Sélimɛ 46

Yakuba 'kɛ́ Ezipiti kùlo mɛ́ lè

1A Isirayɛli 'yɛ̀ nɛ̀ koligo líɛ gè nɛ waa Ezipiti kùlo mɛ́ lè nɛ́ wi kɔliyɛrɛ ti mìɛni ní. A wi sɛ́nì nɔ̀ Bɛri Seba tiʔɛ nɛ̄ gè, a wi 'kakuɔrɔ yajuʔu káà kpúu nɛ̀ yanyige suro suʔɔ Kulocɛliɛ mɛ́, wi tuu Siaga Kulocɛliɛ mɛ́ wè. 2Bà pìlige ki 'wúɔ gè, a Kulocɛliɛ wi 'juu nɛ́ Isirayɛli ní, nɛ́ wi yɛ: «Yakuba yo ! Yakuba yo !»

A wi 'suɔ: «Coo‑i !»

3A Kulocɛliɛ wi sí wi yɛ: «Mi wī Kulocɛliɛ wè, muɔ tuu Kulocɛliɛ wè. Fǎga de fìʔɛ́ bè kɛ́ Ezipiti kùlo mɛ́ lèʔ. Nɛ́ ki cɛ́n kire tiʔɛ nī gè m'bé muɔ siimɛ niʔɛ bè pi‑ kò kùpolo láà. 4Mi tíimɛ m'bé muɔ tórigo Ezipiti kùlo mɛ́ lè, béri muɔ wéli. Mi míɛni, mi bé ki kpíʔile muɔ‑ yiri baa kire tiʔɛ nī gè bè koli bɛn Kanaa kùlo mɛ́ lè. A muɔ kùu lɛ̀lɛ ni 'nɔ̀ lè, muɔ bé kúu Yusufu kiyɛ nī, wire wi bé muɔ nyapigele tɔ́n gèle.»

5Bà tire 'tóri dè, a Yakuba 'yiri Bɛri Seba tiʔɛ nī gè. A Isirayɛli jaala pe 'wi nyɔ́gɔ nìɛyɛ wotorilo nī bèle, bàli Farawɔn wi yé tórigo pe‑ ba wi líɛ wè, wire nɛ́ pe pìile ní bèle nɛ́ pe cɛlilɛ ní bèle. 6,7A Yakuba wi 'yɛ̀ nɛ̀ kɛ́ nɛ́ wi siimɛ pi mìɛni ní, nɛ́ 'wi jaala nɛ́ wi pórilo pe mìɛni ní, nɛ́ pe pìile pe mìɛni ní. A pe 'pe yajuuro ti mìɛni líɛ, nɛ́ pe yɛrɛ ti mìɛni ní dàa pe yé taa Kanaa kùlo nī lè. A pe sɛ́nì jíin Ezipiti kùlo nī lè, Yakuba wè nɛ́ wi siimɛ pi mìɛni ní.

Yakuba narigɛ siɛnnɛ bèle

8Bàli peli bīɛlɛ Isirayɛli jaala bèle, Yakuba siimɛ bè, bàli ní wi 'pɛn Ezipiti kùlo mɛ́ lè. Yakuba jaapeliwe wi míʔɛ kire gī: Wurubɛni. 9Wurubɛni jaala peli pe 'puu bàli bèle: Anɔki, nɛ́ Palu, nɛ́ Ezurɔn, nɛ́ Karimii. 10Simɛyɔ jaala peli pe 'puu bàli bèle: Yemuwɛli, nɛ́ Yamɛ, nɛ́ Woyadi, nɛ́ Yakɛn, nɛ́ Zokari, nɛ́ Sawuli, wire ŋáà wi 'puu Kanaa kùlo cuɔ wi jaa wè. 11Levii jaala peli pe 'puu bàli bèle: Gerisɔn, nɛ́ Keyati nɛ́ Mɛrarii. 12Zuda jaala peli pe 'puu bàli bèle: Eri, nɛ́ Wona, nɛ́ Sela, nɛ́ Perezi, nɛ́ Zera. Eri nɛ́ Wona peli yé kùu Kanaa kùlo nī lè. Perezi jaala peli pe 'puu bàli bèle: Ezurɔn nɛ́ Amuli. 13Izakari jaala peli pe 'puu bàli bèle: Tola, nɛ́ Puwa, nɛ́ Yɔbi, nɛ́ Simurɔ. 14Zabulɔn jaala peli pe 'puu bàli bèle: Sɛrɛdi, nɛ́ Elɔn, nɛ́ Yaleyɛli. 15Bàli peli pe yé puu Leya pìile bèle, bàli wi 'sii Yakuba mɛ́ wè Mɛsopotamii kùlo nī lè, nɛ́ fàri wi póri Dina nɛ̄ wè. Leya jaala bèle, nɛ́ wi pórilo ní bèle, pe mìɛni bìnɛ wi 'puu siɛnnɛ togo nɛ́ kpɔrigɔ nɛ́ taanri.

