puu nɛ ti yeri míɛni Yaliire Líɛ Lɛ̀lɛ Fundaanra. Nyakungɛngɛ Fɔngɔ Siɛnrɛ nī dè, pe 'puu nɛ ti yeri Pantɛkɔti, girɛki siɛnrɛ nī dè (wéli baa Kakpi 2.1). wori dè
15«Cɛndɛnigɛ ki kpìɛnduumɛ mɛ́ bè, cɛndɛnigɛ gíì nī yeli 'yaliipuɔlɔ yɛ̀gɛ lè naamɛ gè, yeli bé séli bè tɔ́ri cégbuʔulo kɔlisiin#23.15 Koliyo 15-21 tiʔɛ nī gè, wéli baa Yir 23.16; 34.22; Tɔ́r 28.26; Fàn 16.9-16. bé Cégbuʔulo Fundaanra kpíʔile dè. 16Yeli bé tɔ́ri bè taa cɛnyɛ togosiin nɛ́ kpɔrigɔ; kire bé bìɛ cɛndɛniyɛ kɔlisiinwuʔu ki kpìɛnduumɛ mɛ́ bè.
«Kire cɛngɛ gè, yeli bé yaliifɔnrɔ yakɛnrɛ kɔ̀n dè Yewe mɛ́ wè. 17Yeli bé yiri yeli tɛ́nidiɛyɛ nī yè bè pɛn nɛ́ búrulo siin ní, búrulo bálì yeli 'kpúɔn bèle nɛ́ juubaanyɛni nigbe míifuɔnibɔ ní bè, bè pe yɛ̀gɛ naamɛ Yewe yiʔɛ mɛ́ gè, yasɛnpelide kpuʔɔrɔ wi mɛ́.
18«Bè ni fàri kire búrulo nɛ̄ bèle, Isirayɛli gboli ni bè pɛn nɛ́ yiɛlɛ nigbe sìnbapɛngɛlɛ kɔlisiin ní, kpɔlidiɛlɛ fùn, nɛ́ nɛ̀piɛyɛlilɛ nigbe ní, nɛ́ sìnbapɔlilɔ siin ní, kakuɔrɔ kaasuʔuro wori Yewe mɛ́ wè. Yeli bé ti yaliire yakɛnrɛ nɛ́ ti kakuɔrɔ diviɛn fàri wè ti nɛ̄. Kakuɔrɔ yakɔnrɔ dī, dàa kàsun ki sórigi dè, dàa nùdaanna ni Yewe fungo nyígi gè.
19«Yeli bé sí síkapɔli nigbe kɛn, kapiʔile kàsulugo kakuɔrɔ wuu, nɛ́ yiɛlɛ nigbe sìnbapɛngɛlɛ siin ní, yanyige yakɔnrɔ wuʔulo. 20Kacuɔnriwɔ wi bé sìnbapɛngɛlɛ siin yɛ̀gɛ gèle naamɛ Yewe yiʔɛ mɛ́ gè, nɛ́ yasɛnpelide kpuʔɔrɔ búrulo ní bèle. Ti bé puu wàlidɛngɛrɛ Yewe mɛ́ wè; ti bé puu kacuɔnrilɔ wori.
21«Kire cɛnnugo gè, yeli bé siɛnnɛ yeri bèle pe- pìye gbuʔulo bè Yewe gbùʔɔrɔ wè. Yeli sǐ ga tíi yeli kele kúɔ gèleʔ. Tire yē fànʔa kaala yeli mɛ́ lɛ̀lɛ ó lɛ̀lɛ nī, kɛ̀ngɛlɛ ke mìɛni nī, nɛ́ yeli tɛ́nidiɛyɛ yi mìɛni nī.
22«A yeli kɛ́nì yeli siiye yaliire líɛ dè, muɔ 'yɛli bè yaliire táà yaʔa siʔi kanyuɔyɔ nɛ̄ yè; muɔ sì yɛli bè yaliikɛniyɛ líɛ yèʔ nyàa yi kòrí yèʔ. Muɔ 'yɛli bè ti yaʔa fuunmɔfɔlilɔ nɛ́ nabɔnminɔ mɛ́ bèle#23.22 Wéli baa 19.9-10; Fàn 24.19-22.. Mi yē Yewe, yeli Kulocɛliɛ wè.»
