Yirile 4
4
1A Misa sí wi yɛ: «-Ki wéli, piyě tɛ́ngɛ mi siɛnrɛ nɛ̄ dèʔ, piyě fɔ̀li bè mi siɛnrɛ lúʔu dèʔ. Pe bé jo: ‹Yewe sì wìi tìɛ muɔ nɛ̄ʔ.› »
2A Yewe sí wi yɛ: «Gáayɛgɛ gī gàa gè muɔ kɔli nī gè ?»
A Misa sí jo: «Kàgbiile nī.»
3A Yewe sí jo: «-Ni cáan dàala nɛ̄ lè.»
A Misa 'ni cáan dàala nɛ̄ lè, a ni 'yiʔɛ nɛ̀ kò wɔ̀bugɔ. A Misa 'fɛ̀ wɔ̀bugɔ nɛ̄ gè.
4A Yewe 'Misa yɛ wè: «-Muɔ kɔli sáʔa gè, ma ki cò nɛgɛ nɛ̄ gè !»
A wi 'kɔli sáʔa gè nɛ̀ ki cò, a ki 'yiʔɛ nɛ̀ kò kàgbiile wi kɔli nī gè.
5A Yewe ń'nɛ̀ wi yɛ: «Mi 'kire fìɛ ŋáà kpíʔile wè kire ga buu pe- tɛ́ngɛ ki nɛ̄ Yewe wi 'wìi tìɛ muɔ nɛ̄, wire ŋáà wī pe tobilo Kulocɛliɛ wè, Birayima Kulocɛliɛ wè, nɛ́ Siaga Kulocɛliɛ wè, nɛ́ Yakuba Kulocɛliɛ wè.» 6A Yewe ń'nɛ̀ wi yɛ: «Píra ŋáà nī wè, -muɔ kɔli le gè burugbuʔɔ láara gè, sìndinge tiʔɛ nī gè.»
A wi 'kɔli le gè burugbuʔɔ láara gè. Bà wi kɛ́nì ki yige gè, cí ! a wi 'ki nyaa a yaanyiɛmɛ 'ki cò a ki 'fílige pérepere#4.6 Tiʔɛ gáà siɛnrɛ dè, ti 'juu nɛ́ jo: fìige bɛ̀ nɛzi tíɛlɛ. Nɛzi wè, wiī fìiwe nɛ̀ tóri kɔ̀rirɔ nɛ̄ dè; wi wè náʔa weli kùlo nī lèʔ, sɛ̀ngɛ ní gè nɛ láʔala ki nɛ̄..
7A Yewe ń'nɛ̀ wi yɛ: «Koli ma ki le burugbuʔɔ láara gè.»
A wi 'kɔli le gè burugbuʔɔ láara gè. Bà wi kɛ́nì ki yige gè, ʔé, a wi 'ki nyaa a ki 'koli nɛ̀ kò ki kaliɛmɛ nɛ̄ bè, bɛ̀ cécɛ̀nrɛ tíɛlɛ dè.
8A Yewe 'jo: «A ki pɛ́nì nyaa piyě tɛ́ngɛ fìɛpeliwe ŋáà siɛnrɛ nɛ̄ dèʔ, dùʔɔ pe bága tɛ́ngɛ siinwuu nɛ̄ wè. 9A ki ń'nɛ̀ nyaa piyě tɛ́ngɛ fìɛlɛ bálì pe siin nɛ̄ bèleʔ, a piyě muɔ siɛnrɛ lúʔu dèʔ, kire nɛ̄ ma Niili cáʔa luʔɔ káà kúu, ma ki wo dàala nɛ̄ lè. Luʔɔ ki bé yiʔɛ bè kò sìsiɛn dàala nɛ̄ lè.»
10A Misa sí Yewe yɛ wè: «ʔé, mi Kàfɔli, -ki yaʔa mi nɛ̄, mi yē siɛn wáà, siɛnrɛ ti wè nɛ waa mi nɛ̄ʔ. Kire sì kpíʔile pàngɛʔ, kiǐ kpíʔile mbànʔaʔ, nɛ́ míɛni mbànʔaguruguʔ, nɛ́ míɛni kàa fìɛ yiri ki nīʔ nɛ̀ séli lɛ̀lɛ líì nī muɔ nɛ nyu nɛ́ mi ní wèʔ. Nɛ́ ki cɛ́n mi siɛnrɛ ti nyɛ́nì nyígi, nɛ́ míɛni mi nyinɛ niī sìlubulo.»
