Maŵerengedu 14

ŴaYisraele ŵakhumba kuwere ku Egipiti

1Sono wumba wose ungusoska mazu ndi kubongo, ŵanthu ŵanguliya usiku wuwa. 2Ndipo ŵaYisraele wose ŵangudinginikiya Mosese ndi Aroni; wumba wose watinge, “Kwenga kwamampha asani tingufwiya mu Egipiti! Kwakuruska kufwiya mu mabozwa yagha! 3Chifukwa nchine Ambuya atitore ku charu chinu, kuti tifwe ndi lipanga? Ŵawoli ŵidu ndi ŵana ŵidu ŵaŵenge ŵakuskoŵeka; Asi nkhwamampha kwaku ifwe kuti tiwerenge ku Egipiti?” 4Ndipo ŵangukambirana yumoza ndi munyake, “Tiyeni tisankhe murongozgi tiwerenge ku Egipiti.” 5Viyo Mosese ndi Aroni ŵanguwa kavunama pa maso pa wumba wose wa ŵaYisraele. 6Ndipo Yoswa mwana waku Nuni ndi Kalebe mwana waku Yefune, wo ŵenga ŵamoza ŵaku wo ŵangamuskora charu cho, ŵanguparuwa vyakuvwara vyawo, 7ndipo ŵangurongoro ndi wumba wose wa ŵaYisraele kuti, “Charu cho tingwendamo kuchipachiya nchamampha kwakuruska. 8Asani Ambuya akondwa nafwe ŵakatitorenga ku charu cho ndi kwachitipaska, ncharu chakutaŵala mkaka ndi uchi, 9chimoza pe nchakuti, mureke kugalukiya Ambuya; ndipo mungawopanga ŵanthu ŵa charu chiya cha pakuti tikaŵarghanga nge nchiŵande ŵalivi kuvikirika sono, ndipo Ambuya ŵendi ifwe mungawopanga iwo cha.” 10Kweni mzinda wose watinge tiŵadine ndi mya. Sono unkhankhu wa Ambuya unguwomeka pa hema lakuwunganamo ku ŵaYisraele wose.

Mosese waŵeyere ŵanthu kwaku Chiuta

11Ndipo Ambuya anguti kwaku Mosese, “Mpaka zuŵanji ŵanthu yaŵa ŵakandikalariskanga? Ndipo mpaka zuŵanji ŵakauranga kundigomezga, chingana ndachita visimikizgu vinandi mukati mwawo? 12Ndiŵapumenge ndi nthenda yakofya ndi kupoka chihara kwaku wo, kweni ndikakuchitaninga kuti muŵe mtundu ukuru ndi wanthazi kwakuruska iwo.”

13Kweni Mosese wangunena ndi Ambuya, “Iku ŵaEgipiti ŵakachivwanga ichi, pakuti mungukwezga ŵanthu yaŵa munthazi zinu kuŵatuzga mwaku wo, 14ndipo ŵakaŵatauliyanga ŵakuja mu charu ichi. Iwo ŵavwa kuti imwe Ambuya mwe pamoza ndi ŵanthu yaŵa; pakuti imwe Ambuya muwoneka chisku ndi chisku, ndi kuti mtambo winu utuma pachanya pawo ndi kuti imwe mutiŵadanjiriya, ndi msana mu mzati wa mtambo, ndi usiku mu mzati wa moto. 15Ndipo asani mubayenge ŵanthu yaŵa wose teteti, sono mitundu yeniyo yavwa mbiri yinu yikakambanga kuti, 16‘Nchifukwa chakuti Ambuya ŵengavi nthazi kuŵaserezga ŵanthu yaŵa mu charu cho anguŵarapiya, chifukwa cho aŵakosore mu bozwa.’ 17Viyo sono, nditumuŵeyereni, nthazi zinu Ambuya zikuwe nge ndimo mungukambiya, kuti, 18‘Ambuya mbakukunthiyapo ndi alisungu likuru, akugowoke kwananga ndi maphuru, kweni kuti akamlekanga waka cha pa nthowa ye yose wa mrandu, ndiwo ŵakulanga ŵana chifukwa cha kwananga kwa auskeu, mpaka ku migonezi wa chitatu ndi wa chinayi.’ 19Gowokiyani kwananga kwa ŵanthu yaŵa, ndikuŵeyani kwakulingana ndi lisungu linu likuru, ndipo nge ndimo mwaŵiya ŵakugowoke ŵanthu yaŵa, kuturiya ku Egipiti mpaka kunu ku sono.”

20Ndipo Ambuya anguti, “Ndagowoka, kwakuyana ndi mazu ghako; 21kweni kwakuneneska mo ndiliri wamoyo ine, ndimo charu chose chikazazikiyanga ndi unkhankhu wa Ambuya, 22ndikalanganga ŵanthu wose wo ŵawona unkhankhu wangu ndi vya minthondwi vyangu vyo ndinguchita mu Egipiti ndi mu bozwa, ndipo ŵandesa sono kwanyengo izi chumi ŵakana kuvwa mazu ghangu, 23palivi nanga njumoza yo wakachiwonanga charu cho ndingurapiya auskeu, chingana njumoza waku wo wangundikalariska kuti wakachiwonanga cho cha. 24Kweni mteŵeti wangu Kalebe, chifukwa wendi mzimu unyake ndipo wandilondo ine kwakufikapo, iyo nkhamutoliyanga mu charu cho wanguyamo, ndipo mphapu yake yikachiharanga. 25Sono pakuti Amaleke ndi ŵaKanani ŵaja mu madambo, la mawa mung'anamuke muruti ku bozwa pa ulendo wakuya ku nyanja Yiyera.”

Ŵakudandaula kuti ŵazomerezgeka cha kwachisere mu charu cha Kanani

26Ndipo Ambuya angurongoro ndi Mosese ndi Aroni, 27“Mpaka zuŵanji ndikunthiyengepo pa wumba uheni uwu wo udinginika kumikana nane? Ndavwa madinginiku gha ŵaYisraele, gho ŵadinginikiya pa ku Ine. 28Nenani kwaku iwo, ‘Mo ndiliri wamoyo,’ atiti Ambuya, ‘nge ndimo mwarongorore mu makutu ghangu mwenimo ndimu ndikachitiyanga kwaku imwe: 29viŵanda vinu vikawanga mu bozwa ili; wose ŵaku imwe wo ŵanguŵerengeka kwamba kwa virimika machumi ghaŵi ndi kuruska po, wo ŵadinginika pa kumikana ndi ine. 30Palivi yumoza wakaserenga mu charu cho ndingurapa kuti mwamujamo, kweni Kalebe pe mwana waku yefune ndi Yoswa mwana waku Nuni. 31Kweni malitema ghinu gho mwatinge ghakaŵanga miskowo, yigho ndikaghaserezganga, ndipo ghakachiziŵanga charu cho imwe mwayuyuwa. 32Kweni imwe, viŵanda vinu vikawanga mu bozwa lenili. 33Ndipo ŵana ŵinu ŵakaŵanga ŵaliska mu bozwa virimika machumi ghanayi, ndipo ŵakasuzgikanga chifukwa cha mauyaghayagha ghinu, mpaka penipo viŵanda vinu vyamaliya mu bozwa, 34kwakulingana ndi mazuŵa mwaku gho mungamuskore charu, inya mazuŵa machumi ghanayi, mukanyamuwanga kwananga kwinu virimika machumi ghanayi, chirimika chimoza chifukwa cha zuŵa limoza, ndipo mukaziŵanga kuchenya kwangu.’ 35Ine Ambuya, ndakamba; kwakuneneska ndikachitangadi ichi ku mpingu wose uheni uwu, ŵanthu ŵeniwo ŵawungana pamoza kumikana nane; mu bozwa ili ndimu ŵakamaliyanga, ndipo ndimu ŵakafwiyanga.” 36Sono ŵanthurumi wo Mosese wangutuma kwachiskora charu cho, ŵanguti ŵaweko ndikuchitiska wumba wose kudinginikiya iyo ndi mbiri ya charu chiya kuti nchiheni, 37wo angupinga makani ghaheni gha charu chiya, ŵangufwa ndi nthenda ya kofya pa maso pa Ambuya. 38Kweni Yoswa mwana waku Nuni ndi Kalebe mwana waku Yefune wo ŵenga ŵamoza ŵa ŵanthu wo ŵangusiyika ŵamoyo.

Kwamba kuchithereska charu

(Marangu 1.41-46)

39Ndipo Mosese wangunena ndi ŵaYisraele mazu ghose yagha, ŵanthu ŵangutenje ukongwa. 40Ndipo ŵangusoka ndi mlenji-lenji ŵangukwera ku mapiri ghatali, wanguti, “Ehe, tepano, ndipo tikakweriyanga ku malo gho Ambuya angupangana; pakuti talakwa ifwe.” 41Sono Mosese wanguti, “Chifukwa nchine muyeya dangu la Ambuya, paulengevi mwaŵi? 42Mungakweriyangako cha vinu mungapumika ndi ŵarwani ŵinu, pakuti Ambuya ŵalivi kwenda pamoza namwe. 43Pakuti Amaleke ndi ŵaKanani ŵekwenikuwa kuurongo kwinu, ndipo mwamubayika ndi nkhondo; chifukwa mwatuwako ku kulondo Ambuya, viyo Ambuya kuti akaŵanga namwe cha.” 44Kweni ŵangukokomezgapo kukwere ku mapiri, nanga bokosi la phanganu la Ambuya pamwenga Mosese wengavi kutuwamu mu ugoŵi. 45Ndipo Amaleke ndi ŵaKanani ŵajanga mu phiri leniliya ŵangusika, ŵanguŵapuma ndi kuŵadikiska mpaka ku Horoma.

Currently Selected:

Maŵerengedu 14: TongaMw

Highlight

Copy

Compare