Galesha 1
1
Lakula bîla
1Yang Pal, apastil kum sna, upla nani bui ai brinka kat upla kumi saki blikan ba sâtka lika apia, sakuna Jisas Kraist pali bara Gâd Aisa mita ai blikan, witinka Jisas pruan wina kli bukan ba mita. 2Bamna yang, bara wan muihni nani yang wal nani ba mita sin, naha wauhkataya na ulbisna, Galesha tasbaya ra serts nani bâra ba sut ra. 3Man nani ba Gâd Aisa wina bara Dawan Jisas Kraist ba wina sin, yamnika nani bara kupia kumi lâka ba bri kama. 4Kraist sika yawan wan saurka dukiara ai wîna tara aiska ba prura mihta ra mangkan,#Mt 20.28; Mk 10.45; 1 Ti 2.6; Tai 2.14. Gâd Aisa kupia lâka ba kat, naha tasba saura na wina pri wan sakaia. 5¡Gâd ra mayunan kabia ban kaia ra! Baku kabia.
Swaki sakan lâka smalkanka wala âpu sa
6Yang lika man nani dukiamra uya aihka pali lukisna, kan man nani lika swaki sakan lâka smalkanka sât wala kum wali, pat pali Gâd ba swisma bamna; bara Gâd sika Kraist latwanka ra luki man nani mai paiwan ba. 7Man nani kasak lukpara, swaki sakan lâka smalkanka wala kum bâra sa. Baha lika, upla tila nani mita trabil mai munisa, bara Kraist swaki wan saki smalkanka ba bahki ra lakaia lukisa. 8Sakuna upla kum mita swaki sakan lâka yang nani mai smalkri ba wal sât aihka kum mai smalkbia kaka, baha uplika ba pât tara mununhtara ban swin kaia sa, yang pali kamna kra, apia kaka insal kum kasbrika pura ba wina balbia kra sin. 9Baha dukiara piua luan ra yang bui pat man nani ra mai wîri, bara nanara kli sin mai wisna: Upla kum mita swaki sakan lâka smalkanka pat briram ba wal, sât aihka mai smalkbia kaka, baha uplika purara pât tara kahbi swin kaia sa.
10Yang plikras upla mita yamni ai kaikbia, sakuna Gâd mita yamni ai kaikbia.#1 Tes 2.4. ¡Yang na upla nani mita pain ai kaikbia plikisna kaka, yang kau Kraist albika kamna apia!
Pal nahki apastil aimakan ba
11Muihki nani, naha tânka na pain kaiki bas: swaki sakan sturka yang aisi smalkisna ba lika, upla nani lukanka wina apia sa. 12Baha ba upla kumi mita sin ai smalkan yang briras, sakuna Jisas Kraist mita aikan kaikri.
13Man nani pain kaikisma, pas piua yang Ju nani lâka nina bliki kapri bara nahki katna ba. Pat kaiki banhwisma, yang bui Gâd sertska ba âpu daukaia wisi, nina bliki rausauhki kapri ba.#Ap St 8.3; 22.4-5; 26.9-11. 14Ju nani lâka ba kat, yang wal pâwan uplika nani wal, yang kau tâura impaki kapri, kan yang sika damiki nani lâka kau karna dauki main kaiki bri kapri bamna.#Ap St 22.3. 15Sakuna yang kau aisubi takras kapri wina, Gâd pat bâk ai saki ai brin kan, bara witin uya pali latwan lâka bri ba mita ai paiwan. Witin baku brin daukan bamna, 16ai Luhpia ba aikan kakaira takri,#Ap St 9.3-6; 22.6-10; 26.13-18. baha mita yang ra ai paiwan swaki sakan lâka smalkanka ba, Ju apia uplika nani ra smalkamna dukiara. Naha diara yang ra takan ba ra, upla kumi wal sin aisaia waras kapri, 17bara yang kainira apastil aimakan nani Jerusalem ra kan ba ra sin waras kapri. Sakuna aihni pali mahka Arabia tasbaya ra wari, bara baha ningkara kli Damaskus ra tawi balri.
18Mani yumhpa luan ningkara, Jerusalem ra wari;#Ap St 9.26-30. baha piua Pita wal prawri bara witin wal yu 15 takaskri. 19Sakuna apastil wala nani kumi sin kaikras, Dawan muihnika Jems baman lika. 20Dawan mawanra yang kasak pali mai wisna, diara nani ulbisna na lika kunin apia, kasak pali sa.
21Naha ningkara, Siria bara Cilicia tasbaya nani ra wari. 22Judia tasbaya ra wan muihni nani Kraist sertska ra nani ba mita pain pali ai kakaira apia kan. 23Witin nani wali kan upla nani aisin: “Wan nina bliki rau wan sauhki kata ba, nanara kasak lukan lâka smalkanka dukiara smalkisa, bara baha pali sika piua luan ra âpu daukaia luki kan ba.” 24Bara yang dukira Gâd ra mayuni banhwi kan.
Currently Selected:
Galesha 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua