Yirile 20

Yewe wi 'nyakungɛngɛ kajuudiʔɛlɛ kiɛ tìɛ gèle

1Ti n'dɛ siɛnrɛ dáà ti mìɛni Kulocɛliɛ 'juu dè:

2Mi yē Yewe, muɔ Kulocɛliɛ wè.

Mi mi muɔ 'yige Ezipiti kùlo nī lè,

kire tiʔɛ nī muɔ 'puu sùkulomɔ nɛ̄ bè.

3Ma fǎga kulocɛliɛ wáà caa bè fàri mi nɛ̄ʔ.

4Ma fǎga yatɛngɛ káà kpíʔile bèri ki gbùʔɔrɔ́ʔ,

kàa tíɛlɛ gàa gī nyìʔɛnɛ nī lèʔ,

nɛ́ kàa tíɛlɛ gàa gī dàala nɛ̄ lèʔ,

nɛ́ kàa ní gàa gī luʔɔ nī gè dàala táanmɛ gèʔ#20.4 Koliyo 4 nɛ́ 5 wuʔu ní gè, wéli baa 34.17; Lev 19.4; 26.1; Fàn 4.15-18; 27.15..

5Ma fǎga káguro cáan kire yɛrɛ dáà ti felide yiʔɛ mɛ́ gèʔ;

muɔ míɛni sì yɛli bèri ti sunguʔ.

Nɛ́ ki cɛ́n mi Yewe wè, muɔ Kulocɛliɛ wè,

mi yē Kulocɛliɛ ŋáà wī yejaʔafɔli wè#20.5 Kulocɛliɛ wiī nɛ caa náʔa gè wire siɛnnɛ peri wire nigbe gbùʔɔrɔ́, majo bɛ̀ nàguɔ cî nɛ ki caa wire cuɔ wi- puu wire nigbe wuu wè (wéli baa 34.14; Fàn 4.24; 32.16,21; Yes 24.19; Ŋún 78.58; Kor1 10.22)..

Mi nɛ̂ tuufɔlilɔ pe kolimɔ tɔ́ri bè pe pìile kúrugu bèle,

fúɔ bè taa kɛ̀ngɛlɛ taanriwoli nɛ́ sicɛriwoli nɛ̄ lè

bàli pe 'cíi mi nɛ̄ bèle.

6Nɛ̀ sí ki yaʔa mi yē Kulocɛliɛ

ŋáà wiī nɛ bànguɔ dɛ́nigɛ nii nɛ́ siɛnnɛ ní bèle,

bìli mɛ́ mi woli ni 'kpúʔɔ pe mɛ́ bèle,

a piyē nɛ lúru mi kajuudiʔɛlɛ mɛ́ gèle,

fúɔ bè sa nɔ̀ kɛ̀ngɛlɛ sirakogunɔwoli (1 000) nɛ̄ lè.

7Ma fǎga Yewe muɔ Kulocɛliɛ míʔɛ yeri gè waʔanɛʔ#20.7 waʔanɛ: Siɛnrɛ dáà ti bé gbɛ̀ yiʔɛ bè jo: muɔ sì yɛli bè Kulocɛliɛ míʔɛ líɛ gè bè siɛn fáanni nɛ́ ki níʔ. Wéli baa Lev 19.12.,

nɛ́ ki cɛ́n Yewe bága kàyuʔu juu siɛn ó siɛn nɛ̄

ŋàa wi 'wi míʔɛ yeri gè waʔanɛ gè.

8Sɔ̀ngi ma taa cɛndɛnigɛ wuʔu nɛ̄ gè, ma ki cò cɛ̀ngɛ.

Ma ki kpíʔile cɛnwalidɛngɛgɛ Yewe mɛ́.

9Muɔ 'yɛli bè baara cɛnyɛ kɔlini bè muɔ baara ti mìɛni kúɔ.

10Gàa gī cɛnyɛ kɔlisiinwuʔu gè,

kire cɛngɛ gè kiī cɛndɛnigɛ Yewe muɔ Kulocɛliɛ mɛ́.

