Matius 7
7
Jang kase sala orang
(Luk. 6:37-38, 41-42)
1Yesus bilang lagi, “Jang ngoni kase sala pa orang laeng, supaya Tuhan Allah me tara kase sala pa ngoni. 2#Mrk. 4:24Karna sama deng ngoni kase sala pa orang laeng, Tuhan Allah me akan kase sala pa ngoni. Kong ukuran yang ngoni pake untuk ukur orang laeng pe sala, Tuhan Allah me akan pake untuk ukur ngoni pe sala. 3Ngoni jaga perhatikan orang laeng pe sala yang kacil, tapi ngoni pe sala yang basar ngoni kase badiam! Itu sama deng ampas kayu yang kacil di ngoni pe sudara pe mata, ngoni bisa lia, padahal balak spanggal yang ada pele ngoni pe mata sandiri, ngoni tara lia. 4Jadi bagimana kong ngoni bisa bilang pa ngoni pe sudara, ‘Mari kita kase kaluar ampas kayu dari ngana pe mata’, padahal balak spanggal di ngoni pe mata sandiri, ngoni kase biar. 5Ee, ngoni orang munafik, kase kaluar dulu balak spanggal dari ngoni pe mata, baru ngoni bisa lia bae-bae, supaya ngoni bisa kase kaluar ampas kayu dari ngoni pe sudara pe mata.
6Jang ngoni kase Tuhan pe firman pa orang yang tara mau tarima. Barang, itu sama deng ngoni buang apa yang kudus di anjing kong anjing itu cuma bale gigi pa ngoni, atau sama deng ngoni buang mutiara yang mahal ka sana di babi kong babi itu cuma injang-injang mutiara itu.”
Minta pa Tuhan Allah apa yang ngoni perlu
(Luk. 11:9-13)
7Yesus bilang lagi, “Minta suda pa Tuhan Allah apa yang ngoni perlu, nanti Dia akan kase apa yang ngoni minta itu. Cari suda pa Tuhan Allah apa yang ngoni perlu, nanti ngoni akan dapa itu dari Dia. Toki suda Tuhan Allah pe pintu, nanti Dia akan buka pintu untuk tolong pa ngoni. 8Karna tiap orang yang minta pa Tuhan Allah, dia akan dapa. Tiap orang yang cari dia pe perlu pa Tuhan Allah, dia akan dapa. Deng tiap orang yang toki Tuhan Allah pe pintu, Tuhan Allah akan buka pintu untuk tolong pa dia.
9Tara mungkin kalu ngoni pe ana minta makanang kong ngoni kase batu pa dia. 10Deng tara mungkin kalu ngoni pe ana minta ikang kong ngoni kase ular pa dia. 11Jadi biar ngoni pe hati tara bae, tapi ngoni tau bagimana kase barang yang bae pa ngoni pe ana-ana. Apalagi ngoni pe Bapa yang di sorga! Dia pe hati paling bae, Dia pasti mo kase yang bae pa orang-orang yang minta pa Dia.
12 #
Luk. 6:31
Jadi, apa saja yang bae yang ngoni suka orang biking pa ngoni, itu suda yang ngoni musti biking pa orang laeng. Deng ngoni biking bagitu, ngoni so biking apa yang tatulis di lima kitab Musa deng di nabi-nabi laeng pe kitab.”
Iko jalang yang sengsara la dapa hidup deng Tuhan Allah slama-lamanya
(Luk. 13:24)
13 #
Luk. 13:24
Yesus bilang lagi, “Maso suda iko pintu yang sempit! Barang, kalu ngoni maso iko pintu yang lebar, itu mo pigi di neraka, dia pe jalang memang gampang, deng banya orang yang iko di situ. 14Tapi, kalu ngoni maso iko pintu yang sempit, ngoni mo dapa hidup deng Tuhan Allah slama-lamanya, dia pe jalang memang sengsara, deng cuma sadiki orang yang iko di situ.”
Ati-ati deng nabi-nabi palsu
(Luk. 6:43-44)
15Yesus bilang lagi, “Ngoni musti ati-ati deng nabi-nabi palsu yang datang pa ngoni! Barang, dorang bilang kata, dorang itu orang yang jaga kase turus Tuhan Allah pe pasáng, padahal bukang. Dorang pura-pura bae sama deng domba, padahal dorang jahat sama deng anjing utang. 16Ngoni bisa dapa tau dorang itu nabi-nabi palsu dari apa yang dong biking. Itu sama deng rumpu yang baduri, tara mungkin babua anggur atau babua ara. 17Samua pohong yang bagus, pasti dia pe bua me bagus, tapi pohong yang tara bagus, pasti dia pe bua me tara bagus. 18Tara mungkin pohong yang bagus kong dia pe bua tara bagus, atau tara mungkin pohong yang tara bagus kong dia pe bua bagus. 19#Mat. 3:10; Luk. 3:9Kong tiap pohong yang babua tara bagus, pasti orang mo potong kong bakar. 20#Mat. 12:33 Jadi torang bisa dapa tau, orang itu butul-butul nabi kalu yang dia biking itu bae.”
Tara samua orang mo jadi Tuhan Allah pe umat
(Luk. 13:25-27)
21Yesus bilang lagi, “Tara samua orang yang pangge pa Kita, ‘Tuhan, Tuhan’ akan jadi Kita pe umat kong Tuhan Allah Berkuasa sebagai Raja pa dorang pe hidup, tapi cuma orang yang jaga biking Kita pe Bapa di sorga pe mau saja. 22Nanti di hari kiamat, banya orang yang mo bilang pa Kita bagini, ‘Tuhan! Tuhan! Torang ini so kase turus Tuhan Allah pe pasáng pake Tuhan Allah pe nama. Torang me so user setang dari orang-orang, pake Tuhan pe kuasa. Deng torang lagi so biking banya mujizat pake Tuhan pe kuasa.’
23 #
Mzm. 6:9
Tapi waktu itu suda, Kita mo bilang pa dorang bagini, ‘Kita tara perna kanal pa ngoni. Bapinda suda dari sini, ngoni yang jaga biking barang yang jahat!’ ”
Orang percaya musti biking apa yang Yesus bilang
(Luk. 6:47-49)
24Yesus bilang lagi, “Tiap orang yang dengar apa yang Kita bilang ini kong biking, dia itu sama deng orang pande yang kase badiri ruma di atas batu fandasi yang kuat. 25Jadi waktu ujang basar sampe banjir datang deng angin kuat bage ruma itu, ruma itu tara rubu karna dia badiri di atas batu fandasi yang kuat.
26Tapi tiap orang yang dengar apa yang Kita bilang ini kong dia tara biking, dia sama deng orang bodo yang kase badiri ruma di atas paser. 27Waktu ujang basar sampe banjir datang, deng angin kuat bage ruma itu, ruma itu rubu kong rusak barát.”
Orang banya jadi herang waktu dengar Yesus pe ajaran
28 #
Mrk. 1:22; Luk. 4:32 Waktu Yesus pe abis bicara, orang banya itu jadi herang deng Dia pe ajaran itu, 29karna Dia mangajar pa dorang deng kuasa, tara sama deng dorang pe guru-guru agama Yahudi yang ahli lima kitab Musa.
Currently Selected:
Matius 7: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020