Lucas 2

Maria jini̧ ararëreyi̧nȩjȩ Jechu boi̧ pio ju̧i̧

Mateo 1:18-25

1Ado pio jiro japamitërä Doma quȩmȩ bë ma̧ri̧rä cjo̧ro̧mȩ ütë pio judi, oëra̧ti̧ oa a̧rȩmȩ chiri oa ütëmȩrȩ cjo̧ro̧mȩ ütë pio judi, Checha Augusto quȩmȩrëremȩde. Ado pio judi ma̧ȩ yürü chjadürëremȩdejȩrȩ pumȩ ütëbodärä oa, oëra̧ti̧ oa a̧rȩmȩ chirirä cjo̧ro̧ji̧ri̧ pio ji̧ri̧. Aja̧, pio ju̧i̧ ja̧ chja̧oerä cjo̧ro̧ji̧ri̧ ütëbo oa ma̧ȩ chjadürëremȩdejȩrȩ judiro̧ chjadëri̧ ütara̧ oa cjiapea̧ oa, judiro̧ ütëbodärärë ütara̧ oa cjiapea̧ oa, cja̧rȩmȩrȩ a̧dë cjiadiärea̧ decjiari̧. 2Aja̧, Quirinio quȩmȩ pio judi Chiria quȩmȩ chiriräpȩ ütërä judirä ütara̧ oa cjiarëreji̧ri̧dirȩ pumȩ judiro̧, judiro̧ cja̧rȩmȩ co ütara̧ oa cjiadërërea ji̧.#2:2 Aja̧ ca̧ oti̧, Checha Augusto judi, Doma quȩmȩ bë ma̧ri̧rä cjo̧ro̧mȩ ütë pio judi jibëa̧ mu̧i̧tjo̧i̧ pio ji̧ri̧iä ma̧ȩ chjadüa̧ oaiä, jabechji̧ Quirinio quȩmȩ pio judiborë ütararëremȩdejȩrȩ pumȩ ji̧ri̧, Chiria quȩmȩ chiriräpȩ cjo̧ro̧ji̧ri̧ pumȩ pio ji̧ri̧. Ado Judearäpȩ cjo̧ro̧ji̧ri̧ pio ji̧ri̧bo ütararëremȩdejȩrȩ. Jabechji̧ domano̧ judiro̧ Judea chiri oa boadärärërea̧ oaiä, jabechji̧ Chiriaräpȩ cjo̧ro̧mȩ ja̧ ütë ja̧ chja̧oerä cjo̧ro̧rëreji̧ri̧dirȩ. Ado pio ju̧i̧iä pio ju̧ri̧pȩ cjo̧ro̧ji̧ri̧ pio ji̧ri̧bo ütararëremȩdejȩrȩ Quirinio quȩmȩ ütë judi. 3Aja, Checha Augusto quȩmȩ ütë judi ja̧di dari̧ japatä yo̧ chjadüa̧ oaiä, jabechji̧ oëra̧ti̧ oa a̧rȩmȩ chirirä cjo̧ro̧ji̧ri̧ pumȩ pio judiro̧ jä marëreji̧ri̧dirȩ jibëa̧ ütëti̧rȩ cjo̧ro̧mȩ bë ma̧ri̧räpȩ ju̧ri̧ jibëa̧ quȩ oa go̧ȩpapea̧ oa, judiro̧ chjadëri̧ ütara̧ oa cjiapea̧ oa. 4Ado Joche judi Davirea̧ pio judiri ja̧mȩ tara, jabechji̧ jäpea̧ chiarëremȩde Berȩ quȩmȩ bë ma̧ri̧räpȩ, Judea quȩmȩ chirirä cjiamȩ bë ma̧ri̧räpȩ ju̧ri̧. Jabechji̧ pio ju̧ri̧ cjo̧ro̧rëremȩde Davi quȩmȩrea̧ pio judi, jibëa̧ tarurea̧ pio judi. Ado pio ju̧i̧iä Joche judi Nachare quȩmȩ bë ma̧ri̧ri pio judiri go̧dümȩrȩ järëremȩde, Garirea quȩmȩ chiriri go̧dümȩrȩ. 5Tjamo̧ davä. Ütara̧ oa cjiapea̧ oa järëremȩde jibëa̧ iei̧payi̧ pio ji̧ nö̧ta, Maria quȩyi̧ pio ji̧ nö̧ta. Arapea̧ querediä tjamo̧yi̧ oa ëba järëremȩdejȩ, bomaiyi̧ oa. 6Ado judiro̧ Berȩräpȩ cjo̧ro̧a̧ nö̧ta, cäripea̧de bo üdë ana̧ri̧ jäa̧ oaiä. Jabechji̧ acä oa gitori̧ mo̧ërëremȩdejȩ boi̧chji̧ üdë. 7Jabo pumȩ no̧i̧dërë Berȩräpȩ jibëa̧ yaboi̧ go̧düdäräa̧ oaiä, jabechji̧ pio jibë ëba cjo̧ro̧mȩ pio ju̧i̧ dadëa̧dirȩ. Pio ju̧i̧iä bacarë cjo̧ro̧rea̧ bëräpȩ yu̧a̧dirȩ. Ado pio ju̧ri̧ ararëreyi̧nȩjȩ boi̧chji̧ oa, jibëa̧ ja yabomȩ oa. Ado boi̧chji̧ pio ju̧i̧ ara ëte, chjibo cotora̧ pio ju̧ri̧ra̧ joë purirëreyi̧nȩjȩ. Ado joë puria̧ duri oa, bacarë jurarea̧ chararä idë a̧ra̧rëreyi̧nȩjȩ.

