Go̧dürea̧ Ma̧ȩ 12
12
Uëmo̧ a̧dë chjätärea̧ do pio ju̧i̧ chjiari yo̧rëremȩde Ütë tjamo̧ judi
1Moiche judi, Aro̧ judi jabë Ejito chiriräji̧ri̧ oa yo̧rëremȩdejȩrȩ Ütë tjamo̧ judi. Ja̧di ta̧rëri̧ yo̧mȩrȩ yo̧a̧dejȩrȩ:
2—Danȩrȩ, pio yaba̧ a̧rȩdiämȩ gupënȩ üdë, yabo baämȩ gupënȩ pio judide. Danȩrȩ, pea tarupea̧de ui peaja̧ üdë. Ado pio jiro uirä yabo baämȩ gupënȩ üdë, pio yaba̧ a̧rȩdiämȩ gupënȩ pio judide. Ja̧di dari̧ ütaraji̧ri̧rȩ cjo̧ro̧panȩrȩ pio yaba̧ domȩri ja̧. 3Ado ja̧di ta̧rëri̧ yo̧tä earequededibe icharaita ji̧ri̧ ütebo oa: "Danȩrȩ, ja̧di dari̧ japatä earequededibe. Uipamȩ nöta, pio yoa gupënȩrämo̧, 9 do chjätä ëte dopea̧rä, oari judiro̧, jibëa̧ u̧ri̧ ëbaji̧ri̧ pio judiro̧ ütëborë mitëpadirȩ oveja pëi̧ chja oa. Chivo pëi̧ chja oa mitërä judi, peaja̧di jabechji̧ chjadëde. Jibëa̧ pumȩ pio ji̧ri̧ ëba jurapea̧ oa mitëpadiro̧jo̧ȩ. 4Jabo jibëa̧ pumȩ judiro̧ ji̧ra̧dërä judi, go̧a̧ chjö̧na̧i̧ oa jurarea̧ dadërä judi, jabechji̧ ëba jurapadiro̧jȩrȩ jibëa̧ bë queri̧ cjo̧ro̧ji̧ri̧ pio ji̧ri̧ go̧a̧ chjö̧na̧i̧ oa yuropapea̧ oa. 5Oveja pëi̧ chja oa, jabo chivo pëi̧ chja oa mitërä, jabechji̧ üi̧ oa, co chja oa, chjadë oa, cja̧rȩmȩ ui goamȩ oa mitëpea̧ maeade. Oveja oa mitërä judi jabechji̧de. Ado chivo oa mitërä judi peaja̧di jabechji̧de. 6Ado mitë ëte jabechji̧ chjadëri̧ goapea̧de jadüchiami̧ do nöta. Aja̧, jadüchiami̧ do nö̧ta chjadëri̧ jidapea̧de. Ja̧dëa ji̧ jadüchiami̧ do chjätä ëte, jabechji̧ icharaita judiro̧ ütëborë ja̧bo tänȩpadiro̧jo̧ȩ jënȩro̧ mitëa̧ pio ju̧i̧, jënȩro̧ chjadëri̧ jida̧ pio ju̧i̧. Yabo baämȩ gupënȩrä, 14 do chjätä ëte, gȩnȩpea̧rä ja̧bo tänȩpadiro̧jo̧ȩ. 7Ado ja̧boa̧mȩ ja̧ goeremȩra̧ pio ju̧ri̧ra̧ joë ya to oa joapea̧de. Joë ya yuroro cjiamȩ to oa joapea̧de, joë ya uëmo̧ a̧rȩmȩ tobo. Pumȩrȩ go̧a̧ oa jurapea̧ bëräpȩ pio ju̧ri̧ joapea̧de joë ya to oa. 8Pio jiro gȩnȩrä go̧a̧ oa tja̧re ëte jurapea̧de. Pjö̧da ëcarara̧ pio ju̧ri̧ra̧, pjuru chiadëmȩ chja̧pera̧ pio ju̧ri̧ra̧ a̧de jurapea̧de. 9Cjüë chja oa juradëpea̧de. Uira̧ chuma̧ ëte peaja̧di juradëpea̧de. Jabechji̧ tja̧repea̧ maeade. Tjübë üdë, yai üdë, tjoro ja̧ üdë, jabechji̧ tja̧repea̧ maeade codë oa. 10Ado go̧a̧ chjö̧na̧i̧ oa yuropari̧ jurarea̧ dadërä judi, jabechji̧ cäapea̧de. 'Yaba̧ dopea̧rä peadai̧rä jurapaquëda' quëna̧rea̧mi̧dëri̧ cäapea̧de. 11Ado jiro jurarea̧ üdë, jabechji̧ jëreeaji̧ri̧rȩ jurapea̧de. Baäpaji̧ri̧mi̧ dari̧, dibëa̧ chjibo oa ina̧ji̧ri̧rȩ jurapea̧de. Ta joë oa go̧ioji̧ri̧rȩ jurapea̧de. Tai̧rea̧ to oa araji̧ri̧rȩ jurapea̧de. Danȩrȩ, pio coa, Jeova quȩmȩ pio ju̧i̧ chjacjiamȩri̧ jo̧rȩtapea̧ oa a̧doparea̧ dode. Uëmo̧ a̧dë chjätärea̧ pio ju̧i̧ jo̧rȩtaji̧ri̧rȩ a̧doparea̧ dopade. Ja̧di tara ja̧di dari̧ japatä earequededibe. 12Jabechji̧ pio jiro gȩnȩrä Ejito chiri nötai̧ oa chjätäparequede yabo ara̧ pio ji̧ri̧ ütëbodärä oa ja̧bo tänȩpea̧ oa. Pumȩ pio ji̧ri̧, pumȩdë pio ji̧ri̧bo ja̧bo tänȩparequedejȩrȩ yabo ara̧ pio ji̧ri̧. Ja̧di dari̧ japamȩrȩ uapai̧ dari̧ bape chjaoparequedejȩrȩ ejichiorë jëdano̧a̧ ütë pio ji̧ri̧, ütë teracaba pio ji̧ri̧. Aja̧, ja̧di dari̧ japaparequede cüdë Jeova pio judi tara. 13Ado mȩnȩro̧ joë ya to oa goera̧ joa̧ üdë, jabechji̧ na̧rȩpadique mȩnȩro̧ cjo̧ro̧mȩ bërä. Ado cüdë goe oa daea̧ oaiä, jabechji̧ uëmo̧ a̧dë chjätäparequede yabo ara̧ pio ju̧i̧ ja̧bo tänȩtärea̧ ji̧. Cüdë ejichio pio ji̧ri̧ ja̧bo tänȩrä, jabechji̧ pio dibëbo ja̧bo tänȩdëparequededibe. 14Ado danȩrȩ, pio yoa do oa china̧chjari̧ tutipea̧de. Bucho ana̧ jo̧rȩtapea̧de. Ui nöta pio yoa do oa jo̧rȩtapea̧ oa a̧dopapanȩrȩ jurapea̧ oa, Jeova judi japea̧ pio ju̧i̧ chjadëri̧ jo̧rȩtapea̧ oa. Aja̧, pio jiro doro ja̧di dari̧ japapea̧de bucho ana̧ a̧dopadërea̧ decjiari̧ —yo̧mȩrȩ yo̧rëremȩdejȩrȩ Jeova judi Moiche ju̧i̧, Aro̧ ju̧i̧bo. Aja̧, judiro̧ icharaita pio ji̧ri̧iäpȩmo̧ yo̧pea̧ oa yo̧a̧dejȩrȩ.
