Lukase 22
22
Ngɔ́’ Yěsô ne ńgee nzyeté
(Matio 26.1-5,14-16; Malékuse 14.1-2,10-11; Jâŋ 11.47-53)
1Alyɛ’ɛ́ línɔ́ɔn pà Yuda gie mé lɔ́ɔn ńtóŋo le *Páskà gÿo ne ńku’u, ńdɔgɔ ńzye ngàb gie pɔ́ lɔ́ɔn ḿpfɛ́ɛ tsɔ̌ ntí mbelég té *mvòŋ. 2*Metándá pànùŋe pwɔ́’ pâ *pàkyàgte lepʉ̌ Mǒsê ne fa’a shÿó légÿo mé zẅé Yěsô, tá ne ḿbɔ́gɔ nÿɔ́g lá’. 3Sátà kúu tsɛ̀ɛ ntʉ́m Jẅidas, á gwɔ́ tsɔ̌ tà’ nyìŋ ná pʉ̀a ntsɔ̀b pʉ́a nê legém, gẅie setsɔ́ lezíŋ sé laa le Iskariod. 4Á leen ńké ńgʉa ńgyá *metándá pànùŋe pwɔ́’ pâ pàtyé mvfò nà lepyɛ̌b ndá Ssé, pâ pɔ̌ kwaŋte pá’ à ge gÿo tá sẅiŋe Yěsô mbwo pɔ́b. 5Á pú ḿboŋo wɔ́b, tà pɔ́ zẅíŋ ngie pɔ́ ge ná nkáb mbwo ye. 6Á zẅíŋ, ńgwóon ńzye léfa’ shÿó pá’ à ge sẅiŋe Yěsô mbwo pɔ́b tà lá’ le zsé.
Yěsô tǔm ngàŋa nkwò yé ńtáŋte yɔ́b línɔ́ɔn Páskà
(Matio 26.17-19; Malékuse 14.12-16)
7Alyɛ’ɛ́ *Páskà ŋwɛ́ leen ńké ńtó, ńgwɔ́ lyɛ̌’ gie mé lɔ́ɔn ńgwaa púɔ *njʉ̀njÿò línɔ́ɔn. 8Yěsô túmo Piɛ pɔ́ Jâŋ, ńgɔɔn né pɔ́b ngie: Pi gʉa ńcwoŋte ségè shúm *Páskà. 9Pɔ́ zɛ́te yé ngie: Ɔ kwǒŋ ngie: Peg gʉa nzɔ̌ ńcwoŋte? 10Á gɔɔn ngie: Pi jú’ mboŋó, pi ge gʉa tà kúu tÿǒsoŋ, é gyá mámbàŋa gẅiin tÿóon ntse, pi cʉ́me nzèm ye, tà á kúu ndá pi kú gí. 11É gɔɔn né ngàŋ ndá ngie: Tsítsà gɔ̌ɔn ngie peg zɛ́te gú ngie lûm ndá gẅie pâ *ngàŋa kwò yé ge jÿó *Páskà wó aa wɛ̌ wɔ́? 12À ge nyɛɛ gẅi máamáa lûm ndá ná ndêg we tÿǒ, tà mbà mé ně ńdá’ ńtáŋte mboŋó, áa jʉ’ gie pi ge cwoŋte ségè shúm línɔ́ɔn wó. 13Pɔ́ gʉa ńkúu wó, ńgyá akɔ́ɔkɔ́ɔ gwɔ́ pɔ́ pá’ Yěsô shwóŋó wɔ́b. Pɔ́ cwoŋte shúm léjÿó *Páskà jʉ’ó.
Eshúm léjÿó Cʉ̀apʉ̀a
(Matio 26.26-29; Malékuse 14.22-25; 1 Korento 11.23-25)
14Afʉ̀’ gÿo ńku’, Yěsô pâ ngàŋ ntúm wé tó ńnéŋe ssé, 15ńně ḿpfɛ́ɛ mmó, á gɔɔn né pɔ́b ngie: N ka kě ńtsɔ́ɔn tɛ’ pá’ pege ge pú jÿó wɔɔn *Páskà tá mèŋ n gyá ngɔ́’. 16Tà mèŋ shwóŋó gẅi mboŋó: N tě ńdá’a ńgíŋe ńjÿó tsɔ̌ *Páskà wɔ́, tà lá’ kú fʉ̀’ gie anò yɔɔn línɔ́ɔn pumté, tà Ssé zɔ̌ cʉ́’ʉ sá’a njÿó. 17À la shwóŋó wɔ́b pú’u, ńdeen ńké ńkaa ntú’ melù’, ńná ndǎg mbwo Ssé, ńgɔ́ɔn né pɔ́b ngie: Pi kɔ ntú’ yɔɔn ḿbú ńnú tà maga gẅí. 18Pi zsé ngie mèŋ, n tě ńdá’a ńgíŋe ńnúu melù’ wɔ́ tà lá’ kú fʉ̀’ gie Ssé zɔ cʉ’ʉ́ sá’a njÿó. 19À la gíŋe ḿbí mbelég, ńná ndǎg mbwo Ssé, ḿbwɔ́’ ńgwaa náa mbwo *ngàŋa kwò yé ńgɔɔn ngie: Yɔɔn ee mbùm nnɛ́ yɔɔn [mie mé nǎ nà twó sí. Pi cʉ́’ ne ńgÿo pá’ɔɔn ńdɔ́gɔ ńkímte wɔ̀ɔn. 20Pɔ́ la pfɛ́ shúm léjÿó tà ḿmag, Yěsô kaa ntú’ melù’ ńgɔɔn ngie: Ntú’ yɔɔn ee pá’ɔɔn ńgwɔ́ kʉa sẅé gie e Ssé lɔgɔ metse mɔ́ɔn ńgwaa. E pfɛte ńtí gẅí].