Kàkpaanya Wíijɛngɛ wori dè
23A Yewe 'ki juu Misa mɛ́ nɛ́ jo: 24«-Ki juu Isirayɛliyé mɛ́ bèle ma kele gálì tìɛ gèle pe nɛ̄:
«Yeye kɔlisiinwuʔu nɛ̄ gè, ki cɛnbelige gè, ki bé puu yeli mɛ́ cɛndɛnigɛ nɛ́ ní cɛnŋɔdaʔa, Kàkpaanya Wíijɛngɛ gè. Yeli sǐ baara yafiɛn kúɔʔ. Ki bé puu sɔ̀ngidaa cɛngbuʔɔ gàa nɛ̄ yeli bé kàkpaanya wíi yè; yeli bé yìye pínɛ bè Yewe gbùʔɔrɔ wè#23.24 Koliyo 24-25 tiʔɛ nī gè, wéli baa Tɔ́r 29.1-6.. 25Yeli sǐ ga tíi yeli kele kúɔ gèleʔ; yeli bé pɛn nɛ́ yakɔnrɔ ní dàa kàsun ki sórigi dè Yewe mɛ́ wè.»
Kapiʔile Kàsulugosuɔ cɛngɛ wori dè
26A Yewe ń'nɛ̀ ki juu Misa mɛ́ nɛ́ jo:
27«Yeye kɔlisiinwuʔu nɛ̄ gè, ki cɛnyɛ kiɛwuʔu nɛ̄ gè, Kapiʔile Kàsulugosuɔ cɛngɛ#23.27 Zuufulo pe ki yeri míɛni Yɔmi Kipuri. Wéli baa Lev 16; Tɔ́r 29.7-11. gī. Yeli bé yìye pínɛ bè Yewe gbùʔɔrɔ wè, bè sún le bè ki tìɛ yeli 'yìye cɛ́rigɛ, bé pɛn nɛ́ kakuɔrɔ yakɔnrɔ ní dè dàa kàsun ki sórigi dè, bè ti kɛn Yewe mɛ́ wè.
28«Yeli sǐ ga tíi yeli kele kúɔ gèleʔ kire cɛngɛ gèʔ, nɛ́ ki cɛ́n Kapiʔile Kàsulugosuɔ cɛngɛ gī, gàa nī pe bé kàsulugo baara kúɔ dè yeli mɛ́ Yewe yeli Kulocɛliɛ yiʔɛ mɛ́ gè. 29A ki 'nyaa siɛn wáà sì wìi cɛ́rigɛ kire cɛngɛ nī gèʔ, pe bé wi yige péwu baa wi siɛnnɛ sunʔɔmɔ nī bè. 30A ki 'nyaa siɛn wáà 'baara táà kúɔ kire cɛngɛ gè, m'bé kire siɛn yige wè péwu wi siɛnnɛ sunʔɔmɔ nī bè. 31Ye fǎga baapile nigbe kúɔʔ. Tire yē fànʔa kaala yeli mɛ́ lɛ̀lɛ ó lɛ̀lɛ nī, kɛ̀ngɛlɛ ke mìɛni nī, nɛ́ yeli tɛ́nidiɛyɛ yi mìɛni nī yè.
32«Ki bé buu cɛndɛnigɛ nɛ́ ní cɛnŋɔdaʔa; yeli sǐ baara yafiɛn kúɔʔ. Yeli 'yɛli bè yìye cɛ́rigɛ. Kire yege ki cɛnyɛ kacɛriwuʔu nɛ̄ gè, cɛndɛnigɛ ki bé séli cɛngɛnyɛnijiin lɛ̀lɛ nī lè; yeli 'yɛli bè ki cɛndɛnigɛ tɛ́ni gè fúɔ bè pa nɔ̀ ki kpìɛnduu cɛngɛnyɛnijiin lɛ̀lɛ nī lè.»
Kpátaapigele Fundaanra wori dè
33A Yewe ń'nɛ̀ ki juu Misa mɛ́ nɛ́ jo:
34«-Ki juu Isirayɛliyé mɛ́ bèle ma pe yɛ:
«Yeye kɔlisiinwuʔu nɛ̄ gè, yeli bé tánʔagbuɔlɔ tánʔa bè Yewe Kpátaapigele Fundaanra séli dè yege ki cɛnyɛ kiɛ nɛ́ kogunɔwuʔu nɛ̄ gè; kire bé mɔgɔ cɛnyɛ kɔlisiin.
35«Cɛnbelige nɛ̄ gè, yeli bé yìye pínɛ bè Yewe gbùʔɔrɔ wè; yeli sǐ ga tíi yeli kele kúɔ gèleʔ. 36Cɛngɛ ó cɛngɛ yeli bé pɛn nɛ́ kakuɔrɔ yakɔnrɔ ní dàa kàsun ki sórigi Yewe mɛ́ wè fúɔ bè pa taa cɛnyɛ kɔlisiin.
«Cɛnyɛ kataanriwuʔu nɛ̄ gè, yeli bé yìye pínɛ cígini bè wi gbùʔɔrɔ wè, bé kakuɔrɔ yakɔnrɔ kɛn dè wi mɛ́, yakɔnrɔ dáà kàsun ki sórigi dè. Kire yē fundaanra gbúʔurulo cɛngbuʔɔ; yeli sǐ ga tíi yeli kele kúɔ gèleʔ#23.36 Wéli baa Tɔ́r 29.12-39..
