Lukase 24
24
Yěsô zimé nà legwé
(Matio 28.1-9; Malékuse 16.1-8; Jâŋ 20.1-10)
1Ndùŋ mvfò lyɛ̌’, á nà ngàba lá’ gÿo ńgwɔ́, pànzwě ŋwɛ́ mʉ́ʉ tsɛ̀ɛ mba’ámba’, ńdɔgɔ làméndɔ́ɔn gie pɔ́ lá táŋte ńgʉa né jʉ’ʉ lesyè. 2Ńgʉa tà ńkúu wó, ńgyá, mbà mé kà fó ncwò lesyè, ńtsó máamáa tóon gẅie à kaa wó. 3Pɔ́ zyɛ́’ ńkúu tsòló, ńké tè pfó Ndè Yěsô gyá. 4Pɔ́ la tyé ńdíe jʉ’ é ne ńkʉ́’ʉ wɔ́b, pɔ́ gwoon ńgyá pʉ̀a mépʉ́a kẅɛ, ḿma’ menzsǒ é fɔ́g tà ńŋwʉŋe. 5Pɔ́ cÿɔ’ tà ńcʉ́’ ńdíe pɔ́ ssé, tá pʉ̀a ŋwɛ́ zɛ́te wɔ́b ngie: Pi tóo tsetsɛ̀ɛ mepfó ssé, éfa’a nyìŋ gẅie aa ntentʉ́ mélà’a kɔ́? 6À cʉ’ʉ́ jʉ’ɔɔn wɔ́, à zimé nà legwé. Pi zɔɔn ńkímte nò gie à la ne ńgɔɔn mbwo pi fʉ̀’ gie pi lâ pɔ́ la nyé Galilea. 7À la gɔɔn ngie: Á ne ńzɛ́te ngie mé sẅiŋe *Míŋ Nyìŋ mbwo pʉ̀a tepòŋ, pɔ́ kime yé nà tÿǒ nkǐ, à zíme nà legwé nà mbɔ́ɔntè lyɛ̌’ tá.
8Pɔ́ jú’ pú’u, ńdeen ńké ńkímte ngie, ée menò mie Yěsô la zɔɔn shwóŋó wɔ́b, 9éfó jʉ’ó, ńgʉa ḿbú ḿbíte menò ntsèm mie é cʉ̌a, éshwóŋ *ngàŋa kwò yé ntsɔ̀b yémmɔ’ɔ́ nê legém mbɔɔ mbwo petsɔ́ pʉ̀a nà nùɔ yɔ́b. 10Pànzwě ŋwɛ́ lâ Malîɛ Magdala, ńgÿo Jâne, mbɔɔ Malîɛ má pà Jâg, pâ petsɔ́ pànzwě. Pɔ́ píte menò ŋwɛ́ éshwóŋ *ngàŋa kwò Yěsô. 11Pɔ́ jú’ é gwɔ́ pɔ́ pá’ njÿòon la, pɔ́ té zẅíŋ. 12Tá’, Piɛ lu ssé, ńkÿote tà ńkúu jʉ’ ye lesyè, ńŋwe’e ssé, ńgyá pɔ́ ndà’ shúm nzsǒ sie mé la lɔg ńzémte pfó Yěsô, ńgwɔ piŋ, á giŋe ńkʉ’ʉ yé, à tè ne ńzsé mmó gie á cʉ̌a wɔ́.
Yěsô kẅɛ̌ mvfò ngàŋa kwò yé yépʉ́a, á mánzsè Emawẅis
13Á la gíŋe ńgwɔ́ pɔ́ lyɛ’ó, etsɔ́ pʉ̀a mépʉ́a, á nà nùɔ Yěsô lu ssé Yerósalem, ńně ńgee nê tsɔ́ lá’ gie mé tóŋo le Emawẅis. Ntyě gwɔ́ pá’ mmó mekilo ntsɔ̀b yémɔ’ɔ́ nê legém. 14Ńgiŋe shwóŋe nà menò ntsèm mie é ka pǔ ńcʉa. 15Afʉ̀’e pɔ́ la ne shwóŋe, ńně ńzoŋo la, Yěsô lê twó yé kẅɛ́te wɔ́b mánzsè, pâ pɔ̌ ne ńgiŋe. 16Tá’, atsɔ́ mmó táte, pɔ́ té yé liŋ. 17Yěsô zɛ́te wɔ́b ngie: Pi sěen ńgiŋe ńzoŋo pɔ́ kɔ́ pɛ́’ɛ̀? Pɔ́ jú’ ńtyé, ḿma’ mezìŋe, éshʉ́ŋe twó. 18Atsɔ̌ tà’ ná pɔ́b, lezíŋ sé gwɔ́ le Kélopàs zɛ́te yé ngie: Mânyìŋ ntsèm Yerósalem zsě mmó gie á kà gÿo Yerósalem nà melyɛ̌’ mɔɔn, tà é cʉ́’ ndà’ gú la?