Pjuru chiadëmȩ chja̧pera̧ a̧doparea̧ japamitë pio ju̧i̧ chjiari yo̧rëremȩde Ütë judi
15Ado Jeova judi ji̧dë u̧i̧ yo̧mȩrȩ a̧de yo̧rëremȩdejȩrȩ Moiche ju̧i̧, Aro̧ pio ju̧i̧bo:
—Danȩrȩ, pjuru chiadëmȩ chja̧pe oa juraji̧ri̧rȩ a̧dopatä earequededibe 7 do nöta. Aja̧, 7 do nö̧ta pjuru chiamȩ chjape oa juradëpea̧de. Yabo baämȩ doro mȩnȩro̧ pearä a̧dopea̧rä, jabechji̧ pjuru chiaparȩrea̧ chjö̧na̧i̧ oa dibëa̧ bëri pio judiri aeno̧pea̧de cjiadiädëri̧. Ado jiro 7 do nöta, eami̧ pumȩ üdë pjuru chiamȩ chja̧pe oa jurarä judi jiadapareconȩ. 'Jabechji̧ icharaitadëdida, icharaita pio ji̧ri̧ nöta ëba cjiarea̧mi̧dëdida' quëna̧ jo̧rȩtamȩrȩ dapareconȩ. Pio ju̧i̧iä o judiro̧ tutimi̧ dari̧ baä tänȩpadiro̧jo̧ȩ, pio jibë nöta ëba cjiarea̧mi̧dëpea̧mȩ oa. 16Ado danȩrȩ, yabo baämȩ doro a̧dopatä earequededibe pio coaiäpȩmo̧ chjacjiamȩri̧ jo̧rȩtapea̧ oa. Ado ja̧dëa ji̧ cjiadiäa̧ dorobo peaja̧di dari̧ japapea̧de. Pio jiro doro ja̧bepadëpea̧de jabo dëdë, mȩnȩro̧ jurapea̧ jurarea̧ oa jëdano̧pea̧ üdë chjadëde.
17Aja̧, ja̧di dari̧ a̧dopatä earequededibe pjuru chiadëmȩ chja̧pe oa juraji̧ri̧rȩ. Pio jiro do oa chjadëri̧ jo̧rȩtapea̧ oa, cüdë dibë Ejito chiriri judiri go̧dü tänȩa̧ do pio ju̧i̧ chjadëri̧ jo̧rȩtapea̧ oa, jabechji̧ ja̧di dari̧ a̧dopatä earequededibe. Ado ja̧di dari̧ a̧dopea̧ maeade a̧dopa ano̧rea̧ decjiari̧. Aja̧, dibëa̧ u̧ri̧ judiro̧, dibëa̧ri ja̧ji̧ri̧ judiro̧, ui nöta a̧dopa mapadirȩ pio jiro do oa jo̧rȩtapea̧ oa cüdë dibë chjiari tuti japea̧ pio ju̧i̧ chjadëri̧ jo̧rȩtapea̧ oa. 18Yabo baämȩ gupënȩrä, 14 do chjätä ëte, gȩnȩpea̧rä tarupapea̧de pjuru chiadëmȩ chja̧pe oa jurapea̧ ji̧. Jabechji̧ 7 do nöta juradëpea̧de pjuru chiamȩ chja̧pe oa. 19Pio jiro 7 do nöta, jabechji̧ pjuru chiaparȩrea̧ boeadëpea̧de dibëa̧ bërä. Ado eami̧ pumȩ üdë pjuru chiamȩ chja̧pe oa jurarä judi, dibëa̧ pumȩ üdë, tjaoërimȩ üdë, icharaitadëmȩborë pjuru chiamȩ chja̧pe oa jurarä judi, jabechji̧ jiadapareconȩ. Ado icharaita pio ji̧ri̧ nöta ëba cjiarea̧ dadëpade. Pio ju̧i̧iä icharaita judiro̧ tutimi̧ dari̧ baä tänȩpadiro̧jo̧ȩ. 20Ado pio ju̧i̧iä jabechji̧, pio jiro 7 do nöta pjuru chiamȩ jurarea̧ oa juradëpea̧de. Aja̧, mȩnȩro̧ eami̧räpȩ cjo̧ro̧ro, mȩnȩro̧ eami̧ jurarea̧ oa jurarä, jabechji̧ pjuru chiamȩ jurarea̧ oa a̧de juradëpea̧de.
Uëmo̧ a̧dë chjätärea̧ doro ja̧di dari̧ japapea̧de
21Ja̧dëa ji̧ Moiche judi ëna̧diärëremȩdejȩrȩ icharaita tjamo̧ cjo̧ro̧ji̧ri̧ pio ji̧ri̧. Ado Ütë tjamo̧ judi yo̧a̧mi̧ yo̧a̧dejȩrȩ: "Danȩrȩ, mȩnȩro̧ ütëborë mitëpanȩrȩ oveja pëi̧ chja oa ja̧bo tänȩpea̧ oa. Dibëa̧ pumȩ pio ji̧ri̧ nöta chjadëri̧ ëba a̧dopapea̧ oa ja̧bo tänȩparenȩro̧jo̧ȩ uëmo̧ a̧dë chjätärea̧ do pio ju̧i̧ chjadëri̧ jo̧rȩtapea̧ oa. Ado oveja pëi̧ chja oa mitëdërä judi, mitëpanȩrȩ chivo pëi̧ chja oa. 22Ado ju̧i̧ ja̧bo tänȩ ëte mitëpanȩrȩ goe oa tjaera̧. Ichopo quȩmȩ to chjia pio ju̧i̧ chudapanȩrȩ goerä. Ado ja̧di dari̧ chuda ëte, joë ya to oa joapea̧de goera̧. Yuroro cjiamȩ to oa joapea̧de, uëmo̧ a̧rȩmȩ tobo. Ado pumȩ judiro̧ ütëborë, jabechji̧ jibëa̧ jo̧ tjoräpȩ cjiadiäpea̧ chiadirȩ dopea̧rä yuro. Bëri pio judiri go̧düdëpea̧de. 23Ado Jeova judi Ejito chiri nöta oa acji tai̧rä, ejichio pio ji̧ri̧ ja̧bo tänȩpea̧ oa acji tai̧rä, ado joë ya toräpȩ cjiamȩ goe oa darä, jabechji̧ uëmo̧ a̧dë chjätäpade. Tjamo̧ davä. A̧dërimȩ mu̧i̧tjoi̧ üdë, ja̧bo tänȩmȩ mu̧i̧tjoi̧ pio judi dibëa̧ bëräpȩ acji yu̧a̧tärea̧ ji̧, dibëa̧ u̧ri̧ yaboji̧ri̧ pio ji̧ri̧ ja̧bo tänȩtärea̧ ji̧, ja̧bo tänȩrea̧ yürüdëpadejȩ Jeova judi. 24Danȩrȩ, ja̧di dari̧ japapea̧ maeade bucho ana̧, japë ano̧rea̧ decjiari̧. Mȩnȩro̧, dibëa̧ u̧ri̧ judiro̧, dibëa̧ri ja̧ji̧ri̧borë ja̧di dari̧ japapea̧ maeade. 25Ado mȩnȩro̧ dibëa̧ chiriräpȩ go̧düdäräa̧räbo japapea̧ maeade. Tjamo̧ davä. Jeova judi yo̧a̧ chiriräpȩ go̧düdäräa̧räbo japapea̧ maeade. Jabechji̧ uëmo̧ a̧dë chjätärea̧ do pio ju̧i̧ ji̧dë ma chjadëri̧ jo̧rȩtapea̧ oa ja̧di dari̧ japapea̧ maeade uipamȩ nö̧ta. 26Ado dibëa̧ u̧ri̧ judiro̧ dibë iëno̧ë ta̧rërä judi, '¿Tjana̧pea̧ oa ja̧di dari̧ japapea̧de ama̧i̧?' yo̧rä judi, '¿Tjana̧pea̧ oa ja̧di dari̧ a̧dopapea̧de?' iëno̧ë ta̧rërä, 27jabechji̧ chjadëri̧ yo̧eji̧ri̧renȩro̧jȩrȩ. 'Danȩ, chjätärea̧ do pio ju̧i̧ chjadëri̧ jo̧rȩtapea̧ oa, jabechji̧ oveja oa goe gu̧rori̧ ja̧bo tänȩrea̧ro̧jo̧ȩ uipamȩ nöta. Jabechji̧ pio jiro doro Jeova judi icharaita ja̧ taru ja̧ bë uëmo̧ a̧dë chjätärëremȩde. Aja̧, icharaitarë yabo ara̧ pio ji̧ri̧ ja̧bo tänȩtärea̧ ji̧, ja̧bo tänȩdëa̧dejȩrȩ jabo ejichiorë yabo ara̧ pio ji̧ri̧mo̧i̧ ja̧bo tänȩrëremȩdejȩrȩ. Pio ju̧i̧ chjadëri̧ jo̧rȩtapea̧ oa japarea̧rȩ' yo̧eji̧ri̧renȩro̧jȩrȩ dibëa̧ bori̧ ji̧ri̧." Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ icharaita ji̧ri̧ Moiche judi Jeova judi yo̧a̧ duri maea oa yo̧a̧ ji̧.
Ado icharaita judiro̧ pio jiro ma̧ȩ oa ta̧rëa̧ oaiä, juchatura̧ tjätjäpë china̧däräji̧ri̧rȩ chjacjiamȩri̧ jo̧rȩtarëreji̧ri̧diro̧jo̧ȩ Jeova pio ju̧i̧. 28Ado ja̧dëa ji̧ Moiche judi yo̧a̧mi̧ japarëreji̧ri̧dirȩ. Aja̧, Jeova judi Moiche ju̧i̧, ado Aro̧ ju̧i̧ yo̧a̧mi̧ japea̧dirȩ.
Ejichiorë yabo ara̧ pio judiro̧ ja̧bo marëreji̧ri̧dirȩ
29Ado Ütë tjamo̧ judi yo̧a̧mi̧ japarëremȩde. Gȩnȩ tjomo̧ro Jeova judi yabo ara̧ ütëbo oa ja̧bo tänȩrëremȩdejȩrȩ Ejitoräpȩji̧ri̧ oa. Aja̧, pjarao̧ ja̧ joja yabomȩ ju̧i̧, Ejitoräpȩ ano̧ mire ütëpamȩ pio ju̧i̧ ja̧bo tänȩrëremȩdejȩ, ado chaärea̧ bëräpȩ chaäa̧ oa cjo̧ro̧mȩ pio ju̧i̧ ja̧ ja yabomȩbo. Ado bacarë yabo ara̧ pio ji̧ri̧bo ja̧bo tänȩa̧dejȩrȩ, jënȩro̧ goa̧ pio ji̧ri̧ ja̧ u̧ri̧ pio ji̧ri̧, yabo ara̧ pio ji̧ri̧. Ja̧di maeari̧ japamȩrȩ japarëremȩde Jeova judi Ejito chiri nöta oa. 30Pio jiro gȩnȩrä pjarao̧ judi, jȩa a̧doji̧ri̧ pio judiro̧borë ta̧rë bëdüa̧ maeadirȩ ejichio judiro̧ ütëborë. Ma̧i̧ dari̧ ejaro cjia̧ oaiä, jachiti̧ oa baäa̧ oaiä, ta̧rë bëdüa̧ maeadirȩ. Ejito bë nötai̧ oa cjo̧ro̧ji̧ri̧ judiro̧ ana̧ri̧ ejaro cjia marëreji̧ri̧dirȩ yabo ara̧ üdë a̧dë ja̧boa̧ oaiä. 31Ado pio jiro gȩnȩrä, pjarao̧ judi chjaodëri̧ ma̧ȩ chjadürëremȩdejȩrȩ Moiche ju̧i̧, Aro̧ ju̧i̧. Ado pio jȩaiäpȩ jana̧na̧ra̧ji̧ri̧ oa yo̧a̧dejȩrȩ:
—A̧dë baächji̧ibe. A̧dë jachipadärächji̧ibe dibëa̧ pumȩborë. A̧dë go̧düchji̧vä ca̧ chiri oa. Jabechji̧ mȩnȩro̧ cjo̧dëa̧mi̧ go̧düchji̧vä Jeova pio ju̧i̧ chjacjiamȩri̧ jo̧rȩtapea̧ oa. 32Mȩnȩro̧ goa̧ pio ju̧i̧bo goa baächji̧vä dibëa̧ oveja oa, dibëa̧ baca oa, dibëa̧ chivo oa, chjö̧na̧i̧ oa. Ado Ütë tjamo̧ judi coa chjadëri̧ a̧dopea̧ oa goë tuti cjo̧dëchji̧vä pio coa chjiari —yo̧mȩrȩ yo̧rëremȩdejȩrȩ pjarao̧ judi.
33Ado Ejitoräpȩ cjo̧ro̧ji̧ri̧ judiro̧ jo̧ȩra̧pe go̧dü tänȩrëreji̧ri̧diro̧jȩrȩ icharaita pio ji̧ri̧. 'Aja̧, judiro̧ jo̧ȩra̧pe go̧düdërä judi, judiro̧ chjaodëri̧ baädërä judi, jabechji̧ a̧ro̧rȩ ütëborë ja̧bopai̧ daa̧ro̧da, pio ji̧ri̧iä ja̧bopai̧ daa̧ro̧da' quëna̧ jo̧rȩtaji̧ri̧rȩ jëreea tjamo̧ji̧ri̧rȩ go̧dü tänȩtarëreji̧ri̧diro̧jȩrȩ. 34Pio ju̧i̧iä icharaita judiro̧ jo̧ȩra̧pe jëdano̧a̧diro̧jo̧ȩ jibëa̧ oa go̧düpea̧ ji̧. Jibëa̧ chja̧pe japarea̧ pjo̧no̧ oa, jabë tja̧rea̧ oa cjiadëmȩ pjo̧no̧ oa, pjuru chiadëmȩ chja̧pe japarea̧ pjo̧no̧ pio ju̧i̧ mitëa̧diro̧jo̧ȩ. Boa̧diro̧jo̧ȩ canarirä. Ado canari pio ju̧i̧ puria̧diro̧jo̧ȩ chjibo cotora̧ pio ju̧ri̧ra̧. Ado ja̧di dari̧ japaji̧ri̧rȩ ara baäa̧diro̧jo̧ȩ. 35Ado icharaita judiro̧ Moicherë yo̧a̧mi̧ cjo̧dëno̧a̧dirȩ jibëa̧ bë queri̧ cjo̧ro̧ji̧ri̧ pio ji̧ri̧iä. Dami̧ti̧ ba chia oa cjo̧dëno̧a̧dirȩ ejichio pio ji̧ri̧iä. Oro oa, parata chiamȩ i̧a̧rea̧ oa cjo̧dëa̧dirȩ chjibobo. 36Ado Jeova pio judi tänȩa̧ oaiä, ejichio judiro̧ cjäri̧ri̧ cjia daea̧diro̧jȩrȩ icharaita ji̧ri̧. Ado jënȩro̧ cjo̧dëa̧mi̧ yürüa̧ madiro̧jȩrȩ china̧chjari̧ boearea̧ decjiari̧. Ado cjo̧dëa̧ oaiä, jabechji̧ goadëji̧ri̧pea̧dirȩ Ejitoräpȩ cjo̧ro̧ji̧ri̧ judiro̧. Jabechji̧ bë maearë cjiadiärëreji̧ri̧dirȩ.
Icharaita judiro̧ Ejito chiriri judiri go̧dürëreji̧ri̧dirȩ
37Pio jiro gȩnȩrä icharaita judiro̧ Dameche quȩmȩ bë ma̧ri̧ri pio judiri go̧dürëreji̧ri̧dirȩ Chucoto quȩmȩ bë ma̧ri̧räpȩmo̧. Ta maeara̧ baärëreji̧ri̧dirȩ. 600 mil oarirë go̧düa̧dirȩ jibëa̧ ivi pio ji̧ri̧ nöta, jibëa̧ bori̧ pio ji̧ri̧ no̧ta. Jabo ivi ji̧ri̧ro̧, bori̧ judiro̧ ütara̧ oa cjiadëa̧dirȩ. 38Ado jënȩro̧ goa̧ pio ji̧ri̧bo ma̧ȩ baärëreji̧ri̧diro̧jȩrȩ buba tjamo̧ oa. Jibëa̧ baca oa, jibëa̧ oveja oa, jibëa̧ chivo oa, ji̧ra̧ tjamo̧ oa ma̧ȩ baäa̧diro̧jȩrȩ. Ado icharaitadë judiro̧ peaja̧di go̧düa̧dirȩ pio ji̧ri̧ nöta. No̧i̧dërë go̧düa̧dirȩ. 39Ado baärea̧ no̧ropȩ ta̧mȩcho̧ ja̧bochea oa, icharaita judiro̧ ara baäa̧ pio ju̧i̧ tja̧rea̧diro̧jo̧ȩ jibëa̧ chja̧pe oa jurapea̧ oa. Pjuru chiadëmȩ chja̧pe japarea̧ pjo̧no̧ pio ju̧i̧ tja̧rea̧diro̧jo̧ȩ. Jabechji̧ pjarao̧ judi Ejito chiriri pio judiri chjaodëri̧ go̧dü tänȩa̧ oaiä, jabechji̧ pjuru chiamȩ chja̧pe oa jëdano̧tärea̧ ji̧, jibëa̧ jurarea̧ chjö̧na̧i̧ oa chjadëri̧ jëdano̧tärea̧ ji̧, jëdano̧rea̧ dadëa̧dirȩ. Pio ju̧i̧iä pjuru chiadëmȩ chja̧pe pio ju̧i̧ jurariä baärëreji̧ri̧dirȩ.
40Ado icharaita judiro̧, jabechji̧ Ejito quȩmȩ chiriräpȩ ju̧ri̧ cjo̧ro̧rëreji̧ri̧dirȩ japamitë ana̧ri̧. Aja̧, 430 ui nöta cjo̧ro̧rëreji̧ri̧dirȩ. 41Ado 430 ui chjätäa̧rä, pio jiro ui nötadäräa̧rä, Jeova ja̧ pumȩ pio judiro̧ ütëborë go̧dürëreji̧ri̧dirȩ Ejito chiriri pio judiri. Jacobo ja̧ u̧ri̧ pio judiri ja̧ji̧ri̧ judiro̧ ütëborë go̧düa̧ maeadirȩ cja̧rȩmȩ bubarë cjiadiädëri̧. 42Ado icharaita judiro̧ Ejito chiriri pio judiri go̧düa̧ gȩnȩrä Jeova judi chjadëri̧ jida̧dejȩrȩ. Ejito chiriri pio judiri chjadëri̧ go̧dürea̧mi̧ dari̧ jidarëremȩdejȩrȩ, na̧e chia tjamo̧mȩrȩ. Ja̧di tara pio jiro gȩnȩ üdë, jabechji̧ china̧chjari̧ tutia̧ oa cjiami̧ dari̧ cjiade yaba̧ Jeova pio ju̧i̧iä. Ado pio ju̧i̧iä icharaita judiro̧ pio jiro gȩnȩ oa chjadëri̧ jo̧rȩtapea̧ chiadiro̧jo̧ȩ. Aja̧, uipamȩ nöta pio jiro gȩnȩ üdë ma̧na̧na̧ra̧rä, jabechji̧ na̧e chiari̧ cjiaji̧ri̧rȩ dae cjiapea̧ chiadiro̧jo̧ȩ. Ja̧di maeari̧ japapea̧ maeade jibëa̧ri ja̧ji̧ri̧ pio judiro̧borë bucho ana̧.