Ma fǎga baapile nigbe kúɔ kire cɛngɛ nī gèʔ,

muɔ yo, muɔ jaa yo, muɔ póri yo,

muɔ baakuɔwɔ nàguɔ nɛ́ ŋàa wī cɛliwɛ wè yo,

nɛ́ muɔ yajuuro ní dè yo,

nɛ́ nabɔnwɔ wáà ní ŋàa wī yeli sunʔɔmɔ nī bè.

11Nɛ́ ki cɛ́n cɛnyɛ kɔlini sunʔɔmɔ nī bè,

Yewe 'nyìʔɛnɛ faan lè nɛ́ ni yɛrɛ dáà dī ni nī lè,

nɛ́ dàala ní lè nɛ́ yɛrɛ dáà dī ni nɛ̄ lè,

nɛ́ kuʔɔjii ní wè nɛ́ yɛrɛ dáà dī wi nī wè.

Cɛnyɛ kɔlisiinwuʔu nɛ̄ gè, a wi 'ŋɔ́ nɛ̀ taa.

Kire kɛnmɛ nɛ̄ Yewe 'diba taʔa wè cɛndɛnigɛ nɛ̄ gè,

nɛ̀ ki wàli nɛ̀ tɛ́ngɛ wire wuʔu#20.11 Wéli baa Sél 2.1-3; Yir 16.23-30; 23.12; 31.12-17; 34.21; 35.2; Lev 23.3..

12Te muɔ tuu nɛ́ muɔ yàa kpóri wè,

kire ga buu muɔ sìi cɛnyɛ yi- niʔɛ kùlo nī lè

nàa Yewe muɔ Kulocɛliɛ wi bé kɛn muɔ mɛ́ lè#20.12 Wéli baa Fàn 27.16; Mat 15.4; 19.19; Mar 7.10; 10.19; Luk 18.20; Efɛ 6.2-3..

13Ma fǎga siɛn kpúuʔ#20.13 Wéli baa Sél 9.6; Lev 24.17; Mat 5.21; 19.18; Mar 10.19; Luk 18.20; Wurɔ 13.9; Zak 2.11..

14Ma fǎga ceyuugo kpíʔileʔ#20.14 Wéli baa Lev 20.10; Mat 5.27; 19.18; Mar 10.19; Luk 18.20; Wurɔ 13.9; Zak 2.11..

15Ma fǎga kàyuugo kpíʔileʔ#20.15 Wéli baa Lev 19.11; Mat 19.18; Mar 10.19; Luk 18.20; Wurɔ 13.9..

16Ma fǎga finɛ daʔa muɔ siɛnnyɛni nɛ̄ʔ#20.16 Wéli baa 23.1; Mat 19.18; Mar 10.19; Luk 18.20..

17Ma fǎga nyabiɛnnɛ kpíʔile muɔ siɛnnyɛni saʔa nɛ̄ʔ;

muɔ fǎga ki yaʔa muɔ siɛnnyɛni cuɔ wi láa muɔ taaʔ;

nɛ́ wi baakuɔwɔʔ ŋàa wī nàguɔ wèʔ,

nɛ́ wi baakuɔwɔʔ ŋàa wī cɛliwɛ wèʔ,

nɛ́ wi nùɔʔ, nɛ́ wi sèfɛnnɛʔ, nɛ́ yɛgɛ ó yɛgɛ

gàa gī muɔ siɛnnyɛni wuʔu gèʔ#20.17 Wéli baa Wurɔ 7.7; 13.9..

Misa 'puu kàsuluwo siɛnnɛ nɛ́ Yewe sunʔɔmɔ nī bè

18Siɛnnɛ pe mìɛni 'puu nɛ kàsakpɛnigɛ ki kpɛ̀nimɛ lúru bè, ki ní nɛ nyíʔɛnɛ, níɛ sìnbanyɛyɛ wíimɛ lúru bè. Pe 'puu nɛ wírige nyaʔa gè gàa ki yé nyagurugo tɔ́n gè. A fíɛrɛ pe 'cò kpuʔɔ a pe 'kò nɛ fún nɛ yàʔará, a pe 'yéri liʔi. 19A pe sí Misa yɛ wè: «Te nyu nɛ́ weli ní muɔ tíimɛ wè; weli béri lúru muɔ mɛ́. Kiì yɛli Kulocɛliɛ wire tíimɛ de nyu nɛ́ weli ní mmɛ gèʔ, kire ga laa weli fǎga kùuʔ#20.19 Wéli baa Eb 12.18-19..»

