Iruruputo 28
28
Molota udu kale
1Ni so keru eṉe lula ṉe bakiake saita, inio eṉeta ṉe viqake voa udu ko ṉi ta Molota udu. 2Ni koa udu kale ama maba poso ta ke ṉelati matu uria baerebaereake eṉe. Ni nioro ta kota tanitake pialo ni sanusanu kota evake, so sole seta ke bainaekake ko uza ni ke baroekiṉelake eṉea kiada ṉela. 3Ni Paula ta o tuboekake ko sirusiru luko ni so keru vo obe vaeka keru koa sirusiru uza kale nio koa vualavualato ta ko saqorivake kala dole ni ota va nanae-kake Paula ko ṉase ni ota vinaike voko ṉase topi. 4Nio koa udu kale ke evani maba poso ke kea keru koa dole kobeta soilako vo Paula ko ṉase topi nio eri kikelake ke ṉavio kude, “Koe, nea maba ta kala vouvato ko maba inio, vota pui opa voula ivere kale, melai sidopu ko baṉara poso ta pui kova zaria tu vota o saevou,” kikelake. 5Melai Paula ta o pirupusaekake koa dole uza kale, ni kota pui ruqe ko ivake. 6Ni seta keta va tarekake tava tubu ko, ma voko taukavo pialo ni vou. Melai seta ke taruanake rosi ama taku melai pulia quli ke keake kiada keru ko kavani jari, so sole seta ke besiekake seko kerukeru ni eri kikelake, “Koe, nei ta kala baṉara inio!” kikelake.
7Ni koa zaekale azo ta pui vaṉa kama miduku poso Pabiliasi ko, vota koa udu kale ala matula lekasa. Ni vota o odieṉelake eṉe voko pade kasi ni o ṉelati uria baerebaereake eṉe, ni eṉeta ṉe evake sai zouke ṉaniu. 8Ni Pabiliasi vo mama, vo tataṉo ni dara suru ko voani, ta obeta tekuake kobo topi. Nio Paula ta o amaqeake voko lose kale, ni o vararaitake, ni ovai ivikake voko ṉase, ni o urikivake vo. 9Nio so keru koko ereiva keru, kiadamu koa udu kale ama vere amu ta ke kuevake vokasi ni vota o urikimake se. 10Ni seta ke katiṉelake kubo katizato ni so keru eṉe ṉe dadaova keru seta ke ṉelai zuranikake kubo quli ko eṉe ko tauveṉelo ama quli.
Molota udu kale azo ti Romu
11Zouke kaboso sai ṉe evake inio eṉeta ṉe vaekaziake Alekezadaria ala vaka kale, modi baṉara beku votonio sala, vo koa sarosaroro ko taku kale o eveni koa udu kale. 12Ni eṉeta ṉe varerikake Sairakiusi peuru kale ni ṉe evake sai zouke ṉaniu. 13Ni sai kazo ṉe dadaoke ni mata ṉe varerikake Reqiumi peuru kale. Ni koko raneo kale ta kala ṉoma ururu ota puzetake, nio koko omuqala ṉaniu kale inio ṉe baroake Puteoli peuru kale. 14Sai nio eṉeta ṉe meake kama lotu maba madu seke taipaziṉeleni eṉe, ni eṉeta ṉe evake sekasi sai omadeu vuiki. Ti sai kazo eṉeta ṉe luluekake ko matu keve tu ṉe barolo Romu peuru kale. 15Ni se Romu ama lotu maba poso keta ṉela viqake ta eṉeta sipole ṉeda barolou sai kio, nio kake seta ke kuevake Apiasi maketi ko evakoi ni kake ta Zouke Mamazopade ka kikelako zaekale sai kepa toraeṉelake.#28:15 Apiasi maketi ko zae ta 43 maelo (69 kilomita) tiniavo koko vaṉa Romu azo ni Zouke Mamazopade ta 33 maelo (53 kilomita) Romu azo. Ni so keru Paula o mea keru se vota o ilusivake vo Baṉara ni ota matu zaubariake.
Romu peuru kale
16Ni so keru eṉe ṉe baroa keru Romu, seta ke zarievake vo Paula tu vota o elo kala pade kale kala solodia ko vailo kale. 17Ni zouke ṉaniu ko tova inio Paula ta o nokaemake sai ke evani Jiu ama tanatanamu vatovatoito ko pesipesito kale, sai nio vota eri kiolake sekasi, “A baerebaere poso mela, aṉata pui aba ereke ruqe ama kalo animeko maba madu kasi ni so jari pui aba bikoirike animeko vikuvikula bazu. Melai seta ke vaelake Jerusalema pirito pade kale ni ke lati sorotake aṉa se Romu amu ko ṉase topi. 18Ni aṉako kuimakuimaelo ko tova inio se Romu amu ta kela zariake rupasilo aṉa, ako ke keake ta aṉata puliama sarueko aba ereke ko vou ko malezikako sole. 19Melai se Jiu amu ta pui kekai zariake ko, Sokale avo inio aṉata a basetake a ṉavi tu aṉata a zio Matu Aikovakova kasi titizato kale, rouka aṉata pulia quli aba mai kuirikou a ṉaviko kuniale amu melai. 20Sokale avo inio aṉata a odiemelala me tu aqai pesio komi mekasi. Ako koko tuveano ko aṉa eria pirizio aqai evako komia seini kale ta vo Izireli amu keta vai keruani voko kilo ko kio kale avo inio,” kiolake. 21Ni seta eri kikelake vokasi, “Eṉeta pui ṉe qoa kama leta Jiudia azo ṉoko bazu sama, ni puliala eṉe kale ala ta o kueva sai kazo kama bazu sate tu ruqe kaseṉo opa elo ṉo. 22Melai eṉeta ṉeda ṉai zaria taṉa viqo ṉoko kerukeru, ako ṉe baqumuka ta kiadakoi zama maba poso ta ke perima ṉoko pitasa madu sole,” kikelake.
23So sole seta ke takumukake ko ṉaniu Paula sate, ni matuma vaki ta ke kuevake koa ṉaniu kale sai vo Paula o evakoi. Nio vikale azo ti kobeta baroake ipu kale vota zakaremu omai ikake vo Baṉara ko lekasa puo voko bazubazu kale, ni vota matuma pesipesi o mati erekake se voko zakaremu pueko kale Mosese ko Bazu ni poropita madu ko riki ko kasekako quli, tu tuvevo ke ivo vo Jisu. 24Nio kake ta ke tuvevo putake tava viqo kale voko bazubazu, kake ta pui ke tuvevo putake. 25-29So sole seta keta zolizoliekiniake, nio Paula ta o kasevake matu tovatovala quli sekasi, ni eri kiolake, “Vo Tabu ala Auvana ta uria kaseko o evake vo poropita Aisea ko riki kale ko tuveano meko taite poso kasi. Ako vota eri kiove sole,
‘Ola ni eri pa kive nia maba poso kasi:
Meta viqo ti viqo me elou, melai pui meba paqumukou;
ni meta kelo ti kelo me elou, melai pui meba patapataekou.
Ako nia maba poso ko bulo ta zokele ke ikou sole,
ni seta ke sutamukou seko taliṉa
ni ke imadikou seko vilu
tu seko vilu ta pui ko kelokelozatou,
ni seko taliṉa ta pui ko viqaviqazatou,
ni seko bulo ta zokele ko elou,
melai pui so tea seta keta vaitou nio aṉa kasi, kiolake vo Baṉara,
ni aṉata a urikimo inio se,’ ka kiovema.”
Ni Paula ta o paikake pesio voko eri kio kale: “So sole meta paqumukomo ko eri; vo Baṉara ko pakiezato ko bazubazu ta lula ko soroiva pui Jiu amu kasi. Ni seta ke roveovou viqo ko!” kiolake. Ni voko so kio ko tova inio seta ke tanitake zio seko matuma zolizoliekinio kale ke ṉavio kude.
30Ni Paula ta omuqa sabere o evake o ṉavi o tabarikema pade kale, sai vo o baroekimekoi kiadamu seke kuevini velole vo. 31Ni vota okai bazubazutake vo Baṉara ko lekasa puo ni vota omai nianiiekivake vo Lekasa Jisu Karisito Vota parani putole ovai bazutake vo, ni puliala ta o tauroevake vo.
Currently Selected:
Iruruputo 28: BLBNT
Highlight
Share
Copy
Want to have your highlights saved across all your devices? Sign up or sign in
The New Testament in the Bilua language, Solomon Islands © The Bible Society of the South Pacific, 1995.