Uëmo̧ a̧dë chjätärea̧ do pio ju̧i̧ chjiari yo̧rëremȩde Ütë tjamo̧ judi
43Ado Jeova judi yo̧rëremȩdejȩrȩ Moiche ju̧i̧, Aro̧ ju̧i̧:
"Danȩrȩ, mȩnȩro̧ a̧doparä, uëmo̧ a̧dë chjätärea̧ do pio ju̧i̧ jo̧rȩtapea̧ oa a̧doparä, ja̧di dari̧ japaji̧ri̧rȩ a̧dopapea̧de. Danȩrȩ, tjaoë judiro̧, icharaitadë pio judiro̧, jabechji̧ go̧a̧ oa juradëpadiro̧jo̧ȩ. Uëmo̧ a̧dë chjätärea̧ do pio ju̧i̧ jo̧rȩtapea̧ oveja go̧a̧ oa juradëpadiro̧jo̧ȩ. 44Jabo dibëa̧ mu̧i̧tjoi̧ judiro̧, mȩnȩro̧ chërera̧ gatëa̧ mu̧i̧tjoi̧ pio judiro̧, jabechji̧ icharaitadëji̧ri̧borë jurapai̧ dadiro̧jo̧ȩ pio jiro go̧a̧ oa judiro̧ budoa̧ oa cjiarä judi. 45Jabo o judiro̧, icharaitadë pio judiro̧, jabechji̧ go̧a̧ pio ju̧i̧ juradëpadirȩ. Chjätäti̧ cjiamȩ üdë, jabomo̧ cjo̧rȩra̧pea̧mȩ pio judi, jabechji̧ juradëpade. Ado chëre boapea̧ oa ja̧bepera̧pea̧mȩ üdë, peaja̧di juradëpade. 46Ado danȩrȩ, mȩnȩro̧ pio jiro oveja go̧a̧ oa jurarä, a̧dopaji̧ri̧rȩ jura̧rä, jabechji̧ jurarea̧ chjö̧na̧i̧ oa jo̧ tjoräpȩ jurapea̧ maeade, go̧a̧ oa jëdano̧a̧ jo̧ tjoräpȩ pio ju̧ri̧. Dairäpȩ juradëpea̧de. Jabechji̧ jibëa̧ bëräpȩ cjo̧ro̧ji̧ri̧ judiro̧ ji̧mo̧ juraji̧ri̧rȩ jurapadiro̧jo̧ȩ. Ado danȩrȩ, ju oa yarëdëpea̧de. Jabechji̧, ju yarëdëji̧ri̧rȩ jurapadiro̧jo̧ȩ oveja go̧a̧ oa. 47Aja̧, ja̧di dari̧ japaji̧ri̧rȩ a̧dopapadirȩ icharaita judiro̧ ütëborë a̧dë cjiadiärea̧ decjiari̧. Uëmo̧ a̧dë chjätärea̧ do pio ju̧i̧ chjadëri̧ jo̧rȩtapea̧ oa, ja̧di dari̧ a̧dopapea̧de. 48Ado tjaoërimȩ üdë, dibëa̧ chjarerä cjo̧rȩra̧pea̧mȩ üdë, uëmo̧ a̧dë chjätärea̧ doro dibë nöta a̧dopatämi̧ cjiarä judi, Jeova pio ju̧i̧ ba chia jo̧rȩtapea̧ oa a̧dopatämi̧ cjiarä judi, jabechji̧ budoa̧ oa cjiatäde jibëa̧ u̧ri̧ pio ji̧ri̧ nöta, jȩa nöta ëba cjo̧ro̧ji̧ri̧ oari pio ji̧ri̧ nöta. Ado oari judiro̧ budoa̧ oa cjia marä, jabechji̧ icharaita chjami̧ dari̧ cjiadiäpadirȩ. Ja̧di dari̧ japea̧rämo̧ a̧doparea̧ dapade. Jabo budoa̧ oa cjiadëmȩ üdë, jabechji̧ pio dibë nöta ëba a̧doparea̧mi̧dëde. 49Aja̧, ja̧di dari̧ japapea̧ maeade. Pio jiro ma̧ȩ üdë icharaita pio ji̧ri̧ ja̧ maeade. Tjaoëri ja̧ji̧ri̧ pio ji̧ri̧ ja̧bode. Ja̧di dari̧ japapea̧ maeade" yo̧mȩrȩ yo̧rëremȩdejȩrȩ Ütë tjamo̧ judi.
50Ado Jeova judi Moiche ju̧i̧, Aro̧ ju̧i̧ yo̧a̧mi̧ ta̧rë ta̧rë japea̧ maeadirȩ. 51Ado pio jiro doro Jeova judi go̧dü tänȩrëremȩdejȩrȩ icharaita ji̧ri̧, buba ji̧ra̧ oa. Aja̧, Ejito chiriri pio judiri go̧dü tänȩrëremȩdejȩrȩ ütëbo oa, Jacobo pio ju̧i̧ ja̧ u̧ri̧ pio judiri ja̧ji̧ri̧ ütëbo oa, cja̧rȩmȩ bubarë cjiadiädëri̧.
Currently Selected:
Go̧dürea̧ Ma̧ȩ 12: Pume
Highlight
Share
Compare
Copy
Want to have your highlights saved across all your devices? Sign up or sign in
©2021 Global Partners, All Rights Reserved
