Chamue Ma̧ȩ 1 13
13
Chauro judi ta̧rë jabodërëremȩdejȩ Jeova ju̧i̧
1Chauro judi 30 ui goarëremȩde icharaita ja̧ ütëpea̧rä. Ado ji̧ri̧ ja̧ ütëmȩrȩ cjo̧ro̧rëremȩde 42 ui nö̧ta.
2Ado Chauro judi pjiriteo quȩmȩ pumȩ pio ji̧ri̧iäpȩ acji tai̧rea̧ jo̧rȩtamȩrȩ ma̧ȩ chjadürëremȩdejȩrȩ icharaita oari ji̧ri̧ pio jȩaiäpȩ jana̧tä. Ado pio jȩaiäpȩ go̧düdäräa̧ji̧ri̧ oa mitërëremȩdejȩrȩ 3 mil oari ji̧ri̧ jibëa̧ guadia tjamo̧parȩpea̧ oa, pio jȩa nö̧ta ji̧dë ma ëba tai̧pea̧ oa. Ado jënȩ mitëdëa̧ pio ji̧ri̧, jabechji̧ ado chjereno̧ baä tänȩrëremȩdejȩrȩ. Ado ja̧dëa ji̧ jënȩ mitëa̧ pio ji̧ri̧ yo̧a̧ri̧ bubape bagari̧ a̧dopa tänȩrëremȩdejȩrȩ. Ado ja̧dëa ji̧ cja̧rȩmȩ buba oa, 2 mil guadia pio ji̧ri̧ mitërëremȩdejȩrȩ pio jȩa nö̧ta ëba jäpea̧ oa Micama quȩmȩräpȩ. Aja̧, Bete quȩmȩ bë ma̧ri̧räpȩ ju̧ri̧, ya̧mi̧ chjareräpȩ ju̧ri̧ ëba jäpea̧ oa, mitërëremȩdejȩrȩ. Ado cja̧rȩmo̧ buba oa, cjiadiäa̧ji̧ri̧ guadia pio ji̧ri̧, jabechji̧ pio jiro 1 mil guadia pio ji̧ri̧ chjadürëremȩdejȩrȩ jibëa̧ ja pio ju̧i̧ nö̧ta ëba jäpea̧ oa, Aja̧, Jonata̧ pio ju̧i̧ nö̧ta ëba jäpea̧ oa chjadürëremȩdejȩrȩ Gibea quȩmȩ bë ma̧ri̧räpȩ jäpea̧ oa, Benjami̧ ja̧ chiriräpȩ jäpea̧ oa. 3-4Ado ja̧dëa ji̧ japamitë chjätä ëte, Jonata̧ judi pio jiro guadia pio ji̧ri̧ nö̧ta go̧düdärärëreji̧ri̧dirȩ Gibearäpȩ. Ado pio ju̧ri̧pȩ acji järëreji̧ri̧dirȩ pjiriteo guadiarë cjo̧ro̧mȩ bë ana̧ pio ju̧i̧. Ado pio jiro guadia ji̧ri̧ boadäräa̧diro̧jȩrȩ, ütëbo oa ja̧bo tänȩji̧ri̧rȩ. Ado pio ju̧i̧ chjiari chjaodëri̧ goë ta̧rëji̧ri̧pea̧dirȩ pjiriteo judiro̧. "Aja̧, icharaita judiro̧ ibëa̧ pumȩ pio ji̧ri̧ Gibearäpȩ ju̧ri̧ ütëbo oa ja̧bo tänȩa̧diro̧jȩrȩ" yo̧mȩ ma̧ȩ pio ju̧i̧ goë ta̧rërji̧ri̧pea̧dirȩ chjaodëri̧. Ado pio ju̧i̧iä a̧dë chjäte goëdëri̧ cjia tjamo̧pea̧diro̧jȩrȩ icharaita ji̧ri̧. Ado pio ju̧i̧iä Chauro judi jëreeamȩrȩ ma̧ȩ chjadürëremȩdejȩrȩ jibëa̧ guadia chjö̧na̧i̧ oa. Aja̧, pjurarea̧ oa pjuraji̧ri̧ pio ji̧ri̧iä ma̧ȩ chjadüeno̧a̧dejȩrȩ pio jȩaiäpȩ a̧dopera̧tä jo̧ȩra̧pe. Ado pio ju̧i̧ ta̧rëji̧ri̧rȩ chjaodëri̧ järëreji̧ri̧dirȩ Giga quȩmȩräpȩ, Chauro pio ju̧i̧iäpȩ a̧dopapea̧ oa. 5Ado pjiriteo judiro̧ ma̧ȩ ta̧rëa̧ oaiä, jabechji̧ a̧doparëreji̧ri̧dirȩ icharaita pio ji̧ri̧ goae tarari̧ dëbëpe chjaopea̧ oa. Noi̧dëti̧rȩ a̧dopea̧ oa cjiarëreji̧ri̧dirȩ. Jabechji̧ 30 mil acji tai̧rea̧ yae chara oa chiaji̧ri̧rȩ, 6 mil yaira̧ tai̧ji̧ri̧ guadia oa chiaji̧ri̧rȩ a̧doparëreji̧ri̧dirȩ. Ado pio ji̧ri̧ uëri tara̧ tai̧ji̧ri̧ guadia pio judiro̧borë a̧doparëreji̧ri̧dirȩ ütararea̧mi̧dërë. Jabechji̧ ui ana̧ yuroro china̧mȩ dabu chomi̧ dari̧ cjiarëreji̧ri̧dirȩ a̧dë chjäte no̧i̧dëti̧rȩ. Ado Micama quȩmȩ bë ma̧ri̧räpȩ ju̧ri̧ cjiadiärëreji̧ri̧dirȩ japamitë ana̧dëri̧, jo̧ bori̧ oa cji̧dëno̧ji̧ri̧rȩ. Ado Micama bë ma̧ri̧ üdë, jabechji̧ Betavȩ pio judiri dorë cjitëmȩräpȩmo̧ cjiarëremȩde.
6Jabo cjäri̧ madirȩ, Icharai pio judiri ja̧ji̧ri̧ pio judiro̧ pjiriteo guadia buba oa daea̧ oaiä, a̧dë chjäte ji̧ra̧ tjamo̧ oa daea̧ oaiä chjaodëri̧ uapaji̧ri̧pea̧dirȩ. 'Cjäri̧ maa̧ro̧da, nö̧tadëa̧ro̧da, no̧i̧dë tjamo̧diro̧da, dëbëpe chjaorea̧mi̧dëa̧roji̧ri̧da' quëna̧ jo̧rȩtaji̧ri̧rȩ oëra̧ti̧ oa bagureno̧rëreji̧ri̧dirȩ goadipea̧ oa. Aja̧, ta̧dë cjararä ju̧ri̧, puërä ju̧ri̧, ya̧mi̧ cjürërä ju̧ri̧, ta̧dë chjarerä ju̧ri̧, tade puërä ju̧ri̧ goadiji̧ri̧pe bagarëreji̧ri̧dirȩ. 7Ado o judiro̧ bea Joroda̧ oëräpȩ goadi baäeno̧a̧dirȩ Ga quȩmȩ chiriräpȩmo̧, Garada quȩmȩ chiriräpȩmo̧. Jabo Chauro judi, icharaita ja̧ ütë pio judi, jabechji Gigaräpȩ cjiadiärëremȩde jibëa̧ guadia pio ji̧ri̧ nö̧ta. Uapa tjamo̧ji̧ri̧rȩ cjiadiärëreji̧ri̧dirȩ, i ma̧na̧gurami̧ tarari̧ joretaji̧ri̧rȩ.
8Ado Chauro judi Gibaräpȩ cjiadiäa̧ nö̧ta, jabechji̧ Chamue pio ju̧i̧ jidatarëremȩdejȩ. Chamue judi 7 do nö̧ta jidatä yo̧a̧ oaiä, jabechji̧ 7 do nö̧ta jidatarëremȩdejȩ. Jabo cjäri̧ made, Chamue judi jana̧dëa̧de. Jënȩ ütara̧ japamitë üdë chjätä ëte jana̧dëa̧de. Ado Chauro judi Chamue pio ju̧i̧ dadëa̧ oaiä, 'Chia chia, jana̧dëa̧dida, ado ca̧ guadia judiro̧ a̧dë baädiro̧coada, pio coa a̧dë chjuchjupechädiro̧da' quëna̧ jo̧rȩtamȩpea̧de bücjüri̧ cjia tjamo̧mȩrȩ. 9Ado pio ju̧i̧iä Chauro judi yo̧a̧dejȩrȩ o ji̧ri̧:
—Danȩrȩ, yürürea̧ oa goa jana̧chji̧coe. Jabechji̧ pio cüdë Ütë tjamo̧ pio ju̧i̧iäpȩmo̧ ano̧ mire yürüpea̧ oa, jabechji̧ goa jana̧chji̧coe. Aja̧, goe gu̧rori̧ cäë yürüpea̧ oa goa jana̧chji̧coe, ado ori̧ bagari̧ jëdano̧pea̧ quȩmȩ yürürea̧ pio ju̧i̧bo. Jabechji̧ Chamue decjia tara, pio cüdë yürüpareconȩ —yo̧a̧dejȩrȩ.