11A Yewe ń'nɛ̀ jo: «Ŋáa wi 'nyuɔ kɛn gè siɛnnɛ mɛ́ bèle ? Ŋáa wi cî siɛn kpíʔile wè bobogo, kire ga jáa dùnɔ ? Ŋáa wi cî siɛn yaʔa wi nìɛ nyaʔa kire ga jáa fúɔn wè ? Mi Yewe bɛ̀ʔ lé ? 12Píra ŋáà nī wè, te waa ! MI YE nɛ́ muɔ nyuɔ ní gè; m'bé muɔ tɛnmɛ siɛnrɛ nɛ̄ dè dàa muɔ bé sa juu dè.»
13A Misa sí ń'nɛ̀ jo: «ʔé mi Kàfɔli, mi nɛ muɔ fiɛn wī: -wàa tun, ŋàa wi 'muɔ dɛ́ni wè.»
14A Yewe fungo ki 'yɛ̀ Misa kúrugu wè, a wi 'jo: «Muɔ luɔ Arawɔn, Levii saʔa tùlugo wuu wè, wi wè baa léʔ ? Mi 'ki cɛ́n wire nɛ nyu fáari fáari. Nɛ̀ taʔa ki nɛ̄ wi cɛ yē baa koligo nɛ̄, nɛ báan bè pa muɔ kpàli. A wi pɛ́nì muɔ nyaa wè, ki bé puu wi mɛ́ fundaangbuɔrɔ wi fungo nī gè. 15Muɔ bé juu nɛ́ wi ní bè siɛnrɛ le dè wi nyuɔ nī gè. Mi wè, MI YE nɛ́ muɔ nyuɔ ní gè nɛ́ Arawɔn wi nyuɔ ní gè. M'bé yeli tɛnmɛ gàa yeli bé sa kpíʔile gè. 16Wire wè, wi béri siɛnrɛ suu dè de nyu muɔ mɛ́ siɛnnɛ mɛ́ bèle. Wire wi bé puu muɔ nyuɔ gè; muɔ wè, muɔ bé puu Kulocɛliɛ sìndiʔɛ nī wi mɛ́. 17-Kàgbiile náà cò lè muɔ kɔli nī gè; lire ní muɔ béri fìɛlɛ kpínʔini bèle.»
Misa wi 'koli nɛ̀ kɛ́ Ezipiti kùlo mɛ́ lè
18A Misa 'yɛ̀ nɛ̀ kɛ́ Zeturo tiʔɛ nī gè, wi cuɔ wi tuu wè, nɛ̀ sɛ́nì wi yɛ: «Mi nɛ muɔ fiɛn wī, -koligo yaʔa m'mɛ́ mi- koli kɛ́ bè sa mi siinyɛninɛ wéli bèle baa Ezipiti kùlo mɛ́ lè, bè ki cɛ́n a ki yē piyē nɛ tíin sìi nɛ̄.»
A Zeturo 'Misa yɛ wè: «Te waa yanyige nɛ̄.»
19Bà wi 'puu nɛ tíin baa Madiyan kùlo nī lè, a Yewe wi ń'nɛ̀ Misa yɛ wè: «Koli mari waa Ezipiti kùlo mɛ́ lè, nɛ́ ki cɛ́n siɛnnɛ bálì pe 'puu nɛ caa bè muɔ kpúu wè, pe nyɛ́nì kùu.»
20A Misa 'yɛ̀ nɛ̀ wi cuɔ líɛ wè, nɛ́ wi jaala ní bèle, nɛ̀ pe tárigɛ sèfɛngɛlɛ nɛ̄ gèle, nɛ̀ koli nɛ waa Ezipiti kùlo mɛ́ lè. A Misa 'Kulocɛliɛ kàgbiile cò lè wi kɔli nī gè.
