Jâg 1
1
Atsyɛ̀’te
1Àa mèŋ Jâg, mèŋ fa’a fà’ Ssé, mbɔɔ ye Cʉ̀apʉ̀a Yěsô Kristo. Mèŋ n náa yɔɔn ŋwà’ne á mbwo pi púɔ Ssé pie ée nà mengẅɛ̀ ndá pà Israel ntsɔ̀b pʉ́a nê legém, mbà pɔ́ léen sa jʉ’ ntsèm tsɛ̀ɛ mengwòŋ. Mèŋ n tsyɛ’té gẅí.
Lezǎb ntʉ́m nà Ssé, ńdúɔ zse nò tsɛ̀ɛ ngʉ̀ngʉ̀
2Mefɛ́ pɔ́ɔn, ngʉ̀ngʉ̀ mentí mentí lɔɔn ńne ńkúu gẅí, pi lɔg pɔ́ kwà’ lekág ńkẅé. 3!Pi gÿo pú’u, nue pi ne ńzsé ngie, pi lɔɔn shÿɔg ngʉ̀ngʉ̀ gie e ne ńkúu gẅí, ḿbiŋ ńne ńkẅi’i ńzába ntʉ́m gẅi nà Ssé, mbà pi ge ne tʉte tʉte. 4Tá’, á poŋ ngie letʉte ŋwɛ́ à fa’a yé fà’ tà ńcʉ́me, ńzsé ngie pi ge cʉ́’ melÿò, é ku’ pʉ̀a Ssé, atsɔ́ mmó le zága ná pi wɔ́.
5Nyìŋ lɔɔn ńgwɔ́ tsetsɛ̀ɛ pi, ńtyé nà nò, azse nò zága yé, á lúɔ mbwo Ssé, mbà Ssé ge ná. Á nue e Ssé zɔɔn ńdɔg pɔ́ ntʉ́m mbòŋo ńnáa mmó mbwo wɔ̌wɔ́ɔ té zẅɛ́te. 6Tá ngàŋ ké ńcʉ́’ʉ lélúɔ, ńzáb ntʉ́m wé nà Ssé té ne ḿmʉ́’te, á nue nyìŋ gẅie à mʉ’té, à gwɔ́ pɔ́ pá’ kanú’ gie á tyé ndùm ntse, fefa ne ńdɔgɔ ḿbʉʉ, ńdɔgɔ ńcwóŋo la. 7Tà ntí nyìŋ pú’u, kwaŋ ngie Cʉ̀apʉ̀a ge náa tsɔ́ lága mmó né yé, 8mélà’ mie nyìŋ pú’u, tè gɔɔn tsɔ́ nò tà ńtÿɔ́gɔ kwò mǒ wɔ́. À kwaŋa lépʉ, ńgíŋ ńkwaŋa lécwóŋ pɔ́ fʉ̀’ó.
Anò fÿɔg pɔ́ nò ngàŋa mmó
9Á poŋ ngie fɛ́ wege gẅie aa fÿɔg kág, á nue e Ssé ŋǎ’ nzẅìŋ wé. 10À gẅie aa ngàŋa mmó kág yé á nue e Ssé kéen sẅí’i nzẅìŋ wé, tà á zsé ngie à ge lá’ mag yé pɔ́ pá’ tootǒ maga nà legǐ la. 11Nèm tʉ̌a tɛ’ ńtuɔ legǐ á pÿɛ́, tootǒ gwe, à we lepoŋ lɔgɔ ḿmaga, áa ndʉŋ ndʉŋ pá’ ngàŋa mmó ge gÿo gwá’ mefà’ mé é kwé.
12Ashÿó mbòŋo, aa nyìŋ gẅie ngʉ̀ngʉ̀ kúu yé á tʉte tʉte, á nue pá’ ngʉ̀ngʉ̀ lʉŋté yé á tʉte tʉte lá, e Ssé ge tɔ’ ngú’ twó yé. E lɔgɔ ńgwɔ́ le gwɔ́ tèmì gẅie à la ka’a mbwo wɔ̌ɔwɔ́ɔ gẅie à kwoŋo yé Ssé. 13Nkwà’te lɔɔn ńké ńtóo ná ngàŋ, tà á gɔɔn ngie nkwà’te yɔɔn fóo mbwo Ssé, á nue à lɔɔn ńgwɔ́ e Ssé le gẅiin kwàŋte légÿo nò tepòŋ wɔ́, kwà’ yé ké le tsóte nyìŋ ngie à gÿo nò tepòŋ wɔ́. 14Ye ntí letsɔ̌ɔn shúm zɔ shwoŋte yé, á gwe ná lejÿɔ̀’. 15Letsɔ̌ɔn shúm ŋwɛ́ gwɔ́ tà ńgá’, ńkẅɛɛ nò tepòŋ, anò tepòŋ gá’ ńkẅɛɛ legwé.