A̧dëriji̧ri̧ mu̧i̧tjoi̧ judiro̧ ana̧ri̧ na̧rȩrëreji̧ri̧diro̧jȩrȩ oveja jidaji̧ri̧ pio ji̧ri̧

8Ado pio jiro gȩnȩrä, oveja jidaji̧ri̧ pio judiro̧ Berȩ dairäpȩ jidarëreji̧ri̧diro̧jȩrȩ jibëa̧ oveja ji̧ri̧, chiriräpȩ ju̧ri̧. 9Ado judiro̧ daba quëna̧dërä chjaodëri̧ idëparëremȩde Ano̧mȩ ja̧ mu̧i̧tjoi̧ judi, a̧dërimȩ mu̧i̧tjoi̧ pio judi. Jabechji̧ bagönȩ marërea̧ ji̧, chjaodëri̧ a̧dë chjäte tatari̧ cjiamȩpea̧de Ano̧mȩ pio ju̧i̧ ja̧ tatarea̧ oaiä. Ado pio ju̧i̧iä uaparea̧ üdë chjaodëri̧ boadärärëremȩdejȩrȩ. 10Jabo mu̧i̧tjoi̧ pio judi yo̧rëremȩdejȩrȩ:

—Uapadëchji̧vä —yo̧a̧dejȩrȩ—. Jabechji̧ ma̧ȩ chjadëi̧ pio ju̧i̧ yürera̧pea̧requededibe. Tjamo̧ davä. Ma̧ȩ chjadëi̧ oa, pumȩ ütëbodärä ja̧ oa ma̧ȩ yürera̧pea̧requededibe, ma̧ chiadëri̧ cjiari̧ jo̧rȩta tänȩmȩ ma̧ȩ chjadëi̧ pio ju̧i̧. 11Jabechji̧ Quiricho pio judi, Ütërë mitëa̧ Chjätä Tänȩmȩ pio judi ara̧ oa cjiade pio yaba̧ domȩ oa —yo̧a̧dejȩrȩ—. Tjamo̧ davä. Chjätärea̧ yürümȩ Ano̧mȩ pio judi ara̧ oa cjiade pio yaba domȩ oa Berȩräpȩ ju̧ri̧, Davi quȩmȩrea̧ pio judi cjo̧ro̧rërea̧ bë ma̧ri̧räpȩ ju̧ri̧. 12Jabechji̧ goëde jächji̧jo̧ȩ. Ado mȩnȩro̧ boi̧chji̧ pio ju̧i̧ chjiari dabadëchea oa, jabechji̧ pio yoa na̧rȩrea̧ oa yürürequededibe. Danȩrȩ, mȩnȩro̧ boi̧chji̧ pio ju̧i̧ da̧rä, jabechji̧ chjibo cotora̧ pio ju̧ri̧ra̧ joë puria̧ oa cjiamȩ oa daparenȩro̧jo̧ȩ, bacarë jurarea̧ chararä a̧rȩmȩ oa. 'Jabechji̧ pio judi tjamo̧dida' quëna̧ jo̧rȩtaji̧ri̧rȩ daparenȩro̧jo̧ȩ. Aja̧, goëde jächji̧jo̧ȩ —yo̧a̧dejȩrȩ.

13Ado a̧dërimȩ mu̧i̧tjoi̧ judi ja̧di ta̧rëri̧ yo̧a̧ duri oa, chjaodëri̧ idëpea̧ oa cjiarëreji̧ri̧dirȩ a̧dëriji̧ri̧ mu̧i̧tjoi̧ judiro̧ no̧i̧dërë, ütararea̧mi̧dërë. Jabechji̧ mu̧i̧tjoi̧ pio judi jibëa̧ma̧i̧ cjiarërea̧ ji̧, chjaodëri̧ bubape bagarëreji̧ri̧dirȩ. Ado chjacjiamȩri̧ ni̧bäji̧ri̧pea̧dirȩ Ütë tjamo̧ pio ju̧i̧iäpȩmo̧, ja̧di ta̧rëri̧ yo̧ji̧ri̧rȩ:

14"Aja̧, Ütë tjamo̧ judi chjacjiamȩri̧ jo̧rȩtapea̧de. Jabechji̧ a̧dëräpȩmȩ oa, a̧dë chjäte ba chiamȩräpȩmȩ oa, a̧dë chjäte tatari̧ cjiamȩräpȩmȩ oa chjacjiamȩri̧ jo̧rȩtapea̧ maeade. Ado chjadëri̧ yürütädejȩrȩ chiriräpȩti̧ oa cjo̧ro̧ji̧ri̧ pio ji̧ri̧. Aja̧, ma̧ chjupi̧ cjiari̧ jo̧rȩtarea̧ yürütädejȩrȩ, jënȩ cjäri̧ri̧ cjia da̧ pio ji̧ri̧iäpȩmo̧."

