Jobo Ma̧ȩ 38

Ütë tjamo̧ judi ano̧ mire ni̧bämȩrȩ iëno̧ë ta̧rë chjaorëremȩdejȩ Jobo ju̧i̧

1Ja̧dëa ji̧ Ütë tjamo̧ judi ma̧i̧ dari̧ pupuripamȩ ja̧ tjori pio judiri dëbë yo̧rëremȩdejȩ Jobo ju̧i̧iäpȩmo̧. Ja̧di ta̧rëri̧ yo̧mȩrȩ iëno̧ iëno̧ cjiarëremȩdejȩ:

2—Jabo danȩ, ¿tjana̧ ju̧i̧iä japë taramȩmi̧ dari̧ ni̧bärenȩ cüdë urëdi tjamo̧ oa jo̧rȩta̧ pio ju̧i̧ chjiari? Jo̧rȩtarea̧ chiadëmȩmi̧ dari̧ ni̧bärenȩ cüdë japapea̧ pio ju̧i̧ chjiari. 3Ado pio ju̧i̧iä iëno̧ iëno̧ cjiaparequedemȩ. Danȩ, coëma cjiari̧ cjitëno̧vä. Mȩnȩ üi̧rä judi, jabechji̧ chjadëri̧ jëdano̧vä pio coaiäpȩmo̧ chjadëri̧ dëbë yo̧pea̧ ji̧.

4—Danȩ, mȩnȩ tjamo̧ri̧ dabarä judi, jabechji̧ pio mȩaiä ta̧rëtämi̧ cjiarequede. Danȩ, cüdë dabu oa pareaparërea̧ ji̧, ¿irä dadëa̧nȩ na̧ dachora̧? 5Cüdë pio yoa dabu ana̧ tjamo̧ oa pareaparërea̧ ji̧, ¿chjiarë ütarë yo̧a̧ oa pareaparëremȩreconȩ? ¿Chjiarë yo̧a̧ oaiä ja̧di ana̧ oa, ja̧di go̧a̧ti̧ oa pareaparëremȩreconȩ? ¿Chjiarë mu̧i̧ toborëremȩdejȩ ütararea̧ ca̧i̧ oa cüdë chjadëri̧ ütarapea̧ oa? Jaevä, mȩnȩ tjamo̧ri̧ dabarä judi, jabechji̧ chjadëri̧ yo̧coe. 6Danȩ, cüdë dabu oa pearä judirä pareaparërea̧ ji̧, ¿yö̧ta darä cji̧däa̧ oa cjiarëremȩde jo̧ taru yuimi̧ da üdë, tjätjäpë cjiami̧ dari̧ cjiapea̧ oa. 7Aja̧, a̧dëriji̧ri̧ mu̧i̧tjoi̧ pio judiro̧ pearä judi go̧a̧rërea̧ ji̧, a̧dëräpȩ cjo̧ro̧ji̧ri̧ pio ji̧ri̧ nö̧ta ëba go̧a̧rërea̧ ji̧, ma̧ chiadëri̧ cjiaji̧ri̧rȩ ëba go̧a̧rërea̧ ji̧, ¿chjiarë cji̧däa̧ oa cjiarëremȩde taru a̧rȩmȩ judi pio yoa chiri üdë chjuari̧ cjiapea̧ oa? Chjadëri̧ yo̧coe.

8—Ado danȩ, ui ana̧ üdë pearä judirä pareapea̧ oa cjiarërea̧ ji̧, ¿chjia tjamo̧rëremȩde pio ju̧i̧ tüdü tänȩrëremȩ judi? Aja̧, ja̧di ta̧rëri̧ yo̧mȩrȩ iëno̧ë ta̧rërequedemȩ. Danȩ, ui ana̧ üdë pearä judi u̧i̧ ja̧ macö jo̧ëri pio judiri̧ go̧düa̧ oa cjiami̧ dari̧ cjiarërea̧ ji̧, ¿chjia tjamo̧rëremȩde adëdiämi̧ dari̧ japarëremȩ judi? 9Chjia tjamo̧dë, danȩ Jobo, pio cüdërëremȩrequede. Ado ui ana̧ üdë pearä judi pareapea̧ oa cjiarërea̧ ji̧, u̧i̧ ja̧ macö jo̧ëri pio judiri go̧düa̧ oa cjiami̧ dari̧ cjiarërea̧ ji̧, jabechji̧ ina̧mi̧ dari̧ japarëremȩreconȩ go̧a̧ra̧ ca̧ra̧ra̧ pio ju̧ri̧ra̧. Ado bagönȩ itura̧ pio ju̧ri̧ra̧ ina̧mi̧ dari̧ japea̧reconȩ peaja̧di. 10Ado ja̧dëa ji̧ ui ana̧ üdë tutia̧rä cjiami̧ dari̧ cjiapea̧ oa, jabechji̧ chjadëri̧ tüdürëremȩreconȩ daburäpȩmo̧ cjae choarea̧mi̧dëri̧. Tjamo̧ davä. Ui ana̧ üdë china̧chjami̧ daräpȩmo̧ cjae choami̧ dari̧ cjiachea oa, jabechji̧ jo̧ë ya oa tuti carami̧ dari̧ tüdüa̧reconȩ chjua tjamo̧mi̧ dara̧. 11“Aja̧ ui ana̧, pio yirä yuromo̧ jana̧parenȩ” yo̧mi̧ dari̧ tänȩrëremȩreconȩ ui oa. “Yirä yuromo̧ acji jana̧mi̧ dari̧ jana̧padiibe na̧ gö̧ma̧ üdë” yo̧mi̧ dari̧ tänȩa̧reconȩ gö̧ma̧ oa. Ado pio ju̧i̧iä jabechji̧, 'Aja̧, ¿chjiacjivadida, pearä judirä ja̧di dari̧ japarëremȩ judi, ¿chjiacjivadida?' quëna̧rea̧mi̧dëde. Jabechji̧ pio cüdërequede davä ja̧di dari̧ japarëremȩ judi.

12—Ado danȩ Jobo, chjadëri̧ yo̧coe. Mȩnȩ cja̧rȩmȩ co do oa ¿ni̧bädëa̧nȩ? Cja̧rȩmȩ co jabë gȩnȩrä, “Aja̧, dopaibe. Cjitëibë yaba̧ chjadëri̧ dopadärärea̧mi̧ dari̧” ¿yo̧dëa̧nȩ? Jabomo̧ cja̧rȩmȩ coi̧ ja̧di ta̧rëri̧ ¿yo̧dëa̧nȩ mȩnȩ? 13Tjamo̧ri̧ yo̧mȩrȩ iëno̧ë ta̧rërequedemȩ pio mȩaiä ta̧rëpea̧ oa. Danȩ, do oa cja̧rȩmȩ co tjamo̧ri̧ cjitëpea̧ oa, chiri nö̧ta oa da mirerea̧mi̧ dari̧ mo̧ëpea̧ oa, ¿japadëa̧nȩ? Chjai̧dëri̧ japaji̧ri̧ pio judiro̧ bagönȩ oaiä goadirea̧ dachea oa, ¿jabechji̧ cja̧rȩmȩ co do oa cjitë tänȩdëa̧nȩ?

16—Ado danȩ, ui ana̧ oa, cjücjürü tjamo̧räpȩ ju̧ri̧ cjiamȩ ui oa, dabu ëteri pio judiri goae tarari̧ cjitëmȩ ui oa ¿ütarë dadëa̧nȩ? A̧dë chjäte cjücjürü tjamo̧räpȩ pio ju̧i̧ chjiari ¿dabadënȩ? Ado pio ju̧ri̧pȩ ¿tai̧dëa̧nȩ? 17Ado danȩ Jobo, ja̧boa̧ji̧ri̧ pio judiro̧ cjiamȩräpȩ yu̧a̧rea̧ jo̧ë yami̧ da oa ¿dadëa̧nȩ? 'Aja̧, pio ju̧ri̧pȩ cjiadiro̧da, ja̧boa̧ji̧ri̧ pio judiro̧ pio ju̧ri̧pȩ yu̧a̧rea̧ dadiro̧da' ¿quëna̧ dabadënȩ? Pio ju̧i̧ chjiari ¿dabadënȩ? Pio ju̧ri̧pȩ ma̧i̧ da bagönȩ pio ju̧i̧ chjiari ¿dadëa̧nȩ? Jabechji̧ iëno̧ë ta̧rërequedemȩ. 18Ado danȩ, dabu üdë, chiri ji̧ra̧ tjamo̧ oa chiamȩ dabu üdë, ¿na̧pai̧ ana̧de? ¿Na̧pai̧ go̧a̧ti̧de? Chjadëri ütarë yo̧coe. ¿Dabadënȩ? Cüdë mȩa iëno̧ iëno̧ cjia̧ pio ju̧i̧ chjiari tjamo̧ri̧ dabarä judi, jabechji̧ yo̧coe.

19—Ado ¿tjana̧räpȩ tarupë cjitëde tatarea̧ üdë? Danȩ, ¿pio yudiri jana̧ tjamo̧diibe? ¿Ado bagönȩ pio ju̧i̧ chjiari tjamo̧ri̧ dabadënȩ? Danȩ, ¿pio yudiri cjitëde bagönȩrea̧ jana̧rea̧ üdë? ¿Yudiri jana̧diibe? Mȩnȩ dabarä judi, jabechji̧ yo̧coe. 20Aja̧, mȩnȩ tjamo̧ri̧ dabarä judi, jaevä, tatape bagari̧ yo̧vä. Mȩnȩ tjamo̧ri̧ dabarä judi, jabechji̧ goë jaevä, bagönȩpe bagari̧ yo̧vä. Ja̧di dari̧ japarea̧ ¿dadënȩ? 21Dëdë, ja̧di dari̧ japarea̧ chia jirorenȩ. Tjamo̧ri̧ dabamȩ jirorenȩ. Mȩnȩ pearä judirä ara̧ oa cjiarërea̧ oaiä, tjamo̧ri̧ daba jirorenȩ. Aja̧, jauëchja jirorenȩ. A̧dë chjäte ütamai̧ jirorenȩ.

24—Ado danȩ Jobo, dorë cjitërea̧räpȩ cja̧rȩmȩ co ¿jäe dadëa̧nȩ? Ado pjaepamȩ üdë, dorë cjitëmȩräpȩmo̧ pjaepamȩ üdë, ¿tjana̧ri cjitëde? ¿Yudiri tjamo̧de? Pio mȩnȩ daba jirorenȩ jauëchja cjia tara.

25—Ado ¿chjiarë tänȩa̧ oa daburäpȩmo̧ birarea̧mi̧ dari̧ cjüde ui üdë? ¿Chjiarë tänȩa̧ oa chjadë maeari̧ pupuripë jana̧ibe no̧ coëma oa jana̧mi̧ dari̧. 26Ado danȩ, pumȩrȩ cjo̧ro̧dë chiriräpȩmo̧ cjü tänȩmȩ judi, dabu nȩgȩ maräpȩ cjü tänȩmȩ judi, ¿chjia tjamo̧de cjü tänȩmȩ judi? 27Danȩ, dabu üdë papë chia oa cjiarä, gaü tjamo̧pe bagarä, jabechji̧ ui ja̧bomi̧ dari̧ cjiade. Jabo danȩ, ¿chjiarë tänȩa̧ oa cjüde ui üdë? Cärä üdë goae tarari̧ buiurea̧mi̧ dari̧ cjü tänȩmȩ judi ¿chjiade?

28—Aja̧ Jobo, iëno̧ë ta̧rërequedemȩ. Mȩnȩ dabarä judi chjadëri̧ yo̧coe. ¿Chjiarë nö̧ria̧ oa cjiami̧ dari̧ cjiade ui üdë? Ado jurucjü ja̧ ama̧i̧mi̧ da judi, ¿chjia tjamo̧de? Yo̧coe. 29Ado ¿chjiarë ara̧ oa cjiami̧ dari̧ cjiade ui choco üdë, a̧dë chjäte chjöchja ui choco üdë? 30Danȩ, mai̧ da chjöchja pio ju̧i̧iä ui üdë uiuia marërea̧ ji̧, chjua tjamo̧pe jäde ta̧dëmi̧ dari̧. Ui ana̧ üdë, cja̧rȩmȩ codë go̧a̧ti̧ oa a̧rȩmȩ ui üdë uiuia marërea̧ ji̧, jabechji̧ chjua tjamo̧ mape jäde mai̧ da chjöchja oaiä. ¿Jabo chjiarë tänȩa̧ oa ja̧di dari̧ japade ui üdë?

31—Ado danȩ, büë üdë na̧ chja̧oerä cjiadëde? Pio mȩnȩ tänȩa̧ oa jibëa̧ no̧ro bara baädëde? Pjerade quȩmȩ buba cha üdë, 7 büë chiamȩ buba üdë, ¿chjia ja̧ ma̧ȩrä cjiade? Ado pio jiro büë üdë ano̧ mire chjuchjuti̧mi̧ cjiachea oa, ado cja̧rȩmo̧ro no̧ro bara baächea oa, ¿tuti japarea̧ chiadënȩ? Büë üdë oëra̧ti̧ oa chjarapë baämi̧ dari̧ cjiachea oa, ¿yurë cji̧därea̧mi̧ dari̧ chiadënȩ? Ado danȩ, yae coto chiamȩ büë üdë ji̧mo̧ cjiarërea̧ ji̧, ¿oëra̧ti̧ oa chuchjupechä tänȩrea̧ chiadënȩ? Mȩnȩ dabarä judi, jabechji̧ chjadëri̧ dëbë yo̧coe.

