Taruparea̧ Ma̧ȩ 33

Jacobo judi ado Echau judi, jabechji̧ chjadëri̧ oparëreji̧ri̧dirȩ

1Ado ja̧dëa ji̧ Jacobo judi chiriräpȩmo̧ gatë damȩrȩ darëremȩdejȩ Echau ju̧i̧ pio jȩaiäpȩmo̧ jana̧mȩ oa. Jabechji̧ oari ji̧ra̧ tjamo̧ ji̧ri̧ nö̧ta jana̧mȩ oa, 400 oari pio ji̧ri̧ nö̧ta jana̧mȩ oa darëremȩdejȩ. Pio ju̧i̧iämȩrȩ Jacobo judi mitërëremȩdejȩrȩ jibëa̧ bori̧ ji̧ri̧ tjarari̧ bubape bagari̧. Chjarapë tutimȩrȩ yürürëremȩdejȩrȩ jibëa̧ bori̧ ji̧ri̧ Dea ji̧iäpȩmo̧, Raque ji̧iäpȩmo̧, jënȩ a̧de ëba̧ pio ji̧ri̧iäpȩmo̧bo. 2Ado jënȩ a̧de ëba̧ ivi pio ji̧ri̧ yaboräpȩ cjia tänȩrëremȩdejȩrȩ jibëa̧ bori̧ pio ji̧ri̧ nö̧ta. Ado ji̧ri̧ ja̧ duriräpȩ cjia tänȩa̧dejȩ Dea pio ji̧, jënȩ ara̧ pio ji̧ri̧ nö̧ta. Ado ji̧dë duriräpȩ cjia tänȩa̧dejȩ Raque pio ji̧, Joche pio ju̧i̧ nö̧ta. 3Ado Jacobo judi jibëa̧ ivi ja̧ yaboi̧ jämȩrȩ järëremȩdejȩ Echau pio ju̧i̧iäpȩmo̧. Ado jibëa̧ omȩ pio ju̧i̧iäpȩmo̧ jämȩrȩ, jabechji̧ jibëa̧ daito üdë daburäpȩmo̧ tjätjäpë china̧därä china̧därä cjiariä järëremȩde. Jabechji̧ ja̧di dari̧ jape chjaomȩrȩ 7 co nöta jape cjiariä järëremȩde queri̧räpȩrä yuro. 4Jabo Echau judi goae tarari̧ baguramȩrȩ jäeno̧rëremȩdejȩ jibëa̧ ayi̧ma̧i̧ ju̧i̧. Ado ida̧dejȩ. Chama̧choro ya i̧bua̧dejȩ. Ado yo̧a̧ri̧borë eaji̧ri̧pea̧dirȩ, da ui gu̧rori̧.

5Ado Echau judi gatë damȩrȩ darëremȩdejȩrȩ Jacobo ja̧ ivi ji̧ri̧, ju̧i̧ ja̧ bori̧ pio ji̧ri̧. Ado ji̧ri̧ damȩrȩ iëno̧ë ta̧rëa̧dejȩ jibëa̧ omȩ ju̧i̧:

—Ado yodëro̧, ¿chjia ja̧dirȩ? —iëno̧ë ta̧rëa̧.

Ado Jacobo judi:

—Chjiadëdirȩ, ca̧ u̧ri̧dirȩ. Ütë tjamo̧ pio judi coa yürüa̧ pio judiro̧dirȩ —yo̧mȩrȩ dëbë yo̧a̧dejȩ jojadi oa.