21Mèŋ n kě ńgɔɔn pá’ɔɔn nyìŋ gẅie à ge sẅǐŋ mèŋ gwɔ́ jʉ́’ɔɔn tà peg yé ne ńteme ńjÿó mmó. 22Áa nò ngie *Míŋ Nyìŋ ge kwé pá’ Ssé la lá’ ńzáb, tá’ ndòon ee twó nyìŋ gẅie à ge tsege yé ná mé zẅé yé. 23Pɔ́ jú’ pú’u, ḿbú ḿmɔɔn, ésele ńzɛ́te tsetsɛ̀ɛ pɔ́b ngie: Awɔ̌ aa pá’ɔɔn ńgwɔ́ nùɔ pɔ́b ńku’u léfʉ’ yɔɔn ntí nò wɔ́?
Awɔ̌ aa ndÿò?
24 *Ngàŋa kwò Yěsô gÿo ńzye lézoŋo nò, éfa’a nyìŋ gẅie aa tsetsɛ̀ɛ pɔ́b ńgwɔ́ ndÿò. 25Yěsô gɔɔn né pɔ́b ngie: Pi giŋé ńzsé gí ngie mefùɔ pà tè zsě Ssé ne sá’a melá’ mɔ́b, ńnɔ’ pʉ̀a, ńké ńkwoŋ pɔ́ ngie me tóŋo wɔ́b le pàgÿo nò mbòŋo. 26Tá’, tà pi fʉ’ʉ wɔ́b. Tà ńcʉ́’ pú’u, nyìŋ gẅie aa tsetsɛ̀ɛ pi ńgwɔ́ ndÿò zɔ sele ńcʉ́’ʉ menkʉ́, nyìŋ gẅie à piŋ ńtyé mvfò pi, ésá’a gẅí, à gwɔ́ pɔ́ pá’ ngàŋa fà’ gẅi la. 27Pi zɔɔn shwóŋó wɔ̀ɔn: Á gʉ́a ná nyìŋ gẅie á neŋé Ssé ńne ḿpfɛ́ɛ mmó pɔ́ nyìŋ gẅie à ně ńdɔ́ɔn ńkaa ńtÿɔ́g pé’e, awɔ̌ gwɔ́ ndÿò? Nyìŋ gẅie à ńnéŋe ssé ḿpfɛ́ɛ zɔ tè ndÿò wá? Tá’, mèŋ n kě ńgwɔ́ tsetsɛ̀ɛ pi, ńgwɔ́ pɔ́ nyìŋ gẅie à fa’a mbwo pi.
28Pi pɔɔn zɔ kà ńnéŋe lejʉ́ŋ mèŋ nà fʉ̀’ʉ ngɔ́’ yɔ́ɔn. 29Áa yɛ̌ tá, ndʉŋ ndʉŋ pá’ Tá wɔ̀ɔn léen ńná lefùɔ né mèŋ la, n ge lá’ ná sí lefùɔ. 30Afʉ̀’ gie mèŋ n ge gwɔ́ Fùɔ la, pege tem shúm ḿpfɛ́, ńnú, pi piŋ ńnéŋe nà melʉŋe lefùɔ, ńŋag ngẅɛ̀ ndá Israel ntsɔ̀b pʉ́a nê legém.
Yěsô kagá tuŋó Símo piɛ
(Matio 26.31-35; Malékuse 14.27-31; Jâŋ 13.36-38)
31Yěsô piŋ ńgɔɔn mbwo Piɛ ngie: Símo, Símo, Sátà ně ńdá’ ńdúɔ léta’a gẅi métsèm ńtyɛ́te, pá’ mé tá’a mekú ńtyɛ́te la. 32Tá’, mèŋ n ně sẅíŋte Ssé nà twó ɔ́, légwɔ́ gie ɔ̀ tè pú kʉ́a kʉ́a nà lezǎb ntʉ́m ná mèŋ wɔ́. Ɔ̀ gÿo ńgwɔ́ tà ḿbiŋe nzèm mèŋ, ɔ̀ ne ńnéŋe ntʉ́m mefɛ́ pú. 33Piɛ gɔɔn ngie: Andè, á lɔɔn ńgwɔ́ pɔ́ lekǔ tsǎŋ, mbà aa pɔgɔ, ńtó fó ńgwɔ́ pɔ́ legwé, mbà aa pɔgɔ. 34Yěsô jú’ pú’u, ńgɔ́ɔn ngie: Piɛ, tà mèŋ n ké shwóŋó gú: Mênkɔ́’ ge gÿo gwaa tóŋ lêtsẅɛ́’ lyɛ̌’ɔɔn, mbà ɔ̀ moŋé wɔ̀ɔn ngʉ̀a ntá.