19Á zɛ́te wɔ́b ngie akɔ́ kà gÿo? Pɔ́ gɔɔn ngie, peg kě ḿmɔɔn pɔ́ menò mie é kà gÿo Yěsô nyìŋ Nǎzarɛd. À kaa kwà’ *ntsẅì nkʉ̀ Ssé we lÿò, á nà mefà’ mé, mbɔɔ nà shwóŋè yé á mvfò Ssé mbɔɔ mvfò pʉ̀a mesoŋ. 20Pá’ *metándá pànùŋe pwɔ́’ pâ pàsá’a lá’ peg ka tsege yé mbwo *Pilato ngie mé gʉa ńŋaga yé, ńzẅé yé. Mé ka leen ńké ńkime yé nà tÿǒ nkǐ. 21Mbà peg ka ne ńkwaŋa ngie yé zɔ ge lá’ zá’ nkÿo ngɔ́’, á lóŋ Israel à tsẅɛ́. Mɔɔn menò ka gÿo, ée fʉ̀’ɔɔn ńgwɔ́ lyɛ’ɛ́ lá’ sétá. 22É té ndà’ pú’u wɔ́, etsɔ́ pànzwě tsetsɛ̀ɛ peg ně ńkʉ’ʉ wég. Pɔ́ ně ḿmʉ́ melém njÿó lyɛ̌’ɔɔn, ńgʉa jʉ’ gie mé ka le’e yé wó, 23pɔ́ té pfó yé gyá, ḿbiŋ nzèm shwóŋó wég ngie: Pɔ́ kǔ wó, *Mecÿɔ́’ Ssé kẅɛɛ mvfò pɔ́b, ńgɔɔn ngie Yěsô gwɔ́ pɔ́ ntentʉ́! 24Etsɔ́ pʉ̀a pég ně ńju’ pú’u, ńdu ssé, ńgíŋe ńgʉa yɔ́b lesyè, ńgyá á gwɔ́ pɔ́ ndʉŋ ndʉŋ pá’ pànzwě ně shwóŋó wɔ́b, tá pɔ́ ké tè Yěsô gyá.
25Yěsô leen ńké ńgɔɔn né pɔ́b ngie: Pi gwě gígyé. Pi tè ne ńdwo ńzẅíŋe menò ntsèm mie *pàntsẅi nkʉ̀ Ssé la ŋwé’e wɔ́. 26Pi kaa zsé ngie, á ka ne ńzɛ́te ngie *Nzà’nkÿo vɔg ńgyá ngɔ́’ tá ńkúu tsɛ̀ɛ legú’ we wɔ́ ka? 27Ńgɔɔn pú’u, ńzye lékyagte menò ntsèm mie ée tsɛ̀ɛ ŋwà’ne Ssé ńne ńdíe yé, éshwóŋó wɔ́b, ńzye nà meŋwà’ne Mǒsê, ḿbɔ́ɔnte ńkúu tsɛ̀ɛ me *pàntsẅì nkʉ̀ Ssé. 28Pâ pɔ̌ gʉa tà ne ńkúu lá’ gie pɔ́ mépʉ́a lɔ́ɔn ńgee wo. Pɔ́ gyá á fa’a pɔ́ pá’ à giŋé ńge giŋ tà ngʉ̀a sag. 29Tá pɔ́ kú’te yé, ńgie pâ pɔ̌ pú ńdá’, mélà’mie nzèm cʉ’ʉ́ síŋe sǐŋ, zà’ cʉ̌a. Á zẅíŋ pâ pɔ̌ kúu ndá gie pɔ́ lɔ́ɔn ńgee nê