ŴaLevi 17
17
Ŵakanizgika kurgha ndopa
1Ndipo Ambuya anguti kwaku Mosese, 2“Ukambe kwaku Aroni ndi ŵana ŵake, ndi ku ŵaYisraele wose kuti Ambuya alangula, kuti. 3Asani munthu wa nyumba yaku Yisraele wabaya ng'ombe pamwenga mberere pamwenga mbuzi mu ugoŵi, pamwenga watiyibayiya kubwalo kwa ugoŵi, 4ndipo kuti watuza nayo ku khomo la chihema chakuwunganamo cha, kwachiyipereka kuŵa cha wezi ku Ambuya paurongo pa chihema cha Ambuya, munthu yo wakatamulikanga kuŵa wakulakwiya ndopa; wadiska ndopa; munthu yo wakadumulikangako ku ŵanthu ŵake. 5Uku nkhuti ŵaYisraele ŵatoliyenge sembe zawo zo ŵabayiya kubwalo, alinga ŵazitoliyenge zo ku Ambuya ku mzukuru pa khomo la hema lakuwunganamo, ŵazibaye kuŵa mipasku ya chimangu ku Ambuya; 6ndipo mzukuru wakawazganga ndopa pa jochero la Ambuya, pa khomo la hema lakuwunganamo, ndi kocha mafuta kuŵa mununkhu wakukondweska Ambuya. 7Viyo kuti ŵakabayiyanga so sembe zawo ku vikozgu cha, kwaku vyo ŵagarukiyako. Ili likaŵanga langulu muyaya kwaku wo mu migonezi yawo yose.
8“Ndipo ukatinge kwaku wo, munthu yose wa nyumba yaku Yisraele pamwenga ya ŵalendo ŵakutandala mukati mwawo, yo wapereka sembe yakocha pamwenga mpasku, 9kwambura kuza nayo ku khomo la hema lakuwunganamo, kuyipereka ku Ambuya; munthu yo wakadumulikangako ku ŵanthu ŵake.
10“Asani munthu wa nyumba yaku Yisraele pamwenga ya ŵalendo ŵakutandara mukati mwawo waturgha ndopa ze zose, ndikamikananga nayo munthu yo, ndipo ndikamudumuwangako ku ŵanthu ŵake. 11Pakuti umoyo wa liŵavu ndi ndopa; reka ndazisankha kuŵa zakupepeske pa jochero chifukwa chinu: ndi ndopa, ndizo umoyo, ndizo zichita mphepeska. 12Chifukwa cho ndaŵanene ŵaYisraele, paulevi munthu wa mukati mwinu yo wakarghanga ndopa chingana ndi mulendo wakutandara mukati mwinu. 13Ndipo yose wa ŵaYisraele, pamwenga ŵalendo ŵakutandara mukati mwawo pakusaka asani wabaya nyama pamwenga chiyuni vyo waturgha wadire pasi ndopa zake ndi kuziwunda ndi dongo.
14“Pakuti umoyo wa chamoyo chose ndi ndopa zake, chifukwa cho ndaŵanene ŵaYisraele, kuti, Mungarghanga cha ndopa za chamoyo chose, pakuti umoyo wa chamoyo chose ndi ndopa zake; we yose yo wakazirghanga wakadumulikangako. 15Ndipo munthu yose yo wakarghanga chakufwa chija; pamwenga cho chabayika ndi vikoko manyi yo munthu ndi mwenicharu pamwenga ndi mwendathowa wakachapanga vivwaru vyake wakasambanga mu maji, ndi kuŵa wakunguzgika mpaka mazulo; pavuli wakatozgekanga. 16Kweni asani walivi kuvichapa pamwenga kusamba liŵavu lake wakapinganga ulakwi wake”.
Currently Selected:
ŴaLevi 17: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
