Marcos 16

Jechu judi ja̧boa̧remȩrȩ bëdüa̧de

Mateo 28:1-10; Uruca 24:1-12; Juan 20:1-10

1Jabo ja̧dëa ji̧ järätä chjaparea̧ do üdë chjätäa̧ duri oa dopea̧rä, Domingo domȩ ju̧i̧iä, jabechji̧ ivi pio jini̧ro̧ ui goaeri̧ pjȩa̧ joarea̧ oa gatepea̧ni̧rȩ Jechu ja̧ icjararemȩ pio ju̧i̧ joapea̧ oa. Aja̧, Maria Madarena pio jini̧, ado Santiago pio ju̧i̧ ja̧ jojini̧ pio jini̧, Maria quȩyi̧ pio jini̧, ado Charomȩ quȩyi̧ pio jini̧borë jäa̧ni̧rȩ. 2Ado domi̧go domȩ ju̧i̧iä dorë pea cjitëa̧rä, pio jiro ivi jini̧ro̧ jäeno̧a̧ni̧rȩ ta̧dë cjararäpȩ ju̧ri̧. 3,4Ado jäji̧ri̧rȩ jibëa̧ dëbëti̧ra̧ chia iëno̧ë ta̧rëa̧ni̧rȩ:

—Jabo danȩro̧, ta̧dë cjara joë ya üdë ta̧dë chachara̧ tuti cara̧ oa cjiadi yu̧a̧rea̧mi̧dëri̧. ¿Chjiarë a̧dopadiibë ta̧dë oa yuroräpȩmo̧ ano̧ mire are chäpea̧ ji̧? —iëno̧ë ta̧rëa̧ni̧rȩ.

Jabo jini̧ro̧ ta̧dë cjara queri̧räpȩ go̧düdäräa̧rä jabechji̧ ya ina̧rea̧ ta̧dë chacha üdë joë ya yuroräpȩmo̧ ano̧ mire chamȩ oa daea̧ni̧ro̧jo̧ȩ, chjaodëri̧ yu̧a̧rea̧mi̧ dari̧. Jabechji̧ ya ina̧rea̧ ta̧dë üdë boi̧dë tjamo̧rëremȩde. 5Pio ju̧i̧iä ta̧dë cjara tjoräpȩmo̧ yu̧a̧rëreji̧ri̧ni̧rȩ. Ado yu̧a̧ ëte jibëa̧ mu̧i̧ chjuata̧ra̧ri chamȩ oa darëreji̧ri̧ni̧ro̧jo̧ȩ a̧dërimȩ mu̧i̧tjoi̧ pio ju̧i̧, pea üi̧pea̧mȩmi̧ da oa, chjibo bërëbërëai̧ tjamo̧ oa ina̧mȩ oa. Ado ana̧ri̧ jo̧rȩtaji̧ri̧rȩ dae cjiarëreji̧ri̧ni̧rȩ, oë ja̧boji̧ri̧rȩ. 6Jabo a̧dërimȩ mu̧i̧tjoi̧ pio judi yo̧rëremȩdejȩrȩ ivi pio ji̧ri̧:

—Danȩro̧, ana̧ri̧ jo̧rȩtadëchji̧vä —yo̧a̧dejȩrȩ—. Jabechji̧ pio dibë chjiari dabaquë. ‘Aja̧, Nachare quȩmȩ bë ma̧ri̧rimȩ pio ju̧i̧, Jechu pio ju̧i̧ na̧tani̧ro̧da, toro cji̧de ja̧bo tänȩa̧ pio ju̧i̧ na̧tani̧ro̧da' quëna̧ dabaquidibë pio dibë chjiari. Jabo danȩro̧, pio yidëdi. Bëdüa̧ oa cjiadi. Ja̧boa̧remȩrȩ bëdüa̧ oa cjiadi —yo̧a̧diro̧jȩrȩ—. Danȩro̧, pio yi are a̧ra̧ oa cjiaremȩdi, jabo jiro decjiadi yaba̧. Jabechji̧ bëdüa̧di. 7Jabo pio yaba̧i̧ jäeno̧chji̧je Jechu ja̧ jadü pio ji̧ri̧iäpȩmo̧ ma̧ȩ yürüpea̧ oa, Pedro pio ju̧i̧bo. Aja̧, Jechu judi, jabechji̧ dibëa̧ yabo jäa̧di Garirearäpȩ. Pio ju̧ri̧pȩmȩ oa dadäräeji̧ri̧mȩnȩro̧ju̧i̧ judi pio dibë yo̧rërea̧mi̧. Ma̧ȩ yüre jächji̧ji̧ri̧. —yo̧mȩrȩ yo̧rëremȩdejȩrȩ ivi jini̧ a̧dërimȩ mu̧i̧tjoi̧ pio judi.

8Ja̧dëa ji̧ ivi jini̧ro̧ ta̧dë cjara tjori judiri go̧düji̧ri̧rȩ chjaodëri̧ a̧dë bagureno̧a̧ni̧ro̧jo̧e. Uapea̧ üdë jibëa̧ chji̧ oa boadärämi̧ dari̧ japea̧ oaiä, jabechji̧ i ma̧na̧gurami̧ dari̧ bagureno̧a̧ni̧rȩ, ana̧ri̧ jo̧rȩtaji̧ri̧rȩ. Ado eami̧ pumȩ oa yo̧tärea̧ ji̧, yo̧dë maea̧ni̧rȩ. Jabechji̧ cjapiri̧ cjiadiärëreji̧ri̧ni̧rȩ uapa tara.

Jechu judi pio jȩaiäpȩmo̧ da tänȩrëremȩdejȩ Maria Madarena ji̧

Juan 20:11-18

9Jechu judi domi̧go doro, peadai̧rä bëdüa̧de. Ado Maria Madarena pio ji̧ yabo chja da tänȩrëremȩdejȩ pio jȩaiäpȩmo̧. Aja̧, 7 yaröca chiarëreyi̧ pio ji̧, jënȩ chjaparȩa̧ pio ji̧ yabo chja da tänȩa̧dejȩ. 10Ado pio jini̧ baäeno̧a̧nȩ Jechu ja̧ jadü pio ji̧ri̧iäpȩmo̧ ma̧ȩ yürüpea̧ oa. Gito ana̧ri̧ jo̧rȩtaji̧ri̧ oa, ejaro cjiaji̧ri̧ oa dadärärëreyi̧nȩjȩrȩ. 11Jabo Jechu judi bëdüa̧ pio ju̧i̧ chjiari yo̧a̧ ji̧, Jechu pio ju̧i̧ irä daea̧ pio ju̧i̧ chjiari yo̧a̧ ji̧, cjäri̧ madiro̧jȩ, ta̧rë ja̧bodëa̧diro̧jȩ. Quëna̧dëa̧diro̧jȩ.

Jechu judi pio jȩa da tänȩrëremȩdejȩrȩ jibëa̧ jadü yo̧a̧ri̧ oa

Uruca 24:13-35

12Ji̧dë duri oa Jechu judi jibëa̧ jadü yo̧a̧ri̧ oa da tänȩrëremȩdejȩrȩ chiriräpȩmo̧ tai̧ji̧ri̧ oa. Tjaoëpai̧ dari̧ cjiamȩrȩ da tänȩa̧dejȩrȩ pio jȩaiäpȩmo̧. 13Ado judiro̧ Jechu pio ju̧i̧ da ëte, jabechji̧ jibëa̧ jadü pio ji̧ri̧iäpȩmo̧ ni̧bä chjaopea̧ oa baäeno̧a̧dirȩ. Jabo jënȩro̧ daea̧ pio ju̧i̧ chjiari ni̧bä chjaoa̧ ji̧, peaja̧di ta̧rë ja̧bodëa̧diro̧jȩrȩ.

Pio jȩa chjiari ma̧ȩ chjadëi̧ oa oëra̧ti̧ oa a̧ra̧ano̧riä baätä yo̧mȩrȩ yo̧rëremȩdejȩrȩ Jechu judi jibëa̧ jadü pio ji̧ri̧iäpȩmo̧

Mateo 28:16-20; Uruca 24:36-49; Juan 20:19-23

14Ji̧dë duri oa Jechu judi jibëa̧ jadü pio ji̧ri̧ da tänȩrëremȩdejȩrȩ 11 oa. Mechjaräpȩ chaji̧ri̧ oa da tänȩa̧dejȩrȩ. Ado to̧bari̧ chi̧dëea̧mȩrȩ yo̧a̧dejȩrȩ. Jabechji̧ judiro̧ quëna̧dëa̧ tara, judiro̧ pio jȩaiäpȩmo̧ irä daea̧ji̧ri̧ pio ji̧ri̧ ta̧rë ja̧bodëa̧ tara, to̧bari̧ chi̧dëearëremȩdejȩrȩ, judiro̧ chjuari̧ jiada̧ tara.

15Ado ji̧dë u̧i̧ yo̧mȩrȩ a̧de yo̧a̧dejȩrȩ:

—Danȩrȩ, chiriräpȩti̧ oa baächji̧vä ma̧ȩ chjadëi̧ pio ju̧i̧ a̧ra̧ano̧pea̧ oa pumȩ ütëbodärä oa. 16Ado eami̧ pumȩ üdë pio coaiäpȩmo̧ quëna̧mȩ pio judi, go̧ȩ cjaeä chuda̧ oa cjiamȩ pio judi, jabechji̧ chjätärea̧ dapade. Jabo pio coaiäpȩmo̧ quëna̧dëmȩ pio judi aeno̧a̧ oa cjiapade. 17Ado pio coaiäpȩmo̧ quëna̧ji̧ri̧ pio judiro̧, jabechji̧ Ütë tjamo̧ ja̧ jauëchja pio ju̧i̧ na̧rȩrea̧ chiapadirȩ. Aja̧, ca̧ quȩ pio ju̧i̧iä baä tänȩrea̧ dapadiro̧jȩrȩ yaröca pio ji̧ri̧. Ado cja̧rȩmo̧ ni̧bärea̧ ma̧ȩra̧ ni̧bärea̧ dapadirȩ peaja̧di, jënȩro̧ dabapadëa̧ ma̧ȩ oa. 18Ado po oa jibëa̧ ichira̧ mitërä judi, jabechji̧ eami̧ oa japadëpadejȩrȩ. Ado ë chiamȩ jararea̧ oa jararä judi, ja̧bo tänȩmȩ jararea̧ oa jararä judi, jabechji̧ ja̧bodëpadirȩ. Ado judiro̧ jibëa̧ ichira̧ gito ja̧boji̧ri̧ pio ji̧ri̧ ga̧re tara̧ oaiä, jabechji̧ chjapea̧ oa cjia mapadirȩ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

Jechu judi baärëremȩde a̧dëräpȩ

Uruca 24:50-53

19Ado Ano̧mȩ Jechu judi jibëa̧ jadü pio ji̧ri̧ nö̧ta ni̧bä chjaoa̧ duri oa, cjitë tänȩa̧ oa cjiarëremȩde a̧dëräpȩ yuro. Ado Ütë tjamo̧ pio ju̧i̧ ja̧ mu̧i̧ chjuari pio judiri chadäräa̧de, ba chia tjamo̧räpȩ. 20Ado ju̧i̧ ja̧ jadü judiro̧, jabechji̧ oëra̧ti̧ oa baärëreji̧ri̧dirȩ ma̧ȩ chjadëi̧ pio ju̧i̧ a̧ra̧ano̧pea̧ oa. Ado judiro̧ a̧ra̧ano̧riä tai̧a̧ ji̧, jabechji̧ ibëa̧ Ano̧mȩ pio judi ana̧ri̧ ja̧beparëremȩde pio ji̧ri̧iä. Aja̧, jibëa̧ jauëchjara̧ na̧rȩriä ja̧bepapea̧ oa, pumȩ judiro̧ coëma cjiari̧ quëna̧pea̧ oa, pio ji̧ri̧iä ana̧ri̧ ja̧beparëremȩde. 'Aja̧, na̧rȩdiro̧ibëda, teracaba ma̧ȩdëdida, jabo Ütë tjamo̧ pio ju̧i̧ ja̧ maȩdida, coëma cjiari̧ a̧ra̧ano̧diro̧ibëda' quëna̧rea̧mi̧ dari̧ ana̧ri̧ ja̧beparëremȩde Ano̧mȩ judi pio ji̧ri̧iä. Ja̧ditäde.

Currently Selected:

Marcos 16: Pume

Highlight

Copy