Atu 18
18
Paulu usu Kurintu kiti
1Asui arire Paulu usu Atena sui, Kurintu kiti.
2Asui uwasemu yepe apigawa serawaa Akila judeu ae Puntu suiwara ae irumute kua ximiriku serawaa Prisila, amu kuese rupire usika Italia sui nyãse aintaruixawa Klaudiu umundu panye judewita aintausu arama Ruma sui. Asui Paulu umusuaki ainta.
3Nyãse aintayuiri upurakiwaita, aintaumunya baraka enseradu suiwara, asui uiku aintairumu.
4Asui muiri sauru uyupurungita aintairumu aintasinaguga upe, asui umuserana siya judewita greguita yuiri.
Umbeu ainta supe Jesus rese
5Asui Paulu umbue kua nyenga Sila Timuteu aintauri irumu Masedunia sui, umbeu ainta supe kuaita judewita Kristu kua Jesus.
6Asui aintaumuruanyana irumu ae aintaukasuari yuiri ae apete umutumu ipupekawa asui umbeu ainta supe:
—Penyete periku kulpa, ixe tihariku kulpa, kuiri hasu hambue kuaita tiwaita judeu.
7Asui utirika aintaruka sui usu yepe apigawa ipiri serawaa Tisiu Justu umanduariwaa kua Deus supiwa, sinaguga ruakintu suka.
8Asui Krispu kua usaruwaa aintasinaguga uxari ipia yaneruixawa rese panye kuaita suka puraita yuiri, asui siya Kurintu upewaraita aintauxari aintapia yaneruixawa rese aintausendu rire inyenga, asui aintaubatizari ainta.
9Asui yepe pituna rame Yaneruixawa umbeu Paulu supe ikerupiwaa upe:
—Teresikie rembeu ainta supe terekiriri maa rembeu.
10Nyãse neirumute ixe, tikuri awa upisika inde uyuká arama inde, nyãse hariku siya semiraita aramawaa ike kua tetama upe.
11Asui uiku aintairumu yepe akayu asui seis yasi yuiri umbue ainta Deus nyenga rese.
Aintaurasu Paulu Galiu ipiri
12Maa aintaruixawa rame kua Galiu Akaia upe asui panye kuaita judewita aintaupisika Paulu asui aintaurasu ae serakuenawaita ipiri.
13Aintaumbeu:
—Kua apigawa umuserana kuaita apigawaita aintauruyari arama Deus amu kiti Deus nyenga kuximawara sui.
14Asui Paulu uputari irumu umbeu asui kua Galiu umbeu ainta supe kuaita judewita:
—Penye judewita, umunya rame maa puxuwerawa hasendu maa penye arama,
15Maa kuiri peyumaramunya retentu nyenga irumu amu rera rese yuiri kua penyenga kuximawara rese yuiri, haxari penyepawate pemaa maye pemunya ixupe arama sesewara.
16Asui umundu aintauyuiri isui.
17Asui muiri ainta aintaupisika Susteni yepe usaruwaa sinaguga asui aintaunupa ae ukara kiti, maa timaa arama ixupe arama ae kua Galiu.
Paulu uyuiri Antiukia kiti
18Maa Paulu uikure aintairumu siya ara yawewaa rire, asui umbeu sesewara asui usu Siria kiti, urasu irumu kuaita Prisila Akila yuiri. Asui Senkreia upe uxari aintauyapina isui iawa nyãse yawe umbeu Deus supe.
19Asui usika Efezu kiti asui uxari ainta ape, asui uwike sinaguga kiti umbue kuaita judewita.
20Asui aintauputari uikure aintairumu maa tiuputari.
21Maa umbeuwaa irumu sesewara umbeu ainta supe:
—Deus uputari rame hayuiri mukuĩsawa pepiri. Asui uwiye naviu upe usu arama Efezu sui.
22Asui uyari irumu Sezareya upe usemu umaa kuaita ingreja puraita asui usuana Antiukia kiti.
23Asui uiku rire aintairumu yepeyepe ara usu aintasui usu arama umaa ainta panye aintaretama yaweyawe Galasia upe Frijia upe yuiri asui umukirimbawa panye uruyariwaita.
Apulu umbue
24Asui yepe apigawa usika Efezu kiti Alexandria suiwara ae serawaa Apulu, judeu ae, puranga umbue Deus nyenga rese kirimbawa.
25Aintaumbuewaa ae yaneruixawa rapee rese kirimbawa umanduari ipia upe, asui umbue ainta satambika Jesus rese, maa anyunte ukuawa kua Juão batizmu rese.
26Asui uyupiru umbue ainta sinaguga upe tiutiĩ, asui Prisila usendu ae Akila yuiri asui aintaurasu ae aintairumu asui aintaumbeu ixupe satambika sese kua yaneDeus rapee.
27Asui kuaita uruyariwaita aintaumusuuri ae nyãse uputari uyasawa Akaia kiti, asui aintaumpinima papera ainta supe kuaita uruyariwaita apewaraita aintausuanti arama ae puranga. Asui usika rame akiti uajudari ainta puranga kuaita uxariwaita aintapia Deus rese igrasa resewara.
28Asui kirimbawa umuserana kuaita judewita aintaumaawaa upe panye, uxari aintaukuawa Deus nyenga irumu Kristu kua Jesus.
Currently Selected:
Atu 18: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