Yěsô shwǒŋ ngàŋa kwò yé ntí gie pɔ́ ge lɔg nyɛte ntʉ́m wɔ́b
35Yěsô piŋ ńzɛ́te *ngàŋa kwò yé ngie: Pi kímte fʉ̀’ gie n da túmo gẅi ngʉ̀a shʉ̀shʉ̀a, pi la gʉa té mûɔ pɔ̀ɔn, té pɔ̀ɔn lyɛb, té melɔ̌ɔn, pi ké ńtsẅé ńgiŋe pé’e, ńdá’ ńzága kɔ́? Pɔ́ gɔɔn ngie ngǎŋ, ammó la tè zág. 36Á gɔɔn ngie: Áa fʉ̀’ɔɔn pá’ɔɔn, mbà á kubé tà nyìŋ lɔɔn ńgẅiin mûɔ pɔ̀ɔn nkáb we, á pí, ńgẅiin pɔ̀ɔn lyɛb yé, á lyɛb. Nyìŋ gẅie à tè nně ncù gẅiin, à sẅiŋ nzsǒ fÿɔ́g ye ńdɔg ńjú ye. 37Mèŋ n gɔɔn pá’ɔɔn, anò gie mé la ŋwé’e ńtí wɔ̀ɔn ne ńgee mbumté. Mé la ŋwe’e ngie: Mé ge lá’ sáŋa yé nùɔ mefÿɛ́. Akɔ́ɔkɔ́ɔ ké ńgwɔ́ pá’ɔɔn ńzye zye lépumte. 38*Ngàŋa kwò yé gɔɔn mbwo yé ngie: Andè, menně ncù mɔɔn ssé mémbʉ́a. Yěsô gɔɔn ngie: Pi nyé pɛ́’ɛ.
Yěsô gʉ̌a ndùm lekwɔ’ɔ́ metÿǒ mèvɛ olive, ésẅíŋte Ssé
(Matio 26.36-45; Malékuse 14.32-41)
39Yěsô la gɔɔn pú’u, ńkẅɛ, pâ *ngàŋa kwò yé gʉa ne ndùm lekwɔ’ɔ́ metÿǒ mèvɛ olive, pá’ à laa mà mbwo ye. 40Pɔ́ la gʉa tà ńkúu wó, á gɔɔn né pɔ́b ngie: Pi sẅíŋte Ssé ḿbɔ́g menò njÿó lé kwa’te gẅi pi fʉa nò, 41ńgɔɔn pú’u, ńnyé wɔ́b ńgíŋ ńtyé lema’á tóon, ésẅɛ́’ ńkẅí’te ssé, ńně sẅíŋte Ssé ńgɔɔn ngie: 42Tá wɔ̀ɔn, ɔ̀ lɔɔn ńgyá, ɔ̀ pe’e yɔɔn ngɔ́’ gie, e ne ńtóo ná mèŋ lɔɔn. Tá’, mèŋ n tě ńgɔɔn ngie ɔ̀ gÿo pɔ́ wɔ̀ɔn lekwoŋ wɔ́. Gÿo pɔ́ gù lekwoŋ. [ 43Ńgɔɔn pú’u, tà’ *cÿɔ́’ Ssé tó ńne ńtóonte yé 44Legwé ne ḿpfɛ́ɛ yé, á ńkẅi’i sẅíŋte Ssé ńnéŋe twó, tà zì’i cʉ́’ʉ ńkẅɛɛ ná yé, ńcʉ́mte ssé ńgwá’a mekɔ̌ɔn metse la]. 45Esẅíŋte Ssé tà ńtsẅé jʉ’, ḿbʉ́’ʉ nnɛ́, ḿbiŋ nê lejʉ́ŋ *ngàŋa kwò yé, ńgwɔ tó, mbà pɔ́ mÿɔ̌g tà ńkʉ́a ńdyéte. 46Á gɔɔn ngie: Pi ńnéŋe té lyé, ḿbɔ́g menò njÿó lékwa’te gẅi pi fʉa nò.
Mé gwǒon Yěsô
(Matio 26.47-55; Malékuse 14.43-49; Jâŋ 18.2-11)
47À la nyé ńgɔɔn gɔɔn, anùɔ lá’ tó, tà Jẅidas gẅie à laa tsɔ̌ tà’ nyìŋ tsetsɛ̀ɛ *ngàŋa kwò yé ntsɔ̀b pʉ́a nê legém gwɔ́ mvfò, ńtsóte nnɛ́ nê lejʉ́ŋ Yěsô, ńtáŋte yé, ńtsyɛ’te yé. 48Yěsô gɔɔn né yé ngie: Jẅidas, ɔ̀ ge lɔg pɔ́ tsyɛ̀’te tá tsege *Míŋ Nyìŋ ka? 49*Ngàŋa kwò Yěsô gie é laa lejʉ́ŋ yé gyá mmó gie á gee ncʉ̌a, ńzɛ́te yé ngie: Andè, peg lɔg menně ńdÿɔ́’ɔ? 50Tsɔ̌ nyìŋ wɔb gwoon soŋ nně lélɔg ńkɔ́’ɔ ngàŋa fà’ *tándá pànùŋe pwɔ́’, é kẅɛ́te letuŋó sé se gwoŋó pwó tʉ̀, ńjúɔ. 51Tá Yěsô kaga yé ńgɔɔn ngie: Pi tsẅé jʉ’, á kǔ’ pɛ́’ɛ, ńdeen ńzába pwó yé nà letuŋó, á sẅéte. 52Yěsô leen ńké ńgɔɔn mbwo *mentándá pànùŋe pwɔ́’ pâ metándá pàpyɛ́bɛ *jʉ’ʉ Ssé pâ mekemé lá’ pie pɔ́ tǒ légwoon yé ngie: Pi gwaa tó gwoon wɔ̀ɔn, ńgẅiin menně ncù lâ mekésiŋ pá’ fʉ̀’ gie pi ge ńgwoon ntsǒŋ pá’ɔɔn lêkɔ́? 53Mbà mèŋ n kaa lyɛ̌’ ntsèm, ńké ńně ńgwɔ́ pɔ́ tsetsɛ̀ɛ pi tsɛ̀ɛ *jʉ’ʉ Ssé, pi ké tè fa’a légwoon wɔ̀ɔn mɔ́. Tá’, agí fʉ̀’ yɔɔn, mbà á léen ńké ńku’, ńgwɔ́ fʉ̀’ gie afùɔ menò nzěm tǒ tà ne sá’a lá’ yé.
Piɛ moŋé Yěsô
(Matio 26.57-58; Malékuse 14.53-54; Jâŋ 18.15-16)
54Pɔ́ gwoon yé ńdɔg ńgʉa lê mbʉ̀a *tándá pànùŋe pwɔ́’, Piɛ zse nzèm yɔb, tá ńké ńgwɔ́ pɔ́ ngʉ̀a shʉ̀shʉ̀a. 55Pɔ́ kúu wó, mé nyɛte mmɔ̌g soŋ tetʉ́a ńně ńzɔ́gɔ. Piɛ tó yé ńnéŋe nùɔ pɔ́b.
56Atsɔ̌ múɔ manzwě gẅie à lɔ̌ɔn fa’a mbʉ̀a ŋwɛ́ ńnéŋe tà mmɔ̌g kyɛ’ jʉ’, á liŋe Piɛ, ńgɔɔn ngie: Nyìŋ gẅie mé gwǒon yé lɛ, pɔ́ nyìŋ wɔ̀ɔn ke ńgwɔ́ nùɔ. 57Piɛ lʉ’, ńgɔɔn né yé ngie: Manzwě wɛ, mèŋ n tè ne ńzsé yé wɔ́! 58Á gíŋe ńgwaa cʉa méjʉ’, tsɔ̌ mámbàŋa líe yé yé tà ńgɔɔn ngie: Ɔɔ jú tsɔ̌ nyìŋ wɔb. Piɛ tsɔ́’ɔ mbwo ngàŋ ngie: Ambàŋa wa! Ngǎŋ, á té nò wɔ́. 59Mé ná’a ńnéŋe, atsɔ̌ nyìŋ ndyɛ̀’ɛ gɔɔn yé tà ńkʉa ngie: Á té nò fa’ fa’ wɔ́, pɔ́ nyìŋ wɛ ke ńgwɔ́ nùɔ, pi zɔɔn ńgyá pá’ aa nyìŋ Galilea pá’ yé. 60Piɛ tsɔ́’ ngie: Ambàŋa wa! Mèŋ n kaa zsé nò gie ɔɔ pɛ́’ɛ ńdɔgɔ ńgɔɔn wɔ́. Piɛ nyé ńgɔɔn gɔɔn, mênkɔ́’ gwóon ńtóŋ. 61Yěsô sele nnɛ́, ḿma’a léjÿɔ́g ńdíe yé, e nÿɔ́g mɔ́b yé pumte. Piɛ leen ńgwóon ńkímte nò gie Cʉ̀apʉ̀a ně ńgɔɔn né yé ngie: Mênkɔ́’ ge gÿo gwaa tóŋ lyɛ̌’ɔɔn, mbà ɔ̀ moŋé wɔ̀ɔn ngʉ̀a ntá. 62Piɛ fóo tetʉ́a ńkẅɛ, ḿbú ńdʉa tɛ’.
63Epʉ̀a pie pɔ́ la kú’te Yěsô la ne ńcúa yé, ńně ńzoonte yé. 64Pɔ́ la gíŋ ńkwɛ́ shÿó wé, ńně ńcúa yé, ńzɛ́te yé ngie: Keme nyìŋ gẅie à cǔɔ gú. 65Pɔ́ laa pú’u, ńgíŋ ně ńkẅi’i ńnege yé.
Mé zyě léŋaga Yěsô
66Njÿó gÿo ńgwɔ́ tà ńdʉ́a, melÿò tsɛ̀ɛ lá’ pâ *mentá ndá pànùŋe pwɔ́’, mbɔɔ *pàkyàgte lepʉ̌ Mǒsê cú’te, ńtsẅí mé lɔ́gɔ Yěsô ńtóo mvfò pɔ́b. 67Pɔ́ zɛ́te yé ngie: Ɔ̀ lɔɔn ńgwɔ́ *Nzà’nkÿo, ɔ̀ shwóŋó wég. Yěsô tsɔ́’ɔ mbwo pɔ́b ngie: Mèŋ shwóŋó gẅi pi é le zẅíŋ, 68ḿbiŋ ńzɛ́te gẅi nò, pi é le tsɔ́’. 69Tà mbɔɔ pú’u, áa fʉ̀’ɔɔn pá’ɔɔn, mbà á kǔ’ pá’ Ssé ngàŋ metʉ̀ ntsèm ge ńnéŋe *Míŋ Nyìŋ nà gwoŋó pwó yé ye tʉ̀. 70Pɔ́ metsèm la jú’ ńdeen ńgɔɔn ngie: Ɔ̀ lɔgɔ ńgwɔ́ Míŋ Ssé wɔ́? Yěsô tsɔ́’ ngie: Á kẅɛ̌ ncwò pi, mèŋ n ge wɛ̌. 71Pɔ́ leen sele ńgɔɔn tsetsɛ̀ɛ pɔ́b ngie: Tà á lɔɔn ńgwɔ́ pɛ́’ɛ̀, pege ké ńgíŋe fa’a tsɔ̌ nkẅè ntáŋ la? Kwà’ pege cwoŋó ńjú’u nò gie á kẅɛ̌ ncwò yé.
Currently Selected:
Lukase 22: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.