Aja̧, ja̧di ta̧rëri̧ yo̧rëreji̧ri̧dirȩ a̧dëriji̧ri̧ mu̧i̧tjoi̧ pio judiro̧.

15Ado ja̧dëa ji̧ mu̧i̧tjoi̧ judiro̧ ado chjereno̧ a̧dëräpȩ baäa̧ duri oa, oveja jidaji̧ri̧ pio judiro̧ jibëa̧ dëbëti̧ra̧ chia ni̧bä chjaoji̧ri̧pea̧dirȩ:

—Goë jaeibe. Jätärȩ. Ano̧mȩ pio judi ibë daba tänȩa̧ pio ju̧i̧ chjadëri̧ dapea̧ oa jätärȩ Berȩräpȩ.

16Ado jëreeaji̧ri̧rȩ järëreji̧ri̧dirȩ bë ma̧ri̧räpȩ ju̧ri̧. Ado go̧düdärä ëte, darëreji̧ri̧diro̧jȩ Maria pio ji̧, Joche pio ju̧i̧bo. Ado ju̧ri̧pȩ a̧rȩmȩ boi̧chji̧ oa darëreji̧ri̧diro̧jo̧ȩ peaja̧di, bacarë jurarea̧ chararä a̧rȩmȩ oa. 17Ado boi̧chji̧ pio ju̧i̧ daea̧rä, jabechji̧ ni̧bä chjaorëreji̧ri̧diro̧jȩrȩ Joche pio ju̧i̧, Maria pio ji̧bo. Jënȩro̧ daea̧ pio ju̧i̧, a̧dërimȩ mu̧i̧tjoi̧ pio judi boi̧chji̧ pio ju̧i̧ chjiari yo̧a̧rea̧ pio ju̧i̧ yo̧a̧diro̧jȩrȩ, o ji̧ri̧bo. 18Ado ta̧rëa̧ji̧ri̧ judiro̧ oveja jidaji̧ri̧ pio ji̧ri̧iä ta̧rëa̧ oaiä, jabechji̧ ana̧ri̧ jo̧rȩtaji̧ri̧pea̧dirȩ dacho bëremi̧ cjiami̧ dari̧.

19Jabo Maria jini̧ pio ji̧ri̧iä ta̧rë ëte, jabechji̧ ji̧dë ma jo̧rȩtarëreyi̧nȩ, urëdi tjamo̧ oa jo̧rȩtayi̧rȩ. Jabechji̧ babui̧ra̧ carupë jo̧rȩte chjaorëreyi̧nȩjȩ. 20Ado oveja jidaji̧ri̧ pio judiro̧, jabechji̧ ado chjereno̧ baäa̧dirȩ jibëa̧ ovejarë cjiamȩräpȩ. Ado jënȩro̧ irä daea̧ pio ju̧i̧iä, jënȩro̧ irä ta̧rëa̧ pio ju̧i̧iä, jabechji̧ ma̧ chiadëri̧ cjia tjamo̧ji̧ri̧rȩ baärëreji̧ri̧dirȩ, Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtaji̧ri̧rȩ. Jabechji̧ a̧dërimȩ mu̧i̧tjoi̧ judi pio jibëiäpȩmo̧ yo̧a̧mi̧ tjamo̧ri̧ darëreji̧ri̧diro̧jo̧ȩ.

Ütara̧ japamitërä budodiro̧jo̧ȩ jibëa̧ Ja oa

21Ado boi̧chji̧ üdë 8 do goa̧mȩpea̧ domȩ ju̧i̧iä, jabechji̧ budorëreji̧ri̧diro̧jo̧ȩ, Icharaita judiro̧ japariärërea̧mi̧. Ado budo ëte, quȩparëreji̧ri̧diro̧jo̧ȩ Jechu quȩra̧ pio ju̧ri̧ra̧. Jabechji̧ a̧dërimȩ mu̧i̧tjoi̧ pio judi yo̧rërea̧ quȩra̧ pio ju̧ri̧ra̧ quȩpea̧diro̧jo̧ȩ, Tjo tjamo̧ judi Maria ji̧ jabë bomai tänȩdëa̧rä yo̧rërea̧mi̧.