Iruruputo 28
28
Molota udu kale
1Ni so keru eṉe lula ṉe bakiake saita, inio eṉeta ṉe viqake voa udu ko ṉi ta Molota udu. 2Ni koa udu kale ama maba poso ta ke ṉelati matu uria baerebaereake eṉe. Ni nioro ta kota tanitake pialo ni sanusanu kota evake, so sole seta ke bainaekake ko uza ni ke baroekiṉelake eṉea kiada ṉela. 3Ni Paula ta o tuboekake ko sirusiru luko ni so keru vo obe vaeka keru koa sirusiru uza kale nio koa vualavualato ta ko saqorivake kala dole ni ota va nanae-kake Paula ko ṉase ni ota vinaike voko ṉase topi. 4Nio koa udu kale ke evani maba poso ke kea keru koa dole kobeta soilako vo Paula ko ṉase topi nio eri kikelake ke ṉavio kude, “Koe, nea maba ta kala vouvato ko maba inio, vota pui opa voula ivere kale, melai sidopu ko baṉara poso ta pui kova zaria tu vota o saevou,” kikelake. 5Melai Paula ta o pirupusaekake koa dole uza kale, ni kota pui ruqe ko ivake. 6Ni seta keta va tarekake tava tubu ko, ma voko taukavo pialo ni vou. Melai seta ke taruanake rosi ama taku melai pulia quli ke keake kiada keru ko kavani jari, so sole seta ke besiekake seko kerukeru ni eri kikelake, “Koe, nei ta kala baṉara inio!” kikelake.
7Ni koa zaekale azo ta pui vaṉa kama miduku poso Pabiliasi ko, vota koa udu kale ala matula lekasa. Ni vota o odieṉelake eṉe voko pade kasi ni o ṉelati uria baerebaereake eṉe, ni eṉeta ṉe evake sai zouke ṉaniu. 8Ni Pabiliasi vo mama, vo tataṉo ni dara suru ko voani, ta obeta tekuake kobo topi. Nio Paula ta o amaqeake voko lose kale, ni o vararaitake, ni ovai ivikake voko ṉase, ni o urikivake vo. 9Nio so keru koko ereiva keru, kiadamu koa udu kale ama vere amu ta ke kuevake vokasi ni vota o urikimake se. 10Ni seta ke katiṉelake kubo katizato ni so keru eṉe ṉe dadaova keru seta ke ṉelai zuranikake kubo quli ko eṉe ko tauveṉelo ama quli.
Molota udu kale azo ti Romu
11Zouke kaboso sai ṉe evake inio eṉeta ṉe vaekaziake Alekezadaria ala vaka kale, modi baṉara beku votonio sala, vo koa sarosaroro ko taku kale o eveni koa udu kale. 12Ni eṉeta ṉe varerikake Sairakiusi peuru kale ni ṉe evake sai zouke ṉaniu. 13Ni sai kazo ṉe dadaoke ni mata ṉe varerikake Reqiumi peuru kale. Ni koko raneo kale ta kala ṉoma ururu ota puzetake, nio koko omuqala ṉaniu kale inio ṉe baroake Puteoli peuru kale. 14Sai nio eṉeta ṉe meake kama lotu maba madu seke taipaziṉeleni eṉe, ni eṉeta ṉe evake sekasi sai omadeu vuiki. Ti sai kazo eṉeta ṉe luluekake ko matu keve tu ṉe barolo Romu peuru kale. 15Ni se Romu ama lotu maba poso keta ṉela viqake ta eṉeta sipole ṉeda barolou sai kio, nio kake seta ke kuevake Apiasi maketi ko evakoi ni kake ta Zouke Mamazopade ka kikelako zaekale sai kepa toraeṉelake.#28:15 Apiasi maketi ko zae ta 43 maelo (69 kilomita) tiniavo koko vaṉa Romu azo ni Zouke Mamazopade ta 33 maelo (53 kilomita) Romu azo. Ni so keru Paula o mea keru se vota o ilusivake vo Baṉara ni ota matu zaubariake.
