Chivumbuzi 5

Kabuku ndi Kana Kamberere

1Ndipo ndinguwona mujanja lamarghe laku Mweniyo wajanga pa chitengu-chaufumu chobuku lakulembeka mukati ndi ku msana, lakuzighirika ndi vizighiri vinkhonde ndi viŵi. 2Ndipo ndinguwona mungelo wanthazi wakumemeza ndi mazu ghakuru, “Njani wakwenere kubanuwa buku lo, ndi kumatuwa vizighiri vyake?” 3Ndipo pengavi yumoza kuchanya, chingana mpha charu chapasi, chingana nkhusi kwa charu, wanthazi kubanuwa buku lo, chingana nkhulereskamo. 4Ndipo ndaliyanga ukongwa ine pakuti wengavi kusanirika yumoza kubanuwa buku lo, chingana nkhulereskamo, 5ndipo yumoza wamu ŵara wo wangunena nane, “Ungaliyanga cha: awona, Nkharamu yo yamu fuku laku Yuda, nkhorozu yaku Davidi yo yapunda ndiyo yiziŵa kubanuwa buku lakuzinga ndi vizighiri vyake vinkhonde ndi viŵi.”

6Ndipo ndinguwona pakati pa chitengu-chaufumu ndi vyamoyo vyo vinayi, ndi mukati mu ŵara wo, Mwana-mberere wakumapo, ulaka nge wangubayika, wakuŵa ndi sengwe nkhonde ndi ziŵi ndi maso ghankhonde ndighaŵi, ghenigho mbazimu ŵankhonde ndi ŵaŵi ŵaku Chiuta, ŵakutumika mu charu chose. 7Ndipo wanguza, wanguto buku mu janja lamarghe laku Mweniyo wajanga pa chitengu-chaufumu cho. 8Ndipo penipo wanguto buku lo, vyamoyo vinayi vyo ndi ŵara wo machumi ghaŵi ndi ŵanayi ŵanguwa pasi paurongo pa Mwana-mberere yo, wose yumoza ndi yumoza wenga ndi kaligu, ndi mbali zagolide zakuzazika ndi vyachema (vyenivyo ndi marombu gha ŵakupaturika). 9Ndipo ŵambanga sumu zifya, ŵakuti,

“Wakwenere ndimwe kuto buku lo, ndi kumatuwa vizighiri vyake:

pakuti mungubayika, ndipo mwaŵawombole kwaku Chiuta ndi ndopa zinu

ŵanthu ŵamu fuku lose,

ndi karongoroledu, ndi khamu ndi mtundu;

10ndipo mwaŵazgora Chiuta widu ŵaŵe ufumu ndi uzukuru;

ndipo ŵakausanga panupasi.”

11Ndipo ndingulereska, ndipo ndinguvwa mazu gha ŵangelo ŵanandi kwakuzingiriya chitengu-chaufumu cho, ndi vyamoyo vyo, ndi ŵara wo; ndipo unandi waku wo wenga vikwi chumi vyakupindika vikwi chumi, ndi vikwi vya vikwi, 12wo ŵakambanga ndi mazu ghakuru kuti, “Ngwakwenere Mwana-mberere yo wangubayika, kuronde nthazi, ndi usambasi, ndi zeru, ndimazaza, ndi rumbu, ndi unkhankhu, ndi thumbiku!” 13Ndipo chilengeka chose cho che kuchanya, ndi panupasi, ndi kusi kwa charu, ndi mu nyanja, ndi vyose vya mwenimo, ndinguvivwa vyakuti, “Kwaku mweniyo waja pa chitengu-chaufumu cho, ndi ku Mwana-mberere, kuŵiye thumbiku, ndi rumbu, ndi unkhankhu, ndi mazaza ku muyaya muyaya!” 14Ndipo vyamoyo vyo vinayi vyatinge, “Ameni.” Ndipo ŵara wo ŵanguwa pasi, ndipo ŵangulambiyapo.

Currently Selected:

Chivumbuzi 5: TongaMw

Highlight

Copy

Compare