Yoswa 18

Ŵajintha hema ku Shilo

1Sono mpingu wose wa ŵaYisraele unguwungana pa Shilo, ndipo ŵangumika hema lakuwunganamo; charu chinguthereskeka paurongo pawo.

2Ŵangujamo muwa mukati mu ŵaYisraele mafuku ghankhonde ndi ghaŵi ŵeniwo chihara chawo chengavi kugaŵika. 3Viyo Yoswa wangunena ndi ŵaYisraele, “Muswerenge mpaka zuŵanji kuruta kwachipoka charu, chenicho Ambuya, Chiuta wa auskemwe, wakupaskani? 4Perekani ŵanthurumi ŵatatu ku fuku le lose, ndiŵatumenge kuti ŵarute uku ndi uku mu charu, kulemba ndi kukonkhoska mo vilili vihara vyake, pavuli pake ŵazenge kwaku ine. 5Ŵakachigaŵanga vigaŵa vinkhonde ndi viŵi, Yuda wakajanga mu chigaŵa chake ku malaŵi, ndi nyumba yaku Yosefe mu chigaŵa chake ku nkhonde. 6Ndipo mukachikonkhoskanga charu cho vigaŵa vinkhonde ndi viŵi ndipo mukandiziyanga ndi kukonkhoska ko; sono ndazakumchitiyani mphenduzga paurongo pa Ambuya Chiuta widu. 7Ŵina Levi ŵalivi chigaŵa mukati mwinu, pakuti uzukuru wa Ambuya ndiwo chihara chawo; Gadi, Rubene ndi Nusu la fuku laku Manase ŵakuronde kali chihara chawo kusirgha ku Yordane kuchiri ku vuma, chenicho Mosese mteŵeti wu Ambuya wakuŵapaska.”

8Viyo ŵanthurumi ŵa ŵanguruta mu nthowa yawo, ndipo Yoswa wanguchenjezga wo ŵanguruta kwachilemba vya charu cho kuti, “Rutani uku ndi uku mulembevyose vyaku cho, ndi kuwere so kwangu; ndipo ndazakumuchitiyani mphenduzga paurongo pa Ambuya mu Chilo.” 9Viyo ŵanthu wo ŵanguruta uku ndi uku mu charu ndipo ŵangulemba mu buku konkhosko lake mu vigaŵa vinkhonde ndi viŵi; sono ŵanguza kwaku Yoswa mu ugoŵi pa Shilo. 10Ndipo Yoswa wanguwachitiya mphenduzga mu Shilo pa maso pa Ambuya; ndipo kwenikuwa Yoswa wangugaŵiya ŵanthu ŵaku Yisraele charu cho, kwaku yumoza ndi yumoza chigaŵa chake.

Mphaka yaku Benjamini

11Mphenduzga ya fuku laku Benjamini kwakuyana ndi mbumba yake yinguwoneka, ndipo chigaŵa chingupaskika kwako iwo pakati pa fuku laku Yosefe. 12Kuchiri kunkhonde mphaka yawo yingwamba pa Yordane; kutuwa pa mphaka yikwere ku nkhondekwa Yeriko, yirutiliya kuporota mu charu cha mtunthu kuchiriku zambwe; yimaliya pa bozwa la Betavene. 13Kutuwa pa mphaka yiruta ku malaŵi kulazga ku Luzi, mu mphepete mwa Luzi (mwenuyu ndi Betele), kutuwa pa yisikiya ku Ataroto-adara, pachanya pa phirilo leku malaŵi kwa Bete-horoni wasika. 14Kutuwa yapa mphaka yirata kuchiri kunyake, kung'anamukiya kuchiri ku zambwe kuchiri ku malaŵi kutuwa ku phiri lo leku malaŵi, kutghana ndi Bete-horoni, yimaliya pa Kiriata-bala (yo ndi Kiriata-jearimi), msumba wa fuku laku Yuda. Ichi nchiguŵa chaku zambwe. 15Ndipo kuchiri ku malaŵi yitamba ku bwalo kwa Kiriata-jearimi; mphaka yiruta mpaka ku Efroni, ku chisima cha maji ghaku Nefetoa; 16yapa mphaka yisikiya ku umari wa phiri lo lilereska pa nthazipadambo la mwana waku Hinomu, lo le ku umari wakunkhonde kwa dambo laku Refaimi, kutuwa pa yisika ndi dambo laku Hinomu ku malaŵi mu mphepete mwa ŵaYebusi, ndi kusikiya ku Ene-rogele; 17yapa yizgomba kuchiri ku nkhonde yirutiliya ku Ene-shemeshe, kutuwa pa yirata ku Gelilote, wo ulereskana ndi khwereru la Adumu-mimi; sono yisikiya ku mwa waku Bohana mwana waku Rubene; 18yijumpha kurata ku nkhondemu mphepete mwa Bete-araba yisikiya ku Araba; 19mphaka yijumpha kuya ku nkhonde mu mphepete mwa Bete-hogla; yimaliya pa dowoko lakunkhonde la Nyanja ya Mche, kuchiri ku matawi kwa Yordane: iyi ndi mphaka yaku malaŵi. 20Ndipo Yordane watuwa mphaka yake kuchiri ku vuma. Ichi ndicho chihara cha mtundu waku Benjamini, kwakulingana ndi mbumba yake, mphaka ndi mphaka kwakuzunguliya.

21Misumba ya fuku laku Benjamini kwakulingana ndi mbumba yake yenga Yeriko, Bete-hogla, Emeke-zizi, 22Bete-araba, Zemaraimi, Betele, 23Avimi, Para, Ofra, 24Chafara-mono, Ofni, Geba-misemuba misumba chumi ndi yiŵi ndi mizi yawo: 25Gibeoni, Rama. Beroto. 26Mizpa Chefira, Moza, 27Rekeme, Iripele, Tarala, 28Zera, Haelefe, Yebusi (yo ndi Yerusalemu), Gibea, ndi Kiriata-jearimi, misumba chumi ndi yinayi ndi mizi yake. Ichi nchihara cha fuku laku Benjamini kwakuyana ndi mbumba yake.

Currently Selected:

Yoswa 18: TongaMw

Highlight

Copy

Compare