Deuteronomio Ma̧ȩ 34
34
Moiche judi ja̧borëremȩde
1Ado Moiche judi Moabo quȩmȩ chiri maearäpȩ cjiarëremȩde. Ado pio judiri jämȩrȩ järëremȩde Nabo quȩmȩ ya̧mi̧räpȩ. Ado judiri uë tjamo̧ oa jämȩrȩ buarëremȩdejȩ Piga quȩmȩ ya̧mi̧ oa, Jerico quȩmȩ bë ma̧ri̧ dëbëräpȩ chamȩ ya̧mi̧ oa. Ado uë tjamo̧ri pio judiri chjadëri̧ na̧rȩrëremȩdejȩ Jeova judi chiri chjö̧na̧i̧ oa, jënȩ icharaita pio ji̧ri̧iäpȩmo̧ yürüa̧ chiri oa. Aja̧, Garada quȩmȩ chiri chjö̧na̧i̧ oa na̧rȩrëremȩdejȩ, Da̧de pio judiri ja̧ji̧ri̧ pio judiro̧ cjo̧ro̧pea̧ chiri oa. 2Ado Netari pio judiri ja̧ji̧ri̧ judiro̧ cjo̧ro̧pea̧ chiri oa, Epjari̧ pio judiri ja̧ji̧ri̧ judiro̧ cjo̧ro̧pea̧ chiri oa, ado Manache pio judiri ja̧ji̧ri̧ judiro̧ cjo̧ro̧pea̧ chiri oa peaja̧di na̧rȩrëremȩdejȩ. Ado Juda pio judiri ja̧ji̧ri̧ judiro̧ cjo̧ro̧pea̧ chiri oa peaja̧di na̧rȩa̧dejȩ, Mediteraneo quȩmȩ ui ana̧räpȩ yuro a̧rȩmȩ chiri oa. 3Peaja̧di na̧rȩa̧dejȩ Negebo quȩmȩ chiri maea oa. Ado bea Joroda̧ yuroro a̧rȩmȩ chiri chjö̧na̧i̧ oa na̧rȩa̧dejȩ Jerico quȩmȩ bë ma̧ri̧räpȩ yuro, a̧rü chiamȩ to oa chiamȩ bë ma̧ri̧räpȩ yuro. Ado judiri na̧rȩa̧dejȩ chiri oa Choa quȩmȩ bë ma̧ri̧räpȩ yuro. 4Ado Jeova judi yo̧rëremȩdejȩ Moiche ju̧i̧: "Danȩ, cüdë Abaraa̧ pio ju̧i̧iäpȩmo̧ yo̧ë cji̧därërea̧ chiri pio judide. Aja̧, cüdë Icha pio ju̧i̧iäpȩmo̧ yo̧ë cji̧därërea̧ chiri üdë, cüdë Jacobo pio ju̧i̧iäpȩmo̧ yo̧ë cji̧därërea̧ chiri üdë pio judide. "Aja̧, dibëa̧ri ja̧ji̧ri̧ pio ji̧ri̧iäpȩmo̧ yürüparequedejȩrȩ" yo̧a̧requedejȩrȩ. Aja̧, pio jiro chiri oa yürüpea̧ ji̧ yo̧ë cji̧därëremȩrequedejȩrȩ. Ado pio jiro chiri oa da tänȩrequedemȩ yaba̧, jabo yu̧a̧rea̧ dadëparenȩ," yo̧mȩrȩ yo̧rëremȩdejȩ Jeova judi Moiche ju̧i̧iäpȩmo̧.
5Ado Moiche judi chiri oa ütarë da ëte ja̧boa̧de. Aja̧, pio ju̧ri̧pȩ ja̧borëremȩde, Moabo quȩmȩ chiriräpȩ. Jeova pio judi yo̧a̧mi̧ ja̧borëremȩde. 6Ado Jeova pio judi na̧ra̧rëremȩdejȩ. Pio jiro chiriräpȩ na̧ra̧dejȩ Bepeo quȩmȩ dëbëräpȩ ju̧ri̧. Jabo eami̧ pumȩ üdë, pio yaba̧mȩ oa cjo̧ro̧mȩborë, 'Aja̧, pio ju̧ri̧pȩ na̧ra̧diji̧da, pio ju̧ri̧pȩ na̧ra̧ oa cjia jirodida' quëna̧ dabami̧dëri̧ na̧ra̧rëremȩdejȩ. 7Ado Moiche judi jabechji̧120 ui goarëremȩde jënȩ ja̧boa̧ ji̧. Jabë ju chiamȩrȩ, jabë da pjurupadëmȩrȩ ja̧borëremȩde.
8Ado Moiche judi ja̧boa̧ oaia gito ana̧ri̧ jo̧rȩtarëreji̧ri̧dirȩ icharaita judiro̧. Aja̧, 30 do nö̧ta odai̧ tarari̧ ejaro cjiaji̧ri̧rȩ jo̧rȩtarëreji̧ri̧diro̧jo̧ȩ, judiro̧ ja̧boa̧mȩ pio ju̧i̧ chjiari ji̧dë ma japariärërea̧mi̧. Jabechji̧ tai̧tärea̧ ju̧i̧ tai̧dërëreji̧ri̧dirȩ. Jabechji̧ Moabo quȩmȩ chiriräpȩ cjiadiäji̧ri̧rȩ jo̧rȩtarëreji̧ri̧diro̧jo̧ȩ.
9Ado Moiche judi ja̧boa̧ duri oa, Jochue judi, Nu quȩmȩ joja pio judi urëdi tjamo̧ oa jo̧rȩtarea̧ chiarëremȩde. Jabechji̧ Jeova pio judi yürüa̧ oa, ja̧di dari̧ jo̧rȩtarea̧ chiamȩpea̧de. Moiche judi Jochue pio ju̧i̧ mitëa̧ oaiä, jibëa̧ tjübë oa ida̧ oaiä, jënȩ ja̧beparërea̧ pio ju̧i̧ ano̧ mire ja̧bepapea̧ oa yürüa̧ oaiä, jabechji̧ ja̧di dari̧ jo̧rȩtarea̧ yürürëremȩdejȩ Jeova judi. Ado icharaita judiro̧ pio ju̧i̧ ano̧ mire ta̧rëdiäji̧ri̧pea̧diro̧jo̧ȩ. Aja̧, Jeova pio judi Moiche pio ju̧i̧iäpȩmo̧ yo̧a̧mi̧ chjadëri̧ ano̧ mire ta̧rëdiärëreji̧ri̧diro̧jo̧ȩ.
10Ado Icharairäpȩ ju̧ri̧ Ütërë ea jana̧ chjadüa̧ oa ni̧bäji̧ri̧ judiro̧ ji̧ra̧ tjamo̧rëreji̧ri̧dirȩ, jabo Moiche pio judimi̧ dari̧ cjiadë marëreji̧ri̧dirȩ. Jabechji̧ Moiche ju̧i̧ irä ni̧bämi̧ dari̧ ni̧bärëremȩdejȩ Jeova judi. 11Ado Moiche pio ju̧i̧iä ana̧ tjamo̧ri̧ na̧rȩ chjaorëremȩde jibëa̧ jauëchja oa. Tjamo̧ davä. Jeova judi pjarao̧ pio ju̧i̧ ana̧ri̧ na̧rȩrërea̧ ji̧, Ejitoräpȩ cjo̧ro̧ji̧ri̧ pio ji̧ri̧ ana̧ri̧ na̧rȩrërea̧ ji̧, ado pjarao̧ ju̧i̧ a̧doji̧ri̧ pio ji̧ri̧iäpȩmo̧bo ana̧ri̧ na̧rȩrërea̧ ji̧, jabechji̧ chjadürëremȩdejȩ Moiche pio ju̧i̧. Aja̧, japadai̧ da pio ju̧i̧ na̧rȩ chjaorëremȩde Moiche pio ju̧i̧iä, a̧dë chjäte jauëchja cjiari̧ na̧rȩmȩrȩ. Jabo Ütërë ea jana̧ chjadüa̧ oa ni̧bäji̧ri̧ judiro̧ orë, jabechji̧ Moiche pio judi japami̧ dari̧ japadë marëreji̧ri̧dirȩ. 12Jabo Moiche pio ju̧i̧iä japadai̧ da pio ju̧i̧, uapai̧ da tjamo̧ pio ju̧i̧, ana̧ri̧ jo̧rȩta tänȩmȩ pio ju̧i̧ jape chjaorëremȩde Icharai pio judiri ja̧ji̧ri̧ ja̧ dachoro, a̧dë chjäte jauëchja cjiari̧ japarea̧ra̧.
Currently Selected:
Deuteronomio Ma̧ȩ 34: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