21A Yewe sí ki juu Misa mɛ́ wè nɛ́ jo: «A muɔ sɛ́nì jíin Ezipiti kùlo nī lè, ki 'yɛli ma sa ki sɔ́migɔ ma kpíʔile Farawɔn yiʔɛ mɛ́ gè gàa mi 'juu gè, kakpoliyo nyáà mi 'kɛn muɔ mɛ́ yè. Mi wè, m'bé Farawɔn nàzɔn gbɛ̀n wè, wiǐ ga siɛnnɛ yaʔa bèle pe- kɛ́ʔ. 22Muɔ bé ki juu Farawɔn mɛ́ wè bé jo: ‹Ti n'dɛ dàa Yewe 'juu dè: Mi jaapeliwe wire wī Isirayɛli wè. 23M'bé ki juu muɔ mɛ́, -mi jaa yaʔa wè wi- kɛ́ wi sa baara kúɔ m'mɛ́. Á muɔ sí cíi, muɔ sì wi yaʔa a wi 'kɛ́ wèʔ, m'bé sí muɔ jaapeliwe kpúu wè.› »
24A ki pɛ́nì nyaa, bà Misa 'puu tánʔana nɛ̄ lè, a wi sɛ́nì nɔ̀ tiʔɛ káà nī baa wi cé yɛli bè súɔn wè. A Yewe 'Misa kpàli wè baa kire tiʔɛ nī gè; wi 'puu nɛ caa bè wi kpúu#4.24 Bà ki 'juu nɛ́ jo Yewe 'puu nɛ caa bè wi kpúu wè, ki 'nyaa Misa sì yé wi jaa kɛnɛkɛnɛ wèʔ, bɛ̀ Yewe cé ki juu gèʔ (wéli baa Sél 17.9-14,25-26). Ki bé gbɛ̀ nyaa dùʔɔ Misa sì yé lɛ̀lɛ taa bè wi jaa kɛnɛkɛnɛʔ, bà wi 'puu tánʔana nɛ̄ lè.. 25A Misa cuɔ wè, Sipora wè, a wi 'kàdɛniviige káà líɛ gàa nyuɔ ki 'tɛ́ni gè, nɛ̀ wi jaa kɛnɛkɛnɛ wè nɛ́ sɛ̀ngɛ wáa gè, a ki sɛ́nì Misa tɔliyɔ círi yè#4.25 Misa tɔliyɔ círi: Ki bé gbɛ̀ nyaa siɛnlaridɛ dī, dàa ti puu nɛ nyu dè Misa nàguɔmɔ wuʔu nɛ̄ gè., a Sipora wi 'fali nɛ̀ jo: «Muɔ yē sìsiɛn labɔli mi mɛ́#4.25 sìsiɛn labɔli: Ki 'nyaa wi yé Misa sìi suɔ wè nɛ́ wi jaa kɛnɛkɛnɛ sìsiɛn ní gè..» 26A Yewe sí Misa yaʔa wè.
Bà Sipora yé jo «sìsiɛn labɔli» wè, wi 'puu nɛ caa bè juu kɛnɛkɛnɛ wuʔu nɛ̄ gè.
27Kire 'lɛ̀lɛ nī lè, Yewe yé ki juu Arawɔn mɛ́ nɛ́ jo: «Te waa, ma sa Misa kpàli wè waama kùlo nī lè.» A wi 'yɛ̀ nɛ̀ kɛ́ nɛ̀ sɛ́nì Misa kpàli wè Kulocɛliɛ nyagurugo táanni gè, a wi 'wi wáa nɛ̀ mígi. 28A Misa 'ti juu nɛ̀ tìɛ Arawɔn nɛ̄, siɛnrɛ dàa ti mìɛni Yewe yé jo wi- sa juu dè, nɛ́ fìɛlɛ pe mìɛni ní, bàli Yewe yé juu nɛ̀ gbɛ̀ngɛ nɛ́ jo wire sa kpíʔile bèle.
29A Misa 'kɛ́ nɛ́ Arawɔn ní wè, a pe sɛ́nì Isirayɛliyé nàgaliɛlɛ pínɛ bèle pìye nɛ̄. 30A Arawɔn 'siɛnrɛ ti mìɛni juu nɛ̀ tìɛ pe nɛ̄ dàa Yewe yé juu Misa mɛ́ wè, a wi 'fìɛlɛ kpíʔile bèle siɛnnɛ pe yiʔɛ mɛ́ gè. 31A siɛnnɛ pe 'tɛ́ngɛ. Bà pe 'ki lúʔu Yewe yé ki nyíɛnɛ nɛ̀ kɔ̀n bè Isirayɛli siɛnnɛ sáʔa bèle, nɛ́ bɛ̀ wi yé pe fuunmɔ nyaa bè, a pe 'tuu nɛ̀ cúbulo nɛ̀ Yewe gbùʔɔrɔ wè.
Currently Selected:
Yirile 4: sev
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