Jädirȩ Jerucharȩräpȩ Moicherë yo̧rërea̧mi̧ japapea̧ oa, joja yabomȩ pio ju̧i̧ Ano̧mȩ ja̧ oa china̧chjari̧ tutipea̧ oa

22Ja̧dëa ji̧ japamitë chjätä ëte ütara̧ doro, Joche judi jibëa̧ iei̧ pio ji̧ nö̧ta järëremȩde Jerucharȩräpȩ ju̧ri̧, Ütë tjamo̧ ja̧ bëräpȩ ju̧ri̧. Jabechji̧ pea arareyi̧ pio jini̧ chjapea̧ oa cjiadiäa̧ oaiä, jabechji̧ järëreji̧ri̧dirȩ Moicherë go̧ȩparërea̧mi̧ chjadëri̧ japapea̧ oa, pio jini̧ chjai̧dë gȩrȩ chiadëyi̧mi̧ dari̧ cjiadiäpea̧ oa. Ado peaja̧di ëba jäa̧diro̧jo̧ȩ Jechu boi̧ pio ju̧i̧ Moicherë go̧ȩparërea̧mi̧. Jabechji̧ Ano̧mȩ pio ju̧i̧ ja̧ oa china̧chjari̧ tutia̧ oa cjiapea̧ oa, peaja̧di ëba jäa̧diro̧jo̧ȩ. 23Jabechji̧ eami̧ iei̧ jini̧ joja yabomȩ oa ararä, jabechji̧ Ano̧mȩ pio ju̧i̧ ja̧ oa china̧chjari̧ tutia̧ oa cjiami̧ dari̧ cjiapea̧ maeade. Aja̧, ja̧di ta̧rëri̧ yo̧diibe Ano̧mȩ pio ju̧i̧ ja̧ ma̧ȩ üdë, tüdüa̧mi̧ darä cjo̧ro̧pea̧ ma̧ȩ üdë. 24Ado pio ju̧i̧iä Maria pio jini̧ joja yabomȩ pio ju̧i̧ ara̧ pio ju̧i̧iä, jabechji̧ ütara̧mi̧ yürürëreji̧ri̧diro̧jo̧ȩ goë tuti ja̧bepamȩ pio ju̧i̧iäpȩmo̧, pio judi goe gu̧rori̧ yürüpea̧ oa pio ji̧ri̧ chjiari. Aja̧, ütara̧mi̧ yürürëreji̧ri̧dirȩ Ano̧mȩ pio judi tüdüa̧mi̧ darä cjo̧ro̧pea̧ ma̧ȩ oa go̧ȩpa tänȩrërea̧mi̧. Aja̧, yo̧a̧ri̧ oa yürüpea̧de. Yo̧a̧ri̧ jotoco pua ma̧ri̧ oa yürüpea̧de, jabo yo̧a̧ri̧ jotoco pua bori̧ oa yürüpea̧de. Ado pio ju̧i̧iä jabechji̧, jënȩro̧ goa̧ pio ju̧i̧ yürürëreji̧ri̧dirȩ.

Chimeo̧ judi Ütërë pio jȩaiäpȩmo̧ ea jana̧ chjadüa̧ duri pio ju̧i̧ ni̧bärëremȩde Jechu pio ju̧i̧ chjiari

25Ado pio jiro japamitërä, cja̧rȩmȩrȩ cjo̧ro̧rëremȩde Jerucharȩräpȩ ju̧ri̧. Chimeo̧ quȩmȩ pio judi cjo̧ro̧rëremȩde. Ado pio judi coëma cjiari̧ cjo̧ro̧mȩrȩ ji̧dë ma jo̧rȩtarëremȩde Ütë tjamo̧ pio ju̧i̧iäpȩmo̧. Ado peaja̧di ji̧dë ma jidatamȩrȩ cjo̧ro̧rëremȩdejȩ Ütërë mitëa̧ Chjätä Tänȩmȩ pio ju̧i̧. Jabechji̧ Icharai pio judiri ja̧ji̧ri̧ pio ji̧ri̧ chjadëri̧ a̧dopea̧ oa, pio ji̧ri̧ chjadëri̧ chjätärea̧ yürüpea̧ oa jidatamȩrȩ cjo̧ro̧rëremȩdejȩ peadëri ja̧. Ado jidatamȩ pio ju̧i̧ cjiana̧ra̧dejȩ Tjo tjamo̧ pio judi. 26Ado cjiana̧ra̧mȩrȩ jo̧rȩta tänȩrëremȩdejȩ Ano̧mȩ pio judi mitëa̧ Chjätä Tänȩmȩ pio ju̧i̧ chjiari. 'Aja̧, cüdë jabë ja̧bodëa̧rä, irä dapacuni̧da, Chjätä Tänȩmȩ pio ju̧i̧ irä dapacuni̧da' quëna̧ jo̧rȩta tänȩa̧dejȩ jabërä Tjo tjamo̧ pio judi.

27Ado pio jiro domȩ ju̧i̧iä, Tjo tjamo̧ pio judi yabo ëba jämi̧ dari̧ ëba jä tänȩrëremȩdejȩ Chimeo̧ pio ju̧i̧ Ütë tjamo̧ ja̧ bëräpȩ ju̧ri̧. Ado ja̧dëa ji̧ Joche judi ado Maria jini̧ jibëa̧ ja oa china̧chjari̧ yürera̧pea̧rä, jabechji̧ Chimeo̧ pio judi daea̧dejȩrȩ. Tjamo̧ davä. Jibëa̧ ja oa china̧chjari̧ yürera̧pea̧rä, tüdüa̧mi̧ darä cjo̧ro̧pea̧ ma̧ȩrä yürera̧pea̧rä, daea̧dejȩrȩ. 28Ado chjaodëri̧ ida̧dejȩ Jechu boi̧ pio ju̧i̧. Ado chjaodëri̧ ni̧bämȩpea̧dejȩ Ütë tjamo̧ pio ju̧i̧iäpȩmo̧, chjacjiamȩri̧ ni̧bämȩrȩ.

