Malaquía 1
1
Dawan bui Israel ra latwan kaikisa
1Naha bîla nani sika Dawan, Malaquías#Malaquías: Hibru ra ulban ba Malahi, baha tânka ba bîla twatwilkra ba (apia kaka yang insalki), 3.1 ra ulban ba baku. ra aisin ba Israel luhpia nani ra wiaia.
2Dawan wisa: “Yang bui man nani ra latwan mai kaikisna.” Sakuna man nani lika pana aisisma: “¿Yang nani nahki kaikamna man latwan ai kaikisma ba?” Bara Dawan pana aisisa: “Latwan mai kaikisna ba tânka sika, Jekob Isau wal ai muihni sakuna Jekob ra baman latwan kaikri ba, 3bara Isau ra lika misbara kaikri.#Bla St 25.23-26; Ro 9.13. Isau tasbaya ilka ba twi langni kan wina, upla iwras tasbaya daukri bara ai tasbaya ba, daiwan wail nani baman dukiara yamni sa.”
4Bara Edom tasbaya uplika nani Isau masraka ba,#Ais 34.5-17; 63.1-6; Jir 49.7-22; Isi 25.12-14; 35.1-15; Em 1.11-12; Oba 1-14. witin nani naku aisabia kaka: “Wan tawanka nani sauhki tikan sa, ban sakuna yawan wan nisanka na kli bukaia sa”, karnika sut bri Dawanka ba pana aisabia: “Âu, witin nani kli bubia kaka, sakuna yang mita kli slingbamna. Witin nani ai tasbaya nina ba ‘Watawika lâka tasbaya’ mâkbia, bara ‘Dawan mita baha nisanka ra ban kaia ra ai kupia baiki ba.’ ” 5Man nani namkra pali ni kaiki si aisama: “¡Wan Dawanka lika karnika tara brisa, Israel tasbaya piarkika kainara luisa!”
Dawan bui prîs nani ra lawi daukisa
6Karnika sut bri Dawanka ba, prîs nani ra naku aisisa: “Luhpia nani ba ai aisika ra kulkanka tara yabisa, bara alba nani ba sin ai dawanka ra yamni kulkisa. Bamna yang na man nani Aisikam sna kaka, ¿dîa muni tara ai kulkras sma? Man nani albiki, yang na Dawankam sna kaka, ¿dîa kan yamni ai kulkras sma? Man nani bahki ai kulkisma, sakuna ban aisisma: ‘¿Yang nani dîa dauki bahki mai kulkisna ki?’ 7Angki aikaia pata nani saura kulkan ba, man nani ban altarki ra bri sal aikisma, bara kau maikabi walisma: ‘¿Yang nani dîa daukri kupiam sauhkaia?’ Man nani bahki ai kulkisma, kan lukisma diara apia sa altarki ba bahki kulkaia; 8man nani sin lukisma diara saura apia sa daiwan nakra baiwan nani, skahwa nani, sikniskira nani ba yang ra aikaia.” ¡Bahmuna daiwra nani ba tasba wihtka nani ra bri si prisantka yas, witin nani liliakira brih tingki mai wibia sapa!#Lib 22.18-25; Kli S 15.21. 9Gâd ra puram suns man nani ra umpira mai kaikaia dukiara. Ban sakuna, bahmuna prisantkam yabisma kaka, lukpara Gâd ai âuyapah kira man nani ra mai walbia. Karnika sut bri Dawanka ba aisisa: 10“¡Brin ai daukisa man nani tilam wina upla kum bal taki tempelka durka nani ba prakaia; bara pauta nani bahara kli bahki ra mukaia apia! Kan man nani wal lilia apia sna, bara sakripais aikisma ba sin ban bri kamna apia.#Ais 1.13; Em 5.21-24. 11Nisan nani sut tasba aiska ra yang na tara ai kulkisa; ani anira yang na tara ai kulki bamna, diara kîa yamni angki Dawan sna ba bara kulkanki ba aikisa. 12Sakuna man nani lika kupi baikisma, lukisma altarki, yang tibilki ba bahki kulkaia sip sa, plun nani baha purara kahban ba sin bahki kulki kaia. 13Man nani aisisma: ‘¡Naha warkka daukan man swapri!’ Baku bahki ai kulkisma. Ba sut dauki man nani ban lukisma, yang lilia kamna daiwan kum impliki, apia kra bîp skahwa, apia kaka siknis ba yang ra aikaia. 14¡Saura pali kabia baha uplika ra ai daiwra daknika wina daiwan sunu kum, sakripais dauki aikaia wisi, watlika ra daiwan skahwa kum aiki ba! Yang sika King Tara, nisan nani sut yang ra sibrin lukisa.” Karnika sut bri Dawanka ba naha aisisa.
Currently Selected:
Malaquía 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua