Go̧a̧rea̧ 23

Davi judi ni̧bärëremȩdejȩ jȩa jidamȩ pio ju̧i̧iäpȩmo̧

1Jeova pio judide coa jidamȩ judi. Tjamo̧ davä. Pio coa jidami̧ dari̧ japadique ovejami̧ da oa. Pio ju̧i̧iä jabechji̧, jabëdiädëmȩrȩ cjo̧ro̧requede. 2Chjadëri̧ järätä chjaparea̧mi̧ dari̧ yürüdique cärä chjadë tjamo̧mi̧ daräpȩ. Ado ui goae tjamo̧mi̧ daräpȩ yabo ëba baämi̧ dari̧ japadique, cüdë ma̧ chjupi̧ cjiari̧ jararea̧mi̧ dari̧. 3Ju chiarea̧ yürüdique. No̧ tjamo̧i̧ oa eba baämi̧ dari̧ ëba baä maeadique, jënȩ yo̧rërea̧mi̧.

4Ado yaba̧, ni̧bärequedemȩ Jeova. Danȩ, cüdë ma̧i̧ da bagönȩmi̧ daräpȩ chjätämȩborë, cüdë eami̧ chjai̧dë oa chjätämȩborë, jabechji̧ uapadërequede. Jabechji̧ uapadërequede pio mȩnȩ pio coa ji̧dë ma ëba cjia tara. Mȩnȩ na̧ tjätjäpë tai̧rea̧ to pio ju̧i̧ arami̧ dari̧ ëba tai̧a̧ oaiä, na̧ gu̧na̧rea̧ to pio ju̧i̧bo arami̧ dari̧ ëba tai̧a̧ oaiä, jabechji̧ chjadëri jida̧ oa cjiami̧ dari̧ cjiarequede eami̧ chirirä cjo̧ro̧mȩ chjuamȩmi̧ darë japarea̧ decjiari̧. 5Ado cüdë goae tarari̧ jurami̧ dari̧ jurapea̧ oa, jurarea̧ goae tjamo̧ oa yürürenȩque mechjarä. Dami̧ti̧ jurarea̧ chjadë tjamo̧mi̧ da oa yürürenȩque. Ado coa eadëji̧ri̧ pio judiro̧ ütëbodärärë pio coa daräbo, jabechji̧ chjadëri̧ jura chami̧ dari̧ cjiarequede pio mȩa nö̧ta uapadëmȩrȩ. Ado ja̧dëa ji̧ jura ëte yo̧ oa arë cjarämi̧ dari̧ japarenȩque ca̧ tjübë oa. Coa ea tjamo̧ tara, ja̧di dari̧ japarenȩque, coa ba chia da tara. Ado jararea̧ ba chiami̧ da oa yürürenȩque peaja̧di ae jararea̧ üdë tjuri cjiari̧. Chjamȩrȩ yürürenȩque nȩmȩparea̧ decjiari̧. 6Ado pio mȩa chjiari chjadëri̧ dabarequede Jeova. Pio coa nö̧ta ji̧dë ma ëba cjia tara, ji̧dë ma a̧dë baärea̧ decjiari̧ ëba cjia tara, jabechji̧ mȩnȩ cjäri̧ri̧ cjia da̧ chja̧oerä cjiaparequede bucho ana̧. Tjamo̧ davä. Mȩnȩ chjadë oa yürüa̧ chja̧oerä cjo̧ro̧parequede bucho ana̧. Na̧ bëmi̧ daräpȩ ju̧ri̧ cjo̧ro̧mi̧ dari̧ cjo̧ro̧requede bucho ana̧, dairäpȩmo̧ aeno̧rea̧ decjiari̧. Aja̧ Jeova, pio ju̧i̧mo̧ yo̧requedemȩ. Ja̧ditäde.

Currently Selected:

Go̧a̧rea̧ 23: Pume

Highlight

Copy

Compare