37«Ke n'gɛlɛ Yewe kpàli lɛ̀gɛlɛ gèle, gàli yeli 'yɛli bè jáari kire ga buu yeli- yìye pínɛ bè Yewe gbùʔɔrɔ wè, bè pɛn nɛ́ kakuɔrɔ yakɔnrɔ ní dàa kàsun ki sórigi Yewe mɛ́ wè: kakuɔrɔ kaasuʔuro dè, yaliire yakɛnrɛ dè, yanyige yakɔnrɔ dè, nɛ́ kakuɔrɔ diviɛn ní wè. Kakuɔrɔ ó kakuɔrɔ ti bé kɔ̀n bè yɛli nɛ́ cɛngɛ gáà ki 'tìɛ gè. 38Kakuɔrɔ yakɔnrɔ dáà ti bé fàri dìi nɛ̄ dè, dàa dī Yewe cɛndɛniyɛ wori dè nɛ́ yeli kpuʔɔrɔ ní dè, nɛ́ yeli nyakungɛngɛ yakɔnrɔ ní dè, nɛ́ yeli kinɛdɛnigɛ yakɔnrɔ ní dè, dàa yeli nɛ kanʔa Yewe mɛ́ wè.
39«Bɛ̀ ki yē gè, yeye kɔlisiinwuʔu nɛ̄ gè, ki cɛnyɛ kiɛ nɛ́ kogunɔwuʔu nɛ̄ gè, a yeli kɛ́nì yeli yaliire líɛ dè nɛ̀ kúɔ dè, yeli bé fundaanra tánʔagbuɔlɔ tánʔa lè; kire kàduʔumɛ yeli bè Yewe gbùʔɔrɔ wè, cɛnyɛ kɔlisiin sunʔɔmɔ nī bè#23.39 Kire fundaanra tiī nuro nɛ́ Kpátaapigele Fundaanra ní dè (wéli baa koliyo 23.34-36).. Cɛnbelige gè, nɛ́ cɛnyɛ kataanriwuʔu ní gè, yire yē cɛndɛniyɛ nɛ́ ní cɛnŋɔdaaya#23.39 Koliyo 39-43 tiʔɛ nī gè, wéli baa Yir 23.16; 34.22; Tɔ́r 29.12; Fàn 16.13-15..
40«Cɛnbelige gè, yeli bé tiire ti yasɛnjɛ̀nrɛ cuɔ dè, bé támari tiiye lèye kabari yè, nɛ́ tiiye lèye ní yè, nyàa nɛ̄ wɛrɛ ti 'niʔɛ dè, nɛ́ luʔɔdaanni tiiye lèye nyáà yī nɛ́ wɛdɔniyɔ ní yè, bè sa fundaanra kpíʔile mi Yewe yeli Kulocɛliɛ yiʔɛ mɛ́ gè, cɛnyɛ kɔlisiin sunʔɔmɔ nī bè.
41«Yiɛlɛ ó yiɛlɛ, yeye kɔlisiinwuʔu nɛ̄ gè, yeli bé tánʔagbuɔlɔ tánʔa bè Yewe gbùʔɔrɔ wè cɛnyɛ kɔlisiin sunʔɔmɔ nī bè. Tire yē fànʔa kaala yeli mɛ́ lɛ̀lɛ ó lɛ̀lɛ nī, kɛ̀ngɛlɛ ke mìɛni nī. 42Cɛnyɛ kɔlisiin sunʔɔmɔ nī bè, yeli 'yɛli bè kò kpátaapigele nī. Isirayɛli siɛnnɛ pe mìɛni 'yɛli bè kò kpátaapigele nī, 43kire ga buu yeli pìile bèle, kɛ̀ngɛlɛ ke mìɛni nī gèle, pe- ki cɛ́n lɛ̀lɛ líì nī mi 'Isirayɛli siɛnnɛ yige bèle Ezipiti kùlo nī lè, mi 'ki kpíʔile pe- súɔn kpátaapigele#23.43 Eburulo mɛ́ bèle, «kpátaapile lè» nɛ́ «fɛ̀ni saʔa» ní gè, yanugo kire gī. nī gèle. Mi yē Yewe yeli Kulocɛliɛ wè.»
44Bɛ̀ ki 'kpíʔile a Misa 'kele gálì juu gèle Isirayɛli siɛnnɛ mɛ́ bèle, Yewe kpàli lɛ̀gɛlɛ wuʔu nɛ̄ gè.
Currently Selected:
Leviiyé 23: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