32—Ado danȩ Jobo, jo̧no̧pe baga̧rä, uirërea̧ ji̧ ano̧ mire jo̧no̧pe baga̧rä, ¿na̧ ma̧ȩrä ano̧ mire baädëde büë üdë? Pio mȩnȩ ütara̧ no̧ro ano̧ mire baädëde? Pio mȩnȩ tänȩa̧ oaiä, jibëa̧ no̧ro baädëde buiji̧ra̧ üdë? Chjadëri̧ yo̧coe. 33Jabechji̧ uë tjamo̧ cjiamȩ büë pio ju̧i̧ chjiari chjö̧na̧i̧ oa ¿dabadënȩ? Judi baäpea̧ no̧ pio ju̧i̧ chjiari ¿tjamo̧ri̧ dabadënȩ? ¿Yö̧ta dari̧ jida̧ oa cjiade uë tjamo̧räpȩ baramȩ üdë jibëa̧ no̧romo̧ bara baäpea̧ oa? Ado uë tjamo̧räpȩ baramȩ üdë daburäpȩmo̧ chjadëri̧ tatapea̧ oa, ütara̧mi̧ tatapea̧ oa ¿tänȩrea̧ chiadënȩ? Uë tjamo̧räpȩ cjiamȩ tatarea̧ üdë, ¿chjia ja̧ ma̧ȩrä bara baäde? ¿Yö̧ta dari̧ jo̧ȩra̧ baäde a̧dëräpȩ cjiamȩ chjö̧na̧i̧rȩ? ¿Na̧ ma̧ȩrä ütara̧mi̧ jo̧ȩra̧ baärea̧mi̧dëde? ¿Na̧ ma̧ȩrä oëra̧ baärea̧ decjiari̧ chjadëri̧ bara baädëde? Mȩnȩ dabarä judi jabechji̧ chjadëri̧ yo̧coe.

34—Ado danȩ, ¿cjü tänȩrea̧ chiadënȩ? Ui üdë chiri nö̧tai̧ oa ina̧mi̧ dari̧ ¿cjae cjae cjü tänȩrea̧ chiadënȩ? Cjümȩ üdë chjadëri̧ ta̧rë ja̧bodëdimȩ? Mȩnȩ yo̧a̧mi̧ ¿japadëde? Chjadëri̧ yo̧coe. Mȩnȩ jauëchja cjia oaiä, jabechji̧ daba jironȩ. 35Ado bërepe chjaomȩ üdë ¿na̧ ma̧ȩrä cjiadärädëde jiadarea̧ decjiari̧? 36¿Chjia tjamo̧de cjü tänȩmȩ judi? ¿Chjia tjamo̧de cjüe cjüe boa tänȩmȩ judi? 37Ado go̧a̧ra̧ pio ju̧i̧ chjiari ¿dabadënȩ? ¿Na̧pai̧ ji̧ra̧de go̧a̧ra̧ üdë? ¿Chjia tjamo̧de go̧a̧ra̧ pio ju̧i̧ chjiari coëma cjiari̧ ütararea̧ chiamȩ judi? ¿Chjia tjamo̧de cjü tänȩmȩ judi? ¿Chjadëri̧ yo̧dëparenȩque? 38Ado chiri üdë a̧dë chjäte gaüpe baga̧ oaiä, dabu pjo̧no̧i̧ maearë cjia oaiä, ¿chjia tjamo̧de dabu ga oa uchjape baga tänȩmȩ judi? Pio ju̧i̧ ¿dabadënȩ? Chjadëri̧ yo̧coe.

Aja̧, ja̧di ta̧rëri̧ yo̧mȩrȩ iëno̧ iëno̧ cjiarëremȩdejȩ Jobo pio ju̧i̧iäpȩmo̧ Ütë tjamo̧ judi. Jabechji̧ ana̧ri̧ jo̧rȩta tänȩtämi̧ cjiamȩrȩ, urëdi tjamo̧ oa jo̧rȩta tänȩtämi̧ cjiamȩrȩ iëno̧ iëno̧ cjiarëremȩdejȩ, ya̧mi̧ ta̧rëri̧. 'Jabechji̧ ba chia tjamo̧dëquëda, tjamo̧ri̧ dabadëquëda, Ütë tjamo̧ pio ju̧i̧ tjamo̧ri̧ nö̧tadëquëda' quëna̧pe järea̧mi̧ dari̧ iëno̧ iëno cjiarëremȩdejȩ.

Currently Selected:

Jobo Ma̧ȩ 38: Pume

Highlight

Copy

Compare