29-32Aja̧, ja̧di ta̧rëri̧ ni̧bämȩrȩ yo̧rëremȩdejȩ: "Aja̧ Ano̧mȩ, mȩnȩ pio coa jabërä yo̧rëremȩrenȩque cüdë Chjätä Tänȩmȩ pio ju̧i̧ irä dapea̧ pio ju̧i̧ chjiari" yo̧a̧dejȩ. "Ado yaba̧ irä dareconȩ pio yoaje. Tjamo̧ davä. Mȩnȩ chjadüa̧ pio yoa, chiriräpȩti̧ oa cjo̧ro̧ji̧ri̧ pumȩ pio judiro̧ chjätärea̧ yürüpamȩ pio yoa irä dareconȩ, mȩnȩ ütëbodärä ja̧ oa chjadüa̧mȩ pio yoa. Jabechji̧ tatami̧ dade. Ado pio judi tatami̧ darä jo̧rȩta tänȩpadejȩrȩ judiodë pio ji̧ri̧ pio mȩa chjiari. Tjamo̧ davä. Ütëbodärä oa, ado cja̧rȩmo̧ ma̧ȩ oa ni̧bäji̧ri̧ pio ji̧ri̧, ado cja̧rȩmo̧ ma̧ȩ oa ni̧bäji̧ri̧ pio ji̧ri̧ dabarea̧ yürüpadejȩrȩ, judiro̧ pio mȩa chjiari chjadëri̧ dabapea̧ oa. Ado pio judi chjadëri̧ japea̧ oaiä, 'jabechji̧ Icharai pio judiri ja̧ji̧ri̧ pio judiro̧ ba chia tjamo̧diro̧da' quëna̧ jo̧rȩta tänȩpadejȩrȩ na̧ pumȩ pio ji̧ri̧ chjiari. Ado yaba̧ ca̧ Ütë, cüdë pio yoa irä daea̧ oaiä, jabechji̧ ma̧ chjupi̧ cjiari̧ jo̧rȩtarea̧ damȩrȩ ja̧boparequede. Chja jabechji̧ ja̧borea̧ yürücoe yaba̧ na̧ mu̧i̧tjoi̧ oa" yo̧mȩrȩ ni̧bärëremȩdejȩ Chimeo̧ judi Ütë tjamo̧ pio ju̧i̧iäpȩmo̧. Aja̧, ja̧di ta̧rëri̧ yo̧mȩrȩ a̧de yo̧rëremȩde Chimeo̧ judi Jechu boi̧ pio ju̧i̧ chjiari.

33Ado pio ju̧i̧ ta̧rëa̧ oaiä Jechu ja̧ ama̧i̧ pio judiro̧ ana̧ri̧ jo̧rȩtaji̧ri̧pea̧dirȩ, dacho bëremi̧ cjiaji̧ri̧rȩ jo̧rȩtarea̧mi̧ dari̧. 34Ado ja̧dëa ji̧ Chimeo̧ judi pio ji̧ri̧ chjiari goë cjo̧dërëremȩde. Jabechji̧ Ütë tjamo̧ judi pio ji̧ri̧iäpȩmo̧ chjadëri̧ a̧dotä eamȩrȩ goë cjo̧dëa̧dejȩ.

Ado pio ji̧ri̧ chjiari goë cjo̧dë ëte, ni̧bämȩpea̧dejȩ Maria pio ji̧iäpȩmo̧, boi̧chji̧ pio ju̧i̧ arayi̧ pio ji̧iäpȩmo̧. Ja̧di ta̧rëri̧ ni̧bämȩrȩ yo̧rëremȩdejȩ:

—Damȩ, pio yoa boi̧chji̧ üdë no̧mȩ tjamo̧ri ja̧ jëdano̧a̧ oa cjiami̧ dari̧ cjiarëremȩdi Icharai pio judiri ja̧ji̧ri̧ pio ji̧ri̧ chjadëri̧ chjätä tänȩpea̧ oa. Jabo pio jiro boi̧chji̧ üdë peaja̧di jëdano̧a̧ oa cjiami̧ dari̧ cjiarëremȩdi Icharai pio judiri ja̧ji̧ri̧ pio judiro̧ no̧i̧dërë Ütë tjamo̧ pio ju̧i̧ putu jura̧ a̧dë chami̧ dari̧ jiadapea̧ oa, jënȩro̧ cjatärea̧mi̧ dari̧. Jabechji̧ Ütë tjamo̧ pio judi chjadüa̧ oa ma̧na̧de na̧rȩmȩmi̧ dari̧, jabo cjäri̧ madiro̧jo̧ȩ, noi̧dërë jiadapadiro̧ju̧i̧. 35Ado pio ju̧i̧iä pumȩ judiro̧ chjai̧dëri̧ jo̧rȩta̧ üdë chjadë maearä cjiami̧ dari̧ cjiapadi. Ado damȩ Maria, pumȩ judiro̧ ji̧dë duri oa na̧ ja pio ju̧i̧ ma̧i̧ dari̧ conȩdapea̧ üdë, jabechji̧ dëbëribo jo̧dë chiamȩ tjapënȩ jujuai̧mi̧ dapadi pio mȩaiä. Jabechji̧ na̧ chji̧ oa cjacjarë guami̧ dari̧ jo̧rȩta tänȩpadima̧ —yo̧mȩrȩ yo̧rëremȩdejȩ Maria pio ji̧iäpȩmo̧ Chimeo̧ judi.