6Ja̧dëa ji̧ Jacoborë a̧de ëba ivi jini̧ro̧ jibëa̧ bori̧ pio ji̧ri̧ nö̧ta quȩri̧däräa̧diro̧jo̧ȩ Echau ju̧i̧. Ado daito üdë daburäpȩmo̧ tjätjäpë china̧därärëreji̧ri̧dirȩ ju̧i̧ ja̧ dëbëräpȩ. 7Ado ja̧dëa ji̧ Dea jini̧ jibëa̧ u̧ri̧ pio ji̧ri̧ nö̧ta queri̧däräa̧ni̧ro̧jo̧ȩ peaja̧di. Ado daito üdë daburäpȩmo̧ tjätjäpë china̧därärëreji̧ri̧dirȩ peaja̧di. Ado ja̧dëa ji̧ queri̧däräa̧nȩ Raque jini̧ Joche pio ju̧i̧ nö̧ta. Ado peaja̧di dari̧ japea̧dirȩ Echau ja̧ dëbëräpȩ. 8Ado ja̧dëa ji̧ Echau judi iëno̧ë ta̧rërëremȩdejȩ jibëa̧ ayi̧ma̧i̧ ju̧i̧:

—Danȩ ayi̧ma̧i̧, järea̧ no̧ro ju̧ri̧ buba ji̧ra̧ tjamo̧ oa daea̧requede. Oveja buba oa, chivo buba oa daea̧requede. Baca buba oa, buro buba oa, cameyo buba oa daea̧requede. ¿Tjana̧ japapea̧de? —iëno̧ë ta̧rëa̧dejȩ.

Ado Jacobo judi dëbë yo̧a̧dejȩ:

—Tjana̧ japadëpea̧de, jabechji̧ mȩnȩ pio coaiäpȩmo̧ cjäri̧ri̧ cjia dapea̧ oa yürüa̧requedemȩ omȩ —yo̧mȩrȩ dëbë yo̧a̧dejȩ.

9Jabo Echau judi dëbë yo̧a̧dejȩ:

—Jabo cjäri̧ marequede. Mitëdëparequede. Jabechji̧ nö̧tadäräri̧ goarequede cüdë. Jabechji̧ na̧ea̧ pio ju̧i̧ goamȩrȩ dopavä —yo̧a̧dejȩ.

10Jabo Jacobo judi dëbë yo̧a̧dejȩ:

—Danȩ ayima̧i̧, mȩnȩ coa cjäri̧ri̧ cjia darä judi, jabechji̧ chjadëri̧ mitëvä. Yürütämi̧ cjiarequedemȩ. Cüdë ma̧ chiadëri̧ cjiamȩrȩ darequedemȩ mȩa. Ütë tjamo̧ pio ju̧i̧ dami̧ dari̧ darequedemȩ mȩnȩ coa chjadëri̧ daea̧ tara, mȩnȩ coa cjäri̧ri̧ cjia daea̧ tara. 11Ja̧di tara yo̧tarequedemȩ mȩnȩ chjadëri̧ mitëtä cüdë yürütämi̧ cjia̧ pio ju̧i̧. Jabechji̧ Ütë tjamo̧ pio judi yürüa̧ oa ji̧ra̧ri̧ goamȩpea̧requede. Jabëdiädëri̧ goamȩrȩ doparequede cüdë. Ja̧di tara jabechji̧ chjadëri̧ mitëtä earequedemȩ —yo̧a̧dejȩ Echau ju̧i̧.

Ado Jacobo judi jibëa̧ omȩ oa ja̧di ta̧rëri̧ yo̧a̧ oaiä goae tarari̧ dëbë yo̧a̧ oaiä, jabechji̧ mitërëremȩdejȩ Echau judi. 12Ado ja̧dëa ji̧ mitë ëte yo̧rëremȩdejȩ Echau judi jibëa̧ omȩ ju̧i̧iäpȩmo̧:

—Goë jaeibe. Baätärȩ. Ëba baäparequededibe —yo̧a̧dejȩ.