Romu peuru kale
16Ni so keru eṉe ṉe baroa keru Romu, seta ke zarievake vo Paula tu vota o elo kala pade kale kala solodia ko vailo kale. 17Ni zouke ṉaniu ko tova inio Paula ta o nokaemake sai ke evani Jiu ama tanatanamu vatovatoito ko pesipesito kale, sai nio vota eri kiolake sekasi, “A baerebaere poso mela, aṉata pui aba ereke ruqe ama kalo animeko maba madu kasi ni so jari pui aba bikoirike animeko vikuvikula bazu. Melai seta ke vaelake Jerusalema pirito pade kale ni ke lati sorotake aṉa se Romu amu ko ṉase topi. 18Ni aṉako kuimakuimaelo ko tova inio se Romu amu ta kela zariake rupasilo aṉa, ako ke keake ta aṉata puliama sarueko aba ereke ko vou ko malezikako sole. 19Melai se Jiu amu ta pui kekai zariake ko, Sokale avo inio aṉata a basetake a ṉavi tu aṉata a zio Matu Aikovakova kasi titizato kale, rouka aṉata pulia quli aba mai kuirikou a ṉaviko kuniale amu melai. 20Sokale avo inio aṉata a odiemelala me tu aqai pesio komi mekasi. Ako koko tuveano ko aṉa eria pirizio aqai evako komia seini kale ta vo Izireli amu keta vai keruani voko kilo ko kio kale avo inio,” kiolake. 21Ni seta eri kikelake vokasi, “Eṉeta pui ṉe qoa kama leta Jiudia azo ṉoko bazu sama, ni puliala eṉe kale ala ta o kueva sai kazo kama bazu sate tu ruqe kaseṉo opa elo ṉo. 22Melai eṉeta ṉeda ṉai zaria taṉa viqo ṉoko kerukeru, ako ṉe baqumuka ta kiadakoi zama maba poso ta ke perima ṉoko pitasa madu sole,” kikelake.
23So sole seta ke takumukake ko ṉaniu Paula sate, ni matuma vaki ta ke kuevake koa ṉaniu kale sai vo Paula o evakoi. Nio vikale azo ti kobeta baroake ipu kale vota zakaremu omai ikake vo Baṉara ko lekasa puo voko bazubazu kale, ni vota matuma pesipesi o mati erekake se voko zakaremu pueko kale Mosese ko Bazu ni poropita madu ko riki ko kasekako quli, tu tuvevo ke ivo vo Jisu. 24Nio kake ta ke tuvevo putake tava viqo kale voko bazubazu, kake ta pui ke tuvevo putake. 25-29So sole seta keta zolizoliekiniake, nio Paula ta o kasevake matu tovatovala quli sekasi, ni eri kiolake, “Vo Tabu ala Auvana ta uria kaseko o evake vo poropita Aisea ko riki kale ko tuveano meko taite poso kasi. Ako vota eri kiove sole,
‘Ola ni eri pa kive nia maba poso kasi:
Meta viqo ti viqo me elou, melai pui meba paqumukou;
ni meta kelo ti kelo me elou, melai pui meba patapataekou.
Ako nia maba poso ko bulo ta zokele ke ikou sole,
ni seta ke sutamukou seko taliṉa
ni ke imadikou seko vilu
tu seko vilu ta pui ko kelokelozatou,
ni seko taliṉa ta pui ko viqaviqazatou,
ni seko bulo ta zokele ko elou,
melai pui so tea seta keta vaitou nio aṉa kasi, kiolake vo Baṉara,
ni aṉata a urikimo inio se,’ ka kiovema.”
Ni Paula ta o paikake pesio voko eri kio kale: “So sole meta paqumukomo ko eri; vo Baṉara ko pakiezato ko bazubazu ta lula ko soroiva pui Jiu amu kasi. Ni seta ke roveovou viqo ko!” kiolake. Ni voko so kio ko tova inio seta ke tanitake zio seko matuma zolizoliekinio kale ke ṉavio kude.
30Ni Paula ta omuqa sabere o evake o ṉavi o tabarikema pade kale, sai vo o baroekimekoi kiadamu seke kuevini velole vo. 31Ni vota okai bazubazutake vo Baṉara ko lekasa puo ni vota omai nianiiekivake vo Lekasa Jisu Karisito Vota parani putole ovai bazutake vo, ni puliala ta o tauroevake vo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
The New Testament in the Bilua language, Solomon Islands © The Bible Society of the South Pacific, 1995.