ŴaLevi 27
27
Dangu lapa marapu
1Ambuya angunena kwaku Mosese, 2“Ukambe ku ŵaYisraele kuti, Asani munthu warapa rapu kupaska ŵanthu ku Ambuya, iwe utenere kutema mtengo wake, 3mtengo wa munthurumi kwamba pa virimika machumi ghaŵi (20) ura wake kwachifika chirimika machumi ghankhonde ndi limoza (60) ukaŵanga ndrama machumi ghankhonde (50) za siliva kwakuyana ndi ndrama ya mu malo ghakupaturika. 4Asani munthu yo ndi munthukazi, uteme mtengo wake kuŵa ndrama machumi ghatatu (30). 5Asani munthu yo ngwa virimika kwamba ku vinkhonde kwachifika virimika machumi ghaŵi (20) uteme mtengo wa munthurumi wa ndrama za siliva, machumi ghaŵi (20) ndi munthukazi ndrama chumi limoza. 6Asani munthu ngwa msinkhu wa mwezi umoza kwachifika ku virimika vinkhonde, uteme mtengo wa munthurumi wa ndrama zinkhonde za siliva, ndi wa munthukazi uteme ndrama zitatu za siliva. 7Ndipo asani msinkhu wa munthu yo ngwa virimika machumi ghankhonde ndi limoza (60) pamwenga kuruska po, sono mtengo wa munthurumi ndi ndrama chumi pachanya zinkhonde (15); ndi wa munthukazi ndrama chumi. 8Ndipo asani munthu ndi msauchi; watondeka kulipa mtengo wo iwe watema, wakazanga ndi munthu yo paurongo pa mzukuru kuti mzukuru wateme mtengo wake. Wakatemanga mtengo kwakuyana ndi ndrama zo wakulipa we nazo.
9“Asani nchinyama cha mtundu wo wapereka sembe ŵanthu ku Ambuya, chose cho munthu wapaska ku Ambuya nchakupaturika. 10Kuti wakasinthiyangepo kanthu kanyake cha pamwenga mu malo mu chamampha kuŵikapo chiheni, pamwenga chiheni ndi chamampha, ndipo asani wasinthiskana nyama yinyake, sono zose ziŵi zikaŵanga zakupaturika. 11Ndipo asani nyama yo njambura kuphotoka yikwenere kuŵa sembe ku Ambuya cha, sono munthu yo wakatoliyanga nyama yo ku mzukuru. 12Mzukuru wakatemanga mtengo wa yamampha pamwenga wa yiheni. Ukaŵanga uli ndimo iwe, wa mzukuru, wateme. 13Kweni asani wakhumba kuyiwombo pa mtengo wake wakasazgiyangapo chigaŵa chimoza cha vigaŵa vinkhonde vya mtengo wake.
14“Asani munthu wapatuwa nyumba kuŵa yakupaturika ku Ambuya, mzukuru wakatemanga mtengo pa umampha wake, pamwenga uheni wake, kwakulingana nge ndimo mzukuru wateme mtengo. 15Ndipo asani yo watiyipatuliya ku Ambuya wakhumba kuyiwombo nyumba yo wakasazgiyangapo ndrama za chigaŵa chimoza cha chinkhonde cha mtengo wakutemeka, sono ndipo yikaŵanga yake.
16“Asani munthu wapatuliya ku Ambuya chigaŵa cha charu cho wahara, wateme mtengo kwakuyana ndi mbeu zo zemwenimo mbeu ya barile yakupanda yakuzaza sokora yikaguliskikanga mtengo wa ndrama machumi ghankhonde (50) za siliva. 17Asani wapatuwa munda wake kwamba pa chirimika cha wanangwa ukaŵanga wa mtengo wamampha; 18kweni asani wapatuwa munda pavuli pa chirimika cha wanangwa, sono mzukuru wakaŵerenganga ndrama kwakulingana ndi virimika vyakujako kwachifika ku chirimika chinyake cha wanangwa. Ndipo watuzgengeko ndrama zo ku mtengo wo watemanga. 19Ndipo asani yo wapatuwa munda wo wakhumba kuwuwombo, sono wakasazgiyangako chimoza cha chinkhonde cha mtengo wakutemeka, wakalipanga ndrama; sono munda ukaŵanga wa mweneko. 20Kweni asani kuti wakhumba cha kuwuwombo munda wo, pamwenga waguliska munda wo ku munthu munyake, kuti ukawombolekanga so cha. 21Munda wo po wafwatulika pa chirimika cha wanangwa, ukaŵanga wakupaturikiya ku Ambuya, kuŵa uli ndi munda wo ukupaturika; mzukuru ndiyo wakaŵanga nawo. 22Asani munthu wapatuliya ku Ambuya munda wo iyo wagula, wo kuti wawuhara cha, 23sono mzukuru wakatemanga mtengo wa munda wo kwachifika ku chirimika cha wanangwa, munthu yo wakaperekanga mtengo wakutemeka mu zuŵa lenilo upatulikiya ku Ambuya. 24Mu chirimika cha wanangwa munda wo ukawerenga ku munthu yo wanguwuguliska, yo wanguwuhara. 25Mtengo wose utemeke kwakuyana ndi shekelo lamu malo ghakupaturika: la magare#27.25 magare: yaka nkhandrama kamana ukongwa kuruska auzi limoza. machumi ghaŵi. 26Kwambura kudodoma cha, paulevi munthu yo wakapatuliyanga nyama ya umwali ku Ambuya, yeniyo yitenere kuperekeka ngenjakudanga kupapika, manyi ndi ng'ombe pamwenga mberere. 27Ndipo asani ndi nyama yakunguzgika, sono wangaziŵa kuyigula pa mtengo wo ungutema ndi kusazgiyako chigaŵa cha chinkhonde ndi chimoza. Kweni asani yindawomboleke yikaguliskikanga ndi mtengo wo mungatema.
28“Paulevi chinthu cho munthu wapatuliya ku Ambuya chikaguliskikanga pamwenga kuwomboleka, manyi ndi munthu manyi nchinyama, pamwenga chamu munda wake wo wahara; chinthu chose cha viyo nchakupaturika kwakufikapo ku Ambuya. 29Paulevi munthu yo wajipereke limu kukubayika mukati mu ŵanthu ŵake, ŵakawombolekanga; wakabayikanga nadi.
30“Msonkho wose wa chichumi cha vyamu charu, manyi ngwa mbeu yamu minda, pamwenga wa vipasi vya miti, ngwa Ambuya; ngwakupaturika ku Ambuya. 31Asani munthu wakhumba kuwombo kanthu kose ka chichumi cho, wakasazgiyangako chigaŵa chimoza cha vinkhonde. 32Ndipo cha chichumi chose cha miskambu ndi viŵetu, nyama yose yachichumi yo yiwezgeka ndi ndodo ya mliska, yikaŵanga yakupaturida ku Ambuya. 33Munthu wareke kufumbiriya kuti manyi njamampha pamwenga njiheni; chingana nkhusinthiskana cha. Ndipo asani wasinthiskana, iku zose ziŵi, iyo ndi yakusinthiskana yo zikaŵanga zakupaturika; kuti ziwombolekenge cha.”
34Yagha ndi marangu gho Ambuya angulanguliya Mosese ku ŵaYisraele pa phiri la Sinai.
Currently Selected:
ŴaLevi 27: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