13Jabo Jacobo judi dëbë yo̧a̧dejȩ:

—Danȩ ca̧ omȩ, ca̧ bori̧ judiro̧ goae tarari̧ baärea̧mi̧dëdirȩ. Ju chiadë madirȩ. Ado oveja bori̧ oa, baca bori̧bo peaja̧di jo̧rȩtarequedejȩrȩ. Goae tarari̧ ma̧ȩ baärea̧mi̧dë madirȩ. Cja̧rȩmȩ do nö̧ta goae tarari̧ ma̧ȩ baärä judi, chjaodëri̧ ja̧bopai̧ dadirȩ bori̧ judiro̧. 14Ado pio ju̧i̧iä jabechji̧, ibëa̧ yaboi̧ baätäreji̧ri̧nȩrȩ mȩnȩro̧. Ado a̧ro̧rȩ jaerira̧ cho̧rë baäparȩaro̧mȩ, bori̧ judiro̧ chjadëri̧ baädärärea̧mi̧ dari̧. Jabechji̧ pumȩ bori̧ pio judiro̧ baäa̧mi̧ baäparea̧rȩ jaerira̧. Baca bori̧ judiro̧, oveja bori̧ judiro̧ baäa̧mi̧ baäparea̧rȩ jëreeadëji̧ri̧rȩ na̧ duriräpȩ. Jabo danȩ, ji̧dë duri oa dëbëdiäparequedemȩ Chera quȩmȩräpȩ. Pio ju̧ri̧pȩ daeji̧ri̧rea̧rȩ —yo̧mȩrȩ dëbë yo̧rëremȩdejȩ jodadi ju̧i̧ Jacobo judi.

15Ado Echau judi yo̧mȩrȩ dëbë yo̧a̧dejȩ:

—Aja̧, jabechji̧de ado ja̧di. Jabo danȩ, ca̧ mu̧i̧tjoi̧ oari ji̧ri̧, o ji̧ri̧ a̧dë baäparequedejȩrȩ pio dibë chjadëri̧ a̧dopea̧ oa, chjadëri̧ jidapea̧ oa.

Jabo Jacobo judi dëbë yo̧a̧dejȩ:

—Cjäri̧ ma ayima̧i̧, jabechji̧de. Bücjüri̧ cjiadëvä pio ibë chjiari. Jabechji̧rea̧rȩ —yo̧a̧dejȩ.

16Ado pio jiro domȩ ju̧i̧iä Echau judi baärëremȩde jibëa̧ pumȩ pio ji̧ri̧ nö̧ta. Chera quȩmȩräpȩ baärëremȩde. 17Jabo Jacobo judi Cheraräpȩ baätärea̧ ji̧, Chucote quȩmȩräpȩ ano̧ mire baärëremȩde. Ado ju̧ri̧pȩ jibëa̧ jo̧ oa japarëremȩde. Totarea̧ oa peaja̧di japarëremȩde jibëa̧ baca ja̧ oa, jibëa̧ oveja ja̧ oa. Ado pio ju̧i̧iä pio jiro chiri oa quȩparëremȩdejȩ. "Jo̧ bori̧" yo̧mȩ quȩra̧ pio ju̧ri̧ra̧ quȩparëremȩdejȩ.

Jacobo judi baädärärëremȩde Canaa̧räpȩ

18Jacobo judi Padanarama chiriri pio judiri go̧dürërea̧ ji̧, Canaa̧ quȩmȩ chiriräpȩ baädärärërea̧ ji̧, jabechji̧ chjadëri̧ baädärärëremȩde. Ado Chequema quȩmȩ bë ma̧ri̧ dëbëräpȩ ju̧ri̧ bëparëremȩde. 19Ado judi bëparërea̧ chiri üdë, jabechji̧ Chequema ja̧ jäja pio judiri ja̧ pumȩ ja̧rëremȩde, Amoro quȩmȩ pio judiri ja̧ji̧ri̧ ja̧rëremȩde. Ado Jacobo judi pio ji̧ri̧iä gatërëremȩde chiri boi̧chji̧ oa 100 chërerä, parata quȩmȩ chjipararira̧ ja̧pea̧ oa chërerä. 20Ado ji̧dë duri oa gu̧na̧rea̧ mechja oa japarëremȩdejȩ. Ado gu̧na̧rea̧ mechja pio ju̧i̧ quȩpea̧dejȩ. "Icharai ja̧ Ütë" yo̧mȩ quȩra̧ pio ju̧ri̧ra̧ quȩparëremȩdejȩ.

Currently Selected:

Taruparea̧ Ma̧ȩ 33: Pume

Highlight

Copy

Compare