wó. 30Afʉ̀’ʉ léjÿó shúm gÿo ńku’, pɔ́ ńnéŋe ssé, á pí mbelég, ńná ndǎg mbwo Ssé, ḿbwɔ́’te ńná né pɔ́b. 31Tá menÿɔ́g mɔ́b leen ńké ńnyɛ́’ɛ pɔ́ liŋe yé, á gwoon ḿbyé. 32Pɔ́ sele ńgɔɔn tsetsɛ̀ɛ pɔ́b ngie: Yɔɔn lɔgɔ ńgwɔ́ mmó gie á kɔ’ɔ ńgÿo tá shwóŋè yé kúte wɔ́gɔ́ fʉ̀’ gie pege kɔ’ɔ ńgwɔ́ mánzsè á ne ńkyagte nò Ssé shwóŋó wɔ́gɔ́ la! 33Pɔ́ lu ssé pɔ́ fʉ̀’ó, ńcʉ́me mánzsè, ńgíŋ ḿbiŋe Yerósalem, ńkẅɛ́te *ngàŋa kwò Yěsô ntsɔ̀b yémɔ’ɔ́ nê legém, mbà pâ petsɔ́ pʉ̀a Yěsô cu’té. 34Ńkẅɛ́te wɔ́b pú’u, pɔ́ shwóŋó wɔ́b ngie: Áa nénʉ́ ngie Ndè zimé nà legwé, Símo ně ńgyá yé. 35Pɔ́ gíŋe ḿbíte yɔ́b mmó gie pɔ́ ně ńtóo mánzsè ńgyá, ńgie pɔ́ ně ńgwaa liŋe yé, mbà à pǐ mbelég tà ne ńgaba.
Yěsô kẅɛ̌ mvfò ngàŋa kwò yé
(Jâŋ 20.19-23)
36Pɔ́ nyé shwóŋó shwoŋó, Yěsô gwóon ńkẅɛɛ tsetsɛ̀ɛ pɔ́b, ńtsyɛ’te wɔ́b ngie: Mbʉ́lè gwɔ́ ne pi! 37Aléme yɔ́b tsɔ́’ɔ. Pɔ́ cÿɔ’, ńzɔɔn ne ńkwaŋa pɔ́ ngie áa gegÿɛ́ nyìŋ. 38Tá Yěsô gɔɔn né pɔ́b ngie: Aléme gí séen ńtsɔ́’ɔ tsɔ’ɔ́ mélà’a kɔ? Pi mʉ’te mʉ’té mélà’a kɔ́? 39Pi líe mbwó mɔ́ɔn nê mekwò mɔ́ɔn tá ńgyá, aa kwà’ mèŋ. Pi mwoonte wɔ̀ɔn tá ńjú’, gegÿɛ́ nyìŋ té mbàb nnɛ́ gẅiin, ńké tè mekẅǐ gẅiin, pi ké ńgyá pá’, m biŋ ńgẅiin mbàb nnɛ́ nê mekẅǐ. 40Á gwaa gɔɔn ńne nyɛɛ wɔ́b mbwó mé lâ mekwò mé. 41Pɔ́ ne ńkága tɛ’ tá’ á nyé ńkʉ’ʉ wɔ́b kʉ’ʉ, pɔ́ gɔɔn ngie kà áa nò wɔ́? Yěsô gyá pá’ pɔ́ nyé ḿmʉ́’te mʉ’té la, ńdeen ńké ńzɛ́te wɔ́b ngie: Pi gẅiin mmó mpfɛ̌ jʉ’ɔɔn? 42Pɔ́ fa’a kème ssó ye ntuɔ ńná né yé. 43Á kẅé, ńtyé pɔ́ mvfò pɔ́b ḿpfɛ́.
44MÀpfɛ́ tà ḿmag, ńgɔɔn né pɔ́b ngie: Pi gyá mmó gie n kɔ̌ɔn shwóŋó gẅí, á fʉ̀’ gie pege ka nyě ńzɔ́gɔ. Mèŋ n da shwóŋó gẅi ngie á ne ńzɛ́te ngie yɛ̌ kɔ́ wɔ́ gie mé la ŋwe’e ná mèŋ wɔ́ à pumte. Menò ŋwɛ́ ntsèm ntsèm ée tsɛ̀ɛ ŋwà’ne Mǒsê, mbɔɔ tsɛ̀ɛ ye *pàntsẅì nkʉ̀ Ssé lâ ye Mezɔ́bɔ Ntse. 45Ńdeen ńké ńtsɔ́’ legyè sɔ́b, ńgÿo pɔ́ jú’ menò mie ée tsɛ̀ɛ ŋwà’ne Ssé. 46Ńgɔɔn ngie: Áa tsɛ̀ɛ ŋwà’ne Ssé ńgwɔ́ ngie: *Nzà’nkÿo gẅíin lé lá’ ńgyá ngɔ́’, ńkwé, tá Ssé piŋ ńzíme yé nà legwé nà mbɔ́ɔntè lyɛ̌’ tá. 47Á ne ńzɛ́te ngie mé lá’ ńdɔg lezíŋ sɔ́ɔn, ńgɔɔn nò Ssé mbwo lá’a lá’ ngie wɔ̌wɔ́ɔ kúbe mà we, e Ssé lege menò tepòŋ mé. Pú’u, é ké zye Yerósalem. 48Pi pɛ zɔ ké ńgwɔ́ pànjÿò ńgyá, á lélɔg menò ŋwɛ́ saa lá’. 49Pi zsé ngie mèŋ n ge tó túmo mmó gie Tá wɔ̀ɔn la ka’a lénáa mbwo pi. Pi ké ńzẅí’te pɔ́ tÿǒsoŋ tà ńkúu fʉ̀’ gie metʉ̀ Ssé é ge fó tyǒ lepwó ésẅɛ̌’ kúu ná pi.
Yěsô kwɔ̌’ lê tÿǒ lepwó
50Yěsô gɔɔn pú’u, ńdɔgɔ wɔ́b ńkẅɛ, ńgʉa tà ńcʉ́’ʉ lékúu Mbetáni, ńka’ mbwó ńnáa tÿǒ, ńnéŋ mbʉ́lè ná pɔ́b. 51Á ne ńnéŋe mbʉ́lè ná pɔ́b pú’u, ńně ńkwɔ́’ɔ ńgee nê tÿǒ lepwó. 52Pɔ́ cʉ́’ ńtyé jʉ’ó ńně ńgu’te yé, tà á ku’, pɔ́ lɔgɔ lekág ḿbiŋ nzèm ne Yerósalem. 53Ńgʉa tà ńkúu wó, ńké ńcʉ́’ ńnéŋe pɔ́ tsɛ̀ɛ *jʉ’ʉ Ssé fʉ̀’ ntsèm, ńgu’te Ssé.
Currently Selected:
Lukase 24: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.
Lukase 24
24
Yěsô zimé nà legwé
(Matio 28.1-9; Malékuse 16.1-8; Jâŋ 20.1-10)
1Ndùŋ mvfò lyɛ̌’, á nà ngàba lá’ gÿo ńgwɔ́, pànzwě ŋwɛ́ mʉ́ʉ tsɛ̀ɛ mba’ámba’, ńdɔgɔ làméndɔ́ɔn gie pɔ́ lá táŋte ńgʉa né jʉ’ʉ lesyè. 2Ńgʉa tà ńkúu wó, ńgyá, mbà mé kà fó ncwò lesyè, ńtsó máamáa tóon gẅie à kaa wó. 3Pɔ́ zyɛ́’ ńkúu tsòló, ńké tè pfó Ndè Yěsô gyá. 4Pɔ́ la tyé ńdíe jʉ’ é ne ńkʉ́’ʉ wɔ́b, pɔ́ gwoon ńgyá pʉ̀a mépʉ́a kẅɛ, ḿma’ menzsǒ é fɔ́g tà ńŋwʉŋe. 5Pɔ́ cÿɔ’ tà ńcʉ́’ ńdíe pɔ́ ssé, tá pʉ̀a ŋwɛ́ zɛ́te wɔ́b ngie: Pi tóo tsetsɛ̀ɛ mepfó ssé, éfa’a nyìŋ gẅie aa ntentʉ́ mélà’a kɔ́? 6À cʉ’ʉ́ jʉ’ɔɔn wɔ́, à zimé nà legwé. Pi zɔɔn ńkímte nò gie à la ne ńgɔɔn mbwo pi fʉ̀’ gie pi lâ pɔ́ la nyé Galilea. 7À la gɔɔn ngie: Á ne ńzɛ́te ngie mé sẅiŋe *Míŋ Nyìŋ mbwo pʉ̀a tepòŋ, pɔ́ kime yé nà tÿǒ nkǐ, à zíme nà legwé nà mbɔ́ɔntè lyɛ̌’ tá.
8Pɔ́ jú’ pú’u, ńdeen ńké ńkímte ngie, ée menò mie Yěsô la zɔɔn shwóŋó wɔ́b, 9éfó jʉ’ó, ńgʉa ḿbú ḿbíte menò ntsèm mie é cʉ̌a, éshwóŋ *ngàŋa kwò yé ntsɔ̀b yémmɔ’ɔ́ nê legém mbɔɔ mbwo petsɔ́ pʉ̀a nà nùɔ yɔ́b. 10Pànzwě ŋwɛ́ lâ Malîɛ Magdala, ńgÿo Jâne, mbɔɔ Malîɛ má pà Jâg, pâ petsɔ́ pànzwě. Pɔ́ píte menò ŋwɛ́ éshwóŋ *ngàŋa kwò Yěsô. 11Pɔ́ jú’ é gwɔ́ pɔ́ pá’ njÿòon la, pɔ́ té zẅíŋ. 12Tá’, Piɛ lu ssé, ńkÿote tà ńkúu jʉ’ ye lesyè, ńŋwe’e ssé, ńgyá pɔ́ ndà’ shúm nzsǒ sie mé la lɔg ńzémte pfó Yěsô, ńgwɔ piŋ, á giŋe ńkʉ’ʉ yé, à tè ne ńzsé mmó gie á cʉ̌a wɔ́.
Yěsô kẅɛ̌ mvfò ngàŋa kwò yé yépʉ́a, á mánzsè Emawẅis
13Á la gíŋe ńgwɔ́ pɔ́ lyɛ’ó, etsɔ́ pʉ̀a mépʉ́a, á nà nùɔ Yěsô lu ssé Yerósalem, ńně ńgee nê tsɔ́ lá’ gie mé tóŋo le Emawẅis. Ntyě gwɔ́ pá’ mmó mekilo ntsɔ̀b yémɔ’ɔ́ nê legém. 14Ńgiŋe shwóŋe nà menò ntsèm mie é ka pǔ ńcʉa. 15Afʉ̀’e pɔ́ la ne shwóŋe, ńně ńzoŋo la, Yěsô lê twó yé kẅɛ́te wɔ́b mánzsè, pâ pɔ̌ ne ńgiŋe. 16Tá’, atsɔ́ mmó táte, pɔ́ té yé liŋ. 17Yěsô zɛ́te wɔ́b ngie: Pi sěen ńgiŋe ńzoŋo pɔ́ kɔ́ pɛ́’ɛ̀? Pɔ́ jú’ ńtyé, ḿma’ mezìŋe, éshʉ́ŋe twó. 18Atsɔ̌ tà’ ná pɔ́b, lezíŋ sé gwɔ́ le Kélopàs zɛ́te yé ngie: Mânyìŋ ntsèm Yerósalem zsě mmó gie á kà gÿo Yerósalem nà melyɛ̌’ mɔɔn, tà é cʉ́’ ndà’ gú la?
19Á zɛ́te wɔ́b ngie akɔ́ kà gÿo? Pɔ́ gɔɔn ngie, peg kě ḿmɔɔn pɔ́ menò mie é kà gÿo Yěsô nyìŋ Nǎzarɛd. À kaa kwà’ *ntsẅì nkʉ̀ Ssé we lÿò, á nà mefà’ mé, mbɔɔ nà shwóŋè yé á mvfò Ssé mbɔɔ mvfò pʉ̀a mesoŋ. 20Pá’ *metándá pànùŋe pwɔ́’ pâ pàsá’a lá’ peg ka tsege yé mbwo *Pilato ngie mé gʉa ńŋaga yé, ńzẅé yé. Mé ka leen ńké ńkime yé nà tÿǒ nkǐ. 21Mbà peg ka ne ńkwaŋa ngie yé zɔ ge lá’ zá’ nkÿo ngɔ́’, á lóŋ Israel à tsẅɛ́. Mɔɔn menò ka gÿo, ée fʉ̀’ɔɔn ńgwɔ́ lyɛ’ɛ́ lá’ sétá. 22É té ndà’ pú’u wɔ́, etsɔ́ pànzwě tsetsɛ̀ɛ peg ně ńkʉ’ʉ wég. Pɔ́ ně ḿmʉ́ melém njÿó lyɛ̌’ɔɔn, ńgʉa jʉ’ gie mé ka le’e yé wó, 23pɔ́ té pfó yé gyá, ḿbiŋ nzèm shwóŋó wég ngie: Pɔ́ kǔ wó, *Mecÿɔ́’ Ssé kẅɛɛ mvfò pɔ́b, ńgɔɔn ngie Yěsô gwɔ́ pɔ́ ntentʉ́! 24Etsɔ́ pʉ̀a pég ně ńju’ pú’u, ńdu ssé, ńgíŋe ńgʉa yɔ́b lesyè, ńgyá á gwɔ́ pɔ́ ndʉŋ ndʉŋ pá’ pànzwě ně shwóŋó wɔ́b, tá pɔ́ ké tè Yěsô gyá.