Lukase 22
22
Ngɔ́’ Yěsô ne ńgee nzyeté
(Matio 26.1-5,14-16; Malékuse 14.1-2,10-11; Jâŋ 11.47-53)
1Alyɛ’ɛ́ línɔ́ɔn pà Yuda gie mé lɔ́ɔn ńtóŋo le *Páskà gÿo ne ńku’u, ńdɔgɔ ńzye ngàb gie pɔ́ lɔ́ɔn ḿpfɛ́ɛ tsɔ̌ ntí mbelég té *mvòŋ. 2*Metándá pànùŋe pwɔ́’ pâ *pàkyàgte lepʉ̌ Mǒsê ne fa’a shÿó légÿo mé zẅé Yěsô, tá ne ḿbɔ́gɔ nÿɔ́g lá’. 3Sátà kúu tsɛ̀ɛ ntʉ́m Jẅidas, á gwɔ́ tsɔ̌ tà’ nyìŋ ná pʉ̀a ntsɔ̀b pʉ́a nê legém, gẅie setsɔ́ lezíŋ sé laa le Iskariod. 4Á leen ńké ńgʉa ńgyá *metándá pànùŋe pwɔ́’ pâ pàtyé mvfò nà lepyɛ̌b ndá Ssé, pâ pɔ̌ kwaŋte pá’ à ge gÿo tá sẅiŋe Yěsô mbwo pɔ́b. 5Á pú ḿboŋo wɔ́b, tà pɔ́ zẅíŋ ngie pɔ́ ge ná nkáb mbwo ye. 6Á zẅíŋ, ńgwóon ńzye léfa’ shÿó pá’ à ge sẅiŋe Yěsô mbwo pɔ́b tà lá’ le zsé.
Yěsô tǔm ngàŋa nkwò yé ńtáŋte yɔ́b línɔ́ɔn Páskà
(Matio 26.17-19; Malékuse 14.12-16)
7Alyɛ’ɛ́ *Páskà ŋwɛ́ leen ńké ńtó, ńgwɔ́ lyɛ̌’ gie mé lɔ́ɔn ńgwaa púɔ *njʉ̀njÿò línɔ́ɔn. 8Yěsô túmo Piɛ pɔ́ Jâŋ, ńgɔɔn né pɔ́b ngie: Pi gʉa ńcwoŋte ségè shúm *Páskà. 9Pɔ́ zɛ́te yé ngie: Ɔ kwǒŋ ngie: Peg gʉa nzɔ̌ ńcwoŋte? 10Á gɔɔn ngie: Pi jú’ mboŋó, pi ge gʉa tà kúu tÿǒsoŋ, é gyá mámbàŋa gẅiin tÿóon ntse, pi cʉ́me nzèm ye, tà á kúu ndá pi kú gí. 11É gɔɔn né ngàŋ ndá ngie: Tsítsà gɔ̌ɔn ngie peg zɛ́te gú ngie lûm ndá gẅie pâ *ngàŋa kwò yé ge jÿó *Páskà wó aa wɛ̌ wɔ́? 12À ge nyɛɛ gẅi máamáa lûm ndá ná ndêg we tÿǒ, tà mbà mé ně ńdá’ ńtáŋte mboŋó, áa jʉ’ gie pi ge cwoŋte ségè shúm línɔ́ɔn wó. 13Pɔ́ gʉa ńkúu wó, ńgyá akɔ́ɔkɔ́ɔ gwɔ́ pɔ́ pá’ Yěsô shwóŋó wɔ́b. Pɔ́ cwoŋte shúm léjÿó *Páskà jʉ’ó.
Eshúm léjÿó Cʉ̀apʉ̀a
(Matio 26.26-29; Malékuse 14.22-25; 1 Korento 11.23-25)
14Afʉ̀’ gÿo ńku’, Yěsô pâ ngàŋ ntúm wé tó ńnéŋe ssé, 15ńně ḿpfɛ́ɛ mmó, á gɔɔn né pɔ́b ngie: N ka kě ńtsɔ́ɔn tɛ’ pá’ pege ge pú jÿó wɔɔn *Páskà tá mèŋ n gyá ngɔ́’. 16Tà mèŋ shwóŋó gẅi mboŋó: N tě ńdá’a ńgíŋe ńjÿó tsɔ̌ *Páskà wɔ́, tà lá’ kú fʉ̀’ gie anò yɔɔn línɔ́ɔn pumté, tà Ssé zɔ̌ cʉ́’ʉ sá’a njÿó. 17À la shwóŋó wɔ́b pú’u, ńdeen ńké ńkaa ntú’ melù’, ńná ndǎg mbwo Ssé, ńgɔ́ɔn né pɔ́b ngie: Pi kɔ ntú’ yɔɔn ḿbú ńnú tà maga gẅí. 18Pi zsé ngie mèŋ, n tě ńdá’a ńgíŋe ńnúu melù’ wɔ́ tà lá’ kú fʉ̀’ gie Ssé zɔ cʉ’ʉ́ sá’a njÿó. 19À la gíŋe ḿbí mbelég, ńná ndǎg mbwo Ssé, ḿbwɔ́’ ńgwaa náa mbwo *ngàŋa kwò yé ńgɔɔn ngie: Yɔɔn ee mbùm nnɛ́ yɔɔn [mie mé nǎ nà twó sí. Pi cʉ́’ ne ńgÿo pá’ɔɔn ńdɔ́gɔ ńkímte wɔ̀ɔn. 20Pɔ́ la pfɛ́ shúm léjÿó tà ḿmag, Yěsô kaa ntú’ melù’ ńgɔɔn ngie: Ntú’ yɔɔn ee pá’ɔɔn ńgwɔ́ kʉa sẅé gie e Ssé lɔgɔ metse mɔ́ɔn ńgwaa. E pfɛte ńtí gẅí].
21Mèŋ n kě ńgɔɔn pá’ɔɔn nyìŋ gẅie à ge sẅǐŋ mèŋ gwɔ́ jʉ́’ɔɔn tà peg yé ne ńteme ńjÿó mmó. 22Áa nò ngie *Míŋ Nyìŋ ge kwé pá’ Ssé la lá’ ńzáb, tá’ ndòon ee twó nyìŋ gẅie à ge tsege yé ná mé zẅé yé. 23Pɔ́ jú’ pú’u, ḿbú ḿmɔɔn, ésele ńzɛ́te tsetsɛ̀ɛ pɔ́b ngie: Awɔ̌ aa pá’ɔɔn ńgwɔ́ nùɔ pɔ́b ńku’u léfʉ’ yɔɔn ntí nò wɔ́?
Awɔ̌ aa ndÿò?
24 *Ngàŋa kwò Yěsô gÿo ńzye lézoŋo nò, éfa’a nyìŋ gẅie aa tsetsɛ̀ɛ pɔ́b ńgwɔ́ ndÿò. 25Yěsô gɔɔn né pɔ́b ngie: Pi giŋé ńzsé gí ngie mefùɔ pà tè zsě Ssé ne sá’a melá’ mɔ́b, ńnɔ’ pʉ̀a, ńké ńkwoŋ pɔ́ ngie me tóŋo wɔ́b le pàgÿo nò mbòŋo. 26Tá’, tà pi fʉ’ʉ wɔ́b. Tà ńcʉ́’ pú’u, nyìŋ gẅie aa tsetsɛ̀ɛ pi ńgwɔ́ ndÿò zɔ sele ńcʉ́’ʉ menkʉ́, nyìŋ gẅie à piŋ ńtyé mvfò pi, ésá’a gẅí, à gwɔ́ pɔ́ pá’ ngàŋa fà’ gẅi la. 27Pi zɔɔn shwóŋó wɔ̀ɔn: Á gʉ́a ná nyìŋ gẅie á neŋé Ssé ńne ḿpfɛ́ɛ mmó pɔ́ nyìŋ gẅie à ně ńdɔ́ɔn ńkaa ńtÿɔ́g pé’e, awɔ̌ gwɔ́ ndÿò? Nyìŋ gẅie à ńnéŋe ssé ḿpfɛ́ɛ zɔ tè ndÿò wá? Tá’, mèŋ n kě ńgwɔ́ tsetsɛ̀ɛ pi, ńgwɔ́ pɔ́ nyìŋ gẅie à fa’a mbwo pi.
28Pi pɔɔn zɔ kà ńnéŋe lejʉ́ŋ mèŋ nà fʉ̀’ʉ ngɔ́’ yɔ́ɔn. 29Áa yɛ̌ tá, ndʉŋ ndʉŋ pá’ Tá wɔ̀ɔn léen ńná lefùɔ né mèŋ la, n ge lá’ ná sí lefùɔ. 30Afʉ̀’ gie mèŋ n ge gwɔ́ Fùɔ la, pege tem shúm ḿpfɛ́, ńnú, pi piŋ ńnéŋe nà melʉŋe lefùɔ, ńŋag ngẅɛ̀ ndá Israel ntsɔ̀b pʉ́a nê legém.
Yěsô kagá tuŋó Símo piɛ
(Matio 26.31-35; Malékuse 14.27-31; Jâŋ 13.36-38)
31Yěsô piŋ ńgɔɔn mbwo Piɛ ngie: Símo, Símo, Sátà ně ńdá’ ńdúɔ léta’a gẅi métsèm ńtyɛ́te, pá’ mé tá’a mekú ńtyɛ́te la. 32Tá’, mèŋ n ně sẅíŋte Ssé nà twó ɔ́, légwɔ́ gie ɔ̀ tè pú kʉ́a kʉ́a nà lezǎb ntʉ́m ná mèŋ wɔ́. Ɔ̀ gÿo ńgwɔ́ tà ḿbiŋe nzèm mèŋ, ɔ̀ ne ńnéŋe ntʉ́m mefɛ́ pú. 33Piɛ gɔɔn ngie: Andè, á lɔɔn ńgwɔ́ pɔ́ lekǔ tsǎŋ, mbà aa pɔgɔ, ńtó fó ńgwɔ́ pɔ́ legwé, mbà aa pɔgɔ. 34Yěsô jú’ pú’u, ńgɔ́ɔn ngie: Piɛ, tà mèŋ n ké shwóŋó gú: Mênkɔ́’ ge gÿo gwaa tóŋ lêtsẅɛ́’ lyɛ̌’ɔɔn, mbà ɔ̀ moŋé wɔ̀ɔn ngʉ̀a ntá.
Yěsô shwǒŋ ngàŋa kwò yé ntí gie pɔ́ ge lɔg nyɛte ntʉ́m wɔ́b
35Yěsô piŋ ńzɛ́te *ngàŋa kwò yé ngie: Pi kímte fʉ̀’ gie n da túmo gẅi ngʉ̀a shʉ̀shʉ̀a, pi la gʉa té mûɔ pɔ̀ɔn, té pɔ̀ɔn lyɛb, té melɔ̌ɔn, pi ké ńtsẅé ńgiŋe pé’e, ńdá’ ńzága kɔ́? Pɔ́ gɔɔn ngie ngǎŋ, ammó la tè zág. 36Á gɔɔn ngie: Áa fʉ̀’ɔɔn pá’ɔɔn, mbà á kubé tà nyìŋ lɔɔn ńgẅiin mûɔ pɔ̀ɔn nkáb we, á pí, ńgẅiin pɔ̀ɔn lyɛb yé, á lyɛb. Nyìŋ gẅie à tè nně ncù gẅiin, à sẅiŋ nzsǒ fÿɔ́g ye ńdɔg ńjú ye. 37Mèŋ n gɔɔn pá’ɔɔn, anò gie mé la ŋwé’e ńtí wɔ̀ɔn ne ńgee mbumté. Mé la ŋwe’e ngie: Mé ge lá’ sáŋa yé nùɔ mefÿɛ́. Akɔ́ɔkɔ́ɔ ké ńgwɔ́ pá’ɔɔn ńzye zye lépumte. 38*Ngàŋa kwò yé gɔɔn mbwo yé ngie: Andè, menně ncù mɔɔn ssé mémbʉ́a. Yěsô gɔɔn ngie: Pi nyé pɛ́’ɛ.
Yěsô gʉ̌a ndùm lekwɔ’ɔ́ metÿǒ mèvɛ olive, ésẅíŋte Ssé
(Matio 26.36-45; Malékuse 14.32-41)
39Yěsô la gɔɔn pú’u, ńkẅɛ, pâ *ngàŋa kwò yé gʉa ne ndùm lekwɔ’ɔ́ metÿǒ mèvɛ olive, pá’ à laa mà mbwo ye. 40Pɔ́ la gʉa tà ńkúu wó, á gɔɔn né pɔ́b ngie: Pi sẅíŋte Ssé ḿbɔ́g menò njÿó lé kwa’te gẅi pi fʉa nò, 41ńgɔɔn pú’u, ńnyé wɔ́b ńgíŋ ńtyé lema’á tóon, ésẅɛ́’ ńkẅí’te ssé, ńně sẅíŋte Ssé ńgɔɔn ngie: 42Tá wɔ̀ɔn, ɔ̀ lɔɔn ńgyá, ɔ̀ pe’e yɔɔn ngɔ́’ gie, e ne ńtóo ná mèŋ lɔɔn. Tá’, mèŋ n tě ńgɔɔn ngie ɔ̀ gÿo pɔ́ wɔ̀ɔn lekwoŋ wɔ́. Gÿo pɔ́ gù lekwoŋ. [ 43Ńgɔɔn pú’u, tà’ *cÿɔ́’ Ssé tó ńne ńtóonte yé 44Legwé ne ḿpfɛ́ɛ yé, á ńkẅi’i sẅíŋte Ssé ńnéŋe twó, tà zì’i cʉ́’ʉ ńkẅɛɛ ná yé, ńcʉ́mte ssé ńgwá’a mekɔ̌ɔn metse la]. 45Esẅíŋte Ssé tà ńtsẅé jʉ’, ḿbʉ́’ʉ nnɛ́, ḿbiŋ nê lejʉ́ŋ *ngàŋa kwò yé, ńgwɔ tó, mbà pɔ́ mÿɔ̌g tà ńkʉ́a ńdyéte. 46Á gɔɔn ngie: Pi ńnéŋe té lyé, ḿbɔ́g menò njÿó lékwa’te gẅi pi fʉa nò.
Mé gwǒon Yěsô
(Matio 26.47-55; Malékuse 14.43-49; Jâŋ 18.2-11)
47À la nyé ńgɔɔn gɔɔn, anùɔ lá’ tó, tà Jẅidas gẅie à laa tsɔ̌ tà’ nyìŋ tsetsɛ̀ɛ *ngàŋa kwò yé ntsɔ̀b pʉ́a nê legém gwɔ́ mvfò, ńtsóte nnɛ́ nê lejʉ́ŋ Yěsô, ńtáŋte yé, ńtsyɛ’te yé. 48Yěsô gɔɔn né yé ngie: Jẅidas, ɔ̀ ge lɔg pɔ́ tsyɛ̀’te tá tsege *Míŋ Nyìŋ ka? 49*Ngàŋa kwò Yěsô gie é laa lejʉ́ŋ yé gyá mmó gie á gee ncʉ̌a, ńzɛ́te yé ngie: Andè, peg lɔg menně ńdÿɔ́’ɔ? 50Tsɔ̌ nyìŋ wɔb gwoon soŋ nně lélɔg ńkɔ́’ɔ ngàŋa fà’ *tándá pànùŋe pwɔ́’, é kẅɛ́te letuŋó sé se gwoŋó pwó tʉ̀, ńjúɔ. 51Tá Yěsô kaga yé ńgɔɔn ngie: Pi tsẅé jʉ’, á kǔ’ pɛ́’ɛ, ńdeen ńzába pwó yé nà letuŋó, á sẅéte. 52Yěsô leen ńké ńgɔɔn mbwo *mentándá pànùŋe pwɔ́’ pâ metándá pàpyɛ́bɛ *jʉ’ʉ Ssé pâ mekemé lá’ pie pɔ́ tǒ légwoon yé ngie: Pi gwaa tó gwoon wɔ̀ɔn, ńgẅiin menně ncù lâ mekésiŋ pá’ fʉ̀’ gie pi ge ńgwoon ntsǒŋ pá’ɔɔn lêkɔ́? 53Mbà mèŋ n kaa lyɛ̌’ ntsèm, ńké ńně ńgwɔ́ pɔ́ tsetsɛ̀ɛ pi tsɛ̀ɛ *jʉ’ʉ Ssé, pi ké tè fa’a légwoon wɔ̀ɔn mɔ́. Tá’, agí fʉ̀’ yɔɔn, mbà á léen ńké ńku’, ńgwɔ́ fʉ̀’ gie afùɔ menò nzěm tǒ tà ne sá’a lá’ yé.