Ado Chauro judi Chamue pio ju̧i̧ chjadëri̧ jidatärea̧ ji̧, jëreeadëmȩrȩ jidatärea̧ ji̧, cjäri̧ made, chjadëri̧ jidatadëa̧dejȩ jabo pio judi ano̧ mire japamȩrȩ goe gu̧rori̧ cäë yürürëremȩde, jënȩ japadëtärea̧ ji̧. 10Ado judi pea cäë yürüdäräa̧rä, Chamue pio judi go̧düdärärëremȩde. Ado Chauro judi chjaodëri̧ go̧düa̧de pio ju̧i̧ chjadëri̧ jeapea̧ oa. 11Jabo Chamue judi iëno̧ë ta̧rëa̧dejȩ:
—Jabo cjäri̧ marenȩ, ¿tjana̧ japea̧nȩ?
Ado Chauro judi dëbë yo̧a̧dejȩ:
—Tjana̧ japadëa̧, jabechji̧ ca̧ guadia judiro̧ pio coa a̧dë baäa̧ oaiä, ado mȩnȩ ütara̧mi̧ jana̧dëa̧ oaiä, ado pjiriteo judiro̧ pio ibë acji jana̧pea̧ oa Micamaräpȩ a̧dope chjaoa̧ oaiä, 12jabechji̧ 'pio cüdë ano̧ mire tuti japatäremȩquëda, Chamue decjia oaiä pio cüdë jabërä japatäremȩquëda' quëna̧ jo̧rȩtamȩrȩ cäë yürüa̧reconȩ Jeova pio ju̧i̧iäpȩmo̧. Tjamo̧ davä. 'Pio yimȩ oa acji jana̧pai̧ dadiro̧coada, Giga quȩmȩräpȩmȩ oa acji jana̧pai̧ dadiro̧coada, pjiriteo pio judiro̧ acji jana̧pai̧ dadiro̧coada, ado Jeova pio ju̧i̧iä jabë goë cjo̧dëdëa̧cuni̧da, ado pio ju̧i̧iä jabërä goë cjo̧dëtäremȩcuni̧da, pio cüdë cäë yürürea̧mi̧dëräbo japatäremȩquëda, ibë cjäri̧ri̧ cjiamȩrȩ a̧dopea̧ oa goë cjo̧dëtäremȩcuni̧da' quëna̧ jo̧rȩtamȩrȩ cäë yürüa̧reconȩ —dëbë yo̧a̧dejȩ Chamue ju̧i̧ Chauro judi.
13Jabo Chamue judi dëbë yo̧a̧dejȩ:
—Jabo cjäri̧ marenȩ, japë taramȩmi̧ dari̧ japea̧renȩ. Jabechji̧ mȩnȩ chjadëri̧ ta̧rëdiätärea̧ ji̧, Jeova judi pio mȩaiäpȩmo̧ yürüa̧ ma̧ȩ pio ju̧i̧ chjadëri̧ ta̧rëdiätärea̧ ji̧, ta̧rëdiädëa̧renȩ. Jabechji̧ mȩnȩ Jeova pio ju̧i̧ chjadëri̧ ta̧rëdiäa̧rä judi, chiri ütëmȩrȩ cjo̧ro̧ tänȩa̧täremȩdimȩ mȩnȩ ütama̧i̧pea̧rä yuro, mȩnȩ ja̧boa̧rä yuro. Ado na̧ea̧ri ja̧ji̧ri̧ pio ji̧ri̧bo ano̧ mire ütë tänȩa̧täremȩdejȩrȩ, pio judiri ja̧ji̧ri̧ pio ji̧ri̧bo. 14Jabo cjäri̧ marenȩ, mȩnȩ pio ju̧i̧ jiada̧ oaiä, ja̧di dari̧ japarea̧mi̧dëde jabo ütë cjatä tänȩpadimȩ. Jabechji̧ ado cja̧rȩmo̧ oa ano̧ mire ütë tänȩpea̧ oa mitëa̧ oa goade. Tjamo̧ davä. Ado cja̧rȩmo̧ oa ano mirȩ ütë tänȩpadejȩ Jeova judi. Jibëa̧ chji̧ra̧ jo̧rȩtami̧ dari̧ cjo̧ro̧mȩ pio ju̧i̧, jënȩ jo̧rȩtami̧ jo̧rȩtamȩ pio ju̧i̧ ano̧ mire ütë tänȩpadejȩ, pio jȩaiäpȩmo̧ ma̧ chiadëri̧ cjiaparȩmȩ pio ju̧i̧.
Aja̧, ja̧di ta̧rëri̧ yo̧mȩrȩ yo̧rëremȩdejȩ Chauro pio ju̧i̧iäpȩmo̧ Chamue judi.
Currently Selected:
Chamue Ma̧ȩ 1 13: Pume
Highlight
Copy
Compare
Share
Want to have your highlights saved across all your devices? Sign up or sign in
©2021 Global Partners, All Rights Reserved