25Yěsô leen ńké ńgɔɔn né pɔ́b ngie: Pi gwě gígyé. Pi tè ne ńdwo ńzẅíŋe menò ntsèm mie *pàntsẅi nkʉ̀ Ssé la ŋwé’e wɔ́. 26Pi kaa zsé ngie, á ka ne ńzɛ́te ngie *Nzà’nkÿo vɔg ńgyá ngɔ́’ tá ńkúu tsɛ̀ɛ legú’ we wɔ́ ka? 27Ńgɔɔn pú’u, ńzye lékyagte menò ntsèm mie ée tsɛ̀ɛ ŋwà’ne Ssé ńne ńdíe yé, éshwóŋó wɔ́b, ńzye nà meŋwà’ne Mǒsê, ḿbɔ́ɔnte ńkúu tsɛ̀ɛ me *pàntsẅì nkʉ̀ Ssé. 28Pâ pɔ̌ gʉa tà ne ńkúu lá’ gie pɔ́ mépʉ́a lɔ́ɔn ńgee wo. Pɔ́ gyá á fa’a pɔ́ pá’ à giŋé ńge giŋ tà ngʉ̀a sag. 29Tá pɔ́ kú’te yé, ńgie pâ pɔ̌ pú ńdá’, mélà’mie nzèm cʉ’ʉ́ síŋe sǐŋ, zà’ cʉ̌a. Á zẅíŋ pâ pɔ̌ kúu ndá gie pɔ́ lɔ́ɔn ńgee nê wó. 30Afʉ̀’ʉ léjÿó shúm gÿo ńku’, pɔ́ ńnéŋe ssé, á pí mbelég, ńná ndǎg mbwo Ssé, ḿbwɔ́’te ńná né pɔ́b. 31Tá menÿɔ́g mɔ́b leen ńké ńnyɛ́’ɛ pɔ́ liŋe yé, á gwoon ḿbyé. 32Pɔ́ sele ńgɔɔn tsetsɛ̀ɛ pɔ́b ngie: Yɔɔn lɔgɔ ńgwɔ́ mmó gie á kɔ’ɔ ńgÿo tá shwóŋè yé kúte wɔ́gɔ́ fʉ̀’ gie pege kɔ’ɔ ńgwɔ́ mánzsè á ne ńkyagte nò Ssé shwóŋó wɔ́gɔ́ la! 33Pɔ́ lu ssé pɔ́ fʉ̀’ó, ńcʉ́me mánzsè, ńgíŋ ḿbiŋe Yerósalem, ńkẅɛ́te *ngàŋa kwò Yěsô ntsɔ̀b yémɔ’ɔ́ nê legém, mbà pâ petsɔ́ pʉ̀a Yěsô cu’té. 34Ńkẅɛ́te wɔ́b pú’u, pɔ́ shwóŋó wɔ́b ngie: Áa nénʉ́ ngie Ndè zimé nà legwé, Símo ně ńgyá yé. 35Pɔ́ gíŋe ḿbíte yɔ́b mmó gie pɔ́ ně ńtóo mánzsè ńgyá, ńgie pɔ́ ně ńgwaa liŋe yé, mbà à pǐ mbelég tà ne ńgaba.
