Galasiwaraita 4
4
Maitaa yande Kristu resewara
1Hambeu penye arama, kua urikuwaa taira taina ramere ae yepewasute ae ixupe aramawaa irumu, ae pukusawa suixawa panye.
2Maa aintaumukiriari ae, kuaita umbuewaita ae, usaruwaita ae yuiri, ate usika sangawa ipaya umbeuwaa yawe.
3Yawete yuiri yande tainaita ramere yande yamunyare kuaye mundu puraita uputariwaa yawe yamunya.
4Maa usikana sangawa Deus umundu Taira unaseri arama kunya sui, uiku Deus nyenga kuximawara rese.
5Uyurawa arama ainta uikuwaita Deus nyenga kuximawara rese uxari arama yande tairaita arama.
6Sesewara tairaita penye Deus umundu Taira Espiritu yanepia upe umbeu: "Yanepaya, yanepaya."
7Ape Deus rese timaa amu supe aramawaa inde, maa taira inde, asui taira resewara inde Deus kuri uxari inde arama panye maa.
Usasawa judewita kustumi
8Maa kuxima tire pekuawa Deus pepuraki ainta supe arama kuaita peDeus tiwaita Deus ainta.
9Maa kuiri pekuawana Deus, u puranga hambeu, kuiri Deus ukuawana penye, maitaa penye? Maitaa peyereu yuiri pesikari arama kua mundu pura pituawaa pirasuawaa, kua peputariwaa pexari yuiri ixupe aramawaa penye?
10Remanduarire yepeyepe mundu rangawa, yasi yuiri, kurasi yuiri, akayu yuiri.
11Hasikie yawaite retentu hapuraki pepiterupi.
Paulu upurara aintaresewara
12Semuita, hapurandu penye peiku arama yuiri haikuwaa yawe, nyãse ixe yuiri haiku maye peikuwaa yawe. Tipemunya ixe arama puxi.
13Nyãse pekuawate hapurara resewara sepira irumu hayupiru hambue penye sese kua nyenga purangawaa.
14Asui kua semãsisawa resewara pemaa, maa timaa puxi pemaa ixe, tiyuiri pemutenyuntu ixe sesewara, maa pesuanti ixe kuaye Deus anju yawe, kuaye Kristu Jesus yawe yuiri.
15Ape marantaa tisuuri penye kuiri? Nyãse hapuderi hambeu peresewara puranga, pepuderi rame maa peyuka peresa pemee arama ixe arama ae.
16Maitaa pemuruanyana ixe kuiri hambeu resewara penye arama nyenga supiwa?
17Kuaita apigawaita umusuuriwaa penye timaa supiwa ainta, nyãse aintauputari aintautiari penye sesui pemanduari arama ainta puranga.
18Nyãse purangate pesikari pemunya puranga yawewarawate yawaite pemunya puranga anyunte haiku rame peirumu.
19Semuita, hapurara yuiri peresewara ate pexari Kristu uiku puranga pepia upe.
20Haputari haiku pepiterupi kuiri, ape, hambeu maa penye arama nyenga suuriwaa irumu, nyãse sasiyara ixe peresewara.
Mukuĩ nyenga
21Pembeu hasendu penye uputariwaita yuiri peiku Deus nyenga kuximawara rese: Maitaa tiserá pesendu mayetaa umbeu penye arama?
22Nyãse aintaumpinima kuera, Abraão uriku mukuĩ taira. Yepe taira ikriada supe arama, asui amu taira ximiriku supe arama.
23Maa imembira kua ikriada usemu umaa ara Abraão umunya resewara kuaye ipira uputari yawe, maa imembira kua ximiriku unaseri ae Deus umbeuwaa resewara.
24Yawesawa kua hambeuwaa, kuaita mukuĩ kunyaita mukuĩ nyenga ainta; yepe supiwa, yawesawa Sinai yawe kua iwitera, kua uxariwaa prezu yande aete kua kunya Agar.
25Kua Agar aete kua iwitera serawaa Sinai uikuwaa Arabia upe, yawesawa kua Jeruzalẽ nyãse umprezu kua kunya imembira irumu.
26Maa kua Jeruzalẽ iwate suiwara timaa prezu ae, aete yanemaya ae.
27Nyãse aintaumpinima: "Reyumusuuri inde tiwa uriku imembira, inde tiwa remusemu nembira, reyumusuuri nyenga tiapuwaa irumu, inde tiwa sasi nembira, nyãse kua kunya utiariwaa kuera siyapiri imembiraita kua urikuwaa imena sui."
28Maa penye semuita, tairaita penye umbeuwaa resewara kuaye Izaki yawe.
29Nyãse kuxima kua unaseriwaa apigawa uputari resewara umuruanyana kua unaseri kuaye Espiritu uputariwaa yawe, yawete yuiri kuiri.
30Maitaa umbeu aintaumpinimawaa: "Pemburi pesui kua kriada imembira irumu nyãse imembira kua kriada timaa kuri penye arama ae irumu kua taira ximiriku membira."
31Ape yawe yuiri yande semuita, timaa imembira yande kua kriada, maa imembiraita yande kua ximiriku.
Currently Selected:
Galasiwaraita 4: BBp
Highlight
Share
Compare
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
