Atu 25
25
Paulu upuamu Festu umaa arama
1Asui uwike rire guvernu arama tetama upe kua Festu, asui musapiri ara rire usu Sezareya sui Jeruzalẽ kiti.
2Asui kutarantu aintaumbeu ixupe puxi sese kua Paulu panye saserdutita ruixawaita yuiri kuaita judewita ruixawa yuiri, asui aintaupurandu ae.
3Aintaupurandu ae umundu arama Paulu Jeruzalẽ kiti, nyãse aintauputari aintauyuká ae uyumimisawa upe pee rupi.
4Maa Festu unyee ainta supe:
—Prezu uiku kua Paulu Sezareya kiti, asui kutara kuri ixe yuiri hasu akiti.
5Asui unyee ainta supe:
—Awa pruntuwaa pesuiwara usu seirumu, asui ape aikue rame puxi sese pepurandu kuri ae umbeu kuri sesewara.
6Asui uiku rire aintairumu uitu u dezi ara anyunte uyuiri Sezareya kiti, asui wirande kiti usu uwapika serakuenawaita uwapikawera upe, asui umundu aintaurasu ixupe kua Paulu.
7Asui usika rire anyunte aintaupuamu suaki kuaita judewita uriwaita Jeruzalẽ sui, asui turusu aintaumbeu sese puxuwera, maa tiaintaupuderi aintaumukame umaa supiwa aintaumbeuwaa.
8Maa Paulu uyumbeu sesewara, unyee:
—Tihamunya puxi Deus nyenga kuximawara rese, tiyuiri hamunya puxi templu supe, tiyuiri hamunya puxuwera Sezar supe.
9Asui uputari resewara puranga aintaumaa ixupe Festu unyee Paulu supe:
—Maitaa reputari resu Jeruzalẽ kiti aintaumbeu arama neresewara hamaawaa upe?
10Asui Paulu unyee ixupe:
—Kuiri haiku aintaumaa ixe arama kuaita Sezar serakuenawaita, aintayuiri aintaurikute aintaumbeu serese, timaa hamunya puxi ainta supe kuaita judewita, rekuawate.
11Ape hamunya rame maa puxi, hamunya rame maantu puxuwerawa peyuká arama ixe, suuri ixe hamanu arama. Maa tirame maa resewara aintaumbeu seresewara kuaita judewita, timaa awa upuderi uxari ixe aintaipu kiti umusuuri arama ainta. Haputari haxari Sezar umbeu seresewara.
12Asui upurungita rire aintairumu kuaita serakuenawaita Festu usuaxara ae:
—Reputari resu Sezar ipiri, akiti kuri resu.
Festu umbeu Agripa supe Paulu rese
13Asui yepeyepe ara rire kua tuixawa Agripa asui Berenise yuiri aintausu Sezareya kiti aintaumaa arama festa.
14Uiku resewara irumu yepeyepe ara Festu umbeu tuixawa supe Paulu resewara, unyee ixupe:
—Felix uxari prezu yepe apigawa,
15Asui haiku irumu Jeruzalẽ upe kuaita saserdutita ruixawa serakuenawaita yuiri judewita aintaumbeu ixe arama puxi sese, asui aintauputari haxari puxuwerawa uiku ae.
16Asui hambeu ainta supe arama kuaita Ruma suiwaraita tiarama aintauxari puxuwerawa yepe tirame umaa kuaita umbeuwaita puxi sese uyumbeu arama sesewara.
17Asui aintauyumuatiri sepiri, asui kutara wirande kiti hasu hawapika serakuenawaita uwapikawera upe asui hamundu aintaururi kua apigawa.
18Asui aintaupuamu kuaita aintaumbeuwaa puxi sese, maa tiaintaumbeu puxi sese kuaye hamanduariwaa yawe.
19Asui aintaumbeu sese puxi sesewara kua aintauruyariwaa aintapawa, asui umbeu yuiri yepe apigawa umanuwaa ae serawaa Jesus kua Paulu umbeuwaa sese upakate ae.
20Asui tiresewara hapuderi hakuawa hapurandu ae hakuawa arama supiwa sese hapurandu ae uputari usu Jeruzalẽ kiti aintaumbeu arama sese akiti.
21Asui Paulu upurandu ixe haxari arama Sezar umbeu sese, asui hamundu aintaumprezure ae ate hamundu ae Sezar ipiri.
22Asui Agripa umbeu Festu supe:
—Ixe yuiri haputari hasendu ixupe. Asui usuaxara ae:
—Wirande kuri resendu ixupe.
Paulu upuamu Agripa umaa
23Asui wirande kiti Agripa uri kua Berenise yuiri aintayara purangawa irumu, asui aintauwike aintaumuatiriwerawaa kuaita kumandanti kuaita yuiri serakuenawaita aintarendawa upe. Asui Festu umundu aintaururi aintapiri Paulu.
24Asui Festu umbeu:
—Inde tuixawa Agripa, panye penye yuiri penye uyatiriwaita yaneirumu pemaa kua apigawa, sesewara panye kuaita judewita siyawaita aintauri sepiri Jeruzalẽ kiti ike yuiri kua tendawa, aintaumbeu ixe arama tipuranga upaka kua apigawa.
25Maa timaa hawasemu puxi sese umanu arama maa ae sesewara, ape upurandu sesewara haxari arama Sezar usendu ixupe asui haputari hamundu ae.
26Maa timaa hakuawa mayetaa kuri hampinima seruixawa supe sese, asui haruri ae pesendu arama ixupe penye, inde yuiri inde tuixawa Agripa asui yasendu rire kuri ae hakuawa hampinima sesewara.
27Nyãse hamanduari timaa puranga hamundu yepe prezu tirame hambeu yuiri maa resewarataa aintaumbeu puxi sese.
Currently Selected:
Atu 25: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