Yěsô kẅɛ̌ mvfò ngàŋa kwò yé
(Jâŋ 20.19-23)
36Pɔ́ nyé shwóŋó shwoŋó, Yěsô gwóon ńkẅɛɛ tsetsɛ̀ɛ pɔ́b, ńtsyɛ’te wɔ́b ngie: Mbʉ́lè gwɔ́ ne pi! 37Aléme yɔ́b tsɔ́’ɔ. Pɔ́ cÿɔ’, ńzɔɔn ne ńkwaŋa pɔ́ ngie áa gegÿɛ́ nyìŋ. 38Tá Yěsô gɔɔn né pɔ́b ngie: Aléme gí séen ńtsɔ́’ɔ tsɔ’ɔ́ mélà’a kɔ? Pi mʉ’te mʉ’té mélà’a kɔ́? 39Pi líe mbwó mɔ́ɔn nê mekwò mɔ́ɔn tá ńgyá, aa kwà’ mèŋ. Pi mwoonte wɔ̀ɔn tá ńjú’, gegÿɛ́ nyìŋ té mbàb nnɛ́ gẅiin, ńké tè mekẅǐ gẅiin, pi ké ńgyá pá’, m biŋ ńgẅiin mbàb nnɛ́ nê mekẅǐ. 40Á gwaa gɔɔn ńne nyɛɛ wɔ́b mbwó mé lâ mekwò mé. 41Pɔ́ ne ńkága tɛ’ tá’ á nyé ńkʉ’ʉ wɔ́b kʉ’ʉ, pɔ́ gɔɔn ngie kà áa nò wɔ́? Yěsô gyá pá’ pɔ́ nyé ḿmʉ́’te mʉ’té la, ńdeen ńké ńzɛ́te wɔ́b ngie: Pi gẅiin mmó mpfɛ̌ jʉ’ɔɔn? 42Pɔ́ fa’a kème ssó ye ntuɔ ńná né yé. 43Á kẅé, ńtyé pɔ́ mvfò pɔ́b ḿpfɛ́.
44MÀpfɛ́ tà ḿmag, ńgɔɔn né pɔ́b ngie: Pi gyá mmó gie n kɔ̌ɔn shwóŋó gẅí, á fʉ̀’ gie pege ka nyě ńzɔ́gɔ. Mèŋ n da shwóŋó gẅi ngie á ne ńzɛ́te ngie yɛ̌ kɔ́ wɔ́ gie mé la ŋwe’e ná mèŋ wɔ́ à pumte. Menò ŋwɛ́ ntsèm ntsèm ée tsɛ̀ɛ ŋwà’ne Mǒsê, mbɔɔ tsɛ̀ɛ ye *pàntsẅì nkʉ̀ Ssé lâ ye Mezɔ́bɔ Ntse. 45Ńdeen ńké ńtsɔ́’ legyè sɔ́b, ńgÿo pɔ́ jú’ menò mie ée tsɛ̀ɛ ŋwà’ne Ssé. 46Ńgɔɔn ngie: Áa tsɛ̀ɛ ŋwà’ne Ssé ńgwɔ́ ngie: *Nzà’nkÿo gẅíin lé lá’ ńgyá ngɔ́’, ńkwé, tá Ssé piŋ ńzíme yé nà legwé nà mbɔ́ɔntè lyɛ̌’ tá. 47Á ne ńzɛ́te ngie mé lá’ ńdɔg lezíŋ sɔ́ɔn, ńgɔɔn nò Ssé mbwo lá’a lá’ ngie wɔ̌wɔ́ɔ kúbe mà we, e Ssé lege menò tepòŋ mé. Pú’u, é ké zye Yerósalem. 48Pi pɛ zɔ ké ńgwɔ́ pànjÿò ńgyá, á lélɔg menò ŋwɛ́ saa lá’. 49Pi zsé ngie mèŋ n ge tó túmo mmó gie Tá wɔ̀ɔn la ka’a lénáa mbwo pi. Pi ké ńzẅí’te pɔ́ tÿǒsoŋ tà ńkúu fʉ̀’ gie metʉ̀ Ssé é ge fó tyǒ lepwó ésẅɛ̌’ kúu ná pi.
Yěsô kwɔ̌’ lê tÿǒ lepwó
50Yěsô gɔɔn pú’u, ńdɔgɔ wɔ́b ńkẅɛ, ńgʉa tà ńcʉ́’ʉ lékúu Mbetáni, ńka’ mbwó ńnáa tÿǒ, ńnéŋ mbʉ́lè ná pɔ́b. 51Á ne ńnéŋe mbʉ́lè ná pɔ́b pú’u, ńně ńkwɔ́’ɔ ńgee nê tÿǒ lepwó. 52Pɔ́ cʉ́’ ńtyé jʉ’ó ńně ńgu’te yé, tà á ku’, pɔ́ lɔgɔ lekág ḿbiŋ nzèm ne Yerósalem. 53Ńgʉa tà ńkúu wó, ńké ńcʉ́’ ńnéŋe pɔ́ tsɛ̀ɛ *jʉ’ʉ Ssé fʉ̀’ ntsèm, ńgu’te Ssé.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.