16Mefɛ́ pɔ́ɔn pe ntʉ̀ nzẅìŋ, tà nkwaŋá gẅi fʉte gẅí. 17Afù’ gie á poŋ tɛ’, mbɔɔ ntsɔ’ɔ́ fà’ we mbòŋo pú fóo pɔ́ tÿǒ lepwó, á mbwo Ssé gẅie à la nyɛte nèm lâ mecÿɔ́’ saŋ á lefaŋ. À tè kúbe, ńké tè nzěm gẅiin. 18Yé zɔ la kwoŋ, ńdɔgɔ shwóŋe gie áa nénʉ́, ńgÿo pege tsẅɛ́, légwɔ́ gie pege ge gwɔ́ mbwo yé, é gwɔ́ ntwó mmó ná ngwòŋ kɔ̀ɔkɔ́ɔ gie à la gÿo.
Leju’ú shwóŋe ḿbiŋ ńgÿo pú’u
19Mefɛ́ pɔ́ɔn pe ntʉ̀ nzẅìŋ, pi zsé ngie áa mbòŋ mbwo nyìŋ lézsé lézẅí’te nò gie mé gɔɔn, ḿbiŋ ńgɔɔn yé nò á ku’ ku’, é ké le lwo ńgyáŋa lóŋ wɔ́, 20mélà’mie nyìŋ lɔɔn ńgyáŋa lóŋ, mbà à tě ńdɔgɔ ńgÿo mmó gie áa ndʉŋ ndʉŋ mvfò Ssé wɔ́. 21Pú’u la, pi gwá’ menò ncÿǒ ntsèm, ńgwá’a mà gẅie à fóo nà lecÿɔ́g cÿɔ́g. Pi nuŋe ssé mvfò Ssé, ńzẅíŋe shwóŋè gie á ka pye tsɛ̀ɛ ntʉ́m pi. Á nue à ku’u légÿo pi tsẅɛ́.
22Tà pi gwɔ́ pàjú’u shwóŋè Ssé jú’ ndà’, pi gÿo mmó gie shwóŋè ŋwɛ́ gɔɔn ngie pi gÿo. Tà á té pú’u wɔ́, mbà pi sele fʉte mennɛ́ mí. 23Á nue nyìŋ lɔɔn ńjú’u shwóŋè Ssé, ḿbiŋ ńké tè gÿo pá’ á ne ńzɛ́te wɔ́, mbà ngàŋ gwɔ̌ pɔ́ pá’ nyìŋ gẅie à líe shÿó wé tsɛ̀ɛ gyà shÿó, ńgyá pá’ à gwɔ̌. 24À lǐe tà ńtsẅé jʉ’, tà fó jʉ’ó ńgʉa, ḿbú ńdege pá’ à gwɔ̌. 25Tá nyìŋ gẅie à nyɛte ńtuu nò á ná *lepʉ̌ sie tsɔ́ mmó té mǒ zág, ésie é gÿo nyìŋ gwɔ́ ndù nnɛ́, ńzáb ntʉ́m wé mǒ té kʉ́a tà à tè gwɔ́ pɔ́ jù’u ńdege wɔ́, ńgwɔ́ jù’u ńgÿo, mbà à ge gwɔ́ shÿó mbòŋo ná kɔ̀ɔkɔ́ɔ gie à gÿo.
26Nyìŋ lɔɔn ńne ńkwaŋa ngie aa nà nò Ssé, ncwò wé piŋ tè poŋ, mbà à fʉte twó mbùm yé. À we légwɔ́ ná nò Ssé gwɔ́ pɔ́ sẅɛ̀ɛ. 27Nyìŋ gẅie e Ssé líe yé á gwɔ́ kwà’ ná nò yé Ssé, tà mmó té ná yé zág, aa nyìŋ gẅie à líe púɔ métsé mbɔɔ mepfɔ̌g tsɛ̀ɛ ngɔ́’ yɔb, ńgwɔ́ nyìŋ gẅie à pɔ́ɔn mbùm ye, ḿbɔ́g menò njÿó lécʉŋte yé.
Currently Selected:
Jâg 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.