2 Korintus Kitab ini pe keterangan
Kitab ini pe keterangan
Orang yang tulis kitab ini: Kitab 2 Korintus ini, satu surat yang Paulus tulis. Paulus itu orang Yahudi dari aliran Farisi, yang pegang kuat aturan-aturan di lima kitab Musa (Flp. 3:5-6). Dulu, dia yang jaga siksa pa orang-orang percaya pa Yesus Kristus karna dia kira kata, dorang iko ajaran sesat. Tapi, satu kali dia dapa penglihatan dari Yesus Kristus, kong Yesus pangge pa Paulus untuk iko pa Dia. Yesus me utus pa Paulus untuk kase tau Kabar Bae tentang Yesus Kristus pa orang-orang yang bukang Yahudi (Kis. 9:1-19).
Kitab ini untuk sapa: Kitab 2 Korintus ini surat yang kedua yang Paulus tulis untuk jemaat di kota Korintus. Paulus dulu tinggal di kota Korintus, tapi waktu Paulus so kaluar dari kota itu, ada orang-orang yang tara suka pa Paulus mulai muncul di Korintus. Dorang maso di jemaat kong bilang kata, Paulus itu bukang Tuhan Yesus pe utusan yang orang sebut rasul. Dorang pe bicara yang tara butul itu Paulus dengar, kong Paulus utus pa Titus pigi di kota Korintus. Titus bawa Paulus pe surat yang pertama untuk jawab pa orang Korintus yang tara tarima pa dia. Kong waktu Titus bale dari Korintus untuk baku dapa deng Paulus di daera Makedonia, dia kase tau pa Paulus, ada banya orang Korintus yang dong pe hati so beruba, dorang so mangaku Paulus itu rasul, kong dorang so ingin baku dapa ulang deng Paulus. Tapi ada lagi babarapa orang yang pe hati masi karas. Jadi waktu Paulus dengar kabar itu, dia tulis surat yang kedua ini.
Ajaran-ajaran di kitab ini: Paulus tulis surat ini untuk lawan pa orang-orang yang lawan pa dia. Barang, dorang pe tujuan itu supaya orang-orang tara mangaku Paulus itu rasul, deng dorang berusaha kase putar bale Kabar Bae tentang Yesus Kristus yang Paulus so kase tau (2Kor. 11:4, 12:11). Jadi, Paulus kase jelas tentang dia pe karja untuk kase tau Kabar Bae tentang Yesus Kristus supaya dorang mangaku dia itu rasul (2Kor. 2:14–6:10). Dia me bilang, dia sayang skali pa dorang (2Kor. 6:11-13, 7:2-4, 13-16), kong dia sanang, karna banya dari dorang yang so mangaku Paulus itu rasul (2Kor. 7:5-13). Abis itu, dia minta pa dorang supaya dorang kumpul doi sumbangan untuk kase pa orang-orang percaya yang susa di daera Yudea (2Kor. 8–9), supaya waktu dia datang pa dorang, dia bole ambe doi itu kong bawa di daera Yudea. Abis itu, Paulus togor karas pa orang-orang yang tara mau mangaku dia itu rasul (2Kor. 10–13).
Currently Selected:
2 Korintus Kitab ini pe keterangan: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020