Mika 6
6
Yisraele wasuskika chifukwa cha ulakwi wa ŵanthu ŵake
1Vwani cho Ambuya akamba:
Yukani, kambani mlandu winu panthazi pamapiri,
ndipo mapiri ghamanaghamana ghavwe mazu ghinu.
2Vwani, imwe mwamapiri, suskanu ya Ambuya,
ndi imwe viŵanja vyakukho vya charu chapasi;
pakuti Ambuya ŵe ndi suskanu ndi ŵanthu ŵawo,
ndipo akamikananga ndi Yisraele.
3“A! Mwa ŵanthu ŵangu ndachitanji kwaku imwe?
Ndamusuzgani imwe ndikanthu uli?
Mundamuke!
4Pakuti ndamutuzgani mu charu cha Egipiti,
ndi kumuwomboni mu nyumba ya uŵanda;
ndipo ndingukutumiyani panthazi pinu Mosese,
Aroni ndi Miriamu ŵarongozge.
5A! Mwa ŵanthu ŵangu, kumbukani cho Balaki,
karonga wa Moabu wangughanaghana;
ndi cho Balamu mwana waku Beori wangumwamuka;
ndi cho chinguŵako kutuwa ku Shitimi ku Gilgala,
mwakuti muziŵe milimu ya utaski wa Ambuya.”
6“Nkhazanga ndi chine pa maso pa Ambuya,
ndi kusindama pa maso paku Chiuta wa pachanya paku vyose?
Kumbi nkhazanga pa maso pake ndi sembe yakocha,
ndimatholi gha chirimika chimoza?
Kumbi Ambuya akakondwanga
ndi vikwi vya ŵana ŵa mberere ŵanthurumi,
ndi vikwi chumi (10,000) vya misinji ya mafuta?
7Kumbi nkhaperekanga mwana wangu wa
umwali chifukwa cha maulakwi ghangu,
chipasi cha liŵavu langu chifukwa cha kwananga kwa mzimu wangu?”
8Iyo wakurongo wa munthu, cho nchamampha,
ndi cho Ambuya akhumbiya iwe,
kweni kuchita urunji, ndi kwanja ulemu,
ndi kwenda kwakujiyuyuwa ndi Chiuta wako?
9Mazu gha Ambuya ghadanirizga ku msumba
ndipo ndi vinjeru vyamampha kopa zina linu:
“Vwani, mwa fuku ndi
mwakuwungana mu msumba!
10Kumbi ndingaruwa usambasi wa uheni mu nyumba ya muheni,
ndi thumba la vyakupimiya
vyakupusika yo ngwakutembeka?
11Kumbi ndingamuleka munthu yo wendi mweso yiheni,
ndi thumba la mauzitu ghakupimiya ghakupusika?
12Ŵanthu ŵinu ŵasambasimba kuzazika ndi nkhaza;
ŵakuja mwaku imwe ŵakamba mautesi,
ndi lilime lawo ndakupusika mu mlomo wawo.
13Chifukwa ichi ndayamba kumupumani,
kumupa suwani chifukwa cha maulakwi ghinu.
14Mukarghanga, kweni mukagutanga cha;
muŵenge ndi nja mukati mwinu; mukaŵikanga pade,
kweni kuti mukasunganga cha,
ndipo cho musunga ndichiperekenge ku lipanga.
15Mukamijanga, kweni mukavunanga cha,
mukapuwanga maolivi,
kweni kuti mukajitukutizganga ndi mafuta cha;
mukapuwanga mphereska,
kweni kuti mumwenge vinyo wake cha.
16Chifukwa mwasunga vilayizgu vyaku Omri,
ndi vyakuchita vyose vya nyumba yaku Ahabu;
ndi mwayenda mufundu zawo; ndi mupasuweninge,
ndi ŵakujamo ŵinu wakafyonyekanga;
viyo mukayeyekanga ndi ŵanthu.”
Currently Selected:
Mika 6: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