Piɛ moŋé Yěsô
(Matio 26.57-58; Malékuse 14.53-54; Jâŋ 18.15-16)
54Pɔ́ gwoon yé ńdɔg ńgʉa lê mbʉ̀a *tándá pànùŋe pwɔ́’, Piɛ zse nzèm yɔb, tá ńké ńgwɔ́ pɔ́ ngʉ̀a shʉ̀shʉ̀a. 55Pɔ́ kúu wó, mé nyɛte mmɔ̌g soŋ tetʉ́a ńně ńzɔ́gɔ. Piɛ tó yé ńnéŋe nùɔ pɔ́b.
56Atsɔ̌ múɔ manzwě gẅie à lɔ̌ɔn fa’a mbʉ̀a ŋwɛ́ ńnéŋe tà mmɔ̌g kyɛ’ jʉ’, á liŋe Piɛ, ńgɔɔn ngie: Nyìŋ gẅie mé gwǒon yé lɛ, pɔ́ nyìŋ wɔ̀ɔn ke ńgwɔ́ nùɔ. 57Piɛ lʉ’, ńgɔɔn né yé ngie: Manzwě wɛ, mèŋ n tè ne ńzsé yé wɔ́! 58Á gíŋe ńgwaa cʉa méjʉ’, tsɔ̌ mámbàŋa líe yé yé tà ńgɔɔn ngie: Ɔɔ jú tsɔ̌ nyìŋ wɔb. Piɛ tsɔ́’ɔ mbwo ngàŋ ngie: Ambàŋa wa! Ngǎŋ, á té nò wɔ́. 59Mé ná’a ńnéŋe, atsɔ̌ nyìŋ ndyɛ̀’ɛ gɔɔn yé tà ńkʉa ngie: Á té nò fa’ fa’ wɔ́, pɔ́ nyìŋ wɛ ke ńgwɔ́ nùɔ, pi zɔɔn ńgyá pá’ aa nyìŋ Galilea pá’ yé. 60Piɛ tsɔ́’ ngie: Ambàŋa wa! Mèŋ n kaa zsé nò gie ɔɔ pɛ́’ɛ ńdɔgɔ ńgɔɔn wɔ́. Piɛ nyé ńgɔɔn gɔɔn, mênkɔ́’ gwóon ńtóŋ. 61Yěsô sele nnɛ́, ḿma’a léjÿɔ́g ńdíe yé, e nÿɔ́g mɔ́b yé pumte. Piɛ leen ńgwóon ńkímte nò gie Cʉ̀apʉ̀a ně ńgɔɔn né yé ngie: Mênkɔ́’ ge gÿo gwaa tóŋ lyɛ̌’ɔɔn, mbà ɔ̀ moŋé wɔ̀ɔn ngʉ̀a ntá. 62Piɛ fóo tetʉ́a ńkẅɛ, ḿbú ńdʉa tɛ’.
63Epʉ̀a pie pɔ́ la kú’te Yěsô la ne ńcúa yé, ńně ńzoonte yé. 64Pɔ́ la gíŋ ńkwɛ́ shÿó wé, ńně ńcúa yé, ńzɛ́te yé ngie: Keme nyìŋ gẅie à cǔɔ gú. 65Pɔ́ laa pú’u, ńgíŋ ně ńkẅi’i ńnege yé.
Mé zyě léŋaga Yěsô
66Njÿó gÿo ńgwɔ́ tà ńdʉ́a, melÿò tsɛ̀ɛ lá’ pâ *mentá ndá pànùŋe pwɔ́’, mbɔɔ *pàkyàgte lepʉ̌ Mǒsê cú’te, ńtsẅí mé lɔ́gɔ Yěsô ńtóo mvfò pɔ́b. 67Pɔ́ zɛ́te yé ngie: Ɔ̀ lɔɔn ńgwɔ́ *Nzà’nkÿo, ɔ̀ shwóŋó wég. Yěsô tsɔ́’ɔ mbwo pɔ́b ngie: Mèŋ shwóŋó gẅi pi é le zẅíŋ, 68ḿbiŋ ńzɛ́te gẅi nò, pi é le tsɔ́’. 69Tà mbɔɔ pú’u, áa fʉ̀’ɔɔn pá’ɔɔn, mbà á kǔ’ pá’ Ssé ngàŋ metʉ̀ ntsèm ge ńnéŋe *Míŋ Nyìŋ nà gwoŋó pwó yé ye tʉ̀. 70Pɔ́ metsèm la jú’ ńdeen ńgɔɔn ngie: Ɔ̀ lɔgɔ ńgwɔ́ Míŋ Ssé wɔ́? Yěsô tsɔ́’ ngie: Á kẅɛ̌ ncwò pi, mèŋ n ge wɛ̌. 71Pɔ́ leen sele ńgɔɔn tsetsɛ̀ɛ pɔ́b ngie: Tà á lɔɔn ńgwɔ́ pɛ́’ɛ̀, pege ké ńgíŋe fa’a tsɔ̌ nkẅè ntáŋ la? Kwà’ pege cwoŋó ńjú’u nò gie á kẅɛ̌ ncwò yé.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.