16Gadi jaala peli pe 'puu bàli bèle: Sifiyɔn, nɛ́ Agii, nɛ́ Sunii, nɛ́ Ɛsibɔn, nɛ́ Erii, nɛ́ Arɔdi nɛ́ Areyɛli. 17Azɛri jaala peli pe 'puu bàli bèle: Yimina, nɛ́ Yisiwa, nɛ́ Yisiwii, nɛ́ Beriya nɛ́ pe juɔ Sɛra. Beriya jaala peli pe 'puu bàli bèle: Ebɛri nɛ́ Malikiyɛli. 18Bàli peli pe yé puu Zilipa pìile bèle, bàli wi 'taa Yakuba mɛ́ wè, pe mìɛni bìnɛ wi 'puu siɛnnɛ kiɛ nɛ́ kɔlini. Zilipa wire yé puu sùkulocuɔ ŋáà Laban yé kɛn wi póri Leya mɛ́ wè.

19Arasɛli wè, Yakuba cuɔ wè, wi jaala peli pe 'puu bàli bèle: Yusufu nɛ́ Bɛnzamɛ. 20Ezipiti kùlo nī lè, Yusufu yé jaafɔlilɔ siin taa nɛ́ wi cuɔ Asɛnati ní wè, Potifera póri wè, Potifera ŋáà wi 'puu Ɔni kàʔa kacuɔnriwɔ wè. Peli bīɛlɛ bàli bèle: Manase nɛ́ Ɛfirayimi. 21Bɛnzamɛ jaala peli pe 'puu bàli bèle: Bela, nɛ́ Bɛkɛri, nɛ́ Asibɛli, nɛ́ Gera, nɛ́ Naamani, nɛ́ Eyii, nɛ́ Worosii, nɛ́ Mupimi, nɛ́ Upimi nɛ́ Aridi. 22Bàli peli pe yé puu Arasɛli pìile bèle, bàli wi 'sii Yakuba mɛ́ wè, pe mìɛni bìnɛ wi 'puu siɛnnɛ kiɛ nɛ́ sicɛri.

23Dan jaa wire wi 'puu: Usimi. 24Nafitali jaala peli pe 'puu bàli bèle: Yaseyɛli, nɛ́ Gunii, nɛ́ Yesɛri, nɛ́ Silɛmi. 25Bàli peli pe yé puu Biliya pìile bèle, bàli wi 'taa Yakuba mɛ́ wè, pe mìɛni bìnɛ wi 'puu siɛnnɛ kɔlisiin. Biliya wire yé puu sùkulocuɔ ŋáà Laban yé kɛn wi póri Arasɛli mɛ́ wè.

26Siɛnnɛ bálì ní Yakuba 'kɔ́n Kanaa kùlo mɛ́ lè nɛ̀ pɛn Ezipiti kùlo mɛ́ lè, peli bálì pe yé puu Yakuba sìsiɛn tíimɛ gè, pe mìɛni bìnɛ wi 'puu siɛnnɛ togotaanri nɛ́ kɔlini. Piyè yé wi jaala cɛlilɛ tɔ́ri bèleʔ. 27Nɛ̀ fàri Yusufu jaala siin nɛ̄ bèle, bàli wi yé sii baa Ezipiti kùlo nī lè, a ki 'nyaa Yakuba narigɛ gáà ní wi yé pɛn Ezipiti kùlo mɛ́ lè, a ki mìɛni bìnɛ wi 'nyaa siɛnnɛ togotaanri nɛ́ kpɔrigɔ#46.27 Siɛnnɛ bálì nyuɔ ki 'tìɛ náʔa gè, a muɔ 'Yakuba wire tíimɛ tɔ́ri nɛ̀ taʔa baa wè, nɛ́ wi póri Dina ní wè, nɛ́ Yusufu nɛ́ wi pìile siin ní bèle bàli wi 'sii Ezipiti kùlo nī lè, Ɛfirayimi nɛ́ Manase ní wè; a muɔ 'pe mìɛni tɔ́ri bèle pe mìɛni bìnɛ wi bé nyaa togotaanri nɛ́ kpɔrigɔ nɛ́ siin. A muɔ sí Zuda jaala siin yige bèle baa wè, bàli pe 'kùu bèle, Eri nɛ́ Wona ní wè, sɛnminɛ pe 'kò togotaanri nɛ́ kpɔrigɔ. Peli ní Yakuba 'kɛ́ Ezipiti kùlo mɛ́ lè..

Yusufu sɛ́nì wi tuu kpàli wè

28A Yakuba sí Zuda tun nɛ́ jo wi‑ sa ki juu Yusufu mɛ́ wè peri pìye kpàli baa Gozɛni tɛ́nimɛ nī bè. Bà Yakuba nɛ́ wi siɛnmɛ pi sɛ́nì nɔ̀ Gozɛni tɛ́nimɛ nɛ̄ bè, 29a Yusufu wire 'jíin wi wotori nī wè, a sunʔɔ ki 'wi píle nɛ̀ kɛ́ Gozɛni tɛ́nimɛ nī bè, a wi sɛ́nì Isirayɛli kpàli wè, wi tuu wè. Bà wi sɛ́nì wi tuu nyaa wè, a wi 'wi wáa nɛ̀ mígi kiyɛ nī yè nɛ́ nyùgo taʔa gè wi fíkanʔa nɛ̄ gè nɛ́ nyɛni nɛ̀ mɔgɔ. 30A Isirayɛli sí ki juu wi jaa Yusufu mɛ́ wè nɛ́ wi yɛ: «Píra ŋáà nī wè, mi 'yéri ki nɛ̄ bè kùu, bɛ̀ mi 'muɔ nyaa wè, á muɔ ní sìi nɛ̄ wè.»

31A Yusufu sí ki juu wi siinyɛninɛ mɛ́ bèle nɛ́ wi tuu narigɛ ní gè nɛ́ jo: «M'bé koli gɛ́ bè sa ki juu Farawɔn mɛ́ wè bé wi yɛ: 'Mi lɔbilɔ, nɛ́ mi tuu narigɛ ní gè, bàli pe 'puu Kanaa kùlo nī lè, pe nyɛ́nì pɛn mi kúrugu. 32Mi wuulo bèle, yajuunaʔana bīɛlɛ, síkaala piyē nɛ gbún, nɛ́ sìnbaara ní, nɛ́ nìɛyɛ ní. Pe sí nyɛ́nì pɛn nɛ́ pe yajuuro ti mìɛni ní, nɛ́ pe kɔliyɛrɛ ní dè. 33Kire nɛ̄, a Farawɔn wi kɛ́nì yeli yúgo wè nɛ́ jo: ‹Gáa baara sí yeli nɛ kúu wè ?›, 34ye‑ wi yɛ: ‹Weli bálì bīɛlɛ muɔ baakuɔlɔ bèle, nɛ̀ líɛ baa weli pìimɛ lɛ̀lɛ nī lè, weli yē nɛ yajuuro gbún wī, bɛ̀ weli tobilo pe 'puu nɛ ki kpínʔini gè.› Bà wi bé yéri ki nɛ̄ yeli kò náʔa Gozɛni tɛ́nimɛ nī bè, nɛ́ ki cɛ́n Ezipiti siɛnnɛ piyē nɛ nyígi yajuunaʔana nɛ̄ bèle.»

Currently Selected:

Sélimɛ 46: sev

Highlight

Copy

Compare