20A Misa wi 'ki juu siɛnnɛ mɛ́ bèle nɛ́ jo: «Ye fǎri fìʔɛ́ʔ. Bɛ̀ Kulocɛliɛ wi 'pɛn náʔa gè yeli mɛ́ wè, wiī nɛ caa bè yeli siʔɛ weli wī, kire ga buu yeli de wi fìʔɛ́ lɛ̀lɛ ó lɛ̀lɛ nī, kire ga buu míɛni yeli fǎga de kapiʔile kpínʔiniʔ#20.20 Náʔa gè, Isirayɛli siɛnnɛ pe 'ki juu nɛ́ jo Misa wi 'yɛli bè kò peli kàsuluwo peli nɛ́ Kulocɛliɛ sunʔɔmɔ ní bè. Nyakungɛngɛ Fɔngɔ Siɛnrɛ nī dè, ki 'juu míɛni nɛ́ jo Zezi wiī kàsuluwo weli nɛ́ Kulocɛliɛ sunʔɔmɔ ní bè, wire wi 'kàsulugo sɛngɛ kpíʔile gè. Wéli baa Tim1 2.5; Eb 8.6; 9.15; 12.18-19,24..»

21Bà sí ki 'kpíʔile a siɛnnɛ pe 'yéri liʔi, a Misa wire 'sìʔɛrɛ nɛ̀ jíin kàsadibagɛ nī gè gàa gī wuʔɔ gè, gàa nī Kulocɛliɛ yé puu gè.

Yewe wi 'wi gbùʔɔrɔdiʔɛ faanna wori juu dè

22A Yewe 'ki juu Misa mɛ́ nɛ́ jo: «Ti n'dɛ dàa muɔ bé juu Isirayɛli siɛnnɛ mɛ́ bèle:

« ‹Yeli nyɛ́nì ki nyaa yeli tíimɛ bèle, nyìʔɛnɛ naamɛ mi 'puu níɛ nyu nɛ́ yeli ní. 23Yeli sì yɛli bè yafaanra táà faan bèri ti gbùʔɔrɔ́ de ti sungu mi táanniʔ. Dàa dī walifiiwe wori dè, nɛ́ tiɛ wori ní dè, yeli sǐ ga tíi tire tàa fáala kpíʔileʔ.

24« ‹Muɔ bé puuro tíʔɛ bè mi gbùʔɔrɔdiʔɛ faan gè. Kire nɛ̄ muɔ béri yajuuro kɔnigi dè de mi gbùʔɔrɔ́, nɛ́ míɛni muɔ kakuɔrɔ kaasuʔuro dè, nɛ́ muɔ yanyige kaara ní dè, dàa ti bé puu sìnbaala nɛ́ síkaala wori dè, kire ga laa nìɛyɛ wori ní dè. A mi 'ki kpíʔile ma mi míʔɛ gbùʔɔrɔ gè tiʔɛ ó tiʔɛ nī wè, m'bé muɔ kpàli bé diba taʔa wè muɔ nɛ̄ kire tiʔɛ nī gè wī. 25A muɔ je mi gbùʔɔrɔdiʔɛ faan gè nɛ́ kàdɛniyɛ ní yè, ma fǎga ki faan nɛ́ kàdɛniyɛ ní nyàa pe 'tɛn yè. Nɛ́ ki cɛ́n a muɔ 'ti tɛn dè, muɔ bé ki núʔɔ wī#20.25 Wéli baa Fàn 27.5-6; Yes 8.31.. 26Muɔ sì yɛli bè mi gbùʔɔrɔdiʔɛ faan gè gàa ki bé puu nɛ́ tánʔadiʔɛlɛ ní gèleʔ, kire ga laa a siɛn kɛ́nì je tánʔa ki nɛ̄ bè mi gbùʔɔrɔ wè, pe 'wi fìɛrɛ tiʔɛ nyaa gè !› »

Currently Selected:

Yirile 20: sev

Highlight

Copy

Compare