Ana̧ quȩyi̧ pio jini̧, Ütërë pio jȩaiäpȩmo̧ ea jana̧ chjadüa̧ duri pio ju̧i̧ ni̧bärëreyi̧nȩ Jechu pio ju̧i̧ chjiari

36Ado cja̧rȩmo̧rȩ cjo̧ro̧rëreyi̧nȩ Ütë tjamo̧ ja̧ bëräpȩ, Ana̧ quȩyi̧ pio jini̧, ütai̧ tjamo̧padäräa̧yi̧ pio jini̧. Ütërë ea jana̧ chjadüa̧ oa ni̧bäyi̧rȩ cjo̧ro̧rëreyi̧nȩ. Penue quȩmȩ pio ju̧i̧rea̧ ja̧ jojabirë cjo̧ro̧rëreyi̧nȩ. Ado Ache quȩmȩ pio judiri ja̧yi̧rȩ cjo̧ro̧a̧ oaiä, jabechji̧ pio ju̧i̧ ja̧ bubarä cjo̧ro̧rëreyi̧nȩ. Jibëa̧ üi̧rea̧ pio judi a̧dë ja̧borëremȩdejȩ judiro̧ pea ëba̧rä, judiro̧ 7 ui maea oa ëba ëte. 37Ado judi ja̧boa̧ pio judiri yurori cjo̧ro̧rëreyi̧nȩ jënȩ 84 ui goayi̧pea̧rä yuro, ado cja̧rȩmo̧ üi̧ oa ëbadëyi̧rȩ. Ado jënȩ cjo̧ro̧a̧ nö̧ta, jabechji̧ ji̧dë ma cjo̧ro̧rëreyi̧nȩ Ütë tjamo̧ ja̧ bëräpȩ ju̧ri̧. Do yoa, gȩnȩ yoa pio ju̧ri̧pȩrëreyi̧nȩ Ütë tjamo̧ pio ju̧i̧iäpȩmo̧ chjacjiamȩri̧ jo̧rȩtapea̧ oa. Ado tjaoërä jurarea̧ oa jiadarëreyi̧nȩ peaja̧di Ütë tjamo̧ pio ju̧i̧iä goë cjo̧dëpea̧ oa, jurarea̧ oaiä oëra̧diäa̧ oa cjiami̧ dari̧ cjiachea oa, Ütë pio ju̧i̧mo̧i̧ jo̧rȩtapea̧ oa.

38Ado Chimeo̧ judi Jechu pio ju̧i̧ chjiari Ütë tjamo̧ ja̧ bëräpȩ ju̧ri̧ jabë ni̧bä chjaoa̧rä, Ana̧ quȩyi̧ pio jini̧ go̧düdärärëreyi̧nȩ pio ji̧ri̧iäpȩ. Ado boi̧chji̧ pio ju̧i̧ irä daea̧ ji̧, 'jabechji̧ Ütë tjamo̧ judi chjadëri̧ tuti chjadüa̧diibëda' quëna̧ jo̧rȩtayi̧rȩ chjacjiamȩri̧ ni̧bäyi̧pea̧nȩjȩ Ütë tjamo̧ pio ju̧i̧iäpȩmo̧. Ado pumȩ ji̧ra̧ tjamo̧ oa ni̧bäyi̧pea̧nȩjȩrȩ peaja̧di. Aja̧, Chjätä Tänȩmȩ pio ju̧i̧ jidataji̧ri̧ pio ji̧ri̧iäpȩmo̧ ni̧bäyi̧pea̧nȩjȩrȩ peaja̧di. Jabechji̧ pumȩ judiro̧ Ütë tjamo̧ pio ju̧i̧ jidataji̧ri̧rȩ cjo̧ro̧a̧ oaiä, Jerucharȩräpȩ cjo̧ro̧ji̧ri̧ pio ji̧ri̧ eadëji̧ri̧ pio ji̧ri̧ ja̧ chja̧oeri pio judiri go̧dü tänȩpea̧ pio ju̧i̧ jidataji̧ri̧rȩ cjo̧ro̧a̧ oaiä, jabechji̧ ni̧bä chjaorëreyi̧nȩjȩrȩ Jechu pio ju̧i̧ chjiari, Jerucharȩräpȩ cjo̧ro̧ji̧ri̧ pio ji̧ri̧ jare chjadüa̧mi̧ dari̧ tuti japapamȩ pio ju̧i̧ chjiari.

Ado chjereno̧ baärëreji̧ri̧dirȩ Nachareräpȩ

39Ado Jechu ja̧ ama̧i̧ pio judiro̧ Ano̧mȩ ja̧ ma̧ȩ oa chjadëri̧ japadäräa̧rä, judiro̧ tüdüa̧mi̧ darä cjo̧ro̧pea̧ ma̧ȩrä ütara̧mi̧ japadäräa̧rä, jabechji̧ ado chjereno̧ baärëreji̧ri̧dirȩ Garirea quȩmȩ chiriräpȩ. Ado ju̧ri̧pȩ go̧düdärä ëte, jibëa̧ bëräpȩ baäa̧dirȩ Nachare quȩmȩ bë ma̧ri̧räpȩ. 40Ado Jechu boi̧ judi ütëchjai̧pe bagarëremȩde. Jabechji̧ ju chiamȩ tjamo̧pe bagarëremȩde. Ado urëdi tjamo̧ oa jo̧rȩtamȩpea̧de peaja̧di, a̧dë chjäte chjadëri̧ ütarë jo̧retamȩrȩ. Ado Ütë tjamo̧ judi 'Aja̧, ca̧ Ja tjamo̧dica̧da' quëna̧ jo̧rȩtamȩrȩ ji̧dë ma chjadëri̧ a̧dorëremȩdejȩ.

Ana̧ri̧ jo̧rȩtaji̧ri̧rȩ ta̧rë charëreji̧ri̧diro̧jo̧ȩ Jechu boi̧ pio ju̧i̧ jibëa̧ Ama̧i̧ ja̧ bëräpȩ ni̧bämȩ oa

41Uipamȩ nö̧ta Jechu ja̧ ama̧i̧ pio judiro̧ jädiärëreji̧ri̧dirȩ Jerucharȩräpȩ uëmo̧ a̧dë chjätärea̧ do pio ju̧i̧ jo̧rȩtaji̧ri̧rȩ a̧dopapea̧ oa. 42Ado Jechu judi 12 ui goamȩpea̧rä, peaja̧di järëreji̧ri̧dirȩ pio jiro do pio ju̧i̧ jo̧rȩtaji̧ri̧rȩ a̧dopapea̧ oa, judiro̧ ji̧dë ma japariärërea̧mi̧. 43Ado a̧dopea̧ duri oa, Jechu ja̧ joji̧ri̧ jini̧, ado jȩa ütëparȩmȩ pio judiborë ado chjereno̧ taruparëreji̧ri̧dirȩ jibëa̧ bëräpȩ baäpea̧ oa, Nachareräpȩ baäpea̧ oa. Jabo Jechu judi Jerucharȩräpȩ a̧dë cjiadiäa̧dejȩrȩ. Jabo judiro̧ pio ju̧i̧ dadëräbo, jabechji̧ ana̧ri̧ jo̧rȩtadëa̧dirȩ. 44'Jabechji̧ ji̧ra̧ tjamo̧a̧ro̧da, ado o ji̧ri̧ nö̧ta baä jirodida, ibë nö̧ta baäji̧ri̧ pio ji̧ri̧ nö̧ta baä jirodida' quëna̧ jo̧rȩtaji̧ri̧rȩ ana̧ri̧ jo̧rȩtadërëreji̧ri̧dirȩ jabo jabechji̧ do yoa baärëreji̧ri̧dirȩ chjadëri̧ go̧düdäräpea̧ oa. Jabo ja̧dëa ji̧ baärea̧ no̧ro gȩnȩpea̧rä jibëa̧ ja oa dadëa̧ oaiä, chjaodëri̧ iëno̧ iëno̧ ta̧rëa̧diro̧jȩrȩ jibë nö̧ta ëba baäreji̧ri̧ pio ji̧ri̧iä, jibëa̧ pumȩ pio ji̧ri̧iä, jënȩro̧ daea̧ pumȩ pio ji̧ri̧iä. 45Jabo cjäri̧ madiro̧jo̧ȩ, dadärädëa̧diro̧jo̧ȩ. Ado pio ju̧i̧iä ado chjereno̧ jäeno̧a̧dirȩ Jerucharȩräpȩ ju̧ri̧. 46Ado tjarari̧ do nö̧ta, na̧tarëreji̧ri̧diro̧jo̧ȩ oëra̧ti̧ oa. Jabo pio jiro do üdë chjätäa̧ duri oa, dadäräa̧diro̧jo̧ȩ Ütë tjamo̧ ja̧ bëräpȩmȩ oa. Tjamo̧ davä. Pio ju̧ri̧pȩ chamȩ oa, Ütë tjamo̧ ja̧ ma̧ȩ oa a̧ra̧ano̧ji̧ri̧ pio ji̧ri̧ ja̧ chjarerä chamȩ oa dadäräa̧diro̧jo̧ȩ. Jabechji̧ pio ji̧ri̧iä ta̧rë chamȩ oa, ado pio ji̧ri̧iä ta̧rë ëte bapë iëno̧ë ta̧rëmȩ oa dadäräa̧diro̧jo̧ȩ. 47Ado ütëbodärärë ana̧ri̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ Jechu pio ju̧i̧. 'Jabechji̧ pio jiro boi̧chji̧ üdë a̧dë chjäte ji̧ra̧ri̧ dabamȩdida, ado Ütë tjamo̧ ja̧ ma̧ȩ oa a̧ra̧ano̧ji̧ri̧ judiro̧ pio ju̧i̧ eami̧ oa iëno̧ë ta̧rërä, jabechji̧ jibëa̧ dabarea̧ ji̧ra̧ tjamo̧ra̧ chjaodëri̧ dëbë yo̧diji̧ri̧da' quëna̧ jo̧rȩtaji̧ri̧rȩ daea̧diro̧jo̧ȩ ana̧ tjamo̧ri̧ jo̧rȩtaji̧ri̧rȩ, dacho bëremi̧ cjiami̧ dari̧ jo̧rȩtaji̧ri̧rȩ. 48Ado Jechu ja̧ ama̧i̧ judiro̧ pio ju̧i̧ daea̧ ji̧, peaja̧di ana̧ri̧ jo̧rȩtaji̧ri̧pea̧dirȩ, dacho bëremi̧ cjiami̧ dari̧, ya yabë cjiami̧ dari̧. Ado ju̧i̧ arayi̧ pio jini̧ iëno̧ë ta̧rëa̧nȩjȩ:

—Danȩ ca̧ ja, ¿tjana̧ japea̧renȩibe? Ana̧ri̧ jo̧rȩta tänȩa̧renȩibe. Jabechji̧ bücjüri̧ cjia tjamo̧ji̧ri̧rȩ na̧tareji̧ri̧rea̧ro̧mȩ, odai̧ dari̧ cjiaji̧ri̧rȩ —yo̧a̧nȩjȩ.

49Jabo Jechu judi dëbë yo̧a̧dejȩ jȩa arayi̧ pio ji̧:

—¿Jabo tjana̧ ju̧i̧iä na̧tareji̧ri̧mȩnȩro̧coa? 'Jabechji̧ jäja ja̧ bëräpȩ chapea̧ chiadida, jibëa̧ Ama̧i̧ ja̧ oa ja̧bepapea̧ chiadida' ¿quëna̧dëa̧mȩnȩro̧coa? —iëno̧ë ta̧rëa̧dejȩrȩ.

50Jabo cjäri̧ madiro̧jo̧ȩ, Jechu ja̧ joji̧ni̧ jini̧, ado ütëparȩmȩborë jibëa̧ ja oa irä ta̧rëa̧räbo, jabechji̧ tjamo̧ri̧ dabadërëreji̧ri̧dirȩ judi dëbë yo̧a̧ pio ju̧i̧ chjiari.

51Ja̧dëa ji̧ Jechu judi ado chjereno̧ baärëremȩde jibëa̧ ama̧i̧ pio ji̧ri̧ nö̧ta Nachare quȩmȩ bë ma̧ri̧räpȩ. Ado Jechu judi, jabechji̧ ji̧dë ma ta̧rëdiärëremȩdejȩrȩ jibëa̧ ai̧ ji̧, jȩa ütëparȩmȩ pio ju̧i̧bo. Jabechji̧ cja̧rȩmȩ co jiade ta̧rëdëmȩrȩ ta̧rëdiäa̧dejȩrȩ. Ado arayi̧ jini̧ joja üdë ta̧rëdiäa̧ pio ju̧i̧ dae chjaoa̧ oaiä, judi Ütë tjamo̧ ja̧ bëräpȩ japea̧ pio ju̧i̧ jo̧rȩte chjaoa̧ oaiä, judi yo̧a̧ pio ju̧i̧ ta̧rëa̧ oaiä, jabechji̧ urëdi tjamo̧ oa jo̧rȩtarëreyi̧nȩ, ji̧dë ma carupë jo̧rȩte chjaoyi̧rȩ.

52Ado ui ji̧ra̧ri̧ chjätäa̧ oaiä, jabechji̧ ji̧dë u̧i̧ urëdi oa jo̧rȩtamȩpea̧de Jechu judi, chjö̧na̧i̧däräti̧ oa dabape bagari̧. Jabechji̧ judi boi̧chji̧rërea̧ ji̧, ütëpe bagarëremȩde üi̧padäräa̧ oaiä. Ado Ütë tjamo̧ judi, jabechji̧ ji̧dë ma ea tjamo̧mȩrȩ darëremȩdejȩ Joja oa. Ado pumȩ judiro̧ pio ju̧i̧ daea̧ oaiä, peaja̧di 'pumȩ chjadë tjamo̧dida' quëna̧ jo̧rȩtaji̧ri̧rȩ dae chjaorëreji̧ri̧diro̧jo̧ȩ, Jechu pio ju̧i̧ ji̧dë ma ea tjamo̧pe bagarea̧mi̧ dari̧.

Currently Selected:

Lucas 2: Pume

Highlight

Copy