Yuda 1

1Kalata wakutuwa kwaku Yuda mteŵeti waku Yesu Kristu, ndi mhurwa waku Yakobe, ku ŵakudanika wo ŵakwanjiwa mwaku Chiuta Dada, ndi ŵakusungikiya mwaku Yesu Kristu: 2Lisungu, chimangu, ndi chanju vyandaniskike mwaku imwe.

Ŵasambizgi ŵatesi

3Mwaŵakwanjiwa, pakutinthimikiya kukulembiyani vyapa utaski widu wamasanga, ndingukakamizgika kumlembiyani ndi kumchiskani kulimbiya pa chivwanu cho chaperekeka kamoza ku ŵakupaturika. 4Chifukwa ŵakwaŵiyamo kwaudeke ŵanthu ŵanyake wo kali ŵangutemeke limu ku chisusa chenichi, ŵambura uwopa Chiuta, ŵakusanduska wazi waku Chiuta widu ku uyaya, ndi ŵakumkana mweneko yija ndi Mbuyafwe Yesu Kristu. 5Kweni ndikhumba kumkumbuskani, mwaŵakuziŵiya limu vyose, kuti Ambuya, ŵati ŵataska khamu ku Egipiti, pavuli po anguŵananga ŵambura kuvwana. 6Ŵangelo nawo so viyo ŵeniwo ŵengavi kusunga ura waku ŵija, ŵangureka ujazi wapa mtima wawo, ŵaŵasunga mu magoŵa ghamuyaya pasi pa munkhorwe ku chisusa cha zuŵa likuru. 7Uli ndimo Sodomu ndi Gomora, ndi misumba yakuzunguliya, pakujipereke ku maureŵi kwakukozgana nawo, ndi pakusaka uyaya wakutimbang'a vyakawi, ŵaŵikikiya nge nchirongoleru, ndi kulangikiya ku chisusa cha moto wamuyaya.

8Kweni kwakukozgana nako ŵakulota yaŵa nawo ŵakazuzga liŵavu, ndipo ŵayeya mazaza, ndi kutuka maunkhankhu. 9Kweni Mikaeli, mungelo mura yo penipo pakususkana ndi diabolo yo wangulimbana nayo pa thupi laku Mosese, kuti wangugangiya cha kumsuska kwautusi, kweni wanguti, “Ambuya akuchenye.” 10Kweni yaŵa ŵanthu mbakutuka vyenivyo vyose ŵalivi kuziŵa; ndipo vyenivyo vyose ŵawamo kwakawi, nge ndi vyamoyo vyambura vinjeru, mwaku vyenivyo ŵanagikiya. 11Owe wo nawo! Pakuti ŵangukiya mu nthowa yaku Kaine, ndipo ŵangutunthwiya ku urandizgi waku Balamu chifukwa cha mphotu, ndipo ŵayowe mu chigaruka uli nchaku Kora. 12Ŵenaŵa ndi maŵanga gha kufipa mu madghera ghinu ghachanju, pakurghiya pamoza namwe ŵajariska kwambura wofi: mitambo yambura maji, yakuyungwiskika ndi zimphepu; miti yachihanya yambura vipasi yakufwa kaŵi, yakuzgulika; 13mayigha ghakari gha nyanja, ghenigho ghamokoka phovu la soni zawo; nyenyezi zakurandiyarandiya, kwaku zenizo wasungikiya munkhorwe wa mdima muyaya.

14Ndipo mphaku ŵenaŵa po wanguloske Hanoke, wachinkhonde ndi chiŵi kutuwa kwaku Adamu, wakuti, “Awonani, ŵanguza Ambuya ndi ŵakupaturika ŵaŵo vikwi chumi. 15Kwachichitiya cheruzgu paku wose, ndi kwachipanikizgiya wose ŵambura uwopa Chiuta ndi nchitu zawo zakuura uwopa Chiuta, zeneizo watakatakiya kwambura uwopa Chiuta, ndipo ndi vinononu vyose vyenivyo ŵalakwi ŵambura kopa Chiuta ŵakamba paku iyo.” 16Ŵenaŵa mbakudinginika, ŵakudandauriya, ŵakwenda kwakuyana ndi maulakalaka ghawo (ndipo mlomu wawo urongoro viphweti), pakurumba visku pa chifwa cha chanduku.

Machenjezgu ndi visambizgu

17Kweni imwe, mwaŵakwanjiwa, kumbukani manenedu ghenigho ghanguneneke limo ndi ŵakutumika ŵaAmbuya Yesu Kristu; 18ŵanguti kwaku imwe, “Pa nyengo ya umari paŵenge ŵakuwera, ŵakwenda uli ndi maulakalaka gha uwura uwopa Chiuta waku ŵija.” 19Yaŵa mbakugauskana, ŵa mtima wakawi, ŵambura Mzimu. 20Kweni imwe, mwaŵakwanjiwa, pakujizenge pa chivwanu chinu chakupaturika kwakuruska, ndi pakurombe mu Mzimu ŵakupaturika, 21mujisunge mu chanju chaku Chiuta, ndi kulereze lisungu la Ambuyafwe Yesu Kristu la ku umoyo wamuyaya. 22Ndipo ŵachitiyeni lisungu wo mbakukayika, 23ndipo ŵanyake ŵataskeni, pakuŵabuwa mu moto; ndipo ŵanyake ŵachitiyeni lisungu ndi wofi, muchitinkha munjirira wakukazuzgika ndi lisiru la liŵavu.

Rombo la mathamiko

24Ndipo kwaku mweniyo ngwanthazi kumbhozgani ŵambura kuguŵa, ndi kumjarikani paurongo pa unkhankhu wake ŵambura kalema mu chimwemwe chenichikuru, 25kwaku Chiuta yijayija pe, Ntaski widu, kuŵiye mwaku Yesu Kristu Ambuyafwe, unkhankhu, mazaza, ukumu ndi mtufu, uli ndimo kwaŵiyanga yindaŵepo migonezi, kuliri sono, ndipo kukaŵiyanga muyaya. Ameni.

Currently Selected:

Yuda 1: TongaMw

Highlight

